ᤔᤷᤁᤢᤛ 6:20-32 in Limbu

²⁰ ᤌᤣᤀᤠᤱᤓᤧᤸᤗᤧ ᤜᤧᤖᤥᤍ ᤜᤠᤱᤅᤡᤸᤗᤧ ᤕᤢᤜᤢᤴᤏᤠ᤺ᤴ ᤛᤠᤶᤕᤥᤏᤡᤒᤠ ᤏᤢ ᤛᤣᤛᤣᤒᤠ ᤔᤏᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ. ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤋᤠᤱᤛᤧ᤺ᤵᤋᤢᤀᤠᤱ ᤘᤕᤧᤖᤥ॥ ᤕᤢᤜᤢᤴᤏᤠᤖᤧ ᤁᤢᤒᤠ᤺ᤴᤏᤡᤴ ᤂᤢᤏᤧ᤹ ᤂᤧᤵᤛᤢᤸᤗᤧ ᤛᤠ᤹ᤖᤡᤰ ᤁᤡ᤺ᤛᤧᤀᤠᤱ ᤘᤕᤧᤛᤠᤱ ᤛ᤺ᤳᤋᤧᤖ ᤂᤧᤵᤛᤢᤖᤀᤣ ᤘᤕᤧᤖᤥ॥

²¹ ᤀᤠᤸᤗ ᤕᤶᤒᤠ ᤛᤢᤕᤧᤶ ᤋᤩᤧ॥ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤛᤠᤘᤠ᤺ᤴᤇᤡᤱᤔᤠ ᤛᤛ᤺ᤳᤛᤖᤠᤱᤅᤥ ᤃᤠᤗᤡᤗ ᤌᤢᤶᤔᤥᤒᤠ ᤐᤕᤶ ᤕᤶᤒᤠ ᤛᤢᤜᤠᤱᤕᤢᤰᤐᤠᤜᤠ᤹. ᤋᤡᤗᤡᤱᤃᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ ᤏᤢ ᤔᤡᤱᤛᤥᤍᤠᤱᤒᤠ ᤋᤢᤶᤔᤩᤠᤜᤠᤱᤜᤠ᤹ ᤋᤖᤣ ᤀᤢ᤺ᤳᤋᤢᤛᤡᤀᤠᤱ ᤘᤕᤧ॥

²² ᤜᤧᤖᤥᤍᤡᤕᤠᤛᤖᤧ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤴ ᤂᤧᤵᤔᤥ ᤋᤩᤧᤀᤠᤱ ᤗᤠ᤺ᤰᤂᤧ. ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤴ ᤏᤢ ᤂᤧᤵᤔᤥ ᤁᤧᤍᤠ᤺ᤒᤠ ᤁᤧᤖᤧᤰ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤛᤢ ᤐᤡᤖᤢᤛᤡᤸᤗᤧ ᤜᤠᤱᤅᤡᤸᤗᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤣ ᤁᤧᤏᤠ᤺ᤰᤁᤠᤛᤠᤱ ᤀᤡᤱᤃᤠ᤹ ᤐᤡᤏᤧᤖᤥ॥”

²³ ᤂᤧᤸᤗᤧ ᤔᤠᤱᤜᤧᤰᤛᤡᤱᤗ ᤔᤧᤳᤋᤢ. “ᤂᤧᤏᤧ᤹ ᤌᤣ ᤁᤧᤏᤠ᤺ᤰᤁᤠ ᤀᤡᤱᤃᤠ᤹ ᤐᤡᤏᤧ॥ ᤀᤠᤜᤠᤱᤈᤢᤶᤔᤡᤴ ᤁᤢᤓᤪᤧ᤺ᤱ ᤁᤧᤏᤠ᤺ᤰᤋᤢᤛᤠᤱ ᤐᤡᤏᤧᤖᤥ॥”

²⁴ ᤂᤧᤴ ᤆᤢᤰᤔᤧᤴ ᤁᤢᤶᤔᤠᤖᤥ ᤐᤣᤀᤠᤱ ᤛᤣ᤺ᤴᤍᤥᤛᤢ. “ᤀᤠᤸᤗ ᤌᤣ ᤏᤠ᤺ᤰᤋᤢᤱᤒᤠᤒᤣ᥅” ᤜᤧᤰᤁᤣ᤺ᤸᤗᤧ ᤁᤢᤶᤔᤠᤖᤧ ᤔᤧᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤏᤠ᤺ᤰᤋᤧ᤹॥”

²⁵ ᤂᤡᤔᤥ ᤂᤧᤴ ᤆᤢᤰᤔᤧᤴᤏᤠᤱ ᤐᤣᤀᤠᤱ ᤔᤧᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤀᤠᤸᤗᤥᤛᤠ ᤆᤧᤳᤌᤩᤠᤀᤥ ᤐᤡᤖᤠᤱᤅᤧ᤹ᤀᤥ॥”

²⁶ ᤜᤧᤰᤁᤣ᤺ᤸᤗᤧ ᤜᤧᤖᤥᤍ ᤜᤠᤱᤅᤡᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧᤛᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠᤀᤣ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ

²⁷ ᤂᤧᤵᤔᤥ ᤁᤧᤕᤧᤵᤐᤠ ᤜᤠᤱᤋᤡᤗᤡᤱᤃᤠ᤺ᤴ ᤐᤣᤃᤧ᤹ᤀᤠᤱ ᤕᤢᤜᤢᤴᤏᤠᤖᤧ ᤁᤢᤎᤧᤃᤣ᤺ᤰᤁᤡᤴ ᤑᤧᤳᤋᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢ॥ ᤂᤧᤴ ᤂᤡᤔᤥ ᤐᤢᤱᤗᤠᤜᤡᤶᤔᤥ ᤐᤣᤀᤠᤱ ᤕᤢᤜᤢᤴᤏᤠᤖᤧ ᤁᤢᤎᤧᤃᤣ᤺ᤰᤁᤡᤴ ᤂᤰᤋᤢ.

²⁸ ᤜᤧᤰᤁᤩᤠᤱ ᤆᤧᤳᤌᤩᤠᤀᤥ ᤑᤧᤳᤋᤢᤀᤠᤱ ᤂᤧᤴ ᤆᤢᤰᤔᤧᤴ ᤐᤡᤖᤢ॥ ᤆᤢᤰᤔᤧᤸᤗᤧ ᤂᤧᤴ ᤋᤣ᤹ᤖᤢᤀᤠᤱ ᤁᤢᤶᤔᤠ ᤐᤡᤖᤢᤖᤥ॥

²⁹ ᤕᤢᤜᤢᤴᤏᤠ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤔᤧᤍᤩᤧ. ᤜᤧᤰᤁᤩᤠᤱ ᤁᤢᤎᤰᤁᤡᤴ ᤔᤧᤍᤣ᤹ᤖᤢᤀᤠᤱ ᤀᤡᤵᤐᤢᤱᤅᤥ ᤔᤧᤗᤢᤵᤋᤢ॥

³⁰ ᤋᤃᤡ ᤕᤧᤛᤢᤖᤧ ᤀᤡᤱᤓᤴ ᤆᤥ᤺ᤰᤛᤧ ᤐᤠᤱᤄᤢᤛᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤏᤢ ᤔᤧᤜᤢ᤹ᤖᤢᤛᤡᤒᤠ ᤐᤠ᤺ᤴᤜᤠ᤹ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤔᤧᤈᤧᤰᤋᤢ॥

³¹ ᤜᤧᤰᤁᤩᤠᤱ ᤕᤧᤛᤢᤖᤧ ᤀᤠᤸᤗ ᤀᤣ᤺ᤰᤛᤠᤍᤧᤴᤏᤥ ᤐᤡᤃᤡᤀᤠᤱ ᤛᤵᤑᤠᤛᤡᤰ ᤏᤠ᤺ᤶᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤁᤧᤍᤠ᤺ᤒᤠ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤂᤢᤏᤡ᤹ ᤆᤠᤔᤠ ᤕᤧᤶᤔᤠᤱ ᤔᤧᤱᤄᤥᤀᤣ ᤔᤧᤘᤕᤧᤖᤥ॥

³² ᤜᤧᤰᤁᤣ᤺ᤸᤗᤧ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤀᤥ ᤛᤫᤠ᤺ᤳᤋᤠᤱ ᤔᤧᤗᤠ᤺ᤛᤧᤀᤠᤱ ᤀᤣ᤺ᤰᤛᤠᤍᤧᤴᤏᤥ ᤔᤧᤒᤣ॥

²⁰ थेआङ्‌भे़ल्‍ले़ हे़रोद हाङ्‌ङिल्‍ले़ युहुन्‍नाःन् साम्‌योनिबा नु सेसेबा मना फाॽआङ् कुसिङ् निःत्तुआङ् वये़, खे़ल्‍ले़ चोगुल्‍ले़ खुने़ॽ ताङ्‌से़ःप्‍तुआङ् वये़रो॥ युहुन्‍नारे़ कुबाःन्‍निन् खुने़ॽ खे़प्‍सुल्‍ले़ साॽरिक् किःसे़आङ्‌वये़साङ् सःत्ते़र खे़प्‍सुरए वये़रो॥

²¹ आल्‍ल यम्‍बा सुये़म् त्‍ये़॥ हे़रोद हाङ्‌ङिल्‍ले़ कुसावाःन्‍छिङ्‌मा ससःत्‍सराङ्‌ङो गालिल थुम्‍मोबा पयम्‌यम्‍बा सुहाङ्‌युक्‍पाहाॽ, तिलिङ्‌गाहाॽरे़ खुनिॽ थक्‍तुम्‍बाहाॽ नु मिङ्‌सोदाङ्‌बा तुम्‍म्‍याहाङ्‌हाॽ तरे उःत्तुसिआङ् वये़॥

²² हे़रोदियासरे़ आबाङे कुस्‍साः मे़न्‍छुमाॽइन् खे़प्‍मो त्‍ये़आङ् लाःक्‍खे़, हे़क्‍क्‍याङ् हे़रोद हाङ्‌ङिन् नु खे़प्‍मो के़दाःबा के़रे़क् तरेबाहाॽरे़ खुनिॽ निङ्‌वाॽ तासु पिरुसिल्‍ले़ हाङ्‌ङिल्‍ले़ खे़न् मे़त्तु, “खे़ने़ॽ थे के़नाःक्‍कासाङ् इङ्‌गाॽ पिने़रो॥”

²³ खे़ल्‍ले़ माङ्‌हे़क्‍सिङ्‌ल मे़त्तु, “खे़ने़ॽ थे के़नाःक्‍का इङ्‌गाॽ पिने़॥ आहाङ्‌जुम्‍मिन् कुभ्रे़ःङ् के़नाःक्‍तुसाङ् पिने़रो॥”

²⁴ खे़न् चुक्‍मे़न् कुम्‍मारो पेआङ् सेःन्‍दोसु, “आल्‍ल थे नाःक्‍तुङ्‌बाबे?” हे़क्‍केःल्‍ले़ कुम्‍मारे़ मे़त्तु, “बप्‍तिस्‍मा के़बिबा युहुन्‍नाःल्‍ले़ कुधे़गेःक्‍किन्‌नाःक्‍ते़ॽ॥”

²⁵ खिमो खे़न् चुक्‍मे़न्‍नाङ् पेआङ् मे़त्तु, “बप्‍तिस्‍मा के़बिबा युहुन्‍नाःल्‍ले़ कुधे़गेःक्‍किन्‌आल्‍लोसा चे़त्‍थ्‍याओ पिराङ्‌ङे़ॽओ॥”

²⁶ हे़क्‍केःल्‍ले़ हे़रोद हाङ्‌ङिन् साॽरिक् कुनिङ्‌वाॽ तुगे़साङ् खे़प्‍मो के़वाॽबा तरेबाहाॽरे़ खुनिॽ तगि खुने़ॽ चोगुबा माङ्‌हे़क्‍किन्‌के़प्‍माए के़लॽबा निङ्‌वाॽ चोगुआङ्

²⁷ खे़प्‍मो के़ये़प्‍पा हाङ्‌तिलिङ्‌गाःन् पेगे़ॽआङ् युहुन्‍नारे़ कुधे़गेःक्‍किन्‌फे़त्ते़ॽ फाॽआङ् इङ्‌जाःङ् पिरु॥ खे़न् खिमो पुङ्‌लाहिम्‍मो पेआङ् युहुन्‍नारे़ कुधे़गेःक्‍किन्‌खक्‍तु,

²⁸ हे़क्‍क्‍याङ् चे़त्‍थ्‍याओ फे़त्तुआङ् खे़न् चुक्‍मे़न् पिरु॥ चुक्‍मे़ल्‍ले़ खे़न् तेॽरुआङ् कुम्‍मा पिरुरो॥

²⁹ युहुन्‍नाःल्‍ले़ कुहुॽसाम्‍बाहाॽरे़ कन् मे़घे़प्‍सुआङ् मे़द्‌ये़, हे़क्‍क्‍याङ् कुधक्‍किन् मे़देॽरुआङ् इप्‍पुङ्‌ङो मे़लुप्‍तु॥

³⁰ तगि ये़सुरे़ इङ्‌भन् चोःक्‍से़ पाङ्‌घुसिबा सेःक्‌युक्‍मिबाहाॽरे़ मे़जोगुबा याःम्‍बक् नु मे़हुॽरुसिबा पाःन्‍हाॽ मे़नुःक्‍खे़ मे़द्‌ये़आङ् ये़सुःन् मे़जे़क्‍तु॥

³¹ हे़क्‍क्‍याङ् ये़सुरे़ आल्‍ल एःक्‍सादे़न्‍नो पिगिआङ् सप्‍फासिक् नाःम्‍मासि फाॽआङ् खे़ङ्‌हाॽ मे़त्तुसि, थेआङ्‌भे़ल्‍ले़ के़दाःबा के़बेःक्‍पा मनाहाॽरे़ मे़जोगुल्‍ले़ खुनिॽ चामा ये़म्‍माङ् मे़ङ्‌घोए मे़वये़रो॥

³² हे़क्‍केःल्‍ले़ ये़सुःन् नु कुहुॽसाम्‍बाहाॽ खःङ्‌बेओ स्‍वाःत्ताङ् मे़लाःसे़आङ् एःक्‍सादे़न्‍नो मे़बे॥