ᤕᤢᤜᤢᤴᤏᤠ 19:32-41 in Limbu

³² ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ ᤔᤧᤒᤣᤀᤠᤱ ᤕᤧᤛᤢ᤺ᤴᤏᤢ ᤔᤧᤓᤥ᤺ᤴᤍᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤔᤧᤀᤧᤰᤂᤢᤖᤥ॥

³³ ᤁᤖ ᤂᤧᤱᤜᤠ᤹ ᤕᤧᤛᤢᤖᤥ ᤔᤧᤓᤧᤖᤧᤸᤗᤧ ᤕᤧᤛᤢ᤺ᤱᤃ ᤋᤃᤡᤀᤣ ᤛᤩᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤧ᤹ ᤁᤢᤗᤠᤱᤜᤠ᤹ ᤔᤧᤴᤀᤧᤰᤂᤢᤴᤗᤥ॥

³⁴ ᤜᤧᤰᤁᤣᤛᤠᤱ ᤌᤡᤰ ᤌᤰᤛᤢᤒᤠᤸᤗᤧ ᤕᤧᤛᤢᤖᤧ ᤁᤢᤗᤧᤶᤓᤣ᤺ᤵᤔᤥ ᤗᤠ᤺ᤰᤁᤡᤸᤗᤧ ᤌᤢᤒᤢᤸᤗᤧ ᤂᤡᤔᤥ ᤂᤧᤵᤔᤥᤗᤠᤶ ᤔᤠᤰᤂᤡ᤹ ᤏᤢ ᤆᤫᤠ᤺ᤳ ᤗ᤺ᤴᤍᤧᤖᤥ॥

³⁵ ᤂᤡᤏᤡ᤹ᤀᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤂᤧᤴ ᤐᤥ᤺ᤰᤂᤧᤒᤠ ᤐᤠ᤺ᤴ ᤁᤧᤏᤡ᤺ᤒᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤒᤠᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠᤀᤣᤖᤥ॥

³⁶ “ᤂᤢᤏᤧ᤹ ᤁᤢᤕᤧ᤺ᤵᤐᤠᤜᤠ᤹ ᤗᤳᤌᤡᤰᤁᤠᤱ ᤔᤧᤀᤧᤰᤏᤧᤴᤗᤥ” ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤵᤐᤠ ᤛᤠᤶᤕᤥᤛᤠᤵᤗᤠ᤺ᤴ ᤁᤧᤳᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ.

³⁷ ᤜᤧᤰᤁᤩᤠᤱ ᤘᤣ᤹ ᤋᤧᤴᤏᤥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤀᤠᤱ ᤛᤠᤵᤋᤧᤀᤠᤱ ᤐᤳᤗᤥ. “ᤁᤧᤎᤢᤵᤐᤠᤜᤠ᤹ᤖᤧ ᤀᤠᤒᤠᤅᤣ ᤔᤧᤎᤢᤒᤢᤒᤠᤴ ᤀᤥᤔᤧᤔᤧᤳᤋᤢᤖᤥ॥”

³⁸ ᤂᤧᤴ ᤀᤣᤃᤠᤱ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑᤧᤴ ᤐᤡᤗᤠᤋᤛᤖᤥ ᤐᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢ॥ ᤂᤢᤏᤧ᤹ ᤕᤜᤢᤍᤡᤜᤠ᤹ ᤁᤡᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ ᤐᤡᤗᤠᤋᤛᤖᤧ ᤀᤡᤱᤍᤳ ᤐᤡᤖᤢᤀᤠᤱ ᤂᤧᤸᤗᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤌᤠ᤺ᤛᤢᤀᤠᤱ ᤋᤣ᤹ᤖᤢ॥

³⁹ ᤋᤃᤡ ᤛᤧᤴᤍᤡᤰ ᤕᤧᤛᤢᤖᤧ ᤁᤢᤍᤢᤶᤛᤧ ᤁᤧᤍᤠ᤺ᤒᤠ ᤏᤡᤁᤥᤍᤣᤔᤛᤖᤧ ᤕᤢᤛᤢᤑᤧᤴ ᤋᤣ᤺ᤱ ᤔᤧᤳᤋᤢᤀᤠᤱ ᤘᤕᤧ॥ ᤏᤡᤁᤥᤍᤣᤔᤛᤖᤧ ᤔᤢᤷᤖ ᤏᤢ ᤂᤠᤶᤍᤥᤗᤡ ᤑ᤺ᤶᤔᤏᤠᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤶᤛᤢᤶ (᥉᥉) ᤁᤡᤗᤥ ᤔᤠᤖᤢᤰᤁᤡᤴ ᤋᤠᤖᤢᤀᤠᤱ ᤘᤕᤧᤖᤥ॥

⁴⁰ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤋᤣ᤹ᤖᤧᤳᤇᤢᤀᤠᤱ ᤕᤜᤢᤍᤡ ᤆᤣ ᤗᤢᤵᤔᤠ ᤌᤡᤶ ᤁᤢᤀᤡᤛᤡ᤺ᤰ ᤔᤠᤖᤢᤰᤁᤡᤴ ᤜᤢ᤺ᤳᤋᤧᤳᤇᤢᤀᤠᤱ ᤏᤢ᤺ᤒᤠ ᤆᤣᤍᤣ᤺ᤳᤋᤡᤸᤗᤧ ᤁᤡᤳᤋᤧᤳᤇᤢᤖᤥ॥

⁴¹ ᤀᤠᤸᤗ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤒᤠ ᤋᤧᤴᤏᤥ ᤑᤢᤱᤀᤡᤰ ᤌᤡᤰ ᤏᤧᤛ᤻ᤛᤧ॥ ᤂᤧᤴ ᤑᤢᤱᤀᤡᤰᤁᤥ ᤀᤠᤸᤗᤥ ᤌᤠᤖᤡᤰ ᤔᤏᤠ ᤔᤧᤴᤏᤧᤀᤣ ᤁᤧᤘᤠ᤹ᤒᤠ ᤀᤡᤵᤐᤢᤱᤎᤡᤰ ᤏᤧᤛ᤻ᤛᤧᤖᤥ॥

³² खे़ल्‍ले़ चोगुल्‍ले़ थक्‍सुबाहाॽ मे़बेआङ् ये़सुःन्‍नु मे़भोःन्‍दुसिबा मनाहाॽरे़ खुन्‍छिॽ लाङ्‌हाॽ मे़ए़क्‍खुरो॥

³³ कर खे़ङ्‌हाॽ ये़सुरो मे़भे़रे़ल्‍ले़ ये़सुःङ्‌ग तगिए स्‍ये़बा मे़निःसुआङ् खुने़ॽ कुलाङ्‌हाॽ मे़न्‍ए़क्‍खुन्‍लो॥

³⁴ हे़क्‍केसाङ् थिक् थक्‍सुबाल्‍ले़ ये़सुरे़ कुले़म्‍भेःप्‍मो लाःक्‍किल्‍ले़ थुबुल्‍ले़ खिमो खे़प्‍मोलाम् माक्‍खिॽ नु च्‍वाःत् लःन्‍दे़रो॥

³⁵ खिनिॽआङ् नसाःन् के़जोगुम्‍ल फाॽआङ् खे़न् पोःक्‍खे़बा पाःन् के़निःबाल्‍ले़ कन् पाःन्‍हाॽ पाःत्तुबारो॥ हे़क्‍क्‍याङ् खुने़ॽ पाःत्तुबा पाःन्‍हाॽग से़क्‍खाएरो॥

³⁶ “खुने़ॽ कुये़ःप्‍पाहाॽ लत्‍थिक्‍काङ् मे़ए़क्‍ने़न्‍लो” लॽरिक् साप्‍ते़आङ् पप्‍पा साम्‌योसाप्‍लाःन् के़त्‍ल फाॽआङ् अक्‍खे पोःक्‍खे़बारो,

³⁷ हे़क्‍क्‍याङ् वेॽ ते़न्‍नो साम्‌योसाप्‍लाओ अक्‍खेआङ् साप्‍ते़आङ् पत्‍लो, “के़धुप्‍पाहाॽरे़ आबाङे मे़धुबुबान् ओमे़मे़त्तुरो॥”

³⁸ खे़न् एगाङ् आरिमाथिया पाङ्‌जुम्‍बा युसुफे़न् पिलातसरो पेआङ् ये़सुरे़ कुधक्‍किन् नाःक्‍तु॥ खुने़ॽ यहुदिहाॽ किरुसिबाल्‍ले़ चोगुल्‍ले़ स्‍वाःत्ताङ् ये़सुरे़ कुहुॽसाम्‍बा पोःक्‍खे़आङ् वये़रो॥ पिलातसरे़ इङ्‌दत् पिरुआङ् खे़ल्‍ले़ ये़सुरे़ कुधक्‍किन् थाःसुआङ् तेॽरु॥

³⁹ तगि से़न्‍दिक् ये़सुरे़ कुदुम्‍से़ के़दाःबा निकोदेमसरे़ युसुफे़न् तेःङ् मे़त्तुआङ् वये़॥ निकोदेमसरे़ मुर्र नु खाम्‍दोलि फःम्‍मनाबा कुनाम्‍गे़नुॽबा सुम्‍सुम् (३३) किलो मारुक्‍किन् तारुआङ् वये़रो॥

⁴⁰ खे़ङ्‌हाॽरे़ ये़सुरे़ कुधक्‍किन् तेॽरे़त्‍छुआङ् यहुदि चे लुप्‍मा थिम् कुइसिःक् मारुक्‍किन् हुःत्ते़त्‍छुआङ् नुःबा चेदेःत्तिल्‍ले़ कित्ते़त्‍छुरो॥

⁴¹ आल्‍ल ये़सुःन् सिलाम्‍साक्‍मा सिङ्‌ङो मे़भोःन्‍दुबा ते़न्‍नो फुङ्‌इक् थिक् ने़स्‍से़॥ खे़न् फुङ्‌इक्‍को आल्‍लो थारिक् मना मे़न्‍ने़ए के़वाॽबा इप्‍पुङ्‌धिक् ने़स्‍से़रो॥