ፆኦሲ ማዾ''ም ዳኪንቴዞንሢኮ ማዾ'' 16:25-38 in Male (Ethiopia)

²⁵ ሳዖኮ ዴንዲ ጊዲሚሺ ማዓንዳ ዎዴይዳ ጳውሎሴና ሲላሴና ሺኢጲሢ ሺኢቂ ሺኢቂ ሓሣ ዓይኑሞዋ ዓይናዺ ዓይናዺ ፆኦሲ ጋላታንቴ፤ ሓንጎ ቱኡቴ ዓሳ ዬያ ዔያቶኮ ዋይዛኔ።

²⁶ ዒማ''ና ዔርቲባኣንቴ ቱኡዞ ማኣሮኮ ፃጶ ሄሊ'' ዓጊሣ ዼኤፒ ሳዓ ዓጊፂሢ ዓጊፃዛ፥ ቱኡዞ ማኣሮ ካራ'' ቢያ ፔቴ''ና ቡሊ''ንቴኔ፤ ሓሣ ቢያ ቱኡቴ ዓሶ ቱኮ''ና ካኖ ቢራታኣ ቡሊ''ንቴኔ።

²⁷ ቱኡዞ ማኣሮ ካፓ ዓሢ ጊንዓስካፓ ጴጪ ቱኡዞ ማኣሮ ካራ'' ቡሊ''ንቲ ዓኣሢ ዴንቃዖ ቱኡዞ ዓሳ ቶሊ'' ዴንዴያ ዒዛም ማላዛ ዓፓሮ ፔኤኮ ቱጊ ፔና ዎዻኒ ማሌኔ።

²⁸ ጋዓንቴ ጳውሎሴ፦ «ኑኡኒ ቢያሢ ሃይካኬ! ዬያሮ ኔ ቶኦኮ''ይዳ ፔቴ'' ባኣዚ''ታዖ ማዺፖ!» ጌዒ ዒላቴኔ።

²⁹ ዬማና ካፓ ዓሢ ፖዒ ዔኪ ጳሽኪ ጋሮ ጌላዖ፥ ጎጋይቂ ጎጋይቂ ጳውሎሴና ሲላሴናኮ ቶኮ'' ዴማ'' ባሊቲና ሎኦሜኔ።

³⁰ ዬካፓ ዔያቶ ዙሎ'' ኬሳ''ዖ፦ «ታ ጎዳንሢዮ! ታ ዻቃኒ ዓይጎ ዎኦታንዳያ ኮይሳይ?» ጌዔኔ።

³¹ ዔያታ ዒዛም፦ «ጎዳ ዬሱሴ ጉሙርቄ፤ ኔናንታ ኔ ማኣሮ ዓሶንታ ዻቃንዳኔ» ጌዔኔ።

³² ዬካፓ ጎዳሢኮ ቃኣሎ'' ዒዛና ዒዛኮ ማኣራ ዓኣ ዓሶናም ቢያ ዔያታ ኬኤዜኔ።

³³ ዬማና ቱኡዞ ማኣሮ ካፓ ዓሢ ዬኖ ዋንቶ ዹማ ፔ ማኣሪ ዔኪ ዓኣዺ ኪፆ ዔያቶኮ ማስኬኔ፤ ዬማፓ ኔጉዋዖ ዒዛና ማኣሮ ዓሶና ቢያ ዋኣፆና ማስቴኔ።

³⁴ ቱኡዞ ማኣሮ ካፓ ዓሢ ጳውሎሴና ሲላሴና ፔ ማኣሪ ዔኪ ዓኣዺ ሙኡዚ'' ዔያቶም ዒንጌኔ፤ ማኣሮ ዓሶ ቢያሢና ዎላ'' ኪሪስቶሴ ጉሙርቄሢሮዋ ዒ ዎዛዼኔ።

³⁵ ሳዓ ካራዛ ዓጮ'' ዎይሣ ዓሳ፦ «ዬንሢ ዓሶንሢ ቡሊ''ንቶንጎ» ጌዒ ፖኦሊሴስኬንሢ ዳኬኔ።

³⁶ ቱኡዞ ማኣሮ ካፓሢያ፦ «ዒንሢ ቡሊ''ንታንዳጉዲ ዓጮ'' ዎይሣ ዓሳ ዓሲ ዳኬሢሮ ዓካሪ ኬስኪ ኮሺ ዓኣዹዋቴ» ጌዒ ጳውሎሴም ኬኤዜኔ።

³⁷ ጳውሎሴ ጋዓንቴ፦ «ኑኡኒ ሮሜ ዓሲታንቴ ኑ ጊዳ'' ዎጉዋዖ ዓሳ ቡካ ቤዞይዳ ኑና ጳርቂ፥ ቱኡዞ ማኣራ ኑና ዔያታ ቱኬ''ኔ። ሓሢ ጊንሣ ቱኡዞ ማኣራፓ ዴሚ''ና ኑ ኬስካንዳጉዲ ዎዲ'' ዔያታ ጌዔይ? ዬይ ማዑዋሴ! ዔያታ ፔ ቶኦኪና ሙኪ ኑና ኬሶ''ንጎ!» ጌዔኔ።

³⁸ ፖኦሊሶንሢ ዬያ ዎይሣ ዓሶም ኬኤዛዛ ዎይሣ ዓሳ ጳውሎሴና ሲላሴና ሮሜ ዓጪ ዓሲ ማዔሢ ዔራዖ ዒጊጬኔ።