1 Iei alon Tafit nöün Jesi we mwän, alon ätewe ewe mi Unusen Tekia a atekiatä, ätewe mi kepit me ren än Jakop we Kot, ewe souköl me lon Israel. Ikei än Tafit kewe kapasen kasop:
2 “Ngünün ewe Samol mi Lapalap a fos me woi, an kapas a nom won chönawei.
3 Ewe Koten Israel a kapas, ewe Achauen Israel a üreniei: Ewe king mi nemeni aramas fän pwüng, mi nemenem fän an niuokusiti Kot,
4 a wewe ngeni saramen tötän akkar lesosor, lupwen esap wor kuchu, pwal usun saramen akkar mürin püngün üt mi ämärätä fetil won fanüfan.
5 Ewer, a öch lefilen chon leimwei me Kot. Pun a föri ngeniei eu pwon esemüch, eu pwon mi kotöch lon mettoch meinisin o nükünüköch. I epwe afisätä ai manau o ngeniei mochenin letipei meinisin.
6 Nge ekewe aramas mi manauangau ra usun iräfölüföl mi katurula, esap wor eman a tongeni ionifengeniir ren pöün.
7 Nge are eman aramas a ionifengeniir, a aea mächä ika ilon efoch siles, mürin ra kekkila.”
8 Ikkei iten nöün Tafit kewe sounfiu mi pwora: Aemanün Josep-pasepet eman re Takemon. Ätei i ewe meilap me lein ekewe ülüman, a aea wokun siles le niela ükükün walupükü mwän lon eu chök fansoun.
9 Ewe aruomanün lein ekewe ülüman mwän mi pwora Eleasar nöün Toto we mwän seni än Aho cho. Ätei a eti Tafit lon Pastamin, lupwen ekewe chon Filistia ra chufengen pwe repwe maun ngeniir. Nge lupwen ekewe re Israel ra timär,
10 Eleasar a chök ütala lon lenian o fiu ngeni ekewe chon Filistia tori pöün a mwöchüla won ewe ketilas. Iwe, ewe Samol mi Lapalap a afisi eu win mi lapalap lon ewe rän. Mürin, ekewe mwän mi timär ra liwinsefälito ren Eleasar o angei pisekin ekewe mi mäla.
11 Ewe aülümanün leir itan Sama nöün Aki we mwän ewe re Harar. Ekewe chon Filistia ra mwichefengen lon Lehi, ewe ia a nom ie eu tanipin mame. Iwe, ekewe chon Israel ra sü ren ekewe chon Filistia,
12 nge Sama a chök ütala lukalapen ewe tanipi o tümwünü, a pwal niela ekewe chon Filistia. Iwe, ewe Samol mi Lapalap a afisi eu win mi lapalap lon ewe rän.
13 Lupwen fansoun räs, ülüman me lein ekewe ilik meilapen sounfiu ra feila ren Tafit lon ewe föimw Atulam, nge eu mwichen chon Filistia a nom lon ewe lemolun Refaim.
14 Lon ena fansoun, Tafit a nom lon ewe lenien op mi pöchökül, nge eu mwichen sounfiun Filistia a nom lon Petleem.
15 Iwe, Tafit a äleäl, “Amwo eman epwe üfato ünümei koluk seni ewe chönüttu mi nom Petleem ren asamalapen ewe tit.”
16 Mürin, ekewe ülüman sounfiu mi pwora ra töfochofocholong lon lenien ekewe chon Filistia o üfi koluk seni ewe chönüttu mi nom Petleem ren asamalapen ewe tit. Iwe, ra uwato ren Tafit, nge Tafit esap mochen ünümi. A ninätiu ewe koluk pwe eu asor ngeni ewe Samol mi Lapalap
17 o üra, “Ai Samol mi Lapalap, üsap fokun tongeni ünümi ei koluk. Pun ika üpwe ünümi, epwe usun chök ai üpwe ünümi chan ekei mwän mi fangala manauer, lupwen ra feila.” Iei mine Tafit esap ünümi ewe koluk. Ekei föför ekewe ülüman sounfiu mi pwora ra föri.
