ᤗᤢᤁᤠ 23:27-41 in Limbu

²⁷ ᤜᤧᤰᤁᤩᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥ ᤂᤧᤵᤔᤥ ᤁᤧᤜᤠ᤺ᤵᤔᤠᤖ ᤔᤣᤖᤡᤱ ᤁᤧᤎᤰᤔᤠ ᤔᤧᤴᤇᤢᤔᤠᤜᤠ᤹ᤀᤠᤱ ᤔᤧᤘᤕᤧᤖᤥ॥

²⁸ ᤁᤖ ᤕᤧᤛᤢᤖᤧ ᤂᤡᤖᤡ ᤜᤡᤛᤡᤱᤅᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤖᤢᤛᤗᤧᤶᤔᤡᤸᤗᤧ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤛᤣ. ᤂᤡᤏᤡ᤹ ᤀᤠᤗᤠᤃᤡ ᤔᤧᤜᤠᤒᤧᤶᤔᤡᤴᤏᤧ᤹. ᤁᤖ ᤂᤡᤏᤡ᤹ ᤀᤠᤒᤠᤅᤣ ᤗᤠᤃᤡ ᤏᤢ ᤂᤡᤏᤡ᤹ ᤛᤠ᤺ᤜᤠ᤹ᤖᤧ ᤗᤠᤃᤡ ᤜᤠᤒᤧᤶᤔᤧ᤹ᤀᤥ.

²⁹ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤛᤠ᤺ᤔᤧᤱᤃᤵᤔᤏᤠᤔᤠᤜᤠ᤹ ᤜᤧᤰᤁᤩᤠᤱ ᤀᤅᤧ᤺ᤰᤘᤠ ᤏᤢᤔᤧᤴᤎᤢᤰᤏᤠᤔᤠᤜᤠ᤹ ᤔᤢᤀᤡ᤹ᤛᤠᤔᤠᤛᤡᤖᤥ ᤗ᤹ᤖᤡᤰ ᤐᤠ᤺ᤵᤔᤠ ᤕᤧᤶ ᤋᤠᤖ ᤐᤳᤗᤥ॥

³⁰ ᤂᤧᤴ ᤕᤧᤶᤔᤥ ᤔᤏᤠᤜᤠ᤹ᤖᤧ ᤏᤠᤱᤈᤱᤜᤠ᤹ ᤀᤠᤏᤡᤃᤧ ᤛᤶᤍᤠᤱ ᤔᤰᤌᤩᤧ᤹ᤀᤥ᥄ ᤜᤧᤰᤁᤩᤠᤱ ᤁᤥ᤺ᤰᤔᤠᤜᤠ᤹ ᤕᤠᤵᤔᤡ ᤀᤠᤗᤢᤵᤋᤧᤀᤥ᥄ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤖᤥ॥

³¹ ᤌᤣᤀᤠᤱᤓᤧᤸᤗᤧ ᤛᤖᤡ᤺ᤳᤁᤩᤠ᤺ᤵᤐᤠ ᤁᤢᤜᤡᤱᤘᤧᤳ ᤛᤡᤱᤅᤡᤴᤏᤣ ᤀᤰᤂᤣ ᤔᤧᤔᤧᤳᤋᤢᤸᤗᤧ. ᤁᤧᤜᤣᤒᤠ ᤛᤡᤱᤅᤡᤱᤃ ᤀᤠᤰᤂᤣ ᤔᤧᤔᤧᤳᤋᤢᤀᤡᤖᤥ᥅”

³² ᤂᤢᤏᤧ᤹ᤏᤢᤀᤣ ᤏᤧᤵᤑᤢ ᤁᤢᤓᤠᤱ ᤁᤧᤓᤣ᤺ᤶᤒᤠᤜᤠ᤹ᤀᤠᤱ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤔᤧᤍᤣ᤹ᤖᤢᤛᤡ॥

³³ ᤂᤧᤱᤜᤠ᤹ ᤔᤡᤰᤂᤥ᤺ᤰᤐᤠ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤀᤥ ᤔᤧᤃᤧᤖᤧᤀᤠᤱ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤖᤥ॥ ᤂᤧᤴ ᤏᤧᤵᤑᤢ ᤁᤢᤓᤠᤱ ᤁᤧᤓᤣ᤺ᤶᤒᤠᤜᤠ᤹ ᤕᤧᤛᤢᤖᤧ ᤁᤢᤈᤢᤵᤛᤠᤱ ᤏᤢ ᤁᤢᤓᤧᤴᤇᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤔᤧᤓᤥ᤺ᤴᤍᤢᤛᤡᤖᤥ॥

³⁴ ᤜᤧᤰᤁᤩᤠᤱ ᤕᤧᤛᤢᤖᤧ ᤐᤠ᤺ᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤦ. ᤁᤱᤜᤠ᤹ ᤗᤧᤵᤔᤡ ᤐᤡᤖᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤖᤧ ᤌᤧᤔᤠ ᤔᤧᤈᤥᤃᤢᤖ ᤔᤧᤒᤳ ᤌᤣᤀᤠᤱ ᤔᤧᤴᤏᤡ᤺ᤛᤢᤴᤗᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤍᤣ᤺ᤳᤜᤠ᤹ ᤜᤠ᤺ᤳᤇᤡᤱᤔᤠ ᤑᤠ᤹ᤀᤠᤱ ᤋ᤹ᤕᤠ᤺ᤴᤛᤥ᤺ᤴ ᤔᤧᤃᤧᤛᤢᤖᤥ॥

³⁵ ᤔᤠ᤺ᤱᤄᤠᤗᤠᤶ ᤔᤏᤠᤜᤠ᤹ ᤀᤥᤔᤧᤔᤕᤧᤖ ᤔᤧᤕᤧᤒᤧ. ᤁᤖ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤀᤰᤂᤣ ᤔᤧᤔᤧᤳᤋᤢ. “ᤂᤧᤸᤗᤧ ᤘᤣ᤹ ᤔᤏᤠᤜᤠ᤹ᤃ ᤛᤧ᤺ᤵᤋᤢᤛᤡ. ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ ᤑᤠ᤹ᤃᤪ ᤀᤠᤒᤠᤅᤣ ᤛᤧ᤺ᤵᤛᤡᤱᤗ᥄”

³⁶ ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤖᤧ ᤔᤧᤎᤠᤅᤧᤀᤠᤱ ᤁᤡᤏᤠ᤺ᤴᤍᤡ ᤔᤧᤒᤡᤖᤢ ᤜᤧᤰᤁᤩᤠᤱ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤎᤢᤱᤄᤢᤖ

³⁷ ᤔᤧᤔᤧᤳᤋᤢ. “ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧ ᤑᤠ᤹ᤃᤪ ᤀᤠᤒᤠᤅᤣ ᤛᤧ᤺ᤵᤛᤡᤱᤅᤧ᤹ᤀᤥ॥”

³⁸ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤧᤃᤣ᤺ᤰ ᤛᤶᤍᤠᤱ ᤁᤱᤃ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤗᤥ ᤗ᤹ᤖᤡᤰ ᤀᤠᤵᤋᤡᤰ ᤛᤰᤁᤡᤴ ᤔᤧᤛᤠᤵᤋᤢᤀᤠᤱ ᤔᤧᤓᤳᤇᤢ॥

³⁹ ᤂᤧᤵᤔᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤒᤠ ᤁᤢᤓᤠᤱ ᤁᤧᤓᤣ᤺ᤶᤒᤠᤎᤡᤰᤗᤧ ᤂᤢᤏᤧ᤹ ᤐᤠ᤺ᤴᤏᤡᤸᤗᤧ ᤗᤰᤋᤢᤖ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ ᤔᤧ᤺ᤶᤒᤡ᥅ ᤂᤧᤏᤧ᤹ ᤛᤧ᤺ᤵᤛᤡᤱᤅᤧ᤹ᤀᤠᤱ ᤀᤠᤴᤇᤡᤃᤧᤀᤠᤱ ᤕᤠᤵᤔᤡ ᤀᤠᤛᤧ᤺ᤵᤋᤧ᤹॥”

⁴⁰ ᤁᤖ ᤘᤣ᤹ᤛ᤻ᤔᤠ ᤁᤢᤓᤠᤱ ᤁᤧᤓᤣ᤺ᤶᤒᤠᤸᤗᤧ ᤂᤧᤴ ᤑᤧ᤺ᤰᤋᤢᤖ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤱᤃᤡᤖᤢᤴᤒᤡ᥅ ᤀᤠᤏᤡ᤹ ᤛᤢᤶᤒᤪᤠᤱᤅᤧ ᤗᤳᤇᤠ ᤐᤖᤡᤰᤐᤠ ᤂᤢᤶᤍᤡᤱᤅᤥ ᤀᤠᤎᤩᤧᤀᤠᤱ ᤀᤠᤘᤠ᤹.

⁴¹ ᤆᤩᤠᤛᤠᤱ ᤀᤠᤴᤇᤡ᤹ᤃ ᤀᤠᤈᤥᤃᤧᤳᤇᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤀᤠᤄᤥ᤺ᤛᤧᤳᤇᤢᤒᤠᤖᤥ. ᤁᤖ ᤂᤢᤏᤧ᤹ᤃ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹ᤖᤥ॥”

²⁷ हे़क्‍क्‍याङ् खे़प्‍मो यरिक् मनाहाॽरे़ खुने़ॽ मे़दिम्‍दुरो॥ खे़प्‍मो के़हाःप्‍मार मेरिङ् के़धक्‍मा मे़न्‍छुमाहाॽआङ् मे़वये़रो॥

²⁸ कर ये़सुरे़ खिरि हिसिङ्‌ङाङ् खे़ङ्‌हाॽ मे़त्तुसि, “यरुसले़म्‍मिल्‍ले़ कुस्‍साः मे़न्‍छुमाॽसे, खिनिॽ आलागि मे़हाबे़म्‍मिन्‍ने़ॽ, कर खिनिॽ आबाङे लागि नु खिनिॽ साःहाॽरे़ लागि हाबे़म्‍मे़ॽओ,

²⁹ थेआङ्‌भे़ल्‍ले़ मनाहाॽरे़ आप्‍फाल्‍ले़आङ् साःमे़ङ्‌गप्‍मनामाहाॽ हे़क्‍क्‍याङ् अङे़ःक्‌वा नुमे़न्‍धुक्‍नामाहाॽ मुइॽसामासिरो लॽरिक् पाःप्‍मा ये़म् तार पत्‍लो॥

³⁰ खे़न् ये़म्‍मो मनाहाॽरे़ नाङ्‌जङ्‌हाॽ आनिगे़ सम्‍दाङ् मक्‍थ्‍ये़ॽओ! हे़क्‍क्‍याङ् कोःक्‍माहाॽ याप्‍मि आलुप्‍ते़ओ! फाॽआङ् मे़मे़त्तुसिरो॥

³¹ थेआङ्‌भे़ल्‍ले़ सरिःत्‍क्याःप्‍पा कुहिङ्‌वे़त् सिङ्‌ङिन्‍ने अक्‍खे मे़मे़त्तुल्‍ले़, के़हेबा सिङ्‌ङिङ्‌ग आक्‍खे मे़मे़त्तुइरो?”

³² खुने़ॽनुए ने़प्‍फु कुभाङ्‌के़भेःम्‍बाहाॽआङ् सिःमे़ल्‍ले़ खुम्‍दिङ् पिमासि फाॽआङ् मे़देॽरुसि॥

³³ खे़ङ्‌हाॽ मिक्‍खोःक्‍पा मे़प्‍मनाबा कोःक्‍माओ मे़गे़रे़आङ् ये़सुःन् सिलाम्‍साक्‍मा सिङ्‌सम्‍दाङ् मे़भोःन्‍दुरो॥ खे़न् ने़प्‍फु कुभाङ्‌के़भेःम्‍बाहाॽ ये़सुरे़ कुजुप्‍साङ् नु कुभे़न्‍छाङ्‌बा सिलाम्‍साक्‍मा सिङ्‌हाॽ सम्‍दाङ् मे़भोःन्‍दुसिरो॥

³⁴ हे़क्‍क्‍याङ् ये़सुरे़ पाःत्तु, “पानुदिङ् आम्‍बौ, कङ्‌हाॽ ले़प्‍मि पिरे़से़ॽओ, थेआङ्‌भे़ल्‍ले़ कङ्‌हाॽरे़ थे़मा मे़जोगुर मे़बत् थेआङ् मे़न्‍निःसुन्‍लो॥” हे़क्‍क्‍याङ् खे़ङ्‌हाॽरे़ ये़सुरे़ कुदेःत्‍हाॽ हाःत्‍छिङ्‌मा फाॽआङ् तॽयाःन्‍सोःन् मे़गे़सुरो॥

³⁵ माःङ्‌घालाम् मनाहाॽ ओमे़मये़र मे़ये़बे़, कर यहुदि लाम्‍लोःबाहाॽरे़ खुने़ॽ किनाःन्‍दि मे़बिरुर अक्‍खे मे़मे़त्तु, “खे़ल्‍ले़ वेॽ मनाहाॽग से़ःप्‍तुसि, आल्‍ल निङ्‌वाॽफुमाङ्‌ङिल्‍ले़ सेःन्‍दुबा ख्रिस्‍तने़ फाॽग्र आबाङे से़ःप्‍सिङ्‌ल!”

³⁶ हे़क्‍क्‍याङ् थक्‍सुबाहाॽरे़ मे़धाङे़आङ् किनाःन्‍दि मे़बिरु हे़क्‍क्‍याङ् के़सुःप्‍पा चे़ल्‍ले़क्‍सेॽ थिःन् मे़धुङ्‌घुर

³⁷ मे़मे़त्तु, “खे़ने़ॽ यहुदि हाङ्‌ने़ फाॽग्र आबाङे से़ःप्‍सिङ्‌ङे़ॽओ॥”

³⁸ हे़क्‍क्‍याङ् ये़सुरे़ कुधे़गेःक् सम्‍दाङ् कङ्‌ग यहुदिहाॽरे़ खुनिॽ हाङ्लो लॽरिक् आप्‍तिक् सक्‍किन् मे़साप्‍तुआङ् मे़भत्‍छु॥

³⁹ खे़प्‍मो सिलाम्‍साक्‍मा सिङ्सम्‍दाङ् मे़भोःन्‍दुबा कुभाङ्‌के़भेःम्‍बाधिक्‍ले़ खुने़ॽ पाःन्‍निल्‍ले़ लक्‍तुर अक्‍खे मे़त्तु, “खे़ने़ॽ निङ्‌वाॽफुमाङ्‌ङिल्‍ले़ सेःन्‍दुबा ख्रिस्‍तने़ मे़ःम्‍बि? खे़ने़ॽ से़ःप्‍सिङ्‌ङे़ॽआङ् आन्‍छिगे़आङ् याप्‍मि आसे़ःप्‍ते़ॽ॥”

⁴⁰ कर वेॽस्‍मा कुभाङ्‌के़भेःम्‍बाल्‍ले़ खे़न् फे़ःक्‍तुर अक्‍खे मे़त्तु, “खे़ने़ॽ निङ्‌वाॽफुमाङ्‌ङिन् के़ङ्‌गिरुन्‍बि? आनिॽ सुम्‍ब्राङ्‌ङे़ लत्‍छा परिक्‍पा खुम्‍दिङ्‌ङो आध्‍ये़आङ् आवाॽ,

⁴¹ च्‍यासाङ् आन्‍छिॽग आजोगे़त्‍छुबा याःम्‍बक् कुइसिःक् सिःमे़ल्‍ले़ खुम्‍दिङ् आघोःसे़त्‍छुबारो, कर खुने़ॽग थेआङ् फे़न् याःम्‍बक् मे़न्‍जोःक्‍के वाॽरो॥”