31 ये़सुरे़ खुने़ॽओ नसाःन् के़जोःक्पा यहुदिहाॽ मे़त्तुसि, “इङ्गाॽ से़क्खाए मे़त्निङ्, इङ्गाॽ पाःत्तुङ्बा पाःन्हाॽओ चक्मे़ल्लॽए के़बत्छिॽने़ फाॽग्र से़क्खाए आहुॽसाम्बा के़बोःक्खिॽरो॥
32 हे़क्क्याङ् से़क्खाःन् कुसिङ् के़निःत्तुम्माङ् से़क्खाःल्ले़ चोःक्युम्भो के़बिरिॽरो॥”
33 खे़ङ्हाॽरे़ खुने़ॽ नोगप् मे़बिरु, “आनिगे़ग अब्राहामरे़ कुमुॽइदाङ्सासिगे़रो॥ हे़क्क्याङ् आप्फाल्ले़आङ् आत्तिल्ले़न्नाङ् कुयोःक्पा मे़म्बोःङ्ङे वयिगे़रो॥ हे़क्केःल्ले़ आक्खेलॽरिक् चोःक्युम्भो के़घोःसुम् लॽरिक् याप्मि के़मे़प्पाबे?”
34 ये़सुरे़ खे़ङ्हाॽ नोगप् पिरुसि, “इङ्गाॽ से़क्खाए मे़त्निङ्लो, हाःत्ले़ लायो चोगुॽ, खे़ङ्ग लायोरे़ कुयोःक्पा पोःङ्लो॥
35 आल्ल योःक्पाङ्ग सदादिङ् हिम्सयङ्ङोबा मे़ःन्लो, कर साःङ्ग सदादिङ् हिम्सयङ्ङोबारो॥
36 खे़ल्ले़ चोगुल्ले़ निङ्वाॽफुसाःल्ले़ चोःक्युम्भो के़जोगिने़ फाॽग्र से़क्खाए खिनिॽ चोःक्युम्भो के़बोःक्खिॽरो॥
37 खिनिॽग अब्राहामरे़ कुमुॽइदाङ्सानिङ् फाॽआङ् निःसुङ्लो, हे़क्केसाङ् याप्मि से़प्मा के़गोःत्तिॽरो थेआङ्भे़ल्ले़ इङ्गाॽ हुॽनिङ्बा निसाम्मिन् खिनिॽ निङ्वाॽओ युङ्मा के़न्दे़न्दिन्लो॥
