24 Ǹ n kína dakenↄ lilin kɛ, ń don'arɛde pãndenↄ ditɛditɛ ń gbɛ̀n.
25 Séde n zĩ̀karinↄ kũ n sↄ̃nↄ kũ n sↄ̃gonↄ gↄ̃ dasi lán káakupↄ kũ n kurainↄ bà, ó zĩ̀ ká kũńwo gusaran, ó gbãna ni deńla. Kína ń yã mà, akũ à kɛ̀ lɛ.
26 Kũ Sɛ̃̀tãgↄrↄ kà, Bɛnadada Sirianↄ kàkara, akũ à gɛ̀ɛ zĩ̀ ká kũ Isarailanↄ zaa Afɛki.
27 Ò Isarailanↄ kàkara ò kusuna kɛ̀ńnɛ, akũ ò gɛ̀ɛńyĩ. Sirianↄ dàgula gu sĩnda pínki, akũ Isarailanↄ bùraa kàtɛ lán blè kpàsa fítinna lɛu planↄ bà, ò arɛ dↄ̀kↄ̃a.
28 Akũ Luda gbɛ̃ pìi sù à pì Isarailanↄ kínanɛ: Dikiri pì, zaakũ Sirianↄ tɛn da sĩ̀sĩnↄ dikirin a ũ, guvutɛ dikirin a ũro, áni a zĩ̀kari dasi díkĩnanↄ nannɛ n ↄĩ, ĩnigↄ̃ dↄ̃ kũ akãamɛ Dikiri ũ.
29 Ń bùranↄ arɛ dↄdↄkↄ̃ana lɛ ari gↄrↄ suppla, a gↄrↄ supplade pìn ò nà zĩ̀ia. Akũ Isarailanↄ Siria gɛ̀sɛdenↄ dɛ̀dɛ gbɛ̃nↄn dúbu basↄↄro zĩ pìia.
30 Kũ gbɛ̃ kparanↄ lɛ̀kↄ̃a ò sì Afɛki wɛ̃tɛn, akũ a bĩni lɛ̀tɛ à sìḿma. Gbɛ̃ pìnↄ kà gbɛ̃nↄn dúbu baraasↄↄro awɛɛsuppla. Bɛnadada sↄ̃ à bàa sì à sì wɛ̃tɛ pìn se, à gɛ̀ɛ à ùtɛ kpɛ́nɛ gũn.
31 Akũ a ìbanↄ pìnɛ: O mà Isarailanↄ kínanↄn gbɛ̃kɛ vĩ. Ò uta kasanↄ dↄ ó pi, ò bà dↄ ó wakalɛ, ò bo ò gɛ́ ò a le. Òdigↄ̃ dↄ̃ro ke ani n tó kũ wɛ̃̀ndiio.
32 Akũ ò uta kasanↄ dↄ̀ ń pi, ò bàa dↄ̀ ń wakalɛ, ò gɛ̀ɛ ò Isarailanↄ kína lè ò pì: N zↄ̀bleri Bɛnadada pì ǹ a tó kũ wɛ̃̀ndiio. Akũ Isarailanↄ kína pì: Ase à kpɛ́ kun yá? Ma gbɛ̃mɛ.
33 Yã pìi kɛ̀ gbɛ̃ pìnↄnɛ àlesi mana ũ, akũ ò yã pìi dã̀ ò kũ̀ ò pì: Ee, Bɛnadada bi n gbɛ̃mɛ. Akũ kína pì: À gɛ́ à a sɛ́ à su kãao. Kũ Bɛnadada sù, akũ Ahabu pìnɛ à gɛ̃ kãao a sↄ̃gon.
34 Akũ Bɛnadada pìnɛ: Wɛ̃tɛ kũ ma de sì n deanↄ mani ɛra mà kpámma, ĩnigↄ̃ laga yía Damasuku lákũ ma de kɛ̀ nà Samaria. Akũ Ahabu pì: Ò lɛ́dokↄ̃nↄ kɛ abire musu, má n gbarɛ. Akũ à lɛ́dokↄ̃nↄ kɛ̀ kãao à a gbàrɛ.
35 Dikiri pì annabi gã̀ gbɛ̃kenɛ à o a gbɛ̃dakenɛ à a lɛ́. Kũ annabii pìi ònɛ, akũ à gì.
