6 आल्ल पावले़न् थङ्दुआङ् हर्गुप् चोःन्नाङ् सिःॽ लॽरिक् निङ्वाॽ मे़इःत्तुआङ् मनाहाॽरे़ मे़हाङ्घुरो॥ यरिक् ये़म् मे़हाङ्घुसाङ् खुने़ॽ थे़माआङ् मे़बोःक्खे़म्बा मे़निःसुआङ् खुनिॽ निङ्वाॽइन्मे़ले़क्खुर अक्खे मे़मे़त्छिङ्लो, “कङ्ग से़क्खासाङ् माङ्लो॥”
7 खे़प्मो निःत्ताङ्ङे खे़न् वागप्खाम् युक्पा पब्लियसरे़ कुलाजेॽ ने़स्से़॥ खे़ल्ले़ आनिगे़ कुहिम्मो तेॽरिगे़आङ् साॽरिक् नुःरिक् मे़त्तिगे़र सुम्ये़न् थारिक् तरे याप्मि तोःसे़रो॥
8 पब्लियसरे़ कुम्बा तुङ् नु माक्खिॽ हिबिःप्माल्ले़ तरुआङ् ने़त्नाओ ने़स्से़॥ हे़क्केःल्ले़ पावले़न् कुहिम्मो पेआङ् तुवा चोगु पिरुआङ् हुक् ने़स्सुआङ् वेःन्दुरो॥
9 अक्खे पोःक्खे़ल्ले़ वागप्लाजेॽओबा काक् के़दुक्पा के़यॽबाहाॽ मे़द्ये़आङ् मे़वेःत्ते़रो॥
10 खे़ङ्हाॽरे़ यरिक् इङ्धाःङ् मे़बिरिगे़र मिक्तोःक् नु चे़स्सुङ्हाॽ मे़दोःन्दि मे़बिरिगे़॥ याङ्सि पेःक्मा ये़म् पोःक्खे़ल्ले़ वालाम्दिःक्को चाहाबा के़जोःक्पा के़रे़क् चिगःक्वाहाॽ वालाधाओ मे़याक्तु मे़बिरिगे़रो॥
11 हे़क्क्याङ् खे़प्मो ला सुम्सि थारिक् वयिगे़आङ् खे़प्मो अले़क्जे़न्द्रियालाम् के़दाःबा काप्साबा ग्रिक माङ्हाॽरे़न् खोःम्मनाबा इत्छाप् के़बप्पा वालाधाओ लाःप्मनाआङ् आनिगे़ वालाम्दिःक्को थासिङ्मनारो॥ खे़न् वालाधाःन् चुङ्वाःम्माओ खे़न् वागप्खेःङ्ङो त्ये़आङ् वये़रो॥
