ᤗᤢᤁᤠ 5:1-13 in Limbu

¹ ᤌᤡᤰ ᤕᤧᤴ ᤕᤧᤛᤢ᤺ᤴ ᤃᤏᤧᤛᤖᤧᤋ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤛᤢᤏᤠᤀᤡᤱ ᤛᤧ᤺ᤛᤢᤖ ᤕᤧᤒᤧᤸᤗᤧ ᤂᤧᤵᤔᤥ ᤔᤏᤠᤜᤠ᤹ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤧᤶᤛᤧ ᤔᤧᤍᤩᤧᤀᤠᤱ ᤂᤢᤏᤧ᤹ ᤆᤡᤒᤢ᤺ᤳ ᤔᤧᤒᤴᤇᤢᤖᤥ॥

² ᤂᤧᤵᤔᤥ ᤁᤢᤕᤠᤀᤥ ᤏᤧᤳᤇᤡ ᤂ᤺ᤱᤒᤣᤜᤠ᤹ ᤕᤧᤛᤢᤖᤧ ᤏᤡ᤺ᤛᤢᤛᤡ. ᤁᤖ ᤁᤢᤒᤣᤛᤠᤱ ᤕᤥ᤺ᤱᤃᤧᤗᤧᤵᤐᤠᤜᤠ᤹ ᤂᤢᤏᤡ᤹ ᤕᤥ᤺ᤱ ᤘᤠᤜᤵᤏᤢ ᤔᤧᤕᤠᤃᤧ॥

³ ᤕᤧᤛᤢ᤺ᤴ ᤛᤡᤔᤥᤏᤖᤧ ᤁᤢᤄ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤔᤡᤛᤠᤰ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠᤀᤥ ᤋᤣ᤹ᤒᤠᤱᤄᤢ. ᤜᤧᤰᤁᤩᤠᤱ ᤂᤧᤵᤔᤥ ᤕᤢᤱᤛᤡᤱᤅᤠᤱ ᤔᤏᤠᤜᤠ᤹ ᤜᤢ᤹ᤖᤢᤛᤡ॥

⁴ ᤂᤢᤏᤧ᤹ ᤐᤠ᤺ᤵᤔᤠ ᤛᤢᤖᤢᤀᤠᤱ ᤛᤡᤔᤥᤏᤧᤴ ᤔᤧᤳᤋᤢ. “ᤂ᤺ᤱᤒᤣᤴ ᤏᤠ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠᤀᤥ ᤋᤣ᤹ᤖᤧᤀᤠᤱ ᤕᤥ᤺ᤱᤅᤡᤴ ᤗᤧᤵᤋᤧ᤹॥”

⁵ ᤜᤧᤰᤁᤣ᤺ᤸᤗᤧ ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤏᤠᤶᤍᤠ᤺ᤳᤋᤠ᤺ᤳ ᤕᤥ᤺ᤱ ᤗᤧᤵᤔᤏᤠᤛᤠᤱ ᤅᤠᤎᤡᤰᤁᤠᤱ ᤔᤧᤕᤠᤱᤄᤢᤶᤒᤧᤴᤗᤥ. ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤗᤧᤵᤋᤢᤱᤛᤠ᤹ᤖᤢᤱᤗᤥ॥”

⁶ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤜᤧᤰᤁᤣ ᤕᤥ᤺ᤱᤅᤡᤴ ᤗᤧᤵᤋᤢᤸᤗᤧ ᤕᤖᤡᤰ ᤅᤠᤜᤠ᤹ ᤔᤧᤎᤩᤧᤀᤠᤱ ᤕᤥ᤺ᤱᤅᤡᤴᤏᤣ ᤋᤧ᤺ᤱᤔᤠ ᤀᤡ᤺ᤳᤋᤧᤖᤥ॥

⁷ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤘᤣ᤹ ᤂᤢᤏᤡ᤹ ᤋᤣ᤺ᤱᤈᤢᤶᤜᤠ᤹ ᤘᤣ᤹ ᤂ᤺ᤱᤒᤣᤴ ᤑᤧᤳᤋᤧᤶᤔᤧ᤹ᤀᤠᤱ ᤀᤠᤓᤠ᤹ᤖᤧᤶᤔᤧ᤹ᤀᤥ ᤗ᤹ᤖᤡᤰ ᤜᤢᤰᤆᤠ᤺ᤸᤁᤡ᤺ᤸᤗᤧ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤓᤧᤖᤧᤀᤠᤱ ᤏᤧᤵᤔᤠᤱ ᤂ᤺ᤱᤒᤣᤜᤠ᤹ ᤅᤠ᤺ᤸᤗᤧ ᤋᤡᤶᤛᤧᤀᤠᤱ ᤏᤡ᤺ᤶᤔᤠ ᤀᤡ᤺ᤳᤋᤧ॥

⁸ ᤛᤡᤔᤥᤏ ᤐᤋᤪᤢᤛᤖᤧ ᤁᤴ ᤏᤡ᤺ᤛᤢᤀᤠᤱ ᤕᤧᤛᤢᤖᤧ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤛᤠ᤹ᤖᤡᤰ ᤗᤠᤕᤥᤒᤠ ᤔᤏᤠᤀᤠᤖᤥ. ᤂᤧᤏᤧ᤹ᤏᤢ ᤘᤠ᤹ᤔᤠ ᤔᤧᤗᤠ᤹ᤀᤠᤴᤗᤥ. ᤗᤧᤖᤠᤱ ᤌᤩᤠᤱᤅᤧ᤹ᤀᤥ॥”

⁹ ᤌᤣᤀᤠᤱᤓᤧᤸᤗᤧ ᤛᤡᤔᤥᤏ ᤏᤢ ᤁᤢᤴᤈᤢᤶᤜᤠ᤹ᤖᤧ ᤔᤧᤎᤠᤛᤢᤛᤡᤒᤠ ᤅᤠᤜᤠ᤹ ᤔᤧᤀᤡ᤺ᤳᤋᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥

¹⁰ ᤛᤡᤔᤥᤏᤖᤧ ᤁᤢᤴᤈᤢᤶ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺ᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤛᤡᤖᤧᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧ॥ ᤕᤧᤛᤢᤖᤧ ᤛᤡᤔᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹. ᤅᤠ ᤁᤧᤍᤧᤶᤛᤢᤒᤠ ᤜᤧᤰᤁᤣᤀᤣ ᤀᤠᤸᤗᤀᤠᤱᤎᤥ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤏᤠ ᤁᤧᤍᤧᤶᤒᤠ ᤁᤧᤍᤠ᤺ᤵᤐᤠ ᤁᤧᤒᤥ᤺ᤱᤗᤥ॥”

¹¹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂ᤺ᤱᤒᤣᤜᤠ᤹ ᤁᤢᤕᤠᤀᤥ ᤔᤧᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤗᤧᤖᤢ ᤔᤧᤎ᤺ᤀᤠᤱ ᤕᤧᤛᤢ᤺ᤴ ᤔᤧᤏᤠ᤺ᤳᤋᤢᤖᤥ॥

¹² ᤌᤡᤰ ᤕᤧᤴ ᤕᤧᤛᤢ᤺ᤴ ᤗᤳᤇᤠ ᤐᤠᤱᤈᤢᤶᤔᤥ ᤘᤕᤧᤸᤗᤧ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠᤎᤡᤰ ᤂᤧᤵᤔᤥ ᤋᤩᤧ॥ ᤂᤧᤸᤗᤧ ᤕᤧᤛᤢ᤺ᤴ ᤏᤡ᤺ᤛᤢᤀᤠᤱ ᤁᤢᤍᤃᤡ ᤛᤠᤶᤒᤥ᤺ᤴ ᤑᤴᤇᤡᤱᤗ ᤐᤣᤗᤡ ᤑᤠᤰᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤗᤥᤃᤣ᤹ᤗᤠᤶ ᤘᤣ᤺ᤶᤔᤠ ᤁᤧᤛᤢᤰᤁᤠᤖᤥ॥”

¹³ ᤕᤧᤛᤢᤖᤧᤀᤠᤱ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤛᤢ᤺ᤛᤢᤖ ᤂᤧᤴ ᤔᤏᤠ᤺ᤴ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤁᤧᤏᤢ᤹ᤖ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥” ᤜᤧᤰᤁᤩᤠᤱ ᤂᤡᤔᤥ ᤂᤧᤴ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠ᤺ᤴ ᤏᤢ᤺ᤖᤧᤖᤥ॥

¹ थिक् ये़न् ये़सुःन् गने़सरे़त वाहङ्‌ङिल्‍ले़ कुयाओ सुनाइङ् से़ःसुर ये़बे़ल्‍ले़ खे़प्‍मो मनाहाॽ निङ्‌वाॽफु पाःन्‍जाक्‍किन् खे़म्‍से़ मे़द्‌ये़आङ् खुने़ॽ चिबुःत् मे़बन्‍छुरो॥

² खे़प्‍मो कुयाओ ने़त्‍छि खःङ्‌बेहाॽ ये़सुरे़ निःसुसि, कर कुबेसाङ् योःङ्‌गे़ले़प्‍पाहाॽ खुनिॽ योःङ् वाहप्‍नु मे़यागे़॥

³ ये़सुःन् सिमोनरे़ कुघःङ्‌बेओ लाःसे़आङ् मिसाक् कुदिःम्‍बे केःम्‍बाओ तेॽबाङ्‌घु, हे़क्‍क्‍याङ् खे़प्‍मो युङ्‌सिङ्‌ङाङ् मनाहाॽ हुॽरुसि॥

⁴ खुने़ॽ पाःप्‍मा सुरुआङ् सिमोने़न् मे़त्तु, “खःङ्‌बेन् ना कुदिःम्‍बे केःम्‍बाओ तेॽरे़आङ् योःङ्‌ङिन् ले़प्‍ते़ॽ॥”

⁵ हे़क्‍केःल्‍ले़ सिमोनरे़ नोगप् पिरु, “आदाङ्‌बे, आनिगे़ग नाम्‍दाःत्ताःत् योःङ् ले़प्‍मनासाङ् ङाधिक्‍काङ् मे़याङ्‌घुम्‍बे़न्‍लो, हे़क्‍केसाङ् खे़ने़ॽ के़बाःत्तुबा हे़क्‍के ले़प्‍तुङ्‌साॽरुङ्‌लो॥”

⁶ हे़क्‍क्‍याङ् खुने़ॽ पाःत्तुबा हे़क्‍के योःङ्‌ङिन् ले़प्‍तुल्‍ले़ यरिक् ङाहाॽ मे़ध्‍ये़आङ् योःङ्‌ङिन्‍ने ते़ःङ्‌मा इःत्ते़रो॥

⁷ हे़क्‍केःल्‍ले़ खे़ङ्‌हाॽरे़ वेॽ खुनिॽ तेःङ्‌जुम्‍हाॽ वेॽ खःङ्‌बेन् फे़त्ते़म्‍मे़ॽआङ् आभाॽरे़म्‍मे़ॽओ लॽरिक् हुक्‍चाःल्‍किःल्‍ले़ मे़उःत्तुसि॥ हे़क्‍क्‍याङ् खे़ङ्‌हाॽ मे़भे़रे़आङ् ने़प्‍माङ् खःङ्‌बेहाॽ ङाःल्‍ले़ तिम्‍से़आङ् निःम्‍मा इःत्ते़॥

⁸ सिमोन पत्रुसरे़ कन् निःसुआङ् ये़सुरे़ कुदगि थुङ्‌बोहजॽ युङ्‌सिङ्‌ङाङ् मे़त्तु, “आदाङ्‌बे, इङ्‌गाॽग साॽरिक् लायोबा मनाआरो, खे़ने़ॽनु वाॽमा मे़लाॽआन्‍लो, ले़राङ् थ्‍याङ्‌ङे़ॽओ॥”

⁹ थेआङ्‌भे़ल्‍ले़ सिमोन नु कुन्‍जुम्‍हाॽरे़ मे़धासुसिबा ङाहाॽ मे़इःत्तुआङ् साॽरिक् खुनिॽ निङ्‌वाॽ मये़रो॥

¹⁰ सिमोनरे़ कुन्‍जुम् जब्‍दियारे़ कुस्‍साःहाॽ याकुब नु युहुन्‍नासिरे़आङ् खुन्‍छिॽ निङ्‌वाॽ मये़॥ ये़सुरे़ सिमोने़न् मे़त्तु, “खे़ने़ॽ मे़गिसे़न्‍ने़ॽ, ङा के़दे़म्‍सुबा हे़क्‍केए आल्‍लआङ्‌धो निङ्‌वाॽफुहाङ्‌जुम्‍मो मना के़दे़म्‍बा के़दाःप्‍पा के़बोःङ्‌लो॥”

¹¹ हे़क्‍क्‍याङ् खे़ङ्‌हाॽरे़ खःङ्‌बेहाॽ कुयाओ मे़देॽरुसि, हे़क्‍क्‍याङ् के़रे़क् मे़ले़रु मे़धःआङ् ये़सुःन् मे़नाःत्तुरो॥

¹² थिक् ये़न् ये़सुःन् लत्‍छा पाङ्‌जुम्‍मो वये़ल्‍ले़ लोगेॽरे़ तरुबा मनाधिक् खे़प्‍मो त्‍ये़॥ खे़ल्‍ले़ ये़सुःन् निःसुआङ् कुदगि साम्‍बोःन् फन्‍छिङ्‌ल पेलि फाक्‍तु, “आदाङ्‌बे, खे़ने़ॽ निङ्‌वाॽ के़जोगुने़ फाॽग्र लोगेॽलाम् वेःम्‍मा के़सुक्‍कारो॥”

¹³ ये़सुरे़आङ् कुहुक्‍किन् सन्‍छुआङ् सुःसुर खे़न् मनाःन् अक्‍खे मे़त्तु, “इङ्‌गाॽ के़नुॽर फाॽआङ् निङ्‌वाॽ चोगुङ्‌लो॥” हे़क्‍क्‍याङ् खिमो खे़न् लोगेॽरे़ तरुबा मनाःन् नुःरे़रो॥