ፆኦሲ ማዾ''ም ዳኪንቴዞንሢኮ ማዾ'' 11:4-27 in Male (Ethiopia)

⁴ ጴፂሮሴ ጋዓንቴ ሂዚ ጌዒ ቢያ ባኮ ፓይዲ ፓይዲ ኬኤዚሢ ዓርቄኔ።

⁵ «ታኣኒ ዒዮጴ ካታማ'' ሺኢጲሢዳ ዓኣዖ ፆኦሲ ታኣም ፔጋሲ ዻዌ ባኣዚ'' ዛጌኔ፤ ታ ዛጌሢ' ፑኡፒ ዓፒላ ማላ ባኣዚ'' ዖይዶ ዛሎ'' ዓርቂንቲ ጫሪንጫፓ ኬዲ'' ታ ባንሢ ሙካንቴኬ፤

⁶ ዬኖ ባኬሎ ኮሺ'' ታ ዛጋዛ ዱማ ዱማ ቆልሞ፥ ካይዚ ቦዖ ዻካ''ንታ ዼኤፒንታ፥ ካፒያ ጊዳ'' ዓኣንቴ ታ ዛጌኔ፤

⁷ ዒማ''ና ‹ጴፂሮሴ! ዔቂ ሹኪ ሹኪ ሙዔ› ጋዓ ዑኡሲ ታ ዋይዛዖ፥

⁸ ዬይ ‹ማዓዓኬ ጎዳሢዮ! ሙዒንቱዋ ዒኢቴ ባኣዚ'' ታ ሙዒ ቤቂባኣሴ› ጌዔኔ።

⁹ ሓሣ ላሚሢና ዬና ዑኡዜላ ‹ፆኦሲ ጌኤሺ ማሄሢ ኔ ዒኢቴያኬ ጋዓኒ ኮይሱዋሴ› ጌዒ ጫሪንጫፓ ታኣም ኬኤዜኔ።

¹⁰ ዬና ሓይሢ ማይንቲ ያዺ ማዔስካፓ ዬና ዓፒሎ ማላ ባኬላ ጉቤ ሌካ ጫሪንጮ ዔውቴኔ።

¹¹ ዒማ''ና ቂሳሪያይዳፓ ታ ባንሢ ዳኮና ሓይሦ ዓሲ ኑ ዓኣ ማኣሮ ሙኪ ሄሌ''ኔ።

¹² ዓያና ጌኤሺ ታኣኒ ፔቴ''ታዖ ዓልቲሢ ባኣያና ዔያቶና ዎላ'' ዓኣዻንዳጉዲ ታኣም ኬኤዜኔ፤ ሓንሢ ላሆ'' ኪሪስቶሴ ጉሙርቃ ዓሶንሢ ታኣና ዎላ'' ዓኣኔ፤ ዔያቶንታ ዎላ'' ኑ ቆርኔሌዎሴ ማኣሪ ዓኣዺ ጌሌኔ።

¹³ ዒዚያ ፆኦሲ ኪኢታንቻ ዒዛም ጴዼም ዒ ዛጌሢና፦ ‹ዒዮጴ ዓጮ'' ዓሲ ዳኪ ጴፂሮሴ ጌይንታ ሲሞኦኔ ዔኤሊ''ሴ፤

¹⁴ ዒዚ ኔኤና ኔ ማኣሮ ዓሶና ቢያ ዒንሢ ዻቃንዳ ቃኣላ ኔኤም ኬኤዛንዳኔ› ጌዔሢ ዒ ኑም ኬኤዜኔ።

¹⁵ ዬያሮ ታኣኒ ዔያቶም ኬኤዚፆ ዓርቄ ዎዶ''ና ዓያኖ ጌኤዣ ቤርታ ኑ ዑፃ ኬዴ''ሢጉዲ ዔያቶ ዑፃኣ ኬዴ''ኔ።

¹⁶ ዬማና ‹ዮሓኒሴ ዋኣሢና ማስኬኔ፤ ዒንሢ ጋዓንቴ ዓያና ጌኤሺና ማስታንዳኔ› ጌዒ ጎዳ ኬኤዜ ቃኣላ'' ታኣም ጶቄኔ።

¹⁷ ኑኡኒ ጎዳ ዬሱስ ኪሪስቶሴ ጉሙርቄ ዎዶ''ና ፆኦሲ ኑም ዒንጌ ዒንጊፃ ዔያቶማኣ ዒንጊንቴያታቴ ሂዳዖ ፆኦሲ ታ ላኣጋኒ ዎልቄ ታኣኮ ዓኣ?» ጌዔኔ።

¹⁸ ዔያታ ዬያ ዋይዛዖ ጎዖንዶ ጎይሢ ባይዚ ዚቲዮ ጌዔኔ፤ ዬካፓ ዔያታ፦ «ዓካሪ፥ ፆኦሲ ዓይሁዴ ማዒባኣ ዓሳ ዻቃንዳጉዲ ጎሞ ዔያቶም ዓቶም ጌዔኔ» ጌዒ ፆኦሲ ጋላቴኔ።

¹⁹ ዒስፂፓኖሴ ሹጮና ዹይንቲ ሃይቄ ዎዶ''ና ዔቄ ዒፂ ዳውሲፆ ዛሎ''ና ላኣሊንቲ ዴንዴ ኪሪስቶሴ ጉሙርቄ ዓሳ ዴንዲ ፒንቄ፥ ቆጲሮሴና ዓንፆኪያ ዓጮ'' ሄላ''ንዳኣና ዓኣዻዖ ፆኦሲኮ ቃኣሎ'' ዓይሁዴ ዓሲዳፓ ዓታዛ ሜሌ'' ዓሲም ኬኤዚባኣሴ።

²⁰ ማዔቶዋ ቆጲሮሴና ቄሬና ዓጮ''ናይዳፓ ሙኬ ፔቴ'' ፔቴ'' ኪሪስቶሴ ጉሙርቄ ዓሳ ዓንፆኪያ ዓኣዻዖ ዓይሁዴ ማዒባኣ ዓሶማኣ ዓይሱዋዖ ጎዳ ዬሱሴ ዛሎ'' ኮዦ ሓይሶ ኬኤዜኔ።

²¹ ጎዳ ዔያቶ ማኣዴ''ሢሮ ሚርጌ ዓሲ ኪሪስቶሴ ጉሙርቂ ጎዳ ባንሢ ማዔኔ።

²² ዬሩሳላሜይዳ ዓኣ ሺኢጲፆ ማኣሮ ዓሳ ዬያ ዋይዜሢሮ ባርናባሴ ዓንፆኪያ ዳኬኔ።

²³ ዒዚያ ዓኣዺ ፆኦሲ ኮሹሞና ዒንጋ ዒንጊፆ ዴሮ''ም ዎማይዲ ዒንጌቶዋ ዛጋዛ ሚርጌ ዒዛ ዎዛሴኔ፤ ቢያሢ ጉቤ ዒናፓ ዶዲ ጎዳም ጉሙርቂንታያ ማዒ ናንጋንዳጉዲ ዒ ዞሬኔ።

²⁴ ዒዚያ ዓያና ጌኤሺ ኩሙሢ ዎልቄና ዒዛይዳ ማዻያ ሃሣ ሚርጌና ፆኦሲ ጉሙርቃ ኮሺ ዓሲኬ። ሚርጌ ዓሲያ ጎዳ ባንሢ ማዔኔ።

²⁵ ዬካፓ ባርናባሴ ሳውሌ ኮዓኒ ፄርሴሴ ጎዖ ዓጮ'' ዓኣዺ፥

²⁶ ዒዛ ዴንቃዖ ዓንፆኪያ ዔኪ ዒዛ ሙኬኔ። ፔቴ'' ሌዔ ኩሙሢ ዔያታ ዒኢካ ዓኣ ኪሪስቶሴ ጉሙርቃ ዓሶና ዎላ'' ፔቴ'' ማዒ ሚርጌ ዓሲ ዔርዜኔ፤ ኪሪስቶሴ ጉሙርቄ ዓሳ ፔቴ'' ጌዒ ዓንፆኪያይዳ «ዓማኖ'' ዓሶ» ጌይንቴኔ።

²⁷ ዒማ''ና ፔቴ'' ፔቴ'' ፆኦሲ ማሊፆ ኬኤዛዞንሢ ዬሩሳላሜይዳፓ ዓንፆኪያ ዴንዴኔ፤