21 King Basa be inai sivarai ia kamonai, vadaeni Rama hagoadaia gaukara ia hadokoa, bona Tirisa hanua dekenai ia lao.
22 Unai neganai king Asa ese Iuda taudia ibounai ia taravatua, idia ta ta ibounai ese Rama dekenai idia noho nadi bona au, Basa ese ia haginia gaudia, do idia huaia lao siri. Vadaeni unai nadi bona au dekena amo king Asa ese Geba, Beniamina tano dekenai, bona Misipa, ia hagoadaia.
23 King Asa ena kara oredia, iena kara mai kwalimu danu, bona ia ese hanua haida ia hagoadaia, ena sivarai be Iuda Ena King Edia Sivarai Buka ena lalonai idia torea vadaeni. To Asa ia buruka neganai, iena aena hisihisi gorere ta ia davaria.
24 Vadaeni Asa be ia mase, bona Davida ena Hanua lalonai idia guria, iena tubuna bona tamana edia guria gabuna dekenai. Asa ena gabu dekenai iena natuna Iehosapata ese king dagi ia abia.
25 Asa, Iuda ena king, ena lohia lagani iharuana lalonai, Nadaba Ieroboama ese Israela ena king ena dagi ia hamatamaia. Nadaba be lagani rua lalonai Israela dekenai ia king.
26 Ia ese Lohiabada ena vairana dekenai ia kara dika, iena tamana ia karaia bamona, bona ia ese Israela taudia ia hakaua kerere dainai, idia danu be kara dika idia karaia.
27 Basa Ahaisa, Isakara iduhu tauna, ese Nadaba hadikaia totona ia laloa karaia, bona Nadaba, mai ena Israela tuari taudia ese Pilistia hanua Gibetona idia tuari henia, bona idia koua hagegea neganai, Basa ese Nadaba ia alaia mase.
28 Inai kara be Iuda ena king Asa ia king lagani ihatoina lalonai ia vara. Basa ese Nadaba ena gabu dekenai Israela ena king ena dagi ia abia.
29 Basa ese king dagi ia abia, vadaeni maoromaoro ia ese Ieroboama ena bese taudia ia alaia hamatamaia. Vadaeni iena peroveta tauna Abaisa ena uduna dekena amo, Lohiabada ese ia gwauraia hereva be momokani, badina Ieroboama ena bese taudia ibounai be Basa ese ia alaia mase, ta ia mauri lasi.
