13 Unai neganai, peroveta tauna ta ese Ahaba, Israela ena king, dekenai ia lao, ia hamaoroa, “Lohiabada ia gwau, ‘Unai tuari taudia momo herea dekenai do oi gari lasi. Oi kamonai, hari dina lau ese idia dekena amo oi dekenai kwalimu do lau henia, bona do oi diba, lau sibona be Lohiabada.’ ”
14 Ahaba ese peroveta tauna ia nanadaia, ia gwau, “Daika ese tuari do idia gunalaia?” Peroveta tauna ia haere, ia gwau, “Lohiabada ia gwau, provins edia tuari biagudia mai edia tuari taudia, uhau taudia, ese do idia karaia.” Ahaba ese ma ia nanadaia, ia gwau, “Daika ese tuari do ia hamatamaia?” Peroveta tauna ia haere, ia gwau, “Oi ese.”
15 Vadaeni Ahaba ese provins edia tuari biagudia edia tuari taudia, uhau taudia ia haboua, idia be ibounai 232. Unai murinai Israela tuari taudia ibounai ia haboua, idia be 7000.
16 Dina tubua neganai, Ahaba ena tuari taudia idia toreisi, tuari dekenai idia raka lao. Unai neganai Benehadada bona iena durua lohia taudia 32 be edia palai ruma dekenai uaina idia inua noho, idia kekero lao noho.
17 Provins edia uhau tuari taudia idia raka guna. Benehadada ena hasinadoa taudia ese Benehadada idia hamaoroa, “Taunimanima be Samaria dekena amo idia mai noho.”
18 Benehadada ia gwau, “Bema maino totona idia mai, do umui abidia mauri, o bema tuari totona idia mai danu do umui abidia mauri.”
19 Uhau tuari taudia ese tuari orea idia gunalaia, Israela tuari taudia be idia edia murinai idia raka.
20 Vadaeni Israela taudia ta ta ibounai ese Suria tauna ta ia alaia mase. Suria taudia idia heau, bona Israela taudia ese idia lulua lao. To Benehadada, Suria ena king, be hosi dekenai ia heau, hosi guia tuari taudia haida danu.
21 King Ahaba be tuari gabuna dekenai ia lao, hosi bona kariota ia abia. Ia ese Suria taudia ia alaia mase, ala-ala be bada herea.
22 Vadaeni peroveta tauna ese king Ahaba dekenai ia lao, ia hamaoroa, ia gwau, “Oiemu tuari orea do oi hagoadaia, bona palani namodia do oi karaia, badina be keru negana do ia ore neganai, Suria ena king ese oi dekenai do ia tuari henia lou.”
23 King Benehadada ena hesiai taudia ese king idia hamaoroa, idia gwau, “Israela taudia edia dirava be ororo dekenai noho diravadia, bona unai dainai idia ese ita idia halusia. To bema tano palaka dekenai ita tuari henidia neganai, ita ese idia do ita halusia momokani.
24 Inai bamona do oi karaia: Unai king 32 edia dagi do oi kokia, ta ta ena orea, ena orea dekena amo, bona edia gabudia dekenai tuari biagudia do oi atoa.
