4 Ĩnigↄ̃ swa pì í mi. Ma dìtɛ kãakãannanↄnɛ ògↄ̃ n gwa gwe.
5 Akũ à gɛ̀ɛ à kɛ̀ lákũ Dikiri òarɛ nà, à vùtɛ Kɛriti swawɛɛn Yoda bara dire kpa.
6 Kãakãannanↄ dìgↄ̃ sunɛ kũ burodiio kũ nↄ̀bↄↄo kↄnkↄ kũ ↄkↄsio, akũ àdigↄ̃ swa pì í mi.
7 Gↄrↄ pla gbɛra swa pì í bàba kũ legũ dí ma bùsuu pìnlo yãi.
8 Akũ Dikiri yã sùa à pì:
9 Ǹ futɛ ǹ gɛ́ Zarɛfa Sidↄ̃ bùsun, ǹgↄ̃ kú gwe. Ma gyaanↄ ke dìtɛ àgↄ̃ n gwa gwe.
10 Akũ à fùtɛ àtɛn gɛ́ Zarɛfa. Kũ à kà wɛ̃tɛ pìi sarɛ, à gyaanↄ ke lè, àtɛn yàka wɛ gwe. Akũ Iliasu lɛ́ zù gyaanↄ pìii à pì: Ǹ gɛ́ ǹ sumɛnɛ kũ ío, bee fíti, mà mi.
11 Kũ àtɛn gɛ́ tↄ́, Iliasu ɛ̀ra à lɛ́ zùi à pì: Ǹ sumɛnɛ kũ burodi kusuo dↄ.
12 Akũ nↄgbɛ̃ pìi pìnɛ: Kũ Dikiri n Luda kunnaao, bee burodi má vĩro, séde wísiti okũ do kũ à gↄ̃̀ gbaka gũn kũ nísio fíti tùruu gũn baasiro. A yàkaan matɛn wɛ la, de mà tá bɛ mà pↄ́ble kɛo, ò ble kũ ma nɛ́o ògↄ̃ ga dã.
13 Akũ Iliasu pìnɛ: Ǹsun tó vĩna n kũro. Ǹ gɛ́ ǹ kɛ lákũ n ò nà, ama ǹ burodi kɛo fíti ǹ suomɛnɛ gĩa, gbasa ǹ n pↄ́ kɛ kũ n nɛ́o.
14 Zaakũ Dikiri Isarailanↄ Luda pì, wísiti ni láka gbaka pìi gũnlo, akũsↄ̃ nísi ni láka tùruu pìi gũnlo ari gↄrↄ kũ ani tó legũ ma bùsuu pìn.
15 Gyaanↄ pìi gɛ̀ɛ à kɛ̀ lákũ Iliasu òarɛ nà, akũ pↄ́ble mↄ̀ḿma ari gↄrↄ ũgbangba, àpii kũ a bedenↄ kũ Iliasuo.
16 Wísiti dí láka gbaka pìnlo, akũsↄ̃ nísi dí láka tùruu pìnlo, lákũ Dikiri ò Iliasu gãi nà.
17 Abire gbɛra nↄgbɛ̃ bede pì nɛ́ tɛn gyã kɛ. Kũ gyã gbãna kpà manamana, akũ a wɛ̃̀ndii bò.
18 Akũ nↄgbɛ̃ pìi pì Iliasunɛ: Luda gbɛ̃, bↄ́ mɛ́ à ó ká kũ n su ma kĩnaaa? N su ma durunna dↄ Ludagu de à ma nɛ́ dɛ yãin yá?
19 Akũ Iliasu pìnɛ: Ǹ n nɛ́ pì kpáma. Akũ à nɛ́ pìi sì nↄgbɛ̃ pì ↄĩ à dìdi kãao kpɛ́ musu gu kũ à kìpan. À a wùtɛ a gádoa gwe,
20 akũ à ↄ́ↄ dↄ̀ Dikirinɛ à pì: Dikiri ma Luda, mↄkↄ̃n mɛ́ n tò gyaanↄ kũ ma kipa a bɛa nɛ́ gà n pↄsira kpài yá?
21 Akũ à wùtɛ à a zĩda pòro nɛ́gↄ̃gbɛ̃ pìla gɛ̃̀n aakↄ̃ à ↄ́ↄ dↄ̀ Dikirinɛ à pì: Dikiri ma Luda, ǹ tó a wɛ̃̀ndi ɛra à su a mɛ̀ɛ gũn.
22 Dikiri Iliasu ↄ́ↄ dↄ mà, akũ wɛ̃̀ndii ɛ̀ra à sù nɛ́ pìia à fùtɛ.
