ᤛᤣ᤺ᤰᤕᤢᤰᤔᤡᤒᤠᤜᤠ᤹ 7:5-55

⁵ᤜᤧᤰᤁᤣᤛᤠᤱ ᤂᤢᤏᤧ᤹ ᤁᤴ ᤗᤠᤈᤣ᤹ᤀᤥ ᤗᤠᤱᤓᤥ ᤋᤥ᤹ᤔᤠ ᤗᤠᤈᤣ᤹ᤀᤠᤱ ᤔᤧᤒᤡᤖᤢᤴᤗᤥ. ᤁᤖ ᤁᤴ ᤂᤢᤏᤧ᤹ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤋᤠ᤺ᤴᤍᤡ ᤐᤡᤔᤠᤛᤡ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤖᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤕᤧᤶᤔᤥ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ᤎᤡᤰᤁᤠᤱ ᤜᤥ᤺ᤵᤋᤧᤖᤥ॥

⁶ᤕᤠᤱᤛᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤳᤋᤢ. ‘ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤠ᤺ᤱᤄᤠᤒᤠ ᤘᤣ᤹ ᤗᤠᤈᤣ᤹ᤀᤥ ᤔᤧᤕᤢᤱᤗᤥ॥ ᤂᤧᤵᤔᤥᤒᤠ ᤗᤠᤈᤣ᤹ᤛᤠᤒᤠᤜᤠ᤹ᤖᤧ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤀᤠᤱ ᤁᤢᤃᤡᤵ ᤗᤡᤛᤡ ᤋᤱᤒᤣ (᥊᥆᥆) ᤌᤠᤖᤡᤰ ᤂᤢᤏᤡ᤹ ᤛᤠᤰᤁᤧᤸᤗᤧᤰᤁᤠᤱ ᤕᤥ᤺ᤰ ᤔᤧᤈᤥᤃᤢᤛᤡ᤹ᤖᤥ॥

⁷ᤁᤖ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤕᤥ᤺ᤰᤐᤠ ᤁᤧᤈᤥ᤺ᤰᤐᤠ ᤂᤧᤵᤔᤥᤒᤠ ᤗᤠᤈᤣ᤹ᤛᤠᤒᤠᤜᤠ᤹ ᤀᤡᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤂᤧᤴ ᤗᤠᤈᤣ᤹ᤀᤥᤗᤠᤶ ᤁᤴ ᤗᤠᤈᤣ᤹ᤀᤥ ᤔᤧᤎᤠᤱᤅᤠᤱ ᤀᤡᤱᤃᤠ᤹ ᤛᤣᤘᤠ ᤔᤧᤈᤥ᤺ᤰᤁᤠᤖᤥ॥’

⁸ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤔᤠᤱᤜᤢᤵᤗᤧᤴ ᤔᤡᤰᤛᤣ᤺ᤴ ᤐᤥ᤺ᤱᤗ ᤑᤠ᤹ᤀᤠᤱ ᤜᤷᤍᤥ ᤜᤧᤰᤔᤠ ᤌᤡᤶ ᤐᤡᤖᤢᤖᤥ॥ ᤜᤧᤰᤁᤣ᤺ᤸᤗᤧ ᤀᤒᤪᤠᤜᤠᤔᤖᤧ ᤀᤡᤛᤜᤠᤰᤁᤡᤴ ᤛᤠᤘᤠ᤺ᤴᤍᤢᤀᤠᤱ ᤕᤧᤳᤇᤡ (᥎) ᤕᤧᤴᤏᤥ ᤜᤷᤍᤥ ᤜᤧᤃᤢ ᤐᤡᤖᤢ॥ ᤜᤧᤰᤁᤩᤠᤱ ᤀᤡᤛᤜᤠᤁᤧᤴ ᤕᤠᤁᤢᤒᤖᤧ ᤁᤢᤶᤒᤠᤖᤥ॥ ᤀᤠᤏᤡ᤹ᤃ ᤕᤠᤁᤢᤒᤖᤧ ᤌᤡᤰ-ᤏᤧᤳ (᥇᥈) ᤁᤢᤛ᤻ᤛᤠ᤺ᤜᤠ᤹ᤖᤧ ᤂᤢᤏᤡ᤹ ᤔᤢ᤹ᤀᤡᤍᤠᤱᤛᤠᤛᤡᤖᤥ॥

⁹ᤁᤢᤶᤓᤢ᤹ᤛᤡᤖᤧ ᤕᤢᤛᤢᤑᤧᤴ ᤛᤠ᤹ᤖᤡᤰ ᤏᤠᤔᤧᤜᤧᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤡᤛᤪᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤛᤱᤄᤢᤀᤠᤱ ᤂᤢᤏᤧ᤹ ᤕᤥ᤺ᤰᤐᤠ ᤐᤥ᤺ᤰᤂᤧ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤘᤕᤧ.

¹⁰ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤢᤰᤂᤣᤘᤠᤗᤠᤶ ᤛᤧ᤺ᤵᤋᤢᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤐᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤑᤠᤖᤥ ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤢᤖ ᤔᤡᤛᤪ ᤗᤠᤈᤣ᤹ ᤏᤢ ᤁᤢᤕᤠᤱᤛᤠᤁᤢᤴᤎᤣ ᤛᤶᤍᤠᤱ ᤛᤢᤜᤠᤱᤕᤢᤰᤐᤠ ᤆᤥᤃᤢᤖᤥ॥

¹¹ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ ᤏᤢ ᤁᤏᤠᤏ ᤗᤠᤈᤣ᤹ᤀᤥ ᤛᤠ᤹ᤖᤡᤰ ᤕᤶᤒᤠ ᤛᤠᤰ ᤌᤩᤧᤀᤠᤱ ᤕᤶᤒᤠ ᤋᤢᤰᤂᤣᤘᤠ ᤏᤢ ᤔᤡᤴᤍᤣ᤹ ᤐᤥᤃᤧ. ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤆᤠᤔᤠ ᤌᤧᤔᤠᤀᤠᤱ ᤔᤧᤱᤃᤳᤋᤢᤴᤗᤥ॥

¹²ᤁᤖ ᤕᤠᤁᤢᤒᤖᤧ ᤔᤡᤛᤪᤀᤥ ᤕᤖᤡᤰ ᤆᤠ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤁᤢᤛ᤻ᤛᤠ᤺ᤜᤠ᤹ ᤆᤠ ᤗᤠ᤺ᤛᤧ ᤐᤠᤱᤄᤢᤛᤡ॥ ᤂᤧᤱᤜᤠ᤹ᤖᤧ ᤕᤢᤛᤢᤑᤗᤠᤶ ᤆᤠ᤺ᤴ ᤔᤧᤀᤡᤅᤢ ᤁᤖ ᤂᤢᤏᤧ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤜᤡᤶᤔᤥ ᤔᤧᤏᤢ᤺ᤰᤂᤧᤖᤥ॥

¹³ᤜᤧᤰᤁᤣᤗ᤹ᤖᤡᤰ ᤔᤡᤛᤪᤀᤥ ᤏᤡᤗᤧᤱ ᤆᤠ ᤗᤠ᤺ᤛᤧ ᤔᤧᤒᤣ᤺ᤸᤗᤧ ᤕᤢᤛᤢᤑᤖᤧ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤀᤡᤱᤃᤠ᤹ ᤕᤢᤛᤢᤑᤀᤠ ᤑᤠ᤹ᤀᤠᤱ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤑᤠᤖᤥᤜᤠᤱᤅᤡᤸᤗᤧᤀᤠᤱ ᤕᤢᤛᤢᤑᤖᤧ ᤁᤢᤜᤡᤶᤛᤕᤱᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤛᤡᤖᤥ॥

¹⁴ᤜᤧᤰᤁᤩᤠᤱ ᤕᤢᤛᤢᤑᤖᤧ ᤁᤢᤶᤒᤠ ᤕᤠᤁᤢᤒ ᤏᤢ ᤁᤠᤰ ᤁᤢᤜᤡᤶᤛᤕᤱᤜᤠ᤹ ᤔᤡᤛᤪᤀᤥ ᤀᤢ᤺ᤳᤋᤢᤛᤡ॥ ᤂᤧᤱᤜᤠ᤹ ᤁᤧᤖᤧᤰ ᤏᤢ-ᤅᤠ (᥍᥋) ᤔᤧᤘᤕᤧᤖᤥ॥

¹⁵ᤜᤧᤰᤁᤩᤠᤱ ᤕᤠᤁᤢᤒ ᤏᤢ ᤁᤢᤜᤡᤶᤛᤕᤱᤜᤠ᤹ ᤔᤡᤛᤪᤀᤥ ᤔᤧᤒᤣ॥ ᤕᤠᤱᤛᤡ ᤂᤢᤏᤧ᤹ ᤏᤢ ᤁᤢᤛ᤻ᤛᤠ᤺ᤜᤠ᤹ ᤂᤧᤵᤔᤥᤀᤣ ᤔᤧᤛᤩᤧ॥

¹⁶ᤂᤢᤏᤡ᤹ ᤌᤰᤜᤠ᤹ ᤛᤣᤰᤁᤣᤔ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢᤀᤠᤱ ᤀᤒᤪᤠᤜᤠᤔᤖᤧ ᤜᤠᤔᤥᤖᤖᤧ ᤁᤢᤛ᤻ᤛᤠ᤺ᤜᤠ᤹ᤗᤠᤶ ᤀᤡᤅᤢᤀᤠᤱ ᤘᤕᤧᤒᤠ ᤀᤡᤵᤐᤢᤱᤍᤧᤴᤏᤥ ᤔᤧᤗᤢᤵᤋᤢᤛᤡᤖᤥ॥

¹⁷ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤔᤏᤢ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤀᤡ᤺ᤳᤋᤧᤸᤗᤧ ᤔᤡᤛᤪᤀᤥ ᤀᤠᤏᤡ᤹ ᤔᤏᤠᤜᤠ᤹ ᤕᤖᤡᤰ ᤔᤧᤒᤥ᤺ᤴᤍᤧᤖ ᤔᤧᤒᤣᤖᤥ॥

¹⁸ᤕᤖᤡᤰ ᤋᤱᤒᤣ ᤀᤣᤃᤠᤱ ᤂᤧᤵᤔᤥ ᤘᤣ᤹ᤛ᤻ᤔᤠ ᤔᤏᤠ᤺ᤴ ᤜᤠᤱ ᤐᤥ᤺ᤰᤂᤧᤀᤠᤱ ᤔᤡᤛᤪᤀᤥ ᤜᤠᤱ ᤆᤥ᤺ᤰᤔᤠ ᤜᤣ᤺ᤰᤋᤢ॥ ᤂᤧᤸᤗᤧ ᤕᤢᤛᤢᤑᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥

¹⁹ᤂᤧᤸᤗᤧ ᤀᤠᤏᤡ᤹ ᤌᤠ᤺ᤰᤌᤧᤒᤠᤜᤠ᤹ ᤀᤡᤱᤗᤧᤰ ᤔᤧᤳᤋᤢᤛᤡᤖ ᤛᤠ᤹ᤖᤡᤰ ᤏᤡᤱᤄᤢᤶ ᤆᤥᤃᤢᤛᤡᤀᤠᤱ ᤕᤧᤶᤒᤡᤳᤇᤠ᤹ ᤀᤅᤧ᤺ᤰᤘᤠᤛᤠᤜᤠ᤹ ᤔᤧᤛᤡᤖ ᤑᤠ᤹ᤀᤠᤱ ᤗᤠᤵᤑᤢ ᤐᤠᤱᤄᤢᤛᤡ॥

²⁰ᤒᤠ ᤂᤧᤴ ᤕᤧᤶᤔᤥ ᤔᤥᤛᤠ᤺ᤴ ᤛᤠᤘᤠ᤺ᤴᤇᤡᤱ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠ᤹ᤖᤡᤰ ᤏᤢ᤺ᤒᤠ ᤀᤅᤧ᤺ᤰᤘᤠ ᤆᤥᤃᤧ॥ ᤂᤢᤏᤧ᤹ ᤜᤡᤶᤔᤥ ᤗᤠ ᤛᤢᤶᤛᤡ ᤌᤠᤖᤡᤰ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤆᤡᤰᤂᤧᤇᤢᤀᤠᤱ ᤁᤳᤋᤧᤇᤢᤖᤥ॥

²¹ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤀᤠᤱ ᤘᤜᤱᤅᤡᤸᤗᤧ ᤁᤢᤕᤠᤀᤥ ᤔᤧᤏᤧᤛ᤻ᤛᤢᤸᤗᤧ ᤂᤧᤵᤔᤥ ᤑᤠᤖᤥᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤜᤠᤱᤛᤠᤔᤠᤸᤗᤧ ᤂᤥ᤺ᤛᤢᤀᤠᤱ ᤁᤢᤛ᤻ᤛᤠ᤺ ᤆᤥᤃᤢᤀᤠᤱ ᤁᤳᤋᤢᤖᤥ॥

²²ᤜᤧᤰᤁᤣᤗ᤹ᤖᤡᤰ ᤔᤡᤛᤪᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤡᤛᤠᤶᤜᤠ᤹ ᤂᤢᤏᤧ᤹ ᤔᤧᤜᤢ᤹ᤖᤢᤖᤥ॥ ᤜᤧᤰᤁᤩᤠᤱ ᤌᤠᤱᤒᤧᤴ ᤁᤧᤖᤧᤀᤠᤱ ᤂᤢᤏᤧ᤹ ᤐᤠ᤺ᤴᤏᤥ ᤏᤢ ᤕᤠ᤺ᤶᤒᤰᤁᤥ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤖᤥ॥

²³ᤜᤧᤰᤁᤩᤠᤱ ᤔᤥᤛᤠ᤺ᤴ ᤋᤱᤒᤣ ᤗᤡᤒᤥ᤺ᤱ (᥊᥆) ᤁᤧᤖᤧᤸᤗᤧ ᤁᤢᤃᤠ᤹ᤀᤡ ᤀᤡᤛᤪᤠᤀᤡᤗᤡᤜᤠ᤹ ᤋᤢᤶᤛᤧ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥

²⁴ᤜᤧᤰᤁᤩᤠᤱ ᤔᤡᤛᤪᤡᤎᤡᤰᤗᤧ ᤌᤡᤰ ᤀᤡᤛᤪᤠᤀᤡᤗᤡ᤺ᤴ ᤏᤡᤱᤄᤢᤶ ᤔᤧᤳᤋᤢᤒᤠ ᤏᤡ᤺ᤛᤢ॥ ᤜᤧᤰᤁᤣ᤺ᤸᤗᤧ ᤂᤧᤴ ᤏᤠᤱᤔᤠ ᤑᤠ᤹ᤀᤠᤱ ᤐᤣᤀᤠᤱ ᤂᤧᤴ ᤔᤡᤛᤪᤡ᤺ᤴ ᤜᤡᤵᤋᤢ ᤛᤧᤖᤢᤖᤥ॥

²⁵ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤡ᤹ ᤕᤥ᤺ᤰᤐᤠ ᤜᤡᤱᤔᤴᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤐᤠᤱᤄᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤁᤧᤗ᤹ᤒᤠ ᤀᤡ᤺ᤳᤋᤢᤀᤠᤱ ᤘᤕᤧ. ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

²⁶ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤏᤧᤵᤑᤢ ᤀᤡᤛᤪᤠᤀᤡᤗᤡᤜᤠ᤹ ᤆᤢᤅᤧᤳᤇᤡᤖ ᤕᤠᤃᤧᤳᤇᤡᤒᤠ ᤏᤡ᤺ᤛᤢᤛᤡᤀᤠᤱ ᤏᤠᤍᤱ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤐᤣᤀᤠᤱ ᤔᤧᤳᤋᤢᤛᤡ. ‘ᤋᤣ᤺ᤱᤒᤠᤛᤣ. ᤂᤡᤴᤇᤡ᤹ᤃ ᤑᤢ᤹ᤏᤢᤛᤠ᤹ ᤁᤧᤎᤠᤵᤛᤡ᥄ ᤌᤣᤀᤠᤱ ᤁᤧᤈᤢᤱᤛᤡᤒᤠᤒᤣ᥅’

²⁷ᤁᤖ ᤂᤧᤴ ᤏᤡᤱᤄᤢᤶ ᤁᤧᤔᤧᤵᤐᤧᤸᤗᤧ ᤔᤥᤛᤠ᤺ᤴ ᤌᤡᤰᤗᤧᤵᤔᤠᤱ ᤆᤴᤍᤢᤖ ᤛᤣ᤺ᤴᤍᤥᤛᤢ. ‘ᤂᤧᤏᤧ᤹ ᤜᤠ᤺ᤳᤗᤧ ᤀᤠᤏᤡᤃᤧ ᤛᤶᤍᤠᤱ ᤜᤠᤱ ᤁᤧᤈᤥ᤺ᤰᤐᤠ ᤏᤢ ᤂᤠᤛᤧᤴᤗᤥ᤺ᤶᤒᤠ ᤁᤧᤈᤥᤃᤧᤀᤠᤱ ᤁᤧᤘᤠ᤹ᤒᤣ᥅

²⁸ᤂᤧᤏᤧ᤹ ᤔᤡ᤺ᤵᤔᤠ ᤔᤡᤛᤪᤡ᤺ᤴ ᤁᤧᤛᤧᤖᤢᤒᤠ ᤜᤧᤰᤁᤣ ᤀᤡᤱᤃᤠ᤹ᤀᤠᤱ ᤁᤧᤛᤧᤳᤋᤠᤒᤠᤒᤡ᥅’

²⁹ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤔᤥᤛᤠᤖᤧ ᤀᤡᤱᤃᤠ᤹ ᤔᤡᤛᤪᤡ᤺ᤴ ᤛᤧᤖᤢᤱᤒᤠ ᤐᤠ᤺ᤴᤏᤡᤴᤏᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤒᤡᤗᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤁᤡ᤺ᤛᤧᤀᤠᤱ ᤔᤡᤛᤪᤗᤠᤶ ᤔᤡᤍᤩᤠᤏ ᤗᤠᤈᤣ᤹ᤀᤥ ᤂᤧᤳᤇᤡᤱ ᤐᤣᤀᤠᤱ ᤂᤧᤵᤔᤥᤀᤣ ᤘᤠ᤹ᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤂᤧᤵᤔᤥᤀᤣ ᤔᤣ᤺ᤰᤂᤡᤶ ᤆᤥᤃᤢᤀᤠᤱ ᤏᤧᤵᤑᤢ ᤁᤢᤛ᤻ᤛᤠ᤺ᤀᤠᤱ ᤐᤥ᤺ᤰᤂᤧᤳᤇᤡᤖᤥ॥

³⁰ᤋᤱᤒᤣ ᤗᤡᤒᤥ᤺ᤱ (᥊᥆) ᤀᤣᤃᤠᤱ ᤛᤡᤏᤠᤀᤡ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱ ᤀᤣᤰᤛᤠᤍᤧᤴᤏᤥᤒᤠ ᤔᤡ ᤁᤧᤍᤡ᤺ᤵᤐᤠ ᤐᤥ᤺ᤰᤗᤠᤀᤥ ᤔᤠᤱᤗᤠᤀᤡᤱᤒᤠᤴ ᤔᤥᤛᤠᤖᤥ ᤌᤠ᤺ᤴᤇᤡᤱᤗᤥ॥

³¹ᤔᤥᤛᤠᤖᤧ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤌᤣ᤺ᤴᤏᤧᤒᤣ᥅ ᤑᤠ᤹ᤀᤠᤱ ᤁᤢᤒᤣᤛᤠᤱ ᤐᤣᤖᤥ॥ ᤁᤖ ᤂᤧᤸᤗᤧ ᤍᤠᤱᤒᤠᤸᤗᤧ ᤁᤢᤀᤡᤰᤗᤠ᤺ᤴ ᤂᤧᤵᤛᤢ–

³²‘ᤀᤡᤱᤃᤠ᤹ ᤁᤧᤛᤢᤎᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤛᤣᤘᤠ ᤔᤧᤈᤥᤃᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤀᤠ॥’ ᤔᤥᤛᤠ᤺ᤴ ᤁᤢᤃᤡ᤺ᤔᤠᤸᤗᤧ ᤕᤰᤂᤧᤀᤠᤱ ᤂᤧᤴ ᤔᤡ ᤁᤧᤍᤡ᤺ᤵᤐᤠ ᤐᤥ᤺ᤰᤗᤠ᤺ᤴ ᤀᤥᤔᤧᤵᤔᤠ ᤀᤠ᤺ᤴᤇᤡᤱ ᤔᤧᤈᤥᤃᤢᤴᤗᤥ॥

³³ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤔᤧᤳᤋᤢ. ‘ᤂᤧᤏᤧ᤹ ᤁᤧᤗᤠᤱᤛᤢ᤺ᤵᤜᤠ᤹ ᤑᤧᤴᤍᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤕᤧᤵᤐᤠ ᤍᤧᤴᤏᤡᤴ ᤛᤣᤛᤣ ᤆᤥ᤺ᤰ॥’

³⁴ᤀᤡᤱᤃᤠ᤹ ᤀᤠᤔᤏᤠᤜᤠ᤹ ᤔᤡᤛᤪᤀᤥ ᤏᤡᤱᤄᤢᤶᤔᤥ ᤔᤧᤘᤠ᤹ᤒᤠ ᤏᤡ᤺ᤛᤢᤱᤛᤡᤱᤅᤠᤱ ᤂᤢᤏᤡ᤹ ᤔᤣᤖᤡᤱᤅᤡᤴ ᤂᤧᤵᤛᤢᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤣ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤡ᤹ ᤕᤥ᤺ᤰᤐᤠ ᤜᤡᤱᤔᤴᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤛᤧ ᤀᤡᤱᤃᤠ᤹ ᤕᤠᤱᤅᤠᤱ ᤘᤠ᤹ᤀᤠ॥ ᤀᤠᤸᤗ ᤕᤠᤱᤏᤠ ᤔᤡᤛᤪ ᤗᤠᤈᤣ᤹ᤀᤥ ᤂᤢᤏᤡ᤹ ᤁᤢᤓᤠ᤹ ᤐᤡᤛᤧ ᤏᤢ᤺ᤰᤏᤧ᤹ᤖᤥ॥

³⁵ᤒᤠ ᤁᤴ ᤔᤥᤛᤠ᤺ᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ‘ᤂᤧᤏᤧ᤹ ᤀᤠᤏᤡᤃᤧ ᤛᤶᤍᤠᤱ ᤜᤠ᤺ᤳᤗᤧ ᤜᤠᤱ ᤏᤢ ᤂᤠᤛᤧᤴᤗᤥ᤺ᤶᤒᤠ ᤁᤧᤛᤣᤃᤧᤀᤠᤱ ᤁᤧᤘᤠ᤹ᤒᤣ᥅’ ᤔᤧᤔᤧᤳᤋᤢᤖ ᤔᤧᤏᤠ᤹ᤖᤢᤀᤠᤱ ᤔᤧᤘᤕᤧ. ᤁᤖ ᤐᤥ᤺ᤰᤗᤠᤀᤥ ᤀᤥᤛᤣ᤺ᤴᤃᤧᤎᤠᤰᤛᤡᤱᤒᤠ ᤔᤠᤱᤗᤠᤀᤡᤱᤒᤠᤸᤗᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤀᤣ ᤜᤠᤱ ᤁᤧᤈᤥ᤺ᤰᤐᤠ ᤏᤢ ᤋᤠᤱᤃᤧᤛᤧ᤺ᤵᤐᤠ ᤆᤥᤃᤢᤀᤠᤱ ᤐᤠᤱᤄᤢᤖᤥ॥

³⁶ᤔᤥᤛᤠᤖᤧᤀᤣ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡ. ᤜᤧᤰᤁᤩᤠᤱ ᤔᤡᤛᤪᤀᤥ. ᤜᤧ᤺ᤳᤋᤠᤱᤒᤠ ᤘᤠᤜᤱᤅᤥ ᤏᤢ ᤋᤱᤒᤣ ᤗᤡᤒᤥ᤺ᤱ (᥊᥆) ᤌᤠᤖᤡᤰ ᤀᤣ᤺ᤰᤛᤠᤍᤧᤴᤏᤥ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤖᤥ॥

³⁷ᤁᤴ ᤔᤥᤛᤠᤖᤧ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤜᤧᤰᤋᤱᤒᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤂᤡᤏᤡ᤹ ᤀᤠᤒᤠᤅᤣ ᤔᤏᤠᤗᤠᤶ ᤂᤡᤏᤡ᤹ᤀᤥ ᤐᤠᤱᤄᤢ᤹ᤖᤥ॥’

³⁸ᤀᤡᤛᤪᤠᤀᤡᤗᤡᤜᤠ᤹ ᤀᤣ᤺ᤰᤛᤠᤍᤧᤴᤏᤥ ᤔᤧᤈᤢᤵᤛᤧᤸᤗᤧ ᤔᤥᤛᤠ᤺ᤴ ᤂᤧᤱᤜᤠ᤹ᤏᤢ ᤘᤕᤧ. ᤛᤡᤏᤠᤀᤡ ᤁᤥ᤺ᤰᤔᤠᤀᤥ ᤔᤠᤱᤗᤠᤀᤡᤱᤒᤠᤴ ᤂᤢᤏᤧ᤹ᤏᤢ ᤐᤠᤖᤧ ᤜᤧᤰᤁᤩᤠᤱ ᤂᤧᤴ ᤜᤡᤱᤔᤴ ᤁᤧᤒᤡᤒᤠ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤢᤏᤧ᤹ ᤂᤥ᤺ᤛᤢ. ᤜᤧᤰᤁᤩᤠᤱ ᤀᤠᤏᤡ᤹ ᤛᤢᤎᤧᤒᤠᤜᤠ᤹ ᤐᤡᤖᤢᤛᤡᤀᤠᤱ ᤀᤠᤏᤡ᤹ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹ᤖᤥ॥

³⁹ᤁᤖ ᤀᤠᤏᤡ᤹ ᤛᤢᤎᤧᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤋᤧᤴᤍᤡᤱ ᤆᤥ᤺ᤰᤔᤠ ᤔᤧᤏᤠ᤹ᤖᤢᤀᤠᤱ ᤔᤥᤛᤠ᤺ᤴᤏᤠᤱ ᤔᤧᤏᤠ᤹ᤖᤢ. ᤜᤧᤰᤁᤩᤠᤱ ᤔᤡᤛᤪᤀᤥ ᤏᤢ᤺ᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥

⁴⁰ᤜᤧᤰᤁᤣ᤺ᤸᤗᤧ ᤔᤥᤛᤠᤖᤧ ᤁᤢᤶᤓᤢ᤹ ᤜᤠᤖᤢᤴᤏᤡᤴ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢ. ‘ᤀᤠᤏᤡᤃᤧ ᤗᤠᤃᤡ ᤕᤠᤵᤔᤡ ᤗᤠᤶ ᤁᤧᤗᤥ᤺ᤒᤠ ᤔᤠᤱᤜᤠ᤹ ᤆᤥᤃᤧ ᤀᤠᤒᤡᤖᤧ᤹॥ ᤔᤡᤛᤪᤗᤠᤶ ᤕᤠᤵᤔᤡ ᤁᤧᤗ᤺ᤵᤐᤠ ᤁᤴ ᤔᤥᤛᤠ᤺ᤴ ᤌᤣ ᤐᤥ᤺ᤰᤂᤧ ᤑᤠ᤹ᤀᤠᤱ ᤀᤠᤏᤡᤃᤧ ᤔᤧᤏᤡ᤺ᤛᤢᤶᤒᤧᤴᤗᤥ॥’

⁴¹ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤐᤡᤳᤛᤠ᤺ᤳ ᤏᤠᤘᤠᤀᤡᤳᤗᤠ ᤔᤧᤈᤥᤃᤢᤀᤠᤱ ᤛᤡᤍᤢᤱᤈᤓᤠ ᤔᤧᤈᤥᤃᤢᤖᤥ॥ ᤂᤢᤏᤡ᤹ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤥ ᤔᤧᤛ᤺ᤳᤋᤧᤖ ᤏᤠᤘᤠᤀᤡᤳᤗᤠ᤺ᤴ ᤀᤡᤱᤎᤠ᤺ᤱ ᤐᤡᤛᤧ ᤛᤛᤠᤱᤛᤪᤥ᤺ᤳ ᤔᤧᤈᤥᤃᤢᤖᤥ॥

⁴²ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰᤐᤧᤴ ᤛᤣᤘᤠ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤗᤧᤖᤢᤛᤡᤖᤥ॥ ᤁᤴ ᤐᤠ᤺ᤴᤏᤡᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤛᤠᤵᤐᤴᤏᤥ ᤛᤠᤵᤋᤢᤀᤠᤱ ᤁᤧᤒᤵᤐᤠ ᤁᤢᤀᤡᤛᤡ᤺ᤰ ᤁᤧᤖᤧᤖᤥ. ‘ᤀᤡᤛᤪᤠᤀᤡᤗᤡᤛᤣ. ᤂᤡᤏᤡ᤹ ᤀᤣ᤺ᤰᤛᤠᤍᤧᤴᤏᤥ ᤋᤱᤒᤣ ᤗᤡᤒᤥ᤺ᤱ (᥊᥆) ᤌᤠᤖᤡᤰ ᤁᤧᤘᤕᤡᤸᤗᤧᤀᤠᤱ ᤀᤡᤱᤃᤠ᤹ ᤀᤠᤛᤣᤘᤠ ᤁᤧᤈᤥᤃᤢᤶᤔᤡᤸᤗᤧ ᤛᤡᤍᤢᤱᤈᤓᤠ ᤕᤠᤵᤔᤡ ᤁᤧᤶᤒᤡᤖᤡᤴᤗᤥ॥

⁴³ᤁᤖ ᤂᤡᤏᤡ᤹ᤃ ᤔᤥᤗᤥᤁ ᤛᤠᤶᤔᤠᤱᤅᤡᤸᤗᤧ ᤁᤢᤔᤠᤱᤎᤠ᤺ᤴ ᤏᤢ ᤂᤣ᤺ᤶᤛᤡᤰᤐᤧᤴ ᤖᤧᤑᤠᤏ ᤛᤠᤶᤔᤠᤱᤅᤡᤸᤗᤧᤴ ᤏᤠᤘᤠᤀᤡᤳᤗᤠ᤺ᤴ ᤁᤧᤒᤰᤂᤢᤶᤗᤥ॥ ᤂᤡᤏᤡ᤹ ᤀᤠᤒᤠᤅᤣ ᤁᤧᤈᤥᤃᤢᤶᤒᤠ ᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤁᤧᤔᤧᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤒᤧᤒᤡᤗᤥᤴᤏᤢ᤺ᤸᤗᤧᤀᤠᤱ ᤔᤠ᤺ᤱᤄᤠ ᤐᤠᤱᤏᤡᤱᤗᤥ॥’

⁴⁴ᤂᤧᤱᤜᤠ᤹ ᤕᤧ᤺ᤱᤄᤠᤍᤧᤴᤏᤥ ᤔᤧᤘᤕᤧᤸᤗᤧ ᤀᤠᤏᤡ᤹ ᤛᤢᤎᤧᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶ ᤔᤧᤃᤳᤋᤢ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠ᤺ᤴ ᤀᤥᤛᤣ᤺ᤴᤎᤠᤰᤋᤢᤒᤠ ᤜᤧᤰᤁᤣᤀᤣ ᤂᤧᤴ ᤆᤥᤃᤧᤀᤠᤱ ᤘᤕᤧᤖᤥ॥

⁴⁵ᤕᤠᤱᤛᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤋᤃᤡᤗᤠᤶ ᤏᤠ᤺ᤳᤋᤢ ᤗ᤺ᤳᤋᤢᤛᤡᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤕᤜᤥᤛᤢ᤺ᤴᤏᤢ ᤔᤧᤒᤣ᤺ᤸᤗᤧ. ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤔᤡᤴ ᤂᤢᤏᤡ᤹ᤏᤢᤀᤣ ᤔᤧᤃᤢᤕᤢᤀᤠᤱ ᤔᤧᤍᤣ᤹ᤖᤢᤖᤥ॥ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤕᤧᤶ ᤌᤠᤖᤡᤰ ᤂᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤏᤧᤛ᤻ᤛᤧᤖᤥ॥

⁴⁶ᤍᤠᤀᤢᤍ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤛᤢᤀᤠᤱ ᤕᤠᤁᤢᤒᤖᤧ ᤛᤣᤘᤠ ᤆᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤜᤡᤶ ᤆᤥ᤺ᤰᤔᤠ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ.

⁴⁷ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤱᤃ ᤛᤥᤗᤥᤔᤏ ᤜᤠᤱᤅᤡᤸᤗᤧᤖᤰ ᤆᤥᤃᤢᤖᤥ॥

⁴⁸ᤜᤧᤰᤁᤣᤛᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤏᤠᤜᤠ᤹ᤖᤧ ᤆᤥ᤺ᤰᤔᤏᤠᤒᤠ ᤜᤡᤶᤔᤥ ᤔᤧᤘᤠ᤹ᤏᤧᤴ॥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤁᤢᤛᤠᤵᤐᤴᤏᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ–

⁴⁹‘ᤍᤠᤱᤒᤠᤸᤗᤧ ᤐᤠ᤺ᤳᤋᤢ. ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤀᤡᤱᤃᤠ᤹ ᤀᤠᤜᤠᤱᤕᤢᤰᤏᤠᤖᤥ॥ ᤂᤧᤵᤔᤥᤗᤠᤶᤔᤣ ᤁᤠᤰ ᤛᤶᤍᤠᤱ ᤜᤠᤱ ᤆᤥ᤺ᤰᤁᤠᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤡᤱᤃᤠ᤹ ᤀᤠᤗᤠᤱ ᤋᤥ᤹ᤓᤣ᤺ᤳᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤰᤋᤱᤒᤠ ᤁᤧᤄᤧᤶᤒᤠ ᤀᤠᤘᤠ᤹ᤔᤠ ᤜᤡᤶ ᤁᤧᤈᤥᤃᤢᤶᤒᤠᤒᤣ᥅

⁵⁰ᤁᤠᤰ ᤁᤱᤜᤠ᤹ᤃ ᤀᤡᤱᤃᤠ᤹ᤀᤣ ᤆᤥᤃᤢᤱᤛᤡᤱᤒᤠ ᤔᤧ᤺ᤶᤒᤡ᥅’

⁵¹ᤂᤡᤏᤡ᤹ᤃ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤁᤧᤎᤢᤱᤒᤠ ᤌᤡᤱᤃᤠᤏᤡ ᤁᤧᤈᤥᤃᤡᤖᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤶᤔᤠ ᤂᤡᤏᤡ᤹ ᤏᤧᤰᤂᤥ᤹ ᤌᤢᤱᤗᤥ॥ ᤂᤡᤏᤡ᤹ ᤛᤢᤎᤧᤒᤠᤜᤠ᤹ ᤜᤧᤰᤁᤣᤀᤣ ᤁᤧᤗ᤹ᤖᤡᤀᤠᤱ ᤛᤍᤠᤍᤡᤱ ᤛᤣᤛᤣᤔᤠᤱᤅᤡᤴ ᤁᤧᤀᤳᤋᤢᤶᤗᤥ॥

⁵²ᤂᤡᤏᤡ᤹ ᤛᤢᤎᤧᤒᤠᤜᤠ᤹ᤖᤧ ᤁᤠᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤛᤠᤶᤕᤥᤏᤡᤒᤠ ᤜᤠᤱᤅᤡᤸᤗᤧ ᤁᤢᤍᤠᤔᤠᤸᤗᤧᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤔᤧᤛᤧᤖᤢᤛᤡᤖᤥ॥ ᤀᤠᤸᤗ ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤳᤋᤢᤶᤔᤠᤱ ᤁᤧᤛᤧᤖᤢᤶᤗᤥ॥

⁵³ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤴ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤒᤡᤖᤡ᤹. ᤁᤖᤛᤠᤱ ᤂᤡᤏᤡ᤹ ᤁᤧᤱᤄᤧᤵᤛᤢᤶᤔᤡᤴᤗᤥ॥”

⁵⁴ᤁᤴ ᤐᤠ᤺ᤴᤏᤡᤴ ᤆᤢᤶᤗᤢᤱᤒᤠ ᤐᤠᤛᤡᤱ ᤐᤠᤍᤠᤱᤗᤠᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤛ᤻ᤋᤡᤑᤏᤛᤧᤴᤏᤢ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤂᤢᤏᤡ᤹ ᤜᤠᤒᤥ᤹ ᤔᤧᤕᤧ᤺ᤰᤂᤢᤖᤥ॥

⁵⁵ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤒᤠ ᤛ᤻ᤋᤡᤑᤏᤛᤧᤴ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤕᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤏᤢ ᤁᤢᤈᤢᤵᤛᤠᤱ ᤗᤧᤵᤛᤠᤱ ᤕᤧᤛᤢ᤺ᤴ ᤕᤧᤒᤧᤒᤠ ᤏᤡ᤺ᤛᤢᤖᤥ॥