1 Davide ná-woo ɠaaɓelagiti kaa: Davide ɓɔɛ wooi, Izayi ná-doun zunui, tosu ba nu wolai ɓɔɛ wooi, nii Zakɔɓe ná-GALAGI yiimazeɠeai la, é gulɔi ziaai ma, Izelayɛle yiima wuye loo nui.
2 Ɠɔoɠɔ GALAGI ná-Zɛnvui ɓɔɛa ga màaʋele, é daawooi ʋua dà.
3 Izelayɛle ná-GALAGI ɓɔɛa, Izelayɛle ná-fasai ɠɛni mà: «Zɔi é masadai ɠɛɛzu nuiti unda ga telebogi, ta é kɛɛzu GALA gaazuluabai zu,
4 kulaʋɛ ga foloi, é ɠulazu sobui, é volozu geezuʋɛ, ʋɛ tonaɓiin ge la ná, ma zezei ta tonai ti ɗa tufai ʋɔnɔ zooi ma.»
5 Nà-pɛlɛyeɠei la ɠana ɓaa GALA gaazu? Tɔɔzei é ɠɔoɠɔ minazeɠe kɛɛʋɛ bɛ̀, é gaaɠula ba, é makɛ ga pagɔ. Toɠa ʋaazu ga nà-kizogi, é zìima vaiti daazeeli.
6 Kɛlɛ nu ɲakaiti kpein kɛɛʋɛ eɠɛ ɠaingiti ti ʋilisu ya, tɔɔzei nu la ti zeɠea ga yeaɲaka.
7 Zɔi é pɔ é ti zeɠe, kɛni é kɔlui ɓaa kpɛɛin ma wului zeɠe, ti ɠala abui zu náʋɛ nɔ.»
8 Wɛlɛ Davide ná-kɔɔɠuluɓa wolaiti daaseigiti ba: Ma mɔungi ɠɛni ga Yɔsɛɓe-Ɓaseeɓɛte, Taakemɔn mavofodai, é ɠɛni ga kɔɔɠuluɓa saʋagɔiti ta-lotuɠɔi. Daa ɠɛni ɓalaa ga Ɛsenee nui Adino. Tɔ ɠa é nu undɔsaʋa (800) ʋaani ʋɔɔma kɔɔɠɔ laa ɠila su.
9 Tɔun polumai ɠɛni ga Dodo ná-doun zunui Eleazaal, Aɠoa nui ta ná-doun loin. É ɠɛni kɔɔɠuluɓa saʋagɔiti saama, niiti ti yɛni Davide ʋa, siɛgi zu ti malimasakɛɛi leʋeni la ga Filiseti nuiti, naati gaalɛai ma ba kɔɔɠɔ vai ma, naazu Izelayɛle ɠɔɔʋɛbɛi ɗa ɠula ʋolu, ti ɗa lɔɔɠu.
10 Kɛlɛ Eleazaal loni kpaan, é yɛni Filiseti nuiti paazu, zeei ɓata boɠa zɔkpɔi ʋa ga kpɔlɔi. Naama voloi Ɠɔoɠɔ GALAGI fɔnifaama wola veeni Izelayɛle ya, kɔɔʋɛbɛi maaɓuɠani Eleazaal ʋa nɔ ga ti poomaiti kɔligiti seɠe.
11 Tɔun polumai ɠɛni ga Sama, Ɠalaal nui Agee ná-doun zunui. Filiseti nuiti ti ɠaalɛɛni ba Leyi. Tɔɠɔ ɓelei ta ɠɛni náʋɛ, Izelayɛle nuiti ti ɠɛni ʋelazu Filiseti nuiti ba.
12 Kɛlɛ Sama loni kpalagi zaama, é ná zo ʋolu, é ɗa Filiseti nuiti paa. Ɠɔoɠɔ GALAGI fɔnifaama wola veeni Izelayɛle ya.
13 Yeeta molo leʋei lɔɔzeizuʋɛ, kɔɔɠuluɓa ʋuusaʋagɔiti (30) saama, nu saʋagɔ yeini Davide ɠoba Adulame ʋugi zu, siɛgi zu Filiseti ɠɔɔɓɔgi gila ge ɠɛni ɠaalɛɛzu la ba Lefayime ʋɛtugi zu.
14 Davide ɠɛni názu ná-dɔɔɠu wosuʋɛ, siɛgi zu Filiseti ɠɔɔɓɔgi gila ge zeini la Ɓɛteleyɛme.
15 Ani wɔin ta Davide zoni nɔ sa, é ɠɛ ma: «Ɓɛ ɠa a ʋa bɛ̀ ga Ɓɛteleyɛme taa loaʋɛ ma ɗayeɠei zu ɗɛi ta pɔ̀, gè kpɔle?»
16 Kɔɔɠuluɓa saʋagɔiti ti lɔɔni Filiseti ɠɔɔlaɠai zu, ti ziɛi zaɠa ziɛyeɠei zu, é Ɓɛteleyɛme taa loaʋɛ. Ti ʋaani la, ti fe Davide ya, kɛlɛ é la ɠɛni kɛɛni, é ʋa kpɔle. É feeni Ɠɔoɠɔ GALAGI ʋɛ, é pu ya zooi ma.
17 É ɠɛni ma: «Ɠɔoɠɔ GALAGI kìzo nii ɠɛɠala vai ɠɛɛ vai ma! Kulaʋɛ eɠɛ nà ɠɛ naama nuiti ma ɲamai ɓɔlezu, niiti ti ɠikulaai ti-yɛnvuiti su, ti li.» É ɠɛlɛni kpɔle vai ʋa. Lɔɠɔ ɠula faa wolai ɠana kɔɔɠuluɓa wola saʋagɔi naati ti kɛɛni.
