ዮሓኒሴ 8:29-52 in Male (Ethiopia)

²⁹ ታና ዳኬሢ ታኣና ዎላ''ኬ፤ ታኣኒ ቢያ ኬሊ'' ማዻሢ ዒዛ ዎዛሳ ባኣዚ'' ማዔሢሮ ታና ታኣሮ ሌሊ ዒ ሃሺ''ባኣሴ» ጌዔኔ።

³⁰ ዬሱሴ ዬያ ኬኤዛዛ ሚርጌ ዓሲ ዒዛ ጉሙርቄኔ።

³¹ ዬሱሴ ዒዛ ጉሙርቃ ዓይሁዶ ዓሶም፦ «ዒንሢ ታ ዔርዚፆና ዶዲ ናንጌቴ ጎኔና ዒንሢ ታና ዔሪ፥ ታ ዓሲ ማዓንዳኔ፤

³² ጎኑሞ ዒንሢ ዔራንዳኔ፤ ጎኑሞዋ ዒንሢ ዓይላ''ቶይዳፓ ኬሳ''ንዳኔ» ጌዔኔ።

³³ ዔያታ ጋዓንቴ፦ «ኑኡኒ ዓብራሃሜ ዜርሢኬ፤ ፔቴ''ታዖ ዖኦኮዋ ኑ ዓይሌ'' ማዒ ዔሩዋሴ፤ ዓካሪ ኔኤኒ ‹ዒንሢ ዓይሉ''ሞይዳፓ ኬስካንዳኔ› ኑና ጋዓሢ ዎይቲዳይ?» ጌዔኔ።

³⁴ ዬሱሴ ዔያቶም፦ «ጎኔ ታ ዒንሢም ጋዓኔ፤ ጎሜ ማዻሢ ቢያ ጎሜኮ ዓይሌ''ኬ፤

³⁵ ዓይሌ'' ቢያ ዎዴና ማኣሪዳ ናንጊ ዓቱዋሴ፤ ሾዖና ናይ ጋዓንቴ ቢያ ዎዴ ማኣራ ናንጋኔ።

³⁶ ዬያሮ ሾዖና ናዓሢ ዒንሢ ዓይላ''ቶፓ ኬሴ''ቴ ጎኔና ዒንሢ ዓይላ''ቶፓ ኬስኬያ ማዓንዳኔ።

³⁷ ዒንሢ ዓብራሃሜ ዜርፆ ማዔሢ ታ ዔራኔ፤ ጋዓንቴ ታኣኮ ቃኣሎ'' ዒንሢ ዔኩዋያታሢሮ ታና ዎዻኒ ኮዓኔ።

³⁸ ታኣኒ ታ ዓዶ ኮራፓ ዛጌ ባኮ ዒንሢም ኬኤዛኔ፤ ዒንሢ ጋዓንቴ ዒንሢ ዓዶ ኮራፓ ዋይዜ ባኮ ማዻኔ» ጌይ ማሄኔ።

³⁹ ዔያታ ማሃዖ፦ «ኑኡኮ ዓዳሢ ዓብራሃሜኬ» ዒዛም ጋዓዛ፥ ዬሱሴ ዔያቶም፦ «ዓብራሃሜ ናይ ዒንሢ ማዔያታቴ ዓብራሃሜ ማዼሢጉዲ ማዼያናንዳኔ፤

⁴⁰ ታኣኒ ፆኦሲዳፓ ዋይዜ ጎኑሞ ዒንሢም ኬኤዜኔ፤ ዒንሢ ጋዓንቴ ታና ዎዻኒ ኮዓኔ፤ ዓብራሃሜ ዬያይዲባኣሴ።

⁴¹ ዓካሪ ዒንሢ ማዻሢ ዒንሢኮ ዓዳሢ ማዾ''ኬ» ጋዓዛ፥ ዔያታ ማሃዖ፦ «ኑኡኒ ዓሌ'' ናይቱዋሴ፤ ኑኡኮ ፔቴ'' ዓዴ ዓኣኔ፤ ዒዚያ ፆኦሲኬ» ጌዔኔ።

⁴² ዬሱሴ ዔያቶም፦ «ፆኦሲ ዒንሢኮ ዓዶ ማዔያታቴ ታና ዒንሢ ናሽኬያ ናንዳኔ፤ ዓይጎሮ ጌዔቴ ታኣኒ ሓይካ ዓኣሢ ፆኦሲ ኮራፓ ሙኪኬ፤ ታና ዳኬሢያ ዒዛ ማዓንዳኣፓዓቴም ታኣኒ ታ ቢታንቶና ሙኪባኣሴ።

⁴³ ታኣኒ ጋዓ ባካ ዒንሢም ዎይቲ ጌሉዋይ ጌዔቶ ታ ቃኣሎ'' ዒንሢ ዋይዚ ዔካኒ ኮዑዋኣሢሮኬ።

⁴⁴ ዒንሢ ዒንሢኮ ዓዳሢ፥ ፃላሄ ናኣቶ''ኬ፤ ዒንሢኮ ማሊፃ ዒንሢ ዓዳሢ ዓፃዻ ባኮ ኩንሥሢኬ፤ ዒዚ ቤርታፓ ዓርቃዖ ሼምፖ ዎዻያኬ፤ ጎኑሞ ዒዛይዳ ባኣሢሮ ጎኑሞና ዎላ'' ፔቴ''ታዖ ካኣሚ ዒዛኮ ባኣሴ፤ ዒዚ፡ ሉኡቃያ ሃሣ ሉኡዙሞኮዋ ዓዶ ማዔሢሮ ሉኡቂ ዒ ኬኤዛ ዎዶ''ና ፔ ማሊፃፓ ዔኪ ኬኤዛኔ።

⁴⁵ ታኣኒ ጋዓንቴ ጎኑሞ ኬኤዛያ ማዔሢሮ ዒንሢ ታና ጉሙርቁዋሴ፤

⁴⁶ ሂንዳ ዒንሢዳፓ፦ ‹ኔኤኒ ጎሜናኬ› ታና ጋዓንዳሢ ዖናዳይ? ጎኑሞ ታ ኬኤዛያ ማዔቴ ዓካሪ ዒንሢ ዓይጎሮ ታና ጉሙርቁዋይ?

⁴⁷ ፆኦሲዳፓ ማዔሢ ዒዛኮ ቃኣሎ'' ዋይዛንዳኔ፤ ዓካሪ ዒዛኮ ቃኣሎ'' ዒንሢ ዋይዙዋኣሢ ዒዛይዳፓ ዒንሢ ማዒባኣሢሮኬ» ጌዔኔ።

⁴⁸ ዓይሁዶ ዓሳ፦ «ኔኤኒ ሳማሪያ ዓጪ ዓሲኬ፤ ፑርታ ዓያናኣ ኔ ጊዳ'' ዓኣኔ፤ ኑኡኮ ጌይፃ ፒዜቱዋዓዳ?» ዒዛም ጌዔኔ።

⁴⁹ ዬሱሴ ዔያቶም፦ «ታ ጊዳ'' ፃላሄ ዓያና ባኣሴ፤ ታኣኒ ታኣኮ ዓዶ ቦንቻኔ፤ ጋዓንቴ ዒንሢ ታኣኮ ቶኦኪ ባይዛኔ።

⁵⁰ ማዔቶዋ ታኣኒ ታ ቦንቾ ኮዑዋሴ፤ ታኣኒ ቦንቺንታንዳጉዲ ኮዓያና ዬኖ ዛሎ'' ታኣም ዎጋይ ሜሌ'' ዓኣኔ።

⁵¹ ጎኔ ታ ዒንሢም ጋዓኔ፦ ‹ታኣኮ ቃኣሎ'' ካፓሢ ፔቴ''ታዖ ሃይቃዓኬ› » ጌዔኔ።

⁵² ዓይሁዶ ዓሳ ጊንሣ፦ «ፑርቶ ዓያና'' ኔ ጊዳ'' ዓኣሢ ዓካሪ ኑ ዔሬኔ፤ ዓብራሃሜታዖ ሃይቄኔ ሃሣ ፆኦሲ ማሊፆ ኬኤዛ ዓሳኣ ሃይቄኔ፤ ኔኤኒ ጋዓንቴ ‹ታኣኮ ቃኣሎ'' ካፓሢ ፔቴ''ታዖ ሃይቃዓኬ› ጋዓኔ፤