3 “Kopwe sü seni ikei, kopwe feila ngeni ötiu o aopok arun ewe öüwö Kirit ötiuen ewe chanpupu Jortan.
4 Kopwe ün koluk seni ewe öüwö, nge üa fen allük ngeni ekewe ängä pwe repwe uwala anom ikenan.”
5 Iei mine Elias a föri usun mine ewe Samol mi Lapalap a apasa. A feila o nom arun ewe öüwö Kirit ötiuen ewe chanpupu Jortan.
6 Iwe, ekewe ängä ra uwato ren Elias anan pilawa me ochan fituk iteiten lesosor me iteiten lekuniol, a pwal ün koluk seni ewe öüwö.
7 Nge mürin eu fansoun ewe öüwö a pwasatä, pun esap püng üt lon ewe fanü.
8 Mürin, ewe Samol mi Lapalap a üreni Elias,
9 “Iei kopwe feila Sarapat mi nom arun Siton, pwe kopwe nonom ie. Üa allük ngeni eman fefin mi mä pwülüan pwe epwe amongok me ikenan.”
10 Iei mine Elias a feila Sarapat. Nge lupwen a tori asamalapen tittin ewe telinimw, a küna eman fefin mi mä pwülüan a rusi mwüch. Iwe, Elias a kökköla ren neminewe o üreni “Kose mochen kopwe uwato rei ekis koluk lon eu rume pwe üpwe ün.”
11 Nge lupwen neminewe a feila pwe epwe uwato ewe koluk, Elias a köla mürin, “Kose mochen kopwe pwal uwato rei ekis pilawa.”
