ᤗᤢᤁᤠ 6:15-30 in Limbu

¹⁵ ᤔᤳᤋᤡ. ᤌᤥᤔᤠ ᤀᤸᤑᤠᤕᤛᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ. ᤛᤡᤔᤥᤏ (ᤂᤢᤏᤧ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤈᤡᤗᤋᤡ ᤔᤧᤵᤔᤏᤠᤒᤠ ᤘᤕᤧ).

¹⁶ ᤕᤠᤁᤢᤒᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤘᤕᤧ. ᤜᤧᤰᤁᤩᤠᤱ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡ ᤘᤕᤧ. ᤂᤧᤴ ᤋᤠ᤺ᤴᤍᤡ ᤏᤛᤠ᤺ᤴ ᤁᤧᤗᤧᤱᤒᤠ ᤐᤥ᤺ᤰᤂᤧᤖᤥ॥

¹⁷ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤕᤥ ᤌᤩᤧᤀᤠᤱ ᤏᤧᤏᤧᤒᤠ ᤋᤧᤴᤏᤥ ᤕᤧᤶᤛᤡᤱᤗᤥ॥ ᤂᤧᤵᤔᤥ ᤕᤖᤡᤰ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤁᤠᤰ ᤕᤜᤢᤍᤡᤕᤠ ᤌᤢᤶ. ᤕᤖᤢᤛᤗᤧᤔ. ᤜᤧᤰᤁᤩᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰᤁᤥᤗᤠᤶ ᤕᤖᤡᤰ ᤔᤏᤠᤜᤠ᤹ ᤔᤧᤍᤩᤧᤀᤠᤱ ᤔᤧᤘᤕᤧ॥

¹⁸ ᤂᤧᤱᤜᤠ᤹ ᤂᤢᤏᤧ᤹ ᤁᤢᤄᤧᤶᤛᤧ ᤏᤢ ᤂᤢᤏᤡ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤘᤣ᤺ᤳᤇᤧ ᤔᤧᤍᤩᤧᤀᤠᤱ ᤔᤧᤘᤕᤧ॥ ᤂᤧᤵᤔᤥ ᤑᤧᤴᤛᤠᤶᤔᤡᤸᤗᤧ ᤋᤢᤰᤂᤣ ᤆᤠ᤺ᤳᤋᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤔᤧᤘᤣ᤺ᤳᤋᤧᤖᤥ॥

¹⁹ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤢ᤺ᤔᤠ ᤔᤧᤃᤥ᤺ᤳᤋᤢ ᤌᤣᤀᤠᤱᤓᤧᤸᤗᤧ ᤁᤧᤘᤣ᤺ᤶᤒᤠ ᤔᤢᤰᤛᤠᤶ ᤂᤢᤏᤧ᤹ᤀᤥᤗᤠᤶ ᤗ᤺ᤴᤍᤧᤖ ᤐᤳᤇᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤘᤣ᤺ᤴᤍᤢᤛᤡᤖᤥ॥

²⁰ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤕᤠᤱᤁᤧᤛᤠ᤹ᤒᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ᤀᤡᤴᤏᤧᤖᤥ॥

²¹ ᤀᤠᤸᤗ ᤛᤠᤰᤁᤡᤸᤗᤧ ᤋᤖᤢᤛᤡᤒᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡ ᤂᤡᤏᤡ᤹ ᤁᤧᤄᤠᤛᤡᤀᤠᤱ ᤂᤡᤏᤡ᤹ ᤏᤡᤱᤛᤶᤗᤥ॥ ᤀᤠᤸᤗᤥ ᤔᤣᤖᤡᤱ ᤌᤰᤏᤢ ᤁᤧᤜᤠ᤺ᤵᤐᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤀᤣᤖᤡ᤹ᤖᤥ॥

²² ᤔᤧᤴᤇᤠᤶᤛᤠ᤺ᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹ᤒᤠ. ᤁᤧᤶᤏᤠ᤹ᤖᤡᤒᤠ ᤜᤧᤰᤁᤩᤠᤱ ᤂᤡᤏᤡ᤹ ᤏᤠᤔᤧᤎᤠᤛᤢᤀᤠᤱ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳᤋᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ॥

²³ ᤂᤧᤴ ᤕᤧᤶᤔᤥ ᤛ᤺ᤳᤋᤧᤶᤔᤧ᤹ᤀᤥ. ᤀᤥᤔᤢ ᤗ᤹ᤖᤧᤶᤔᤧ᤹ᤀᤠᤱ ᤗᤠ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤌᤢᤶᤄᤥ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤕᤶ ᤕᤶᤒᤠ ᤆᤥ᤺ᤰᤗᤥ॥ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧᤀᤠᤱ ᤀᤢᤴᤇᤥ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤜᤠᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤀᤠᤱ ᤔᤧᤘᤕᤧᤖᤥ॥

²⁴ ᤁᤖ ᤀᤠᤸᤗᤥ ᤕᤠᤱᤛᤠᤁᤢᤴᤎᤣᤛᤠᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛ᤺ᤵᤔᤠᤴ ᤏᤢ ᤏᤡᤱᤘᤠ᤹ ᤋᤠ᤺ᤔᤠᤴ ᤂᤡᤏᤡ᤹ ᤜᤡᤱᤔᤴᤏᤥᤀᤣ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥

²⁵ ᤀᤠᤸᤗᤥ ᤁᤧᤄᤠᤒᤠᤀᤠᤱ ᤁᤧᤘᤠ᤹ᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤠᤰᤔᤧᤴᤈᤠ ᤁᤧᤒᤥ᤺ᤰᤂᤡ᤹ᤖᤥ॥ ᤀᤠᤸᤗᤥ ᤁᤧᤀᤣ᤺ᤵᤐᤠᤖ ᤁᤧᤘᤠ᤹ᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤣᤖᤡᤱ ᤌᤰᤏᤢ ᤁᤧᤜᤠᤒᤡ᤹ᤖᤥ॥

²⁶ ᤀᤠᤸᤗᤥ ᤔᤏᤠᤜᤠ᤹ᤖᤧ ᤏᤢ᤺ᤖᤡᤰ ᤔᤧᤔᤧᤳᤋᤢᤛᤡᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧᤀᤠᤱ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤖᤥ॥”

²⁷ “ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴ ᤁᤧᤄᤧᤶᤒᤠᤛᤣ. ᤂᤡᤏᤡ᤹ ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥ ᤕᤠᤵᤔᤡ ᤁᤧᤈᤡ᤺ᤵᤐᤠᤜᤠ᤹ ᤏᤢ᤺ᤖᤡᤰ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

²⁸ ᤂᤡᤏᤡ᤹ ᤛᤠᤱᤃᤪᤠ ᤁᤧᤔᤧᤵᤐᤠᤜᤠ᤹ ᤔᤢ᤹ᤀᤡᤛᤠᤶ ᤌᤠᤛᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠᤜᤠ᤹ ᤋᤢᤘᤠ ᤆᤥᤃᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥

²⁹ ᤜᤠ᤺ᤳᤗᤧ ᤁᤧᤏᤧᤍᤧᤱᤒᤠᤴ ᤁᤧᤗᤧᤱ ᤁᤧᤒᤡ᤹. ᤂᤧᤏᤧ᤹ ᤘᤣ᤹ ᤗᤧᤵᤔᤠᤱᤒᤠ ᤁᤧᤏᤧᤍᤧᤱᤒᤠᤴᤏᤠᤱ ᤂᤧᤴ ᤋᤥ᤺ᤴᤍᤧ ᤐᤡᤖᤧ᤹॥ ᤜᤠ᤺ᤳᤗᤧ ᤛᤠᤰᤁᤧᤸᤗᤧᤰ ᤁᤧᤛᤢᤱᤄᤣ᤺ᤰᤘᤠ᤺ᤴ ᤁᤧᤏᤠᤵᤐᤠᤱ ᤋᤣ᤹ᤖᤢ᤹. ᤂᤧᤴᤏᤡᤴ ᤁᤧᤈᤠᤱᤔᤠ ᤋᤣ᤺ᤳᤋᤡᤴᤏᤠᤱ ᤐᤡᤖᤧᤍᤣ᤺ᤛᤧ᤹ᤀᤥ॥

³⁰ ᤜᤧᤰᤁᤩᤠᤱ ᤁᤧᤏᤠ᤺ᤰᤐᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤁᤧᤈᤡᤃ᤺ᤰᤘᤠᤜᤠ᤹ ᤁᤧᤍᤣ᤹ᤒᤠᤜᤠ᤹ ᤕᤠᤶᤔᤥ ᤕᤠᤱᤏᤠ ᤔᤧᤏᤠ᤺ᤰᤋᤧᤛᤧᤴᤏᤧ᤹ᤀᤥ॥

¹⁵ मत्ति, थोमा अल्‍फायसरे़ कुस्‍साः याकुब, सिमोन (खुने़ॽ हाङ्‌बिफ्‍युङ् के़जोःक्‍पा जिलति मे़प्‍मनाबा वये़),

¹⁶ याकुबरे़ कुस्‍साः यहुदा वये़, हे़क्‍क्‍याङ् यहुदा इस्‍करियोति वये़, खे़न् ताःन्‍दि नसाःन् के़ले़ङ्‌बा पोःक्‍खे़रो॥

¹⁷ हे़क्‍क्‍याङ् खुने़ॽ खे़ङ्‌हाॽनु यो थ्‍ये़आङ् ने़ने़बा ते़न्‍नो ये़म्‍सिङ्‌लो॥ खे़प्‍मो यरिक् कुहुॽसाम्‍बाहाॽ नु काक् यहुदिया थुम्, यरुसले़म, हे़क्‍क्‍याङ् वरक्‍किल्‍ले़ कुयाओ के़ने़बा तायर नु सिदोन ये़क्‌यक्‍कोलाम् यरिक् मनाहाॽ मे़द्‌ये़आङ् मे़वये़॥

¹⁸ खे़ङ्‌हाॽ खुने़ॽ कुघे़म्‍से़ नु खुनिॽ तुक्‍मा यॽमालाम् वेःत्‍छे़ मे़द्‌ये़आङ् मे़वये़॥ खे़प्‍मो फे़न्‍साम्‍मिल्‍ले़ तुक्‍खे चाःत्तुसिबा मनाहाॽआङ् मे़वेःत्ते़रो॥

¹⁹ खे़ङ्‌हाॽरे़ ये़सुःन् सुःमा मे़गोःत्तु थेआङ्‌भे़ल्‍ले़ के़वेःम्‍बा मुक्‍साम् खुने़ॽओलाम् लःन्‍दे़र पत्‍छे़, हे़क्‍क्‍याङ् खे़ङ्‌हाॽ के़रे़क् वेःन्‍दुसिरो॥

²⁰ ये़सुरे़ कुहुॽसाम्‍बाहाॽ ओमे़त्तुसिर मे़त्तुसि, “याङ्‌के़साॽबासे, खिनिॽ मुॽइसाबानिङ्‌लो, थेआङ्‌भे़ल्‍ले़ निङ्‌वाॽफुहाङ्‌जुम्‍मिन् खिनिॽइन्‍ने़रो॥

²¹ आल्‍ल साक्‍किल्‍ले़ तरुसिबासे, खिनिॽ मुॽइसाबानिङ्‌लो, थेआङ्‌भे़ल्‍ले़ ताःन्‍दि खिनिॽ के़घासिआङ् खिनिॽ निङ्‌सम्‍लो॥ आल्‍लो मेरिङ् थक्‍नु के़हाःप्‍पासे, खिनिॽ मुॽइसाबानिङ्‌लो, थेआङ्‌भे़ल्‍ले़ खिनिॽ के़एरिॽरो॥

²² मे़न्‍छाम्‍साःल्‍ले़ चोगुल्‍ले़ मनाहाॽरे़ के़म्‍जिःत्तिॽबा, के़म्‍नाॽरिबा हे़क्‍क्‍याङ् खिनिॽ नामे़धासुआङ् ताप्‍फे़ःल्‍लिक् के़म्‍मे़त्तिबाहाॽ मुॽइसाबानिङ्‌लो॥

²³ खे़न् ये़म्‍मो सःत्ते़म्‍मे़ॽओ, ओमु लॽरे़म्‍मे़ॽआङ् लाःक्‍खे़म्‍मे़ॽओ, थेआङ्‌भे़ल्‍ले़ खिनिॽ थुम्‍घोःन् साङ्‌ग्राम्‍पेदाङ्‌ङो पयम् यम्‍बा चोःक्‍लो॥ खुनिॽ थाःक्‍थे़बाहाॽरे़आङ् उन्‍छोःन्‍बा माङ्‌निङ्‌वाॽपाःन् के़बाःप्‍पाहाॽ हाबा हे़क्‍केए मे़मे़त्तुसिआङ् मे़वये़रो॥

²⁴ कर आल्‍लो याङ्‌साकुन्‍धेसाबासे, चिःत्ताङ्‌लक् स्‍ये़रो, थेआङ्‌भे़ल्‍ले़ खिनिॽ सःप्‍मान् नु निङ्‌वाॽ ताःमान् खिनिॽ हिङ्‌मन्‍नोए के़घोःसुम्‍माङ् के़वयिॽरो॥

²⁵ आल्‍लो के़घाबाआङ् के़वाॽबासे, चिःत्ताङ्‌लक् स्‍ये़रो, थेआङ्‌भे़ल्‍ले़ खिनिॽ साक्‍मे़न्‍जा के़बोःक्‍खिॽरो॥ आल्‍लो के़एःप्‍पार के़वाॽबासे, चिःत्ताङ्‌लक् स्‍ये़रो, थेआङ्‌भे़ल्‍ले़ खिनिॽ मेरिङ् थक्‍नु के़हाबिॽरो॥

²⁶ आल्‍लो मनाहाॽरे़ नुःरिक् मे़मे़त्तुसिबासे, चिःत्ताङ्‌लक् स्‍ये़रो, थेआङ्‌भे़ल्‍ले़ खुनिॽ थाःक्‍थे़बाहाॽरे़आङ् इङ्‌ले़क्‍पा माङ्‌निङ्‌वाॽपाःन् के़बाःप्‍पाहाॽ बा हे़क्‍केए मे़मे़त्तुसिरो॥”

²⁷ “कर इङ्‌गाॽ आबाःन् के़घे़म्‍बासे, खिनिॽ निङ्‌मिहाॽ लुङ्‌माॽ तुक्‍ते़म्‍सिम्‍मे़ॽओ॥ याप्‍मि के़जिःप्‍पाहाॽ नुःरिक् मे़त्ते़म्‍सिम्‍मे़ॽओ॥

²⁸ खिनिॽ साङ्‌ग्रा के़मे़प्‍पाहाॽ मुॽइसाम् थासे़म् पिरे़म्‍सिम्‍मे़ॽओ॥ खिनिॽ ताप्‍फे़ःल्‍लिक् के़मे़प्‍पाहाॽ तुवा चोगे़म् पिरे़म्‍सिम्‍मे़ॽओ॥

²⁹ हाःत्‍ले़ के़ने़दे़ङ्‌बान् के़ले़ङ् के़बिॽ, खे़ने़ॽ वेॽ ले़प्‍माङ्‌बा के़ने़दे़ङ्‌बान्‍नाङ् खे़न् तोःन्‍दे़ पिरे़ॽ॥ हाःत्‍ले़ साक्‍के़ल्‍ले़क् के़सुङ्‌घेःक्‌वाःन् के़नाप्‍पाङ्‌तेॽरुॽ, खे़न्‍निन् के़जाङ्‌मा तेःत्तिन्‍नाङ् पिरे़देःसे़ॽओ॥

³⁰ हे़क्‍क्‍याङ् के़नाःक्‍पाहाॽ पिरे़से़ॽओ॥ हे़क्‍क्‍याङ् के़जिगःक्‌वाहाॽ के़देॽबाहाॽ याम्‍मो याङ्‌ना मे़नाःक्‍ते़से़न्‍ने़ॽओ॥