21 Iwe, lupwen ewe king Paasa a rong usun, a ükütiu le apöchöküla tittin ewe telinimw Rama o liwinsefäliti Tirsa.
22 Mürin, ewe king Asa a asilefeili eu allük ngeni chon Juta meinisin pwe repwe feito, esap wor eman epwe tiwela. Iwe, ra feito o uweela ekewe fau me ekewe ira Paasa a aea le apöchöküla tittin ewe telinimw Rama, nge ewe king Asa a eäniir le apöchöküla ngeni tittin ewe telinimw Kepa lon ewe fanü Peniamin me tittin ewe telinimw Mispa.
23 Iwe, lusun pworausen än Asa föför meinisin, an föförün pwora, pwal ekewe telinimw a aüetä, a mak lon puken uruwon ekewe kingen Juta. Nge lupwen a chinlapala, a samau pechen.
24 Iwe, Asa a mäla, nge ra peiaseni ren semelapan kewe lon ewe telinimwen Tafit. Nge Jehosafat nöün we mwän a siwili lon wisan wisen king.
25 Iwe, lon aruuen ierin mwün Asa ewe kingen Juta, Natap nöün Jeropoam we mwän a tolong lon wisan wisen king o nemeni Israel lon ükükün ruu ier.
26 Nge Natap a föri mine a ngau me fän mesen ewe Samol mi Lapalap, a tipis usun saman we o emweni chon Israel ngeni tipis.
27 Nge Paasa nöün Ahia we mwän seni ewe ainangen Isakar a rawangauei Natap o niela me lon Kipeton mi nom lon fanüen chon Filistia, lupwen Natap me chon Israel meinisin ra pwelifeili Kipeton fän pisekin maun.
28 Paasa a niela Natap o siwili lon wisan wisen king lon aülüngatin ierin än Asa ewe kingen Juta nemenem.
29 Iwe, lon ewe otun Paasa a wiseni ewe wisen king, a niela chon leimwen Jeropoam meinisin, esap fokun likiti mwo eman tori a aroserela meinisin, usun nöün Kot we chon angang Ahia ewe re Silo a fen apasa fän alon ewe Samol mi Lapalap.
