ᤛᤣ᤺ᤰᤕᤢᤰᤔᤡᤒᤠᤜᤠ᤹ 7:16-29 in Limbu

¹⁶ ᤂᤢᤏᤡ᤹ ᤌᤰᤜᤠ᤹ ᤛᤣᤰᤁᤣᤔ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢᤀᤠᤱ ᤀᤒᤪᤠᤜᤠᤔᤖᤧ ᤜᤠᤔᤥᤖᤖᤧ ᤁᤢᤛ᤻ᤛᤠ᤺ᤜᤠ᤹ᤗᤠᤶ ᤀᤡᤅᤢᤀᤠᤱ ᤘᤕᤧᤒᤠ ᤀᤡᤵᤐᤢᤱᤍᤧᤴᤏᤥ ᤔᤧᤗᤢᤵᤋᤢᤛᤡᤖᤥ॥

¹⁷ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤔᤏᤢ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤀᤡ᤺ᤳᤋᤧᤸᤗᤧ ᤔᤡᤛᤪᤀᤥ ᤀᤠᤏᤡ᤹ ᤔᤏᤠᤜᤠ᤹ ᤕᤖᤡᤰ ᤔᤧᤒᤥ᤺ᤴᤍᤧᤖ ᤔᤧᤒᤣᤖᤥ॥

¹⁸ ᤕᤖᤡᤰ ᤋᤱᤒᤣ ᤀᤣᤃᤠᤱ ᤂᤧᤵᤔᤥ ᤘᤣ᤹ᤛ᤻ᤔᤠ ᤔᤏᤠ᤺ᤴ ᤜᤠᤱ ᤐᤥ᤺ᤰᤂᤧᤀᤠᤱ ᤔᤡᤛᤪᤀᤥ ᤜᤠᤱ ᤆᤥ᤺ᤰᤔᤠ ᤜᤣ᤺ᤰᤋᤢ॥ ᤂᤧᤸᤗᤧ ᤕᤢᤛᤢᤑᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥

¹⁹ ᤂᤧᤸᤗᤧ ᤀᤠᤏᤡ᤹ ᤌᤠ᤺ᤰᤌᤧᤒᤠᤜᤠ᤹ ᤀᤡᤱᤗᤧᤰ ᤔᤧᤳᤋᤢᤛᤡᤖ ᤛᤠ᤹ᤖᤡᤰ ᤏᤡᤱᤄᤢᤶ ᤆᤥᤃᤢᤛᤡᤀᤠᤱ ᤕᤧᤶᤒᤡᤳᤇᤠ᤹ ᤀᤅᤧ᤺ᤰᤘᤠᤛᤠᤜᤠ᤹ ᤔᤧᤛᤡᤖ ᤑᤠ᤹ᤀᤠᤱ ᤗᤠᤵᤑᤢ ᤐᤠᤱᤄᤢᤛᤡ॥

²⁰ ᤒᤠ ᤂᤧᤴ ᤕᤧᤶᤔᤥ ᤔᤥᤛᤠ᤺ᤴ ᤛᤠᤘᤠ᤺ᤴᤇᤡᤱ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠ᤹ᤖᤡᤰ ᤏᤢ᤺ᤒᤠ ᤀᤅᤧ᤺ᤰᤘᤠ ᤆᤥᤃᤧ॥ ᤂᤢᤏᤧ᤹ ᤜᤡᤶᤔᤥ ᤗᤠ ᤛᤢᤶᤛᤡ ᤌᤠᤖᤡᤰ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤆᤡᤰᤂᤧᤇᤢᤀᤠᤱ ᤁᤳᤋᤧᤇᤢᤖᤥ॥

²¹ ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤀᤠᤱ ᤘᤜᤱᤅᤡᤸᤗᤧ ᤁᤢᤕᤠᤀᤥ ᤔᤧᤏᤧᤛ᤻ᤛᤢᤸᤗᤧ ᤂᤧᤵᤔᤥ ᤑᤠᤖᤥᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤜᤠᤱᤛᤠᤔᤠᤸᤗᤧ ᤂᤥ᤺ᤛᤢᤀᤠᤱ ᤁᤢᤛ᤻ᤛᤠ᤺ ᤆᤥᤃᤢᤀᤠᤱ ᤁᤳᤋᤢᤖᤥ॥

²² ᤜᤧᤰᤁᤣᤗ᤹ᤖᤡᤰ ᤔᤡᤛᤪᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤡᤛᤠᤶᤜᤠ᤹ ᤂᤢᤏᤧ᤹ ᤔᤧᤜᤢ᤹ᤖᤢᤖᤥ॥ ᤜᤧᤰᤁᤩᤠᤱ ᤌᤠᤱᤒᤧᤴ ᤁᤧᤖᤧᤀᤠᤱ ᤂᤢᤏᤧ᤹ ᤐᤠ᤺ᤴᤏᤥ ᤏᤢ ᤕᤠ᤺ᤶᤒᤰᤁᤥ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤖᤥ॥

²³ ᤜᤧᤰᤁᤩᤠᤱ ᤔᤥᤛᤠ᤺ᤴ ᤋᤱᤒᤣ ᤗᤡᤒᤥ᤺ᤱ (᥊᥆) ᤁᤧᤖᤧᤸᤗᤧ ᤁᤢᤃᤠ᤹ᤀᤡ ᤀᤡᤛᤪᤠᤀᤡᤗᤡᤜᤠ᤹ ᤋᤢᤶᤛᤧ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥

²⁴ ᤜᤧᤰᤁᤩᤠᤱ ᤔᤡᤛᤪᤡᤎᤡᤰᤗᤧ ᤌᤡᤰ ᤀᤡᤛᤪᤠᤀᤡᤗᤡ᤺ᤴ ᤏᤡᤱᤄᤢᤶ ᤔᤧᤳᤋᤢᤒᤠ ᤏᤡ᤺ᤛᤢ॥ ᤜᤧᤰᤁᤣ᤺ᤸᤗᤧ ᤂᤧᤴ ᤏᤠᤱᤔᤠ ᤑᤠ᤹ᤀᤠᤱ ᤐᤣᤀᤠᤱ ᤂᤧᤴ ᤔᤡᤛᤪᤡ᤺ᤴ ᤜᤡᤵᤋᤢ ᤛᤧᤖᤢᤖᤥ॥

²⁵ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤡ᤹ ᤕᤥ᤺ᤰᤐᤠ ᤜᤡᤱᤔᤴᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤐᤠᤱᤄᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤁᤧᤗ᤹ᤒᤠ ᤀᤡ᤺ᤳᤋᤢᤀᤠᤱ ᤘᤕᤧ. ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

²⁶ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤏᤧᤵᤑᤢ ᤀᤡᤛᤪᤠᤀᤡᤗᤡᤜᤠ᤹ ᤆᤢᤅᤧᤳᤇᤡᤖ ᤕᤠᤃᤧᤳᤇᤡᤒᤠ ᤏᤡ᤺ᤛᤢᤛᤡᤀᤠᤱ ᤏᤠᤍᤱ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤐᤣᤀᤠᤱ ᤔᤧᤳᤋᤢᤛᤡ. ‘ᤋᤣ᤺ᤱᤒᤠᤛᤣ. ᤂᤡᤴᤇᤡ᤹ᤃ ᤑᤢ᤹ᤏᤢᤛᤠ᤹ ᤁᤧᤎᤠᤵᤛᤡ᥄ ᤌᤣᤀᤠᤱ ᤁᤧᤈᤢᤱᤛᤡᤒᤠᤒᤣ᥅’

²⁷ ᤁᤖ ᤂᤧᤴ ᤏᤡᤱᤄᤢᤶ ᤁᤧᤔᤧᤵᤐᤧᤸᤗᤧ ᤔᤥᤛᤠ᤺ᤴ ᤌᤡᤰᤗᤧᤵᤔᤠᤱ ᤆᤴᤍᤢᤖ ᤛᤣ᤺ᤴᤍᤥᤛᤢ. ‘ᤂᤧᤏᤧ᤹ ᤜᤠ᤺ᤳᤗᤧ ᤀᤠᤏᤡᤃᤧ ᤛᤶᤍᤠᤱ ᤜᤠᤱ ᤁᤧᤈᤥ᤺ᤰᤐᤠ ᤏᤢ ᤂᤠᤛᤧᤴᤗᤥ᤺ᤶᤒᤠ ᤁᤧᤈᤥᤃᤧᤀᤠᤱ ᤁᤧᤘᤠ᤹ᤒᤣ᥅

²⁸ ᤂᤧᤏᤧ᤹ ᤔᤡ᤺ᤵᤔᤠ ᤔᤡᤛᤪᤡ᤺ᤴ ᤁᤧᤛᤧᤖᤢᤒᤠ ᤜᤧᤰᤁᤣ ᤀᤡᤱᤃᤠ᤹ᤀᤠᤱ ᤁᤧᤛᤧᤳᤋᤠᤒᤠᤒᤡ᥅’

²⁹ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤔᤥᤛᤠᤖᤧ ᤀᤡᤱᤃᤠ᤹ ᤔᤡᤛᤪᤡ᤺ᤴ ᤛᤧᤖᤢᤱᤒᤠ ᤐᤠ᤺ᤴᤏᤡᤴᤏᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤒᤡᤗᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤁᤡ᤺ᤛᤧᤀᤠᤱ ᤔᤡᤛᤪᤗᤠᤶ ᤔᤡᤍᤩᤠᤏ ᤗᤠᤈᤣ᤹ᤀᤥ ᤂᤧᤳᤇᤡᤱ ᤐᤣᤀᤠᤱ ᤂᤧᤵᤔᤥᤀᤣ ᤘᤠ᤹ᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤂᤧᤵᤔᤥᤀᤣ ᤔᤣ᤺ᤰᤂᤡᤶ ᤆᤥᤃᤢᤀᤠᤱ ᤏᤧᤵᤑᤢ ᤁᤢᤛ᤻ᤛᤠ᤺ᤀᤠᤱ ᤐᤥ᤺ᤰᤂᤧᤳᤇᤡᤖᤥ॥

¹⁶ खुनिॽ थक्‍हाॽ सेक्‍केम लाजेॽओ मे़देॽरुआङ् अब्राहामरे़ हामोररे़ कुस्‍साःहाॽलाम् इङुआङ् वये़बा इप्‍पुङ्‌दे़न्‍नो मे़लुप्‍तुसिरो॥

¹⁷ आल्‍ल निङ्‌वाॽफुमाङ्‌ङिल्‍ले़ अब्राहामनु चोगुबा माङ्‌हे़क्‍किन्‌के़प्‍मा इःत्ते़ल्‍ले़ मिस्रओ आनिॽ मनाहाॽ यरिक् मे़बोःन्‍दे़र मे़बेरो॥

¹⁸ यरिक् तङ्‌बे एगाङ् खे़प्‍मो वेॽस्‍मा मनाःन् हाङ् पोःक्‍खे़आङ् मिस्रओ हाङ् चोःक्‍मा हेःक्‍तु॥ खे़ल्‍ले़ युसुफरे़ कुयाःम्‍बेओ कुसिङ् मे़निःत्तुन्‍लो॥

¹⁹ खे़ल्‍ले़ आनिॽ थाःक्‍थे़बाहाॽ इङ्‌ले़क् मे़त्तुसिर साॽरिक् निङ्‌घुम् चोगुसिआङ् ये़म्‍बित्‍छाॽ अङे़ःक्‌वासाहाॽ मे़सिर फाॽआङ् लाप्‍फु पाङ्‌घुसि॥

²⁰ बा खे़न् ये़म्‍मो मोसाःन् सावाःन्‍छिङ्॥ खुने़ॽ निङ्‌वाॽफुमाङ्‌ङिल्‍ले़ कुनिःमाओ साॽरिक् नुःबा अङे़ःक्‌वा चोगे़॥ खुने़ॽ हिम्‍मो ला सुम्‍सि थारिक् कुम्‍बा कुम्‍मासिरे़ चिक्‍खे़छुआङ् कत्ते़छुरो॥

²¹ हे़क्‍क्‍याङ् खुने़ॽ हिम् लाःक्‍कात् मे़लःत्तुआङ् वहङ्‌ङिल्‍ले़ कुयाओ मे़ने़स्‍सुल्‍ले़ खे़प्‍मो फारोहाङ्‌ङिल्‍ले़ कुस्‍साः हाङ्‌सामाल्‍ले़ खोःसुआङ् कुस्‍साः चोगुआङ् कत्तुरो॥

²² हे़क्‍केलॽरिक् मिस्रओ के़वाॽबा के़रे़क् सिक्‍कुम्‍दिङ् निङ्‌वाॽ निसाम्‍हाॽ खुने़ॽ मे़हुॽरुरो॥ हे़क्‍क्‍याङ् थाङ्‌बे़न् के़रे़आङ् खुने़ॽ पाःन्‍नो नु याःम्‍बक्‍को मुक्‍के़गुबा पोःक्‍खे़रो॥

²³ हे़क्‍क्‍याङ् मोसाःन् तङ्‌बे लिबोःङ्‌(४०) के़रे़ल्‍ले़ कुगाॽइ इस्राइलिहाॽ तुम्‍से़ पेःक्‍मा निङ्‌वाॽ चोगुरो॥

²⁴ हे़क्‍क्‍याङ् मिस्रिधिक्‍ले़ थिक् इस्राइलिःन् निङ्‌घुम् मे़त्तुबा निःसु॥ हे़क्‍केःल्‍ले़ खे़न् नाङ्‌मा फाॽआङ् पेआङ् खे़न् मिस्रिःन् हिप्‍तु से़रुरो॥

²⁵ खुने़ॽग निङ्‌वाॽफुमाङ्‌ङिल्‍ले़ आबाङे कुमना इस्राइलिहाॽ खुनिॽ योःक्‍पा हिङ्‌मन्‍लाम् चोःक्‌युम्‍भो पिमासि फाॽआङ् खुने़ॽ पाङ्‌घुबा पाःन्‍निन् कुसिङ् मे़निःत्तुर के़लॽबा इःत्तुआङ् वये़, कर खे़ङ्‌हाॽरे़ खे़न् पाःन्‍निन् कुसिङ् मे़न्‍निःत्तुन्‍लो॥

²⁶ हे़क्‍क्‍याङ् कुदाःन्‍दिक् ने़प्‍फु इस्राइलिहाॽ चुङे़त्‍छिर यागे़त्‍छिबा निःसुसिआङ् नादङ् चोःक्‍मासि फाॽआङ् पेआङ् मे़त्तुसि, ‘तेःङ्‌बासे, खिन्‍छिॽग फुॽनुसाॽ के़धाप्‍सि! थेआङ् के़जुङ्‌सिबाबे?’

²⁷ कर खे़न् निङ्‌घुम् के़मे़प्‍पे़ल्‍ले़ मोसाःन् थिक्‍ले़प्‍माङ् चन्‍दुर सेःन्‍दोसु, ‘खे़ने़ॽ हाःत्‍ले़ आनिगे़ सम्‍दाङ् हाङ् के़जोःक्‍पा नु खासे़न्‍लोःम्‍बा के़जोगे़आङ् के़वाॽबे?

²⁸ खे़ने़ॽ मिःप्‍मा मिस्रिःन् के़से़रुबा हे़क्‍के इङ्‌गाॽआङ् के़से़त्ताबाबि?’

²⁹ कन् पाःन्‍निन् खे़प्‍सुआङ् मोसारे़ इङ्‌गाॽ मिस्रिःन् से़रुङ्‌बा पाःन्‍निन्‍नाङ् वेॽ मनाहाॽरे़ निङ्‌वाॽ मे़घोःसुबिला लॽरिक् निङ्‌वाॽ इःत्तुर किःसे़आङ् मिस्रलाम् मिद्यान लाजेॽओ खे़त्‍छिङ् पेआङ् खे़प्‍मोए वाॽमा हेःक्‍ते़, हे़क्‍क्‍याङ् खे़प्‍मोए मेःक्‍खिम् चोगुआङ् ने़प्‍फु कुस्‍साःआङ् पोःक्‍खे़त्‍छिरो॥