ዮሃኒሳ 5:4-22 in Dawro

⁴ ኣዪሲ ጎፔ፥ ኢቲ ኢቲ ጌዴ ጎዳ ኪታንቻይ ሄ ዳጋቴዳ ሃꬃኮ ጌሊዴ፥ ሃꬃ ቃꬄ፤ ሃꬃይ ቃፄዳዋፔ ጉዪያን፥ ኮይሮ ጌሌዳ ኡራይ ባሬና ኦይቄዳ ኣይ ሃርጊያፔካ ፓፄ።

⁵ ሄዋን ሃታማኔ ሆስፑን ላይꬃ ሳኬቴዳ ኢቲ ቢታኒ ዴዔ።

⁶ ሄ ቢታኒ ሄዋን ጊሴዳዋ ዬሱሲ ቤዒዴ፥ ዳሮ ዎዲያ ሳኬቴዳዋካ ኤሪዴ ቢታኒያ፥ «ፓፃናው ኮያይ?» ያጌዳ።

⁷ ሳኬቲያ ቢታኒ ዛሪዴ፥ «ጎዳው፥ ሃꬃይ ቃፂያ ዎዴ፥ ታና ሃꬃን ዬጊያ ኣሳይ ꬋዬዳ፤ ታኒ ጌላና ሃኒያ ዎዴ፥ ሃራ ኡራይ ታፔ ካሴቲዴ ጌሊ ኣጌ» ያጌዳ።

⁸ ዬሱሲ ኣ፥ «ዴንዳ ኤቃ፤ ኔኒ ጊሶዋ ቶካዴ ባ» ያጌዳ።

⁹ ቢታኒ ኤሌካ ፓፂ ኣጌዳ፤ ባሬ ጊሱዋ ቶኪዴ ቤዳ። ሄዌ ሃኔዳዌ ሳምባታ ጋላሳና።

¹⁰ ሄዋ ዲራው፥ ኣዪሁዳቱ ፓፄዳ ቢታኒያ፥ «ሃቼ ሳዓይ ሳምባታ፤ ኔኒ ኔ ጊሱዋ ቶካ ቢያዌ ዎጋ ጊዴና» ያጌዲኖ።

¹¹ ሺን ቢታኒ፥ «ታና ፓꬄዳዌ፥ ‹ኔ ጊሱዋ ቶካዴ ባ› ያጌዳ» ጊዴ ኡንቱንቱሲ ዛሬዳ።

¹² ኡንቱንቱ ኣ፥ «ኔና፥ ‹ኔ ጊሱዋ ቶካዴ ባ› ጌዳዌ ኢ ኦኔ?» ጊዴ ኦቼዲኖ።

¹³ ሺን ሄዋን ጮራ ኣሳይ ዴዒያ ዲራዉኔ፥ ዬሱሲካ ጌሜቴዳ ዲራው፥ ቢታኒ ባሬና ፓꬄዳዌ ኦኔንቶ ኤሬና።

¹⁴ ዬሱሲ ጉዬፔ ሄ ቢታኒያ ጌሻ ጎሊያን ዴሚዴ፥ «ቤዓ፥ ኔኒ ሃዒ ፓፃዳ፤ ሃዋፔካ ኢታባይ ኔና ጋኬና ማላ፥ ላዔንꬆ ናጋራ ኦꬆፓ» ያጌዳ።

¹⁵ ሄዋፔ ጉዪያን፥ ቢታኒ ቢዴ፥ ባሬና ፓꬄዳዌ ዬሱሳ ጊዲያዋ ኣዪሁዳ ኣሳ ካፓቶ ኦዴዳ።

¹⁶ ዬሱሲ ሃዋ ሳምባታን ኦꬄዳ ዲራው፥ ኡንቱንቱ ዬሱሳ ዬዴሳን ዋዪሱዋ ዶሜዲኖ።

¹⁷ ዬሱሲ ዛሪዴ ኡንቱንቱሲ፥ «ታ ኣቡ ኡባ ዎዴ ኦꬄ፤ ታኒካ ኦꬃናው ቤሴ» ያጌዳ።

¹⁸ ሄዋ ዲራው፥ ዬሱሲ ሳምባታ ጋላሳ ቦንቼና ዲራ ፃላላሳ ጊዴናን፥ ባሬና ፆሳና ቃራዪዴ፥ «ፆሳይ ታ ኣባ» ጌዳ ዲራው፥ ኣዪሁዳ ኣሳ ካፓቱ ኣ ዎꬋናው ካሴዋፔ ሚኒሲዴ ኮዪኖ።

¹⁹ ዬሱሲ ዛሪዴ ኡንቱንቱሲ፥ «ታኒ ሂንቴንቱሲ ቱሙዋ ኦዳይ፤ ናዓይ ባሬካ ኣይኔ ኦꬄና። ኢ ባሬ ኣቡ ኦꬂሺን ቤዒያዋ ፃላላ ኦꬄ፤ ኣዉ ኦꬂያዋ ናዓይካ ኦꬄ።

²⁰ ኣዪሲ ጎፔ፥ ኣዉ ባሬ ናዓ ሲቄ፤ ቃሲ ኢ ኦꬂያ ኦሱዋ ኡባባ ባሬ ናዓ ቤሴ። ኡባ ሂንቴንቱ ማላሌታና ጋካናው፥ ኢ ሃዋፔ ኣꬊያ ኦሱዋካ ባሬ ናዓ ቤሳናዋ።

²¹ ጋሱኔ፥ ኣዉ ሃይቄዳዋንታ ሃይቁዋፔ ዴንꬂዴ ሼምፑዋና ዎꬂያዋዳን፥ ናዓይካ ቃሲ ባሬ ኮዮዋንታ ሼምፑዋና ዎꬄ።

²² ኣሳይ ኡባይ ኣዉዋ ቦንቺያዋዳን፥ ናዓካ ቦንቻና ማላ፥ ኣዉ ፒርዳ ኡባ ናዓው ኢሜዳዋፔ ኣቲን፥ ኢ ኦናኔ ፒርዴና፤ ናዓ ቦንቼና ኡራይ፥ ኣ ኪቴዳ ኣዉዋካ ቦንቼና።

⁴ Ayissi gooppe, itti itti gede Godaa kiitanchchay he dagatteedda haathaakko geliide, haathaa qaathee; haathay qaaxxeeddawaappe guyyiyan, koyro geleedda uray barena oyqqeedda ay harggiyaappekka paxee.

⁵ Hewaan hattamanne hosppun laythaa saketteedda itti bitani de7ee.

⁶ He bitani hewan giseeddawaa Yesuusi be7iide, daro wodiyaa saketteeddawaakka eriide bitaniyaa, “Paxanaw koyyay?” yaageedda.

⁷ Sakettiyaa bitani zaariide, “Godaw, haathay qaaxxiyaa wode, taana haathaan yeggiyaa asay dhayeedda; taani gelana haniyaa wode, hara uray taappe kasetiide geli aggee” yaageedda.

⁸ Yesuusi A, “Dendda eqqa; neeni gisowaa tookkaade ba” yaageedda.

⁹ Bitani elekka paxi aggeedda; bare gisuwaa tookkiide beedda. Hewe haneeddawe Sambbata gallassaana.

¹⁰ Hewaa diraw, Ayihudatuu paxeedda bitaniyaa, “Hachche sa7ay Sambbataa; neeni ne gisuwaa tookka biyaawe woga gidenna” yaageeddino.

¹¹ Shin bitani, “Taana patheeddawe, ‘Ne gisuwaa tookkaade ba’ yaageedda” giide unttunttussi zaareedda.

¹² Unttunttu A, “Neena, ‘Ne gisuwaa tookkaade ba’ geeddawe I oonee?” giide oochcheeddino.

¹³ Shin hewaan cora asay de7iyaa dirawunne, Yesuusikka geemetteedda diraw, bitani barena patheeddawe oonentto erenna.

¹⁴ Yesuusi guyyeppe he bitaniyaa Geeshsha Golliyan demmiide, “Be7a, neeni ha77i paxaadda; hawaappekka iitabay neena gakkenna mala, laa7entho nagaraa oothoppa” yaageedda.

¹⁵ Hewaappe guyyiyan, bitani biide, barena patheeddawe Yesuusa gidiyaawaa Ayihuda asaa kaappatoo odeedda.

¹⁶ Yesuusi hawaa Sambbataan ootheedda diraw, unttunttu Yesuusa yedesaan waayissuwaa doommeeddino.

¹⁷ Yesuusi zaariide unttunttussi, “Ta Aabbu ubba wode oothee; taanikka oothanaw bessee” yaageedda.

¹⁸ Hewaa diraw, Yesuusi Sambbata gallassaa bonchchenna diraa xalalaassa gidennaan, barena Xoossaanna qarayiide, “Xoossay ta Aabba” geedda diraw, Ayihuda asaa kaappatuu A wodhanaw kasewaappe minissiide koyyiino.

¹⁹ Yesuusi zaariide unttunttussi, “Taani hinttenttussi tumuwaa oday; Na7ay barekka aynne oothenna. I bare Aabbu oothishshin be7iyaawaa xalalaa oothee; Aawuu oothiyaawaa Na7aykka oothee.

²⁰ Ayissi gooppe, Aawuu bare Na7aa siiqee; qassi I oothiyaa oosuwaa ubbabaa bare Na7aa bessee. Ubba hinttenttu maalalettana gakkanaw, I hawaappe aadhdhiya oosuwaakka bare Na7aa bessanawaa.

²¹ Gaasuunnee, Aawuu hayqqeeddawantta hayquwaappe denthiide shemppuwaanna wothiyawaadan, Na7aykka qassi bare koyyowantta shemppuwaanna wothee.

²² Asay ubbay Aawuwaa bonchchiyawaadan, Na7aakka bonchchana mala, Aawuu pirddaa ubbaa Na7aw immeeddawaappe attin, I oonanne pirddenna; Na7aa bonchchenna uray, A kiitteedda Aawuwaakka bonchchenna.