10 à gbɛ̃ ginanↄ wɛtɛ gↄ̃ↄn plaa à ń káɛ à aɛ, lɛ aↄ̃ yã dia wà be à Luda kↄ̃n kínao tↄ́ zaaa sì. À à kũ à bↄo wɛ́tɛ kpɛɛ, é à pápa gbɛ̀o à dɛ.
11 Ben Nabↄti wɛ́tɛ gbɛ̃nsinↄ kↄ̃n kínɛnↄↄ kɛ̀ lán Yɛzɛbɛli ò takada kɛ̀ à kpã̀sãńnɛnↄ guu nà.
12 Aↄ̃ lɛ́yigurↄↄ dìɛ, ben aↄ̃ vɛ̃ɛkii maaa kpà Nabↄtia gbɛ̃nↄ tɛ́.
13 Ben gbɛ̃ gina gↄ̃ↄn plaaa pìnↄ mↄ̀ wà vɛ̃̀ɛ à aɛ, aↄ̃ yã dìa gbɛ̃nↄ wáa wà bè à Luda kↄ̃n kínao tↄ́ zaaa sì. Ben wà à kũ̀ wà bↄ̀o wɛ́tɛ kpɛɛ wà à pàpa gbɛ̀o wà dɛ̀.
14 Ben wà lɛ́kpãsã kɛ̀ Yɛzɛbɛlinɛ wà bè, wà Nabↄti pàpa gbɛ̀o wà dɛ̀.
15 Kɛ̀ Yɛzɛbɛli mà wà Nabↄti pàpa gbɛ̀o wà dɛ̀, ben à gàa à bè Ahabunɛ: Ǹ fɛɛ ǹ gá Nabↄti geepi líkpɛ kɛ̀ à gìonnɛɛ pì sí n pↄ́ ũ, zaakɛ à kuu dↄro à gà.
16 Kɛ̀ Ahabu mà Nabↄti gà, ben à fɛ̀ɛ èe gaa lɛ à à geepi líkpɛ sí a pↄ́ ũ.
17 Ben Dii yã sù Tisibɛ gbɛ̃ Iliaa à bè:
18 Ǹ fɛɛ ǹ gá Samaria kí Ahabu le. À gàa Nabↄti geepi líkpɛ sí, à kú gwe.
19 Ǹ onɛ kɛ̀ mamↄma Dii ma bè, à gbɛ̃ dɛ̀ à mↄ̀ à túbi sín gweroo? Nɛ́ onɛ dↄ kɛ̀ guu kɛ̀ gbɛ̃ɛnↄ Nabↄti aru sã̀sãn, gwen aↄ̃é àpi pↄ́ sãsãn se.
20 Kɛ̀ Ahabu Ilia è à bè: Ma ibɛɛ, ai tia nɛ́ɛ ma tóroo? Ben Ilia bènɛ: Ee, mɛ́ɛ n tóro, zaakɛ n n zĩnda dà yã kɛ̀ zaa Diinɛ kɛnan.
21 Ben Dii bè é mↄ́nzi kpáńzi é n boriinↄ kaatɛ, n gↄ̃gbɛ̃ ke é gↄ̃ Isarailinↄ bùsunlo, baa wɛ̃ɛnɛ kesↄ̃ zↄ̀.
22 É kɛ n uanɛ lán à kɛ̀ Nɛbati nɛ́ Yeroboamu uanɛ nà, lán à kɛ̀ Ahia nɛ́ Baasa uanɛ nà, zaakɛ n Isarailinↄ dà durunkɛnan n à pↄↄ fɛ̃̀nɛ.
23 Yɛzɛbɛli sↄ̃, Dii bè gbɛ̃ɛnↄ é à só Yɛzɛrili bĩi saɛ.
24 Gbɛ̃ɛnↄ é n gbɛ̃ kɛ̀ aↄ̃é gaga wɛ́tɛ guunↄ só, bãanↄ é n gbɛ̃ kɛ̀ aↄ̃é gaga sɛ̃̀nnↄ ble.
25 Gbɛ̃kee kuu ziki kɛ̀ à a zĩnda dà yã kɛ̀ Dii yeziroo kɛnan lán Ahabu bàro, bensↄ̃ à naↄ̃ Yɛzɛbɛli è tɛ́ kán.
26 À yã kɛ̀ wà tɛ̃̀nↄ kɛ̀ maamaa, à tɛ̀ tãanↄzi lán Amↄrinↄↄ kɛ̀ nà, kɛ̀ Dii pɛ̀ḿma Isarailinↄnɛ.
