ዮሃኒሳ 9:27-41 in Dawro

²⁷ ኢ ኡንቱንታ፥ «ታኒ ሂንቴንቱሲ ኦዳዲ፤ ሲሲቤይኪታ። ኣዪሲ ላዔንꬁዋ ሲሳናው ኮዪቴ? ሂንቴካ ዬሱሳ ካሊያዋንታ ጊዳናው ኮዪቴ?» ያጌዳ።

²⁸ ኡንቱንቱ ኣ ቦሪዴ፥ «ኔኒ ሄ ቢታኒያ ካሊያዋ፤ ኑኒ ሙሳ ካሊያዋንታ።

²⁹ ፆሳይ ሙሴሲ ሃሳዬዳዋ ኑኒ ኤሬቶ፤ ሺን ሃ ቢታኒያ ጊዶፔ፥ ኢ ሃቃፔ ዬዴንቶኔ ኑኒ ኤሮኮ» ያጌዲኖ።

³⁰ ቢታኒ፥ «ኢ ሃቃፔ ዬዴንቶኔ ሂንቴንቱ ኤሬናዌ ማላሊሲያዋ፤ ሺን ኢ ታ ኣይፊያ ፓꬄዳ!

³¹ ፆሳው ያዪያ ኡራይኔ ፆሳይ ኮዪያዋ ኦꬂያ ኡራይ ዴዖፔ፥ ሄ ኡራባ ፆሳይ ሲሲያዋፔ ኣቲን፥ ናጋራንቻቱዋባ ሲሴና።

³² ቆቃ ጊዲዴ ዬሌቴዳ ኣሳ ኣይፊያ ኦኒኔ ፓꬂና፥ ሳዓይ ሜꬌቶዴፔ ዶሚና፥ ሲሴቲ ኤሬና።

³³ ሃ ቢታኒ ፆሳፔ ዪቤናዋ ጊዲንቶ፥ ኢቲባኔ ኦꬃናዉካ ዳንዳዬና» ያጌዳ።

³⁴ ኡንቱንቱ ዛሪዴ ኣው፥ «ኔኒ ናጋራን ዬሌታዴ ዲጬዳዌ ኑና ታማሪሳናው ኮያይ?» ያጌዲኖ፤ ኣዪሁዳ ዎሳ ጎሊያፔ ካሬ ኣ ኬሴዲኖ።

³⁵ ኡንቱንቱ ቢታኒያ ካሬ ኬሴዳዋ ዬሱሲ ሲሴዳ፤ ዬሱሲ ቢታኒያ ዴሚዴ፥ «ኣሳ ናዓ ኣማናይ?» ያጌዳ።

³⁶ ቢታኒ ዬሱሳ፥ «ጎዳው፥ ታኒ ኣ ኣማናናዳን ኢ ኦኔ? ታው ኦዳሪኪ!» ያጌዳ።

³⁷ ዬሱሲ ቢታኒያ፥ «ኔኒ ኣ ቤዓዳ፤ ሃ ኔናና ሃሳዪያዌካ ኣ» ያጌዳ።

³⁸ ቢታኒ ዛሪዴ፥ «ጎዳው፥ ኣማናይ» ያጊዴ ዬሱሳው ጎዪኔዳ።

³⁹ ዬሱሲ፥ «ቆቃቱ ፄላና ማላኔ ፄሊያዋንቱ ቆቃና ማላ፥ ታኒ ፒርዳናው ሃ ሳዓ ያዲ» ያጌዳ።

⁴⁰ ኣናና ዴዒያ ኣማሬዳ ፓሪሳዋቱ ሄዋ ሲሲዴ፥ «ኑኒካ ቆቄዬ?» ያጊዴ ኦቼዲኖ።

⁴¹ ዬሱሲ፥ «ሂንቴንቱ ቆቃ ጊዴዴንቶ፥ ሂንቴንቱሲ ናጋራ ጊዴና፤ ሺን ሃዒ ሂንቴንቱ፥ ‹ኑኒ ፄሌቶ› ያጊታ፤ ሂንቴንቱ ናጋራና ዴዒታ» ያጌዳ።

²⁷ I unttuntta, “Taani hinttenttussi odaaddi; sisibeeykkita. Ayissi laa7enthuwa sisanaw koyyiitee? Hinttekka Yesuusa kaalliyaawantta giddanaw koyyiitee?” yaageedda.

²⁸ Unttunttu A boriidde, “Neeni he bitaniyaa kaalliyaawaa; nuuni Musa kaalliyaawantta.

²⁹ Xoossay Musessi haasayeeddawaa nuuni ereetto; shin ha bitaniyaa gidooppe, I haqappe yeeddenttonne nuuni erokko” yaageeddino.

³⁰ Bitani, “I haqappe yeeddenttonne hinttenttu erennawe maalalissiyaawaa; shin I ta ayfiyaa patheedda!

³¹ Xoossaw yayyiyaa uraynne Xoossay koyyiyaawaa oothiyaa uray de7ooppe, he uraabaa Xoossay sisiyaawappe attin, nagaranchchatuwaabaa sisenna.

³² Qooqa gidiide yeletteedda asaa ayfiyaa ooninne pathina, sa7ay medhettoodeppe doommina, sisetti erenna.

³³ Ha bitani Xoossaappe yibeennawaa gidintto, ittibaanne oothanawukka danddayenna” yaageedda.

³⁴ Unttunttu zaariide aw, “Neeni nagaraan yelettaade dicceeddawe nuuna tamaarissanaw koyyay?” yaageeddino; Ayihuda woosa golliyaaappe kare A kesseeddino.

³⁵ Unttunttu bitaniyaa kare kesseeddawaa Yesuusi siseedda; Yesuusi bitaniyaa demmiide, “Asa Na7aa ammanay?” yaageedda.

³⁶ Bitani Yesuusa, “Godaw, taani A ammananaadan I oonee? Taw odarikkii!” yaageedda.

³⁷ Yesuusi bitaniyaa, “Neeni A be7aadda; ha neenanna haasayiyaawekka A” yaageedda.

³⁸ Bitani zaariide, “Godaw, ammanay” yaagiide Yesuusaw goyinneedda.

³⁹ Yesuusi, “Qooqatuu xeellana malanne xeelliyaawanttu qooqana mala, taani pirddanaw ha sa7aa yaaddi” yaageedda.

⁴⁰ Aananna de7iya amareedda Parisaawatuu hewaa sisiide, “Nuunikka qooqeyee?” yaagiide oochcheeddino.

⁴¹ Yesuusi, “Hinttenttu qooqa gideeddentto, hinttenttussi nagaraa gidenna; shin ha77i hinttenttu, ‘Nuuni xeelleetto’ yaagiita; hinttenttu nagaraanna de7iita” yaageedda.