15 अक्खेलॽरिक् खिनिॽ ने़त्तिगे़न् हिङ्मन्ले़ कुबुन्निन् से़प्मा के़बाङ्घुम्सिम्, कर निङ्वाॽफुमाङ्ङिल्ले़ खुने़ॽग कुसिवे़त्लाम् कुहिङ्वे़त् चोगुरो॥ खे़न् पाःन्निल्ले़न् तोःन्दि आनिगे़ वयिगे़रो॥
16 हे़क्क्याङ् ये़सुओबा नसाःन्निल्ले़ चोगुल्ले़ कन् कुसिङ् के़निःत्तुम्बा मनाःन् के़धुम्बा पोःक्खे़बा के़निःसुम्माङ् के़वयिॽरो॥ खे़न् ये़सुओबा नसाःन्निल्ले़ कन् मनाःन् बा खिनिॽ तगिए वेःत्ते़आङ् वाॽरो॥
17 आल्ल फुॽनुसाॽसे, खिनिॽ सुहाङ्युक्पाहाॽरे़ ये़सुःन् ताप्फे़ःल्लिक् मे़मे़त्तुबा हे़क्के खिनिॽग थेआङ् मे़न्निए मे़ल्ले़ए कन् के़जोगुम्बारो फाॽआङ् इङ्गाॽ निङ्वाॽ कत्तुङ्लो॥
18 कर निङ्वाॽफुमाङ्ङिल्ले़ सेःन्दुबा ख्रिस्ते़ल्ले़ग तुक्खे चामाआङ् सिःमाए पोःङ् फाॽआङ् निङ्वाॽफुमाङ्ङिल्ले़ माङ्निङ्वाॽपाःन् के़बाःप्पाहाॽलाम् पाःत्तुबान् के़रे़बारो॥
19 खे़ल्ले़ चोगुल्ले़ आल्लो खिनिॽ लायोलाम् हिन्दे़म्मे़ॽआङ् दाङ्बाओ नुःक्खे़म्मे़ॽओ॥ हे़क्केलॽरिक् खिनिॽ लायो लासोःत्हाॽ माबेःक्नि, हे़क्क्याङ् निङ्वाॽफु दाङ्बालाम् याम्साम्मो के़धुम्बा पोःङ्मा ये़म् तानिरो॥
20 हे़क्केलॽरिक् खुने़ॽ तगिसा सेःन्दुबा ख्रिस्ते़न्खिनिॽओ याम्मो के़बाङ्घि के़बिरिॽरो॥
21 हे़क्क्याङ् निङ्वाॽफुमाङ्ङिल्ले़ तगिनुसाए कुसेसे माङ्निङ्वाॽपाःन् के़बाःप्पाहाॽरे़ मे़बाःत्तुबा कुइसिःक् के़रे़क् पाःन्हाॽ याम्मो कुसङ् मे़न्जोःक्के थारिक् ये़सु ख्रिस्ते़न्साङ्ग्राम्पेदाङ्ङो वाॽमा पोःङ् फाॽआङ् पाःत्तुआङ् वाॽ॥
22 मोसारे़आङ् माङ्धुक्नाःल्ले़ कुयाःम्बेओ अक्खे पाःत्तुआङ् वाॽ, ‘निङ्वाॽफुमाङ्ङिल्ले़ इङ्गाॽ हे़क्तङ्बा माङ्निङ्वाॽपाःन् के़बाःप्पे़न्खिनिॽ फुॽनुसाॽलाम् फोःक्खुॽरो॥ कुबाःन्निन् खिनिॽ के़घे़प्सुम्ल पोःङ्लो॥
23 खे़न् माङ्निङ्वाॽपाःन् के़बाःप्पे़ल्ले़ कुबाःन्निन् मे़ङ्घे़म्मनाबाहाॽ निङ्वाॽफुमाङ्ङिल्ले़ कुमनाहाॽलाम् मे़से़न्नाङ् मे़मे़क्लो॥’
24 हे़क्क्याङ् सामुए़ल्लाङ्धो याङ्सिबा काक् माङ्निङ्वाॽपाःन् के़बाःप्पाहाॽरे़ हाबा कन् ये़न्हाॽरे़ कुयाःम्बेओ माङ्निङ्वाॽपाःन् मे़बाःत्तुआङ् मे़वाॽरो॥