30 हे़क्क्याङ् ये़क्यक्को सिदाक् हयङ्किल्लिङ् पोःक्खे़आङ् काक् पिसाङ्लाम् मनाहाॽ मे़लोःक्ते़र मे़द्ये़रो॥ खे़ङ्हाॽरे़ पावले़न् मे़दे़म्सुआङ् माङ्हिम्लाम् लाःक्कात् मे़उःक्खुर मे़लःत्तुआङ् खिमो माङ्हिम्ले़न् लाम्धेःप्हाॽ मे़सुबुरो॥
31 हे़क्क्याङ् खे़ङ्हाॽरे़ खुने़ॽ से़प्मा मे़गोःत्तुल्ले़ यरुसले़म्मो हयङ्किल्लिङ्के़बोःङ्बार के़बप्पा इङ्घङ्ङिन् रोमि तुरास्मा थक्तुम्बाल्ले़ कुने़क्खोॽओ तोःक्ते़॥
32 खिमो खे़न् थक्तुम्बाल्ले़ कुभा तुम्थक्सुबाहाॽ नु थक्सुबाहाॽ तेॽरुसिआङ् मनाहाॽ मे़वये़बा ते़न्नो लोःक्ते़र के़रे़, हे़क्क्याङ् मनाहाॽरे़ खे़ङ्हाॽ मे़निःसुसिआङ् पावले़न् हिप्मा मे़ले़रुरो॥
33 खे़न् थक्तुम्बे़न् पेआङ् पावले़न् ते़म्सुआङ् ने़त्छि फे़न्सिक्खिहाॽरे़ इघेःङ्मा पाङ्घुसि॥ हे़क्क्याङ् खे़ल्ले़ खे़प्मो के़वाॽबा मनाहाॽ सेःन्दोसुसि, “कन् मनाःन् हाःत्निबे? हे़क्क्याङ् कल्ले़ थे चोगुआङ् वाॽ?”
34 खे़न् मनाहाॽओ कुभारे़ थिक् पाःन् मे़बाःत्तु हे़क्क्याङ् वेॽहाॽरे़ वेॽ पाःन् मे़बाःत्तुर मे़अःक्ते़॥ कन् थे पोःक्खे़बा फाॽआङ् खे़न् थक्तुम्बे़ल्ले़ से़क्खा पाःन् थेआङ् कुसिङ् निःप्मा मे़सुक्तुन्लो॥ खे़ल्ले़ चोगुल्ले़ कुमनाहाॽ पावले़न् थक्सुबा यक्को थाःङ् तेॽमा पाङ्घुसिरो॥
35 हे़क्क्याङ् खे़ङ्हाॽ थरेॽइन् मे़लिङुर मे़बत्छे़ल्ले़ मनाहाॽरे़ आत्तिति हयङ्किल्लिङ् मे़जोगुआङ् पावले़न् से़प्मा मे़गोःत्तुल्ले़ थक्सुबाहाॽरे़ पावले़न् मे़बक्खुआङ् मे़देॽरुरो॥
36 खे़ङ्हाॽ खुनिॽ एःक्एःक् खे़न् मनाःन् से़रे़म्मे़ॽ, से़रे़म्मे़ॽ लॽरिक् मे़अःक्ते़र मे़दिम्दुसिरो॥
37 खे़ङ्हाॽरे़ पावले़न् थक्सुबा यक्को तेॽमा मे़इःत्तुल्ले़ पावलरे़ थक्तुम्बे़न् अक्खे मे़त्तु, “आदाङ्बे, इङ्गाॽ खे़ने़ॽनु कुभा पाःन् पाःप्मा सुक्काबि?” हे़क्क्याङ् खे़न् थक्तुम्बाल्ले़आङ् अक्खे मे़त्तु, “खे़ने़ॽ ग्रिक पाःन्नाङ् पाःप्मा के़ले़स्सुबि?
38 हे़क्केने़ फाॽग्र कुभा तङ्बे तगि हाङ्बिफ्युङ् के़हेःक्पा खे़न् मिस्रि मनाःङ्ग खे़ने़ॽएबिलाबे़ फाॽआङ् निङ्वाॽ इःत्तुङ्लो॥ खे़ल्ले़ ये़ःङ्घादे़न्नो हे़न्छिङ् लिसि (४०००) हाङ्बिफ्युङ्बाहाॽ लाम्लोसुसिआङ् वये़रो॥”
39 पावलरे़ मे़त्तु, “इङ्गाॽ मे़ःन्नाॽरो, इङ्गाॽग यहुदिआ, हे़क्क्याङ् सिलिसिया थुम्मोबा तार्सस्सो सावाःन्छिङ्ङाङ्बा॥ इङ्गाॽ के़ये़क्पा ये़क्यक्कोबा यक्युङ्बाआ॥ आदाङ्बे, कन् मनाहाॽनु इङ्गाॽ पाःप्मा पाङ्घाङ्ङे़ॽओ॥”
