24 निङ्वाॽफुमाङ्ङिङ्ग याम्साम्लो हे़क्क्याङ् खुने़ॽ सेवा के़जोःक्पाहाॽरे़ग से़क्खाःल्ले़ सेसेमाङ्लाम् सेवा चोःक्मा पोःङ्लो॥”
25 खे़न् मे़न्छुमाॽइल्ले़ मे़त्तु, “मसिहःन् ताः फाॽआङ् इङ्गाॽ निःसुङ्लो, (खुने़ॽए ख्रिस्त मे़मे़त्तुॽरो) खुने़ॽ ताःल्ले़ कन् काक् पाःन्हाॽ याप्मि पोधक् चोगु पिरिगे़रो॥”
26 ये़सुरे़ खे़न् नोगप् पिरु, “खे़ने़ॽनु ताॽके़जे़ङ्बान्ने खुने़ॽरो॥”
27 बा खे़न् ये़म्मो ये़सुरे़ कुहुॽसाम्बाहाॽ खे़प्मो मे़गे़रे़ मे़द्ये़॥ खुने़ॽ खे़न् मे़न्छुमाॽइन्नु ताॽजे़ङ्नु युङे़बा मे़निःसुआङ् खुनिॽ निङ्वाॽ मये़रो॥ हे़क्केसाङ् खे़ङ्हाॽरे़ खे़ने़ॽ थेःन् चाहाबा के़जोगे़बे? इग्र थेआङ् खे़न्नु ताॽके़जे़ङ्बाबे फाॽआङ् सेःन्मे़न्दोःसुन्लो॥
28 हे़क्क्याङ् खे़न् मे़न्छुमाॽइल्ले़ च्वाःत् कुःन्दाःन् खे़प्मोए युक्खुधआङ् पाङ्जुम्मो नुःक्खे़ पे हे़क्क्याङ् काक् पाङ्जुम्साबाहाॽ अक्खे मे़त्तुसि,
29 “ओमे़त्ते़म्मे़ॽ, मनाधिक्ले़ इङ्गाॽ चोगुङ्बा काक् आयाःम्बक्हाॽरे़ कुयाःम्बेओ मे़त्ताङ्लो॥ फे़रे़म्मे़ॽआङ् ओमे़त्ते़म्मे़ॽओ॥ निङ्वाॽफुमाङ्ङिल्ले़ सेःन्दुबा ख्रिस्त मे़प्मनाबान् खुने़ॽएग मे़ःम्बि?”
30 हे़क्क्याङ् खे़न् मनाहाॽ पाङ्जुम्मोलाम् मे़लःन्दे़आङ् ये़सुःन् वये़बा ते़न्नो मे़बेरो॥
31 आल्ल हुॽसाम्बाहाॽरे़ ये़सुःन् “‘सिक्साम्बे, चा चे़ॽओ’” फाॽआङ् पेलि मे़भाक्तु॥
32 कर ये़सुरे़ खे़ङ्हाॽ मे़त्तुसि, “इङ्गाॽ कत्तुङ्बा आजामा चाःल्ले़ कुयाःम्बेओ खिनिॽ थेआङ् कुसिङ् के़न्निःत्तुम्मिन्लो॥”
33 हे़क्केःल्ले़ ये़सुरे़ कुहुॽसाम्बाहाॽ अक्खेलॽरिक् आबाङे सेःन्मे़दोःसिङ्, “मे़ःम्बे़, खुने़ॽ हाःत्ले़ कुजा हुॽरुबे?”
