ፆኦሲ ማዾ''ም ዳኪንቴዞንሢኮ ማዾ'' 10:22-48 in Male (Ethiopia)

²² ዔያታ፦ «ኑኡኒ ሙኬሢ ፄኤቶ ፖኦሊሶኮ ሱኡጋሢ፥ ቆርኔሌዎሴ ኮራፓኬ፤ ዒዚያ ዓይሁዶ ዓሳ ቢያ ዒዛ ቦንቻያ ሓሣ ፆኦሲ ካኣሽካያ ኮሺ ዓሲኬ። ኔና ዒዚ ፔ ማኣሪ ዔኤሊ''ሲ ኔ ጋዓ ባኮ ዋይዛንዳጉዲ ፆኦሲ ኪኢታንቻ ዒዛም ኬኤዜኔ» ጌዔኔ።

²³ ዬካፓ ጴፂሮሴ ዔያቶ ማኣሪ ጌልዚ ሾኦቺንሢ ዎይሣዖ ጉቴ''ሎ ዔቂ ዬንሢ ሙኬዞንሢና ዎላ'' ዓኣዼኔ፤ ዒዮጴይዳ ዓኣ ኪሪስቶሴ ጉሙርቃ ዓሶይዳፓ ፔቴ'' ፔቴ'' ዓሲያ ዒዛና ዎላ'' ዓኣዼኔ።

²⁴ ዚሬሎ ዔያታ ቂሳሪያ ሙካንቴ ቆርኔሌዎሴ ፔኤኮ ዒጊኖና ዑኬ ላጌ ማዔ ዓሶዋ ዔኤሊ'' ጴፂሮሴ ካፓኔ።

²⁵ ጴፂሮሴ ጌሊ ቆርኔሌዎሴና ካኣማዛ ቆርኔሌዎሴ ዒዛኮ ቶኮ'' ዴማ'' ሂርኪ ጌዒ ቦንቾ ዔኤሊ''ሢ ዔኤሌ''ኔ።

²⁶ ጴፂሮሴ ጋዓንቴ፦ «ዔቄ! ታኣ ኔጉዲ ዓሲዋይ!» ጌዒ ዒዛ ዔቂሴኔ።

²⁷ ጴፂሮሴ ቆርኔሌዎሴና ዎላ'' ጌስቲ ጌስቲ ጋሮ ጌላዖ ሚርጌ ቡኪንቲ ዓኣ ዓሲ ዴንቄኔ።

²⁸ ዬካፓ ዬያ ዓሶም፦ «ዓይሁዴ ዓሳ ዓይሁዴ ማዒባኣ ዜርፆና ዎላ'' ፔቴ'' ማዒ ሓሣ ዎሊኮ ማኣሪ ጌላኒያ ኑ ካኣዦ ዎጋ ዓይሡዋኣሢ ዒንሢ ዒንሢ ቶኦኪና ዔራኔ፤ ጋዓንቴ ዖናኣ ታኣኒ ጌኤሽኪባኣ፥ ዒኢቴ ዓሲኬ ጎዑዋጉዲ ፆኦሲ ታና ፔጋሲ ዻዌኔ።

²⁹ ዬያሮ ታኣም ዒንሢ ዓሶ ዳኬ ዎዶ''ና ፔቴ''ታዖ ዓልቱዋዖ ታ ሙኬኔ፤ ዓካሪ ዓይጎሮ ዒንሢ ታና ዔኤሌ''ቶዋ ታ ዔራኒ ኮዓኔ» ጌዔኔ።

³⁰ ዒማ''ና ቆርኔሌዎሴ፦ «ሓኖ'' ዖይዳሳ ኬሊ'' ሃይማ ዎዴ፥ ማሢ ዶንቦልሳ ዎዴ ማዓኣና ታኣኒ ታ ማኣራ ፆኦሲ ሺኢቃንቴ ዓኣፒዳ ዱዱካ ቦኦሬ ዓፒላ ማኣዔ ዓሲ ታ ዔሩዋንቴ ታ ቤርታ ዔቃዖ፥

³¹ ‹ቆርኔሌዎሴ! ፆኦሲ ኔኤኮ ሺኢጲፆ ዋይዜኔ፤ ሓሣ ማንቆ ዓሶም ኔ ዒንጋ ዒንጊፆዋ ኔኤኮ ዔኬኔ፤

³² ዓካሪ ዒዮጴ ዓጮ'' ኪኢታ ዓሲ ዳኪጋፓ ጴፂሮሴ ጌይንታ ሲሞኦኔ ዔኤሊ''ሴ፤ ሓሢ ዒዚ ባዞ'' ዓጫ ዓኣ ጎሮ'' ጉኡዓሢ፥ ሲሞኦኔ ማኣራ ሾኦቹሞይዳ ዓኣኔ› ታኣም ጌዔሢሮ፥

³³ ቤዞና ኪኢቶ'' ዓሶንሢ ታ ኔ ኮራ ዳኬኔ፤ ኔኤኒያ ሓሢ ሙኬሢ ቃራኬ፤ ዓካሪ ፆኦሲ ኔና ኬኤዛንዳጉዲ ዓይሤ ባኮ ቢያ ዋይዛኒ ኑኡኒ ቢያሢ ፆኦሲ ቤርታ ሓይካ ቡኬኔ» ሂዚ ጌዔኔ።

³⁴ ጴፂሮሴ ዔያቶም ኬኤዛዖ፦ «ጎኔና ፆኦሲ ዓሲ ዓሲዳፓ ዱማሱዋኣሢና ፔቴ''ያ ባሼ ማሂ ዛጉዋኣሢ ታ ዔሬኔ፤

³⁵ ዓይጎ ዓጪ ዓሲ ማዔቶዋ ፆኦሲ ዒጊጫያ ሓሣ ጎኑሞ ባኣዚ'' ማዻያ ማዔ ዓሢ፥ ዬያ ፆኦሲ ናሽካኔ።

³⁶ ፆኦሲ ዒስራዔኤሌ ዴሮ''ም ቃኣሎ'' ዳኬሢ ዔርቴያኬ፤ ኮዦ ሓይሳ ዬሱስ ኪሪስቶሴ ዛሎ''ና ሙኬሢያ ዔያቶምኬ፤ ጋዓንቴ ዬሱስ ኪሪስቶሴ ቢያሢኮ ጎዳኬ።

³⁷ ዮሓኒሴ ዋኣፆና ማስኪፆ ኬኤዜ ዎዳ''ፓ ዓርቃዖ፥ ጌሊላ ዓጫ''ፓ ዴንዲ ዪሁዳ ዓጮ'' ቢያይዳ ማዔ ባኮ ዒንሢ ዔራኔ።

³⁸ ሓሣ ፆኦሲ፡ ናዚሬቶ ዬሱሴ ዓያኖ ጌኤዦና ዶኦሬሢንታ ዎልቄያ ዒዛም ዒንጌሢ ዒንሢ ዔራኔ፤ ፆኦሲ ዒዛና ዎላ'' ማዔሢሮ ዒዚ ኮሺ ባኣዚ'' ማዺ ማዺ ፑርቶ ዓያኖና ዓርቂንቴ ዓሶዋ ፓሢ ፓሢ ሓንቴኔ።

³⁹ «ዪሁዳ ካታሞ ኮይሎ''ና ዬሩሳላሜ ካታሞናይዳ ዒዚ ማዼ ባኮኮ ቢያ ኑኡኒ ማርካኬ፤ ዔያታ ጋዓንቴ ዒዛ ሚሢዳ ሱፂ ዎዼኔ።

⁴⁰ ፆኦሲ ዒዛ ሃይሣሳ ኬሎ''ና ሓይባ''ፓ ዔቃንዳጉዲና ዓሶማኣ ዒ ጴዻንዳጉዲ ማሄኔ።

⁴¹ ዒዚ ጴዼሢ ቢያ ዓሲምቱዋንቴ ሓይባ''ፓ ዔቄሢኮ ጊንፃ ዒዛና ዎላ'' ሙዒ ዑሽኬ፥ ፆኦሲ ቤርታዺ ዶኦሬ፥ ኑና ዒዛኮ ማርኮንሢምኬ።

⁴² ሓያ ባኮ ዴሮ''ም ኑ ኬኤዛንዳጉዲ፥ ሼምፖና ዓኣ ዓሶና ሓይቄ ዓሶናይዳ ዒ ዎጋንዳያ ማዒፆ ሓሣ ዬያ ፆኦሲ ማሊ ጌሤያ ማዔሢያ ኑ ማርካዻንዳጉዲ ኑና ዓይሤኔ።

⁴³ ዒዛና ጉሙርቃዞንሢም ቢያ ዒዛኮ ሱ'ንፆና ጎማ ዓቶም ጌይንታንዳሢ ፆኦሲ ማሊፆ ኬኤዛ ዓሳ ዒዛ ዛሎ'' ማርካዼኔ» ጌዔኔ።

⁴⁴ ጴፂሮሴ ዬያ ኬኤዛኣና ቃኣሎ'' ዋይዜ ዓሶ ቢያሢዳ ዓያና ጌኤሺ ኬዴ''ኔ።

⁴⁵ ጴፂሮሴና ዎላ'' ሙኬ፥ ኪሪስቶሴ ጉሙርቃ ዓይሁዶ ዓሳ፡ ዓይሁዴ ማዒባኣ ዜርፆም ዓያኖ ጌኤዦ ዒንጊፃ ላኣሊንቴሢ ዛጋዖ ዲቃቲ ሄርሼኔ።

⁴⁶ ዓይሁዴ ማዒባኣ ዜርፆም ዓያኖ ጌኤዣ ዒንጊንቴያታሢ ዔያታ ዔሬሢ፥ ዓይሁዴ ማዒባኣ ዜርፃ ዱማ ዱማ ዻንጋና ጌስታንቴ ሓሣ ፆኦሲ ጋላቲ ጋላቲ ቦንቻንቴ ዔያታ ዋይዜሢሮኬ።

⁴⁷ ዬማና ጴፂሮሴ፦ «ሓኣታ ዓሳ ኑጉዲ ዓያና ጌኤሺ ዔኬኔ፤ ዓካሪ ዋኣፆና ዔያታ ማስቱዋጉዲ ዖኦኒ ዔያቶ ላኣጋይ?» ጌዔኔ።

⁴⁸ ዬያሮ ዔያታ ዬሱስ ኪሪስቶሴ ሱ'ንፆና ዋኣፆ ማስታንዳጉዲ ዓይሤኔ፤ ዬካፓ ጴፂሮሴ ዔያቶና ዎላ'' ዻካ'' ኬሊ'' ዴዓንዳጉዲ ዔያታ ዒዛ ሺኢቄኔ።