17 ये़सुरे़ खे़ङ्हाॽ मे़त्तुसि, “इङ्गाॽ आम्बारे़ए आल्लो थारिक् याःम्बक् चोगुर वाॽ, हे़क्केःल्ले़ इङ्गाॽआङ् चोगुङ्लो॥”
18 खुने़ॽग नाःम्सिङ्ये़न्नो याःम्बक् चोःक्मा मे़न्नुॽमना साम्योथिम्मिन्लक् मे़नाॽरुन् कर निङ्वाॽफुमाङ्ङिन्ने “आम्बारो” पाःत्तुआङ् खुने़ॽ निङ्वाॽफुमाङ्ङिन्नु कुदङ्बा चोःक्सिङ् हे़क्केःल्ले़ यहुदि लाम्लोःबाहाॽरे़ आक्खेलॽरिक्साङ् खुने़ॽ से़प्मा पोःङ् लॽरिक् तम्सिन् मे़जोगु॥
19 ये़सुरे़ खे़ङ्हाॽ अक्तङ्बा नोगप् पिरुसि, “से़क्खाए मे़त्निङ्लो, कुस्साःल्ले़ आबाङेग थेआङ् चोःक्मा मे़सुक्तुन्, कर खुने़ॽग पानुदिङ् कुम्बारे़ चोगुबा पाःन्हाॽ निःसुबा कुइसिःक्लक् चोःक्मा सुक्तुॽरो, थेआङ्भे़ल्ले़ पानुदिङ् पाःल्ले़ थे चोगुॽ बा खे़न्ने कुस्साःल्ले़आङ् चोगुॽरो॥
20 थेआङ्भे़ल्ले़ पानुदिङ् पाःल्ले़ कुस्साःन् लुङ्माॽ तुक्तुआङ् खुने़ॽ चोगुबा काक् याःम्बक्किन् ओसेःन्धाक्तुॽरो॥ हे़क्क्याङ् कन् मनाःन् वेःत्ते़बान्नुःल्ले़आङ् पयम्यम्बा याःम्बक्हाॽ आबुगे़न् कुस्साःन् ओसेःन्धाक्तुबा के़निःसुम्मिल्ले़ खिनिॽ निङ्वाॽ मारो॥
21 थेआङ्भे़ल्ले़ पानुदिङ् पाःल्ले़ के़सिःबाहाॽ याम्मो हिङ्घुसिआङ् मे़न्नुप्मनाबा हिङ्मन् पिरुसिबा कुइसिःक्के कुस्साःल्ले़आङ् निङ्वाॽ चोगुसिबा मनाहाॽ ने़त्तिगे़न् हिङ्मन् पिरुसिॽरो॥
