ዮሃኒሳ 8:2-44 in Dawro

² ዎንቴꬃ ጋላሲ ጉራን ጌሻ ጎሊያ ሲሜዳ፤ ኡባ ኣሳይ ኣኮ ዪና፥ ኡቲዴ ኡንቱንታ ታማሪሱዋ ዶሜዳ።

³ ሙሴ ሂጊያ ታማሪሲያዋንቱኔ ፓሪሳዋቱ ዎሹሚሺን ኦይቄቴዳ ኢቲ ሚሺራቶ ኣኮ ኣሄዲኖ። ኡንቱንቱ ኣሳ ኡባ ሲንꬃን ኢዞ ኤሲዴ ዬሱሳ፥

⁴ «ታማሪሲያዎ፥ ሃ ሚሺራታ ዎሹማዴ ኦይቄታዱ።

⁵ ሂጊያ ቦላን ሙሴ ሃኒ ማላ ማጫ ኣሳ ሹቻን ጫዳና ማላ፥ ኑና ኣዛዜዳ። ያቲና ኔኒ ዋጋይ?» ያጌዲኖ።

⁶ ኡንቱንቱ ሄዋ ጌዳዌ ዬሱሳ ሞቲያዋ ዴሚዴ ኣ ፓጫናሳ፤ ሺን ዬሱሲ ሆኪዴ፥ ባሬ ቢራꬊያን ቢታ ቦላ ፃፌዳ።

⁷ ኡንቱንቱ ኣ ኦቺዴ ኣጌናን ኢፂና፥ ፑዴ ꬎቁ ጊዴ፥ «ሂንቴንቱ ጊዱዋን ናጋራ ኦꬂቤና ኣሳይ ካሴቲዴ፥ ኢዞ ሹቻን ጫዶ» ያጌዳ።

⁸ ቃሲካ ሆኪዴ፥ ቢታ ቦላ ፃፌዳ።

⁹ ኡንቱንቱ ሄዋ ሲሴዳ ዎዴ፥ ካሴቲዴ ጪማቱ ኬሲና፥ ኢቱ ኢቱ ኬሲዴ ዉሬዲኖ፤ ኣ ሲንꬃን ሚሺራታ ኤቃ ዴዒሺን፥ ዬሱሲ ባሬ ፃላላ ኣቴዳ።

¹⁰ ኢ ፑዴ ꬎቁ ጊዴ ሚሺራቶ፥ «ሚሺራቴ፥ ኣሳቱ ሃቃን ዴዒኖ? ኦኒኔ ኔ ቦላ ፒርዲቤኔ?» ያጌዳ።

¹¹ ሚሺራታ፥ «ጎዳው፥ ኦኒኔ ታ ቦላ ፒርዲቤና» ያጋዱ። ዬሱሲ ኢዞ፥ «ታኒካ ኔ ቦላ ፒርዲኬ፤ ባ፤ ላዔንꬃዴ ናጋራ ኦꬆፓ» ያጌዳ።

¹² ቃሲካ ዬሱሲ ኣሳው፥ «ታኒ ኣላሜው ፖዑዋ፤ ታና ካሊያ ኦኒኔ ዴዑዋ ኢሚያ ፖዑዋ ዴማናፔ ኣቲን፥ ꬉማኒ ኡባካ ሃሜቴና» ያጊዴ ሃሳዬዳ።

¹³ ሄዋፔ ጉዬ ፓሪሳዋቱ፥ «ኔኒ ኔባ ማርካታሳ፤ ኔ ማርካቴꬃይ ቱማ ጊዴና» ያጌዲኖ።

¹⁴ ዬሱሲ ዛሪዴ፥ «ታኒ ታባ ማርካቶፔካ፥ ታ ማርካቴꬃይ ቱማ፤ ኣዪሲ ጎፔ፥ ታኒ ሃቃፔ ያዲታንቶኔ ቃሲ ሃቃ ባይታንቶ ኤራይ፤ ሺን ሂንቴንቱ ኤሪኪታ።

¹⁵ ኣሳይ ፒርዲያ ኦጊያን ሂንቴንቱ ፒርዲታ፤ ታኒ ኢቲ ኡራ ቦላካ ፒርዲኬ።

¹⁶ ሺን ታኒ ፒርዲያዋ ጊዶፔኔ፥ ታ ፒርዳይ ቱማ፤ ኣዪሲ ጎፔ፥ ታና ኪቴዳ ታ ኣቡ ታናና ዴዔፔ ኣቲን፥ ታኒ ታሬካ ዴዒኬ።

¹⁷ ላዑ ኣሳ ማርካቴꬃይ ቱማ ጊዲያዌ ሂንቴንቱ ሂጊያን ፃፌቲ ኡቴዳ።

¹⁸ ታኒ ታባ ታ ሁጴው ማርካታዲ፤ ቃሲ ታና ኪቴዳ ታ ኣቡካ ታባ ማርካቴ» ያጌዳ።

¹⁹ ኡንቱንቱ፥ «ኔ ኣቡ ሃቃን ዴዒ?» ያጊዴ ዬሱሳ ኦቼዲኖ። ዬሱሲ ዛሪዴ፥ «ሂንቴንቱ ታናካ ዎይ ታ ኣባካ ኤሪኪታ፤ ታና ኤሬዳዋ ጊዲንቶ፥ ታ ኣባካ ኤራኒታ» ያጌዳ።

²⁰ ዬሱሲ ጌሻ ጎሊያ ታማሪሲዴ፥ ኢሞታ ሚሻይ ኡቲያ ሳፂኒያ ማታን ሄዋ ሃሳዬዳ። ኣ ኦኒኔ ኦይቂቤና፤ ኣዪሲ ጎፔ፥ ኣ ዎዲ ቢሮ ጋኪዲጊቤና።

²¹ ቃሲካ ዬሱሲ ኡንቱንታ፥ «ታኒ ባና ሂንቴንቱ ታና ኮያና፤ ሺን ሂንቴንቱ፥ ሂንቴንቱ ናጋራን ሃይቃኒታ። ታኒ ቢያ ሳዓካ ባናው ሂንቴንቱ ዳንዳዪኪታ» ያጌዳ።

²² ኣዪሁዳቱ፥ «ኢ፥ ‹ታኒ ቢያሳ ሂንቴንቱ ባናው ዳንዳይኪታ› ያጌ፤ ኢ ባሬና ባሬካ ዎꬋኔዬ?» ያጌዲኖ።

²³ ዬሱሲ ዛሪዴ፥ «ሂንቴንቱ ጋርሳ ኣሳ፤ ታኒ ቦላ ኣሳ። ሂንቴንቱ ሃ ኣላሚያ ኣሳ፤ ታኒ ሃ ኣላሚያ ኣሳ ጊዲኬ።

²⁴ ሂንቴንቱ፥ ሂንቴንቱ ናጋራን ሃዪቃናዋ ታኒ ሂንቴንቱሲ ኦዴዳዌ ሃዋሳ፤ ታኒ ታና ጊዲያዋ ሂንቴንቱ ኣማናና ꬋዮፔ፥ ሂንቴንቱ፥ ሂንቴንቱ ናጋራን ሃያኒታ» ያጌዳ።

²⁵ ኡንቱንቱ፥ «ኔኒ ኦኔ?» ያጊዴ ኦቼዲኖ። ዬሱሲ ዛሪዴ፥ «ታኒ ታና።

²⁶ ታኒ ሂንቴባ ሃሳዪያባይኔ ፒርዲያባይ ዳሮባይ ዴዔ። ሺን ታና ኪቴዳዌ ቱማንቻ፤ ቃሲ ታኒ ኣፔ ሲሴዳዋ ኣላሚያ ኣሳው ኦዳይ» ያጌዳ።

²⁷ ኢ ባሬ ኣዉዋባ ሃሳዪያዋ ኡንቱንቱ ኣኬኪቤይኪኖ።

²⁸ ሄዋ ዲራው፥ ዬሱሲ ኡንቱንታ፥ «ታና ኣሳ ናዓ ሂንቴንቱ ማስቃሊያ ቦላ ፑዴ ዴንꬂያ ዎዴ፥ ታኒ ታና ጊዲያዋኔ ቃሲ ታኒ ታ ኣቡ ታና ታማሪሴዳዋዳን ሃሳዪያዋፔ ኣቲን፥ ታ ሼኒያን ኣይኔ ኦꬄናዋ ሂንቴንቱ ኤራኒታ።

²⁹ ቃሲ ታና ኪቴዳዌ ታናና ዴዔ፤ ታኒ ኡባ ዎዴ ኣ ናሼቺያዋ ኦꬂያ ዲራው፥ ኢ ታ ፃላላ ኣጊቤና» ያጌዳ።

³⁰ ዬሱሲ ሄዋ ሃሳዪሺን ሲሴዳ ዳሮ ኣሳይ ኣ ኣማኔዲኖ።

³¹ ዬሱሲ ባሬና ኣማኔዳ ኣዪሁዳቱዋ፥ «ሂንቴንቱ ታኒ ታማሪሲያዎ ኣዛዜቶፔ፥ ቱሙ ታና ካሊያዋንታ።

³² ሂንቴንቱ ቱማቴꬃካ ኤራኒታ፤ ቃሲ ቱማቴꬃይ ሂንቴንታ ኣይሌቴꬃፔ ኬሳናዋ» ያጌዳ።

³³ ኡንቱንቱ ዛሪዴ፥ «ኑኒ ኣብራሃሞ ዛሬ፤ ኑኒ ኦሲኔካ ኣይሌቲቤይኮ። ያቲና ኔኒ ዋጋዴ፥ ‹ኣይሌቴꬃፔ ሂንቴንቱ ኬሳኒታ› ጋይ?» ያጌዲኖ።

³⁴ ዬሱሲ፥ «ታኒ ሂንቴንቱሲ ቱሙዋ ኦዳይ፤ ናጋራ ኦꬂያ ኦኒኔ ናጋራ ኣይሊያ።

³⁵ ኣይሊ ኡባ ዎዴ ሶዪን ዴዔና፤ ሺን ናዓይ ሜꬊናው ጎሌን ዴዔ።

³⁶ ናዓይ ሂንቴንታ ኣይሌቴꬃፔ ኬሶፔ፥ ሂንቴንቱ ኣይሌቴꬃፔ ቱሙ ኬሳኒታ።

³⁷ ሂንቴንቱ ኣብራሃሞ ዛሬ ጊዲያዋ ታኒ ኤራይ፤ ሺን ታ ታማሪሲያዋ ሂንቴንቱ ኣኬና ዲራው፥ ታና ዎꬋናው ኮዪታ።

³⁸ ታኒ ታ ኣቡ ታና ቤሴዳዋ ሃሳያይ፤ ቃሲ ሂንቴንቱካ ሂንቴንቱ ኣዉዋፔ ሲሴዳዋ ኦꬂታ» ያጌዳ።

³⁹ ኡንቱንቱ ዛሪዴ፥ «ኑ ኣቡ ኣብራሃማ» ያጌዲኖ። ዬሱሲ ኡንቱንታ፥ «ሂንቴንቱ ኣብራሃሞ ናና ጊዴዴንቶ፥ ኢ ኦꬄዳ ኦሱዋ ማላ ኦꬃኒታ።

⁴⁰ ሺን ፆሳፔ ሲሴዳ ቱሙዋ ኦዴዳ ታና ሂንቴንቱ ዎꬋናው ኮዪታ፤ ኣብራሃሜ ሄዋዳን ኦꬂቤና።

⁴¹ ሂንቴንቱ፥ ሂንቴንቱ ኣዉ ኦꬄዳዋ ኦꬂታ» ያጌዳ። ኡንቱንቱ ዛሪዴ፥ «ኑኒ ዎሹማን ዲቃላቴꬃ ዬሌቲቤይኮ፤ ኑሲ ኢቲ ኣዉ፥ ፆሳ ፃላላይ ዴዔ» ያጌዲኖ።

⁴² ዬሱሲ ኡንቱንታ፥ «ሂንቴንቱ ፆሳ ናና ቱሙ ጊዴዴንቶ፥ ታና ሲቃና፤ ኣዪሲ ጎፔ፥ ታኒ ፆሳ ማታፔ ያዴ ሃዋን ዴዓይ። ታና ኢ ኪቴዳዋፔ ኣቲን፥ ታኒ ታ ሼኒያን ያቤይኬ።

⁴³ ታኒ ታማሪሲያዋ ሂንቴንቱ ኣኬኬናዌ ኣያሴ? ታኒ ታማሪሲያዋ ሂንቴንቱ ኣኬና ዲራሳ።

⁴⁴ ሂንቴንቱ፥ ሂንቴንቱ ኣዉዋ ኢታ ኣያና ናና፤ ቃሲ ሂንቴንቱ፥ ሂንቴንቱ ኣዉ ኣሞቲያዋ ኦꬃናው ኮዪታ። ኢ ካሴፔ ዶሚዴ፥ ሼምፑዋ ዎꬌዳዋ፤ ቱማቴꬃይ ኣኒ ባይና ዲራው፥ ቱማቴꬃኮ ሺቂ ኤሬና። ኢ ዎርዱዋ ሃሳዪያ ዎዴ፥ ባሬፔ ሃሳዬ፤ ኣዪሲ ጎፔ፥ ኢ ዎርዳንቻኔ ቃሲ ዎርዶካ ኣዉዋ።

² Wonttetha gallassi guuran Geeshsha Golliyaa simmeedda; ubba asay aakko yiina, uttiide unttuntta tamaarissuwaa doommeedda.

³ Muse higgiyaa tamaarissiyaawanttunne Parisaawatuu woshummishshin oyqetteedda itti mishiratto aakko aheeddino. Unttunttu asaa ubbaa sinthan izo essiide Yesuusa,

⁴ “Tamaarissiyaawoo, ha mishiratta woshummaade oyqettaaddu.

⁵ Higgiyaa bollan Muse hanni mala macca asaa shuchchaan caddana mala, nuuna azazeedda. Yaatina neeni waagay?” yaageeddino.

⁶ Unttunttu hewaa geeddawe Yesuusa mootiyaawaa demmiide A paaccanaassa; shin Yesuusi hokkiide, bare biradhdhiyan biittaa bolla xaafeedda.

⁷ Unttunttu A oochchiide aggennaan ixxina, pude dhoqqu giide, “Hintenttu gidduwan nagaraa oothibeenna asay kasetiide, izo shuchchan caddo” yaageedda.

⁸ Qassikka hokkiide, biittaa bolla xaafeedda.

⁹ Unttunttu hewaa siseedda wode, kasetiide cimatuu kesina, ittu ittuu kesiidde wureeddino; A sinthaan mishiratta eqqa de7ishshin, Yesuusi bare xalalaa atteedda.

¹⁰ I pude dhoqqu giide mishiratto, “Mishirattee, asatuu haqan de7iino? Ooninne ne bolla pirddibeennee?” yaageedda.

¹¹ Mishiratta, “Godaw, ooninne ta bolla pirddibeenna” yaagaaddu. Yesuusi izo, “Taanikka ne bolla pirddikke; ba; laa7enthaade nagaraa oothoppa” yaageedda.

¹² Qassikka Yesuusi asaw, “Taani alamew poo7uwaa; Taana kaalliyaa ooninne de7uwa immiyaa poo7uwaa demmanappe attin, dhumaani ubbaakka hamettenna” yaagiide haasayeedda.

¹³ Hewaappe guyye Parisaawatuu, “Neeni nebaa markkattaasa; ne markkatethay tuma gidenna” yaageeddino.

¹⁴ Yesuusi zaariide, “Taani Tabaa markkattooppekka, Ta markkatethay tuma; ayissi gooppe, Taani haqappe yaadditanttonne qassi haqa baytantto eray; shin hinttenttu erikkita.

¹⁵ Asay pirddiyaa ogiyaan hinttenttu pirddiita; Taani itti uraa bollaakka pirddikke.

¹⁶ Shin Taani pirddiyaawaa gidooppenne, Ta pirdday tuma; ayissi gooppe, Taana kiitteedda Ta Aabbu Taananna de7eeppe attin, Taani Taarekka de7ikke.

¹⁷ Laa77u asaa markkatethay tuma gidiyaawe hinttenttu higgiyaan xaafetti utteedda.

¹⁸ Taani Tabaa Ta huuphew markkattaaddi; qassi Taana kiitteedda Ta Aabbukka Tabaa markkattee” yaageedda.

¹⁹ Unttunttu, “Ne aabbu haqan de7ii?” yaagiide Yesuusa oochcheeddino. Yesuusi zaariide, “Hinttenttu Taanakka woy Ta Aabbakka erikkita; Taana ereeddawaa gidintto, Ta Aabbakka eranita” yaageedda.

²⁰ Yesuusi Geeshsha Golliyaa tamaarissiidde, imotaa miishshay uttiyaa saaxiniyaa matan hewaa haasayeedda. A ooninne oyqqibeenna; ayissi gooppe, A wodii biro gakkidiggibenna.

²¹ Qassikka Yesuusi unttuntta, “Taani baana hinttenttu Taana koyyana; shin hinttenttu, hinttenttu nagaraan hayqqanita. Taani biyaa sa7akka baanaw hinttenttu danddayikkita” yaageedda.

²² Ayihudatuu, “I, ‘Taani biyaasaa hinttenttu baanaw danddaykkita’ yaagee; I barena barekka wodhaneeyee?” yaageeddino.

²³ Yesuusi zaariide, “Hinttenttu garssa asa; Taani bolla asa. Hinttenttu ha alamiyaa asa; Taani ha alamiyaa asa gidikke.

²⁴ Hinttenttu, hinttenttu nagaraan hayiqqanawaa Taani hinttenttussi odeeddawe hawaassa; Taani Taana gidiyaawaa hinttenttu ammanana dhayooppe, hinttenttu, hinttenttu nagaraan hayyanita” yaageedda.

²⁵ Unttunttu, “Neeni oonee?” yaagiide oochcheeddino. Yesuusi zaariide, “Taani Taana.

²⁶ Taani hinttebaa haasayiyabaynne pirddiyaabay darobay de7ee. Shin Taana kiitteeddawe tumanchchaa; qassi Taani aappe siseeddawaa alamiyaa asaw oday” yaageedda.

²⁷ I bare Aawuwabaa haasayiyawaa unttunttu akeekibeykkino.

²⁸ Hewaa diraw, Yesuusi unttuntta, “Taana Asaa Na7aa hinttenttu masqqaliyaa bolla pude denthiyaa wode, Taani Taana gidiyaawaanne qassi Taani Ta Aabbu Taana tamaarisseeddawaadan haasayiyawaappe attin, Ta sheniyaan aynne oothennawaa hinttenttu eranita.

²⁹ Qassi taana kiitteeddawe Taananna de7ee; Taani ubba wode A nashechchiyaawaa oothiyaa diraw, I Ta xalalaa aggibeenna” yaageedda.

³⁰ Yesuusi hewaa haasayishshin siseedda daro asay A ammaneeddino.

³¹ Yesuusi barena ammaneedda Ayihudatuwaa, “Hinttenttu Taani tamaarissiyaawoo azazettooppe, tumu Taana kaalliyaawantta.

³² Hinttenttu tumatethaakka eranita; qassi tumatethay hinttentta aylletethaappe kessanawaa” yaageedda.

³³ Unttunttu zaariide, “Nuuni Abraahaamo zare; nuuni oossinneekka aylletibeykko. Yaatina neeni waagaade, ‘Aylletethaappe hinttenttu kesanita’ gay?” yaageeddino.

³⁴ Yesuusi, “Taani hinttenttussi tumuwaa oday; nagaraa oothiyaa ooninne nagaraa aylliyaa.

³⁵ Ayllii ubba wode soyin de7enna; shin na7ay medhinaw gollen de7ee.

³⁶ Na7ay hinttentta aylletethaappe kesooppe, hinttenttu aylletethaappe tumu kessanita.

³⁷ Hinttenttu Abraahaamo zare gidiyaawaa Taani eray; shin Ta tamaarissiyaawaa hinttenttu akkenna diraw, Taana wodhanaw koyyiita.

³⁸ Taani Ta Aabbu Taana besseddawaa haasayay; qassi hinttenttukka hinttenttu aawuwaappe siseeddawaa oothiita” yaageedda.

³⁹ Unttunttu zaariide, “Nu aabbu Abraahaama” yaageeddino. Yesuusi unttuntta, “Hinttenttu Abraahaamo naanaa gideeddentto, I ootheedda oosuwaa malaa oothanita.

⁴⁰ Shin Xoossaappe siseedda tumuwaa odeedda Taana hinttenttu wodhanaw koyyiita; Abraahaame hewaadan oothibeenna.

⁴¹ Hinttenttu, hinttenttu aawuu ootheeddawaa oothiita” yaageedda. Unttunttu zaariide, “Nuuni woshumaan diqaalatethaa yelettibeykko; nuussi itti Aawuu, Xoossaa xalalay de7ee” yaageeddino.

⁴² Yesuusi unttuntta, “Hinttenttu Xoossaa naanaa tumu gideeddentto, Taana siiqana; ayissi gooppe, Taani Xoossaa matappe yaade hawaan de7ay. Taana I kiitteeddawaappe attin, Taani Ta sheniyaan yabeykke.

⁴³ Taani tamaarissiyaawaa hinttenttu akeekennawe ayaassee? Taani tamaarissiyaawaa hinttenttu akkenna diraassa.

⁴⁴ Hinttenttu, hinttenttu aawuwaa iita ayyaanaa naanaa; qassi hinttenttu, hinttenttu aawuu amottiyaawaa oothanaw koyyiita. I kaseppe doommiide, shemppuwaa wodheeddawaa; tumatethay aani baynna diraw, tumatethaakko shiiqi erenna. I wordduwaa haasayiyaa wode, bareppe haasayee; ayissi gooppe, I worddanchchaanne qassi worddookka aawuwaa.