5 A nanↄ Yɛzɛbɛli sù à a là à pì: Bↄ́ mɛ́ à n le n ãnn sìsi, ńdi pↄ́ bleroo?
6 Akũ à wèa à pì: Ma pì Yɛzɛrili gbɛ̃ Nabↄtinɛ à a geepi líkpɛ kpáma, mani fĩna bonɛ kũ andurufuuo. Tó geepi líkpɛ pãnden à yei sↄ̃, mani kpáa a gɛ̃nɛ ũ. Akũ à pì áni kpámaro.
7 Akũ a nanↄ Yɛzɛbɛli pìnɛ: Mↄkↄ̃n Isarailanↄ kí'ina yãkɛnan dí yá? Ǹ futɛ ǹ pↄ́ ble kũ pↄnnao, mani Yɛzɛrili gbɛ̃ Nabↄti geepi líkpɛ sínnɛ.
8 Akũ à takadanↄ kɛ̃̀kɛ̃ kũ Ahabu tↄ́o à a tambari lɛ̀a, à kpã̀zãkpãzã gbɛ̃ zↄ̃kↄ̃nↄ kũ kínɛ kũ ò kú Nabↄti wɛ̃tɛ gũnnↄnɛ.
9 Takada pìnↄ gũn à pì: À lɛ́yĩgↄrↄ ditɛ à a kpàkpa kɛ. À vutɛki mana kpá Nabↄtia gbɛ̃nↄ tɛ́
10 à gbɛ̃ ginanↄ wɛtɛ gbɛ̃nↄn pla à ń kátɛ a arɛ, de ò yã dia ò pi à Luda kũ kínao tↄ́ vãni sì. À a kũ à bo kãao wɛ̃tɛ kpɛ, á a pápa kũ gbɛ̀ɛo à dɛ.
11 Akũ Nabↄti wɛ̃tɛ gbɛ̃ zↄ̃kↄ̃nↄ kũ kínɛnↄ kɛ̀ lákũ Yɛzɛbɛli ò takada kũ à kpã̀zãńnɛnↄ gũn nà.
12 Ò lɛ́yĩgↄrↄ dìtɛ, akũ ò vutɛki mana kpà Nabↄtia gbɛ̃nↄ tɛ́.
13 Akũ gbɛ̃ gina gbɛ̃nↄn pla pìnↄ sù ò vùtɛ a arɛ, ò yã dìa gbɛ̃nↄ wára ò pì à Luda kũ kínao tↄ́ vãni sì. Akũ ò a kũ̀ ò bò kãao wɛ̃tɛ kpɛ ò a pàpa kũ gbɛ̀ɛo ò dɛ̀.
14 Akũ ò lɛ́gbãzã kɛ̀ Yɛzɛbɛlinɛ ò pì, ò Nabↄti pàpa kũ gbɛ̀ɛo ò dɛ̀.
15 Kũ Yɛzɛbɛli mà ò Nabↄti pàpa kũ gbɛ̀ɛo ò dɛ̀, akũ à gɛ̀ɛ à pì Ahabunɛ: Ǹ futɛ ǹ gɛ́ Nabↄti geepi líkpɛ kũ à gìonnɛ pì sí n pↄ́ ũ, zaakũ à kun doro à gà.
16 Kũ Ahabu mà Nabↄti gà, akũ à fùtɛ àtɛn gɛ́ de à a geepi líkpɛ sí a pↄ́ ũ.
17 Akũ Dikiri yã sù Tisibɛ gbɛ̃ Iliasua à pì:
18 Ǹ futɛ ǹ gɛ́ Samaria kína Ahabu le. À gɛ̀ɛ Nabↄti geepi líkpɛ sí, à kú gwe.
19 Ǹ onɛ makũ Dikiri ma pì, à gbɛ̃ dɛ̀ à sù a túbi sín gweroo? Ń onɛ dↄ, gu kũ gbɛ̃danↄ Nabↄti aru sã̀sãn, gwen oni àpii pↄ́ sãsãn se.
20 Kũ Ahabu Iliasu è à pì: Ma ibɛrɛ, ari tera ńdi ma tóroo? Akũ Iliasu pìnɛ: Ee, mádi n tóro, zaakũ n n zĩda dà yã kũ à vãni Dikirinɛ kɛnan.
21 Akũ Dikiri pì áni sunyĩ zĩmma áni n burinↄ kakatɛ, n gↄ̃gbɛ̃ ke ni gↄ̃ Isarailanↄ bùsunlo, bee zĩdade kesↄ̃ zↄ̀.
22 Áni kɛ n ↄnnnɛ lákũ à kɛ̀ Nɛbati nɛ́ Yeroboamu ↄnnnɛ nà, lákũ à kɛ̀ Ahia nɛ́ Baasa ↄnnnɛ nà, zaakũ n Isarailanↄ dà durunnakɛnan n a pↄ fɛ̃̀nɛ.
23 Yɛzɛbɛli sↄ̃, Dikiri pì gbɛ̃danↄ ni a só Yɛzɛrili bĩni sarɛ.
