1 BƐKPÀÀTÌBƐ̀ 6:24-36 in Ditammari

²⁴ Kɛ̀ tɛketitɛ̀ fìɛ̀ti okùmɛ̀ mbo bɑ́ kù mɛ́tìrì mɛ̀dɛ́mɛ̀ nɛ̀ dikéè, kɛ̀ ì wɛ̃nnɛ́ ì mbo mɛ́tìrì mɛ̀nùmmù.

²⁵ Kɛ̀ tɛtɛtɛ̀ kó ifìɛ̀ti okùmɛ̀ múnkɛ mmɛ mmɑ̀, mɛokùmɛ̀ mɛ̀mɑ́ɑ̀ mɛpɛ̃kùmɛ̀ mɛ̀mɑ́ɑ̀.

²⁶ Sidɛ́ kɛ̀ si okùmɛ̀ mmɑ kɛ bo mɛ́tìrì mɛ̀nùmmù.

²⁷ Kòo sì tɑnnɛ́ kufɑ̃́ɑ̃́ nkɛ́cónnɛ́ dɛ cuokɛ̀ kɛ̀ tiɛ̀ nkó kufìɛ̀ti nkɑ́ɑ́ nkummɑrí, kɛ̀ tɛtɛtɛ̀ kɔku nkɑ́ɑ́ nkutɛkù kɛ̀ ì kɔ̀tɛní kɛ mɑ̀ɑ́ dɛ cuokɛ̀

²⁸ kòo sì dɑ̀ri mɛsɔɔ.

²⁹ Ti Yiɛ̀ nKuyie ncĩ́ɛ̃̀tɛ̀ kó tidieti tidɛ́ miɛkɛ, kɛ́dɔɔ̀ tifèntì kɛ̀ dɛ kó tifèntì ndònnɛ̀ tipuonti nɛ̀ mutepóó mmùù tìtɛ.

³⁰ Kòo dɑri mɛsɔɔ nfɛcɑ̀rìfɛ̀ ti Yiɛ̀ nKuyie ncĩ́ɛ̃̀tɛ̀ dieti tidɛ́, kuketikù nɛ̀ kufɑ̃́ɑ̃́.

³¹ Kɛ̀ bɛ̀ɛ dɔɔ̀ dicɑ̀ù dìì kpetírí mɛ̀dɛ́mɛ̀ kɛ bo kpetínnɛ́ ti Yiɛ̀ nKuyie ntɑummɛ̀ tɔu bo kùù dieku, kɛ́ dì dɔ̀ɔ̀nɛ̀ dɛtie mbɛ̀ tu dɛ̀ odìfíè dikpɑ́ɑ̀ kou kó tidɑbɛɛtì, kɛ́dɔɔ̀ tidɑbɛɛtì tìì pĩ̀ńnɛ̀ dicɑ̀ù kɛ̀ tì pɛ̃kùmɛ̀ mmɑ̀nnɛ̀ bɛ̀ bo yɑrímɛ̀ kudieku kó kumɑrí mɛ̀nùmmù diyɑrì dìmɑ́ɑ̀ kó mɛcɛ̃́ɛ̃̀.

³² Kɛ̀ bɛ̀ɛ cíɛ́kɛ́ tifèntì yɛcɑ̀kɛ̀ yɛ̀dɛ́ kó tidɑbɛɛtì ĩ́nkɛ̀, kɛ̀ ti ndònnɛ̀ bɛĩ́nkɛ̀mbɑ̀rìbɛ̀ nɛ̀ tipuonti nɛ̀ mutepóó mmùù tìtɛ, kɛ́deè kòò dɛ̀ dɑ̀ri mɛsɔɔ.

³³ Kɛ múnkɛɛ dɑri kudieku kó dicɑ̀ù nɛ̀ iì dɛí mɑ́ɑ̀. Kɛ̀ di kó tidɑbɛɛtì tìì dì pĩ̀ńnɛ̀, kɛ̀ tinti kó mɛpɛ̃kùmɛ̀ mmɑ̀nnɛ̀ bɛ̀ bo yɑrímɛ̀ kudieku kó kumɑrí mɛ̀nɑ̀ɑ̀ diyɑrì dìmɑ́ɑ̀ kó mɛcɛ̃́ɛ̃̀.

³⁴ Kɛ̀ dɛ kó yɛcɑ̀kɛ̀ ntú idɛí bɛ̀ tu ì sìpɛ̀rɛ́sì i kó tidɑbɛɛtì, kɛ̀ bɛ̀ɛ yɛ̀ dɔ̀ɔ̀ kɛ̀ yɛ̀ ntɑu nyɛ̀dɛ́ɛ̀ yɛ̀dɛ́ɛ̀ bɑ́ kùù píkù, kɛ́ yɛ̀ pĩ̀ńnɛ́nɛ̀ yɛcɑubɛ kɛ̀ yɛ̀ nyɛ̀ fiinko.

³⁵ Kɛ̀ bɛ̀ɛ cíɛ́kɛ́ dɛ kó yɛcɑ̀kɛ̀ ĩ́nkɛ̀ tifèntì kɛ̀ tì ndònnɛ̀ bɛĩ́nkɛ̀mbɑ̀rìbɛ̀ nɛ̀ tipuonti nɛ̀ mutepóó mmùù tìtɛ. Kòo dɛ̀ dɑ̀ri mɛsɔɔ.

³⁶ Dɛ kó difɔ̃nkúò kɛ́mɑɑ́ kuduotí kɛ́fii nKuyie ncĩ́ɛ̃̀tɛ̀, kɛ́ kù mɑɑ́nɛ̀ yɛtɑ̃́rɛ̀ diɛyɛ̀, kɛ̀ yɛ̀ ndɔ́kɛ́ inɑú ìtɑ̃ɑ̃ti kɛ sɔkɛ́ sɔkɛ́ yɛtɔbɛ̀ ĩ́nkɛ̀, kɛ́deè kɛ́cónnɛ́ dɛtekperɛ̀ kó tidɑbɛɛtì yɛ ĩ́nkɛ̀.