ᤕᤢᤜᤢᤴᤏᤠ 8:12-22 in Limbu

¹² ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤥ᤺ᤳᤋᤡᤀᤠᤖᤥ॥ ᤜᤠ᤺ᤳᤗᤧ ᤀᤡᤱᤃᤠ᤹ ᤏᤛᤠ᤺ᤴ ᤆᤥ᤺ᤰᤁᤠ ᤂᤧᤴᤏᤢ ᤜᤡᤱᤔᤴ ᤁᤧᤒᤡᤒᤠ ᤀᤥ᤺ᤳᤋᤡ᤺ᤴ ᤘᤠ᤹ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤂᤧᤴ ᤂᤠᤍᤠᤶᤔᤥ ᤗᤠᤱᤄᤣ᤺ᤰᤔᤠ ᤔᤧᤒᤥ᤺ᤱᤏᤧᤸᤗᤥ॥”

¹³ ᤑᤖᤡᤛᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤀᤠᤒᤠᤅᤣ ᤁᤧᤕᤠ᤺ᤶᤒᤣᤀᤥ ᤁᤧᤒᤠ᤺ᤳᤋᤢ᤹ᤖᤥ ᤜᤧᤰᤁᤩᤠᤱ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠ ᤔᤧ᤺ᤴᤗᤥ॥”

¹⁴ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤒᤠ᤺ᤴᤜᤠ᤹ ᤀᤠᤒᤠᤅᤣ ᤐᤠ᤺ᤳᤋᤢᤱᤛᤠᤱ ᤂᤧᤴ ᤛᤧᤰᤂᤠᤀᤣᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤳᤋᤥᤗᤠᤶ ᤋᤩᤠᤱᤅᤠᤱ ᤀᤠᤳᤋᤠᤴ ᤐᤣ᤺ᤰᤁᤠᤖ ᤐᤳᤋᤠ ᤂᤧᤴ ᤏᤢ᤺ᤖᤡᤰᤁᤠᤱ ᤏᤡ᤺ᤛᤢᤱᤗᤥ ᤁᤖ ᤂᤡᤏᤡ᤹ᤃ ᤀᤡᤱᤃᤠ᤹ ᤀᤠᤳᤋᤥᤗᤠᤶ ᤋᤩᤠᤱᤒᤠ ᤜᤧᤰᤁᤩᤠᤱ ᤀᤠᤳᤋᤥ ᤐᤣ᤺ᤰᤁᤠᤖ ᤐᤳᤋᤠ ᤂᤧᤴ ᤌᤣᤀᤠᤱ ᤁᤧᤴᤏᤡ᤺ᤛᤢᤶᤔᤡᤴᤗᤥ॥

¹⁵ ᤂᤡᤏᤡ᤹ᤃ ᤔᤧᤴᤇᤠᤶ ᤌᤡᤶ ᤁᤢᤀᤡᤛᤡ᤺ᤰᤁᤣ ᤂᤠᤛᤧᤴ ᤁᤧᤗᤥ᤺ᤴᤍᤡ᤹ᤖᤥ. ᤁᤖ ᤀᤡᤱᤃᤠ᤹ᤃ ᤀᤠᤳᤋᤡᤸᤗᤧᤴᤏᤠᤱ ᤂᤠᤛᤧᤴ ᤔᤧᤈᤥᤃᤢᤱᤅᤡᤴᤗᤥ॥

¹⁶ ᤁᤖ ᤀᤡᤱᤃᤠ᤹ ᤂᤠᤛᤧᤴ ᤆᤥᤃᤢᤱᤏᤧ ᤑᤠ᤹ᤃᤪ ᤀᤠᤄᤠᤛᤧᤴᤏᤡᤴ ᤛᤧᤰᤂᤠᤀᤣ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤖᤰ ᤜᤥ᤺ᤵᤐᤠᤖᤥ॥ ᤀᤡᤱᤃᤠ᤹ᤏᤢᤃ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤘᤠ᤹ᤖᤥ॥

¹⁷ ᤂᤡᤏᤡ᤹ ᤛᤠᤶᤕᤥᤌᤡᤶᤔᤥ ᤏᤧᤵᤑᤢ ᤔᤏᤠᤜᤠ᤹ᤖᤧ ᤌᤡᤰ ᤐᤠ᤺ᤴᤏᤥ ᤋᤱᤛᤡᤀᤠᤱ ᤋᤥ᤺ᤴᤍᤡ ᤐᤡᤛᤢᤏᤧ ᤑᤠ᤹ᤃᤪ ᤂᤧᤴ ᤋᤥ᤺ᤴᤍᤡᤴ ᤛᤧᤰᤂᤠᤀᤣ ᤐᤥ᤺ᤱᤗᤥ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳᤗᤥ॥

¹⁸ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤱᤗᤥ. ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧᤀᤠᤱ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤖᤥ॥”

¹⁹ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤖ ᤁᤧᤏᤧᤒᤠ ᤐᤠᤏᤢᤍᤡᤱ ᤁᤧᤶᤒᤠᤃ ᤀᤠᤳᤋᤥ ᤘᤠ᤹ᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤃ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤴᤏᤡ᤺ᤳᤋᤡᤴ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ॥ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤏᤡ᤺ᤳᤋᤡᤸᤗᤧᤃ ᤀᤠᤶᤒᤠᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤔᤧᤴᤗᤥ॥”

²⁰ ᤕᤧᤛᤢᤖᤧ ᤁᤴ ᤐᤠ᤺ᤴᤜᤠ᤹ ᤔᤠᤱᤜᤡᤶᤔᤥ ᤜᤢᤰᤛᤥᤕᤠᤱ ᤕᤠᤰᤔᤏᤠᤒᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤏᤡᤛᤠᤶ ᤜᤢ᤹ᤖᤢᤛᤡᤖ ᤐᤳᤇᤧᤸᤗᤧ ᤐᤠ᤺ᤳᤋᤢᤒᤠᤖᤥ. ᤁᤖ ᤂᤢᤏᤧ᤹ᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤴᤍᤧᤶᤛᤢᤴᤗᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤕᤧᤶ ᤔᤧᤴᤍᤠᤀᤣ ᤘᤕᤧᤖᤥ॥

²¹ ᤕᤠᤱᤛᤡ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤐᤣ᤺ᤰᤁᤠᤀᤠᤱ ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤒᤠᤅᤣ ᤗᤠᤕᤥᤀᤥ ᤁᤧᤛᤩᤧ᤹ᤀᤡᤖᤥ॥ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤣᤴᤏᤥ ᤂᤡᤏᤡ᤹ ᤋᤠ᤺ᤔᤠ ᤁᤧᤴᤇᤢᤰᤋᤡᤴᤗᤥ॥”

²² ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤛᤣ᤺ᤴᤔᤧᤍᤥ᤺ᤛᤡᤱ. “ᤕᤧᤛᤢ᤺ᤴ ᤀᤠᤒᤠᤅᤣ ᤛᤧᤳᤇᤡᤱᤒᤠᤒᤡ᥅ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤣᤴᤏᤥ ᤋᤠ᤺ᤔᤠ ᤁᤧᤴᤇᤢᤰᤋᤡᤴᤗᤥ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠᤒᤡ᥅”

¹² हे़क्‍क्‍याङ् ये़सुरे़ याम्‍मो मनाहाॽ मे़त्तुसि, “इङ्‌गाॽ इक्‍सादिङ् खाम्‍बेःक्‍मोबा ओःत्तिआरो॥ हाःत्‍ले़ इङ्‌गाॽ नसाःन् चोःक्‍का खे़न्‍नु हिङ्‌मन् के़बिबा ओःत्तिःन् वाॽ हे़क्‍क्‍याङ् आप्‍फाल्‍ले़आङ् खे़न् खादाम्‍मो लाङ्‌घेःक्‍मा मे़बोःङ्‌ने़ल्‍लो॥”

¹³ फरिसिहाॽरे़ खुने़ॽ मे़मे़त्तु, “खे़ने़ॽग आबाङे के़याःम्‍बेओ के़बाःत्तुॽरो हे़क्‍क्‍याङ् के़बाःत्तुबा पाःन्‍हाॽग से़क्‍खा मे़ःन्‍लो॥”

¹⁴ ये़सुरे़ खे़ङ्‌हाॽ मे़त्तुसि, “इङ्‌गाॽ आबाःन्‍हाॽ आबाङे पाःत्तुङ्‌साङ् खे़न् से़क्‍खाएरो, थेआङ्‌भे़ल्‍ले़ इङ्‌गाॽ आत्तोलाम् त्‍याङ्‌ङाङ् आत्तान् पेःक्‍कार पत्ता खे़न् नुःरिक्‍काङ् निःसुङ्‌लो कर खिनिॽग इङ्‌गाॽ आत्तोलाम् त्‍याङ्‌बा हे़क्‍क्‍याङ् आत्तो पेःक्‍कार पत्ता खे़न् थेआङ् के़न्‍निःसुम्‍मिन्‍लो॥

¹⁵ खिनिॽग मे़न्‍छाम् थिम् कुइसिःक्‍के खासे़न् के़लोःन्‍दिॽरो, कर इङ्‌गाॽग आत्तिल्‍ले़न्‍नाङ् खासे़न् मे़जोगुङ्‌ङिन्‍लो॥

¹⁶ कर इङ्‌गाॽ खासे़न् चोगुङ्‌ने़ फाॽग्र आघासे़न्‍निन् से़क्‍खाए पोःङ्‌लो, थेआङ्‌भे़ल्‍ले़ इङ्‌गाॽरक् होःप्‍पारो॥ इङ्‌गाॽनुग याप्‍मि के़बाङ्‌बा पानुदिङ् आम्‍बाआङ् वाॽरो॥

¹⁷ खिनिॽ साम्‌योथिम्‍मो ने़प्‍फु मनाहाॽरे़ थिक् पाःन्‍नो तङ्‌सिआङ् तोःन्‍दि पिसुने़ फाॽग्र खे़न् तोःन्‍दिन् से़क्‍खाए पोःङ्‌लो लॽरिक् साप्‍ते़आङ् पत्‍लो॥

¹⁸ इङ्‌गाॽ आयाःम्‍बेओ तोःन्‍दि पिरुङ्‌लो, हे़क्‍क्‍याङ् याप्‍मि के़बाङ्‌बा पानुदिङ् आम्‍बारे़आङ् आयाःम्‍बेओ तोःन्‍दि पिरुरो॥”

¹⁹ खे़ङ्‌हाॽरे़ खुने़ॽ सेःन्‍मे़दोसु, “खे़ने़ॽ के़बाःत्तुर के़ने़बा पानुदिङ् के़म्‍बाग आत्तो वाॽबे?” ये़सुरे़ खे़ङ्‌हाॽ नोगप् पिरुसि, “खिनिॽग इङ्‌गाॽ याप्‍मि कुसिङ् के़न्‍निःत्तिन् हे़क्‍क्‍याङ् पानुदिङ् आम्‍बाआङ् कुसिङ् के़न्‍निःत्तुम्‍मिन्‍लो॥ इङ्‌गाॽ याप्‍मि कुसिङ् के़निःत्तिल्‍ले़ग आम्‍बाआङ् कुसिङ् के़निःत्तुम्‍बामे़न्‍लो॥”

²⁰ ये़सुरे़ कन् पाःन्‍हाॽ माङ्‌हिम्‍मो हुक्‍सोयाङ् याक्‍मनाबादे़न्‍निल्‍ले़ कुबेसाङ् निसाम् हुॽरुसिर पत्‍छे़ल्‍ले़ पाःत्तुबारो, कर खुने़ॽग आत्तिन्‍हाॽरे़आङ् मे़न्‍दे़म्‍सुन्‍लो थेआङ्‌भे़ल्‍ले़ खुने़ॽ कुये़म् मे़न्‍दाए वये़रो॥

²¹ याङ्‌सि ये़सुरे़ याम्‍मो खे़ङ्‌हाॽ मे़त्तुसि, “इङ्‌गाॽग पेःक्‍काआङ् खिनिॽ याप्‍मि के़गोःत्तिॽरो॥ हे़क्‍क्‍याङ् खिनिॽ आबाङे लायोओ के़स्‍ये़ॽइरो॥ इङ्‌गाॽ पेःक्‍काबा तेन्‍नो खिनिॽ ताःमा के़न्‍छुक्‍तिन्‍लो॥”

²² हे़क्‍केःल्‍ले़ यहुदि लाम्‍लोःबाहाॽ सेःन्‍मे़दोःसिङ्, “ये़सुःन् आबाङे से़त्‍छिङ्‌बाबि? खे़ल्‍ले़ चोगुल्‍ले़ इङ्‌गाॽ पेःक्‍काबा तेन्‍नो ताःमा के़न्‍छुक्‍तिन्‍लो फाॽआङ् पाःत्तुबाबि?”