31 Suria ena king ese iena kariota biaguna taudia 32 ia oda henia, ia gwau, “Taunimanima ta, maragina o badana, do umui tuari henia lasi, to Ahaba, Israela ena king sibona.”
32 Unai dainai kariota biaguna taudia ese king Iehosapata idia itaia neganai, idia laloa ia be Israela ena king, vadaeni idia giroa, ia dekenai idia heau, tuari henia totona. To Iehosapata be idia dekenai ia boiboi bada neganai,
33 idia itaia, ia be Israela ena king lasi, vadaeni idia tuari henia lasi.
34 To Suria tuari tauna ta ese diba ta ia pidia kava, Israela ena king Ahaba ena tuari dabua ena matuna maragina ta lalonai ia vareai, Ahaba ia gwadaia. Unai dainai Ahaba ese kariota ia haheaua tauna dekenai ia boiboi, ia gwau, “Bero lau davaria, kariota do oi hagiroa lou, tuari ena murimurinai lau do oi abia lao.”
35 Unai dina dekenai tuari be auka herea, bona king Ahaba be mai bero danu kariota lalonai ia helai. Iena kwarana be ia atoa diho lasi, to Israela taudia ese idia durua dainai, iena vairana be Suria taudia dekenai ia henia ela bona adorahi ia ore. Unai neganai ia mase, bona iena bero ena rara be kariota ena reirei dekenai ia heau diho.
36 Dina ia diho noho neganai, tuari orea lalonai tuari taudia haida be idia boiboi, idia gwau, “Umui ibounai emui hanua bona tano ta ta dekenai do umui heau lao!”
37 King Ahaba be unai bamona ia mase vadaeni, bona Samaria dekenai idia abia lao. Unuseni idia guria.
38 Iena kariota be Samaria ena gohu maragina dekenai idia huria, bona sisia ese iena rarana idia demaria. Unai gohu maragina dekenai be ariara hahine idia digudigu gabuna. Unai ibounai ia vara vadaeni, Lohiabada ese ia gwauraia guna hereva hegeregere.
39 Ahaba ena kara haida, iniseni idia torea lasi gaudia, iena noho ruma, elefante ena doana dekenai ia haginia rumana, bona hanua haida ia haginia, unai karadia ibounai be Israela Ena King Edia Sivarai Bukana lalonai idia torea vadaeni, ani?
40 Ahaba ia mase murinai, iena natuna Ahasaia be iena gabuna dekenai ia king.
