ዮሃኒሳ 4:28-52 in Gofa

²⁸ ሄሳፌ ጉዬ፥ ማጫሲያ ባ ሃꬃ ኦቱዋ ኣጋዳ ጉዬ ካታማ ባዳ ኣሳኮ፥

²⁹ «ታኒ ኦꬂዳባ ኡባ ታው ኦዲዳ ኣዲያ ቤዓናው ዬꬊቴ። ኢ ኪሪስቶሳ ጊዳንዴሻ?» ያጋሱ።

³⁰ ኣሳይ ካታማፔ ኬዪዲ ዬሱሳኮ ቢዶሶና።

³¹ ሄሲ ሃኒሺን፥ ኢያ ታማሬቲ ዬሱሳኮ፥ «ጉꬃባ ማርኪ» ያጊዲ ዎሲዶሶና።

³² ሺን ኢ፥ «ታው ሂንቴ ኤሮና ካꬂ ታ ሜይሲ ዴዔስ» ያጊስ።

³³ ሄሳ ጊሾ፥ ኢያ ታማሬቲ ባንታ ጊዶን፥ «ኢያው ሚያባ ኣሲ ኤሆና ኣጌና?» ያጊዶሶና።

³⁴ ዬሱሲ ኤንታኮ፥ «ታ ካꬃይ ታና ኪቲዳይሳ ሼኒያ ኦꬃናይሳኔ ኢያ ኦሱዋ ፖላናይሳ።

³⁵ ሂንቴ፥ ‹ኦይዱ ኣጌናፔ ጉዬ ካꬃይ ጫኬታና› ጌኬቲዬ? ሺን ታኒ ሂንቴው ኦዳይስ፤ ካꬃይ ካፂዲ ሺሾስ ጋኪዳይሳ ሎይꬂ ፄሊቴ።

³⁶ ዜሬይሲኔ ጫኬይሲ ኢሲፌ ኡፋይታና ሜላ ጫኬይሲ ዳሞዜ ኤኬስ ቃሲ ካꬃ ሜሪና ዴዖስ ሺሼስ።

³⁷ ሂዛ፥ ‹ኢሶይ ዜሬስ፤ ሃንኮይ ቃሲ ጫኬስ› ጊያ ኦዳይ ቱማ።

³⁸ ሂንቴ ዳቡሪቦናይሳ ሺሻና ሜላ ታኒ ሂንቴና ኪታስ። ሃራቲ ኦꬂ ዳቡሪዳሱዋን ጌሊዲ ሂንቴ ኤንታ ዳቡራ ኣይፊያ ኤኪዴታ» ያጊስ።

³⁹ ማጫሲያ፥ «ኢ፥ ታኒ ኦꬂዳ ኡባባ ኦዲስ» ጋዳ ማርካቲዳ ጊሾ ሄ ካታማን ዴዒያ ሳማሬ ኣሳፔ ዳሮቲ ዬሱሳ ኣማኒዶሶና።

⁴⁰ ሳማሬ ኣሳይ ዬሱሳኮ ዪዲ፥ ባንታ ማታን ጋምዓና ሜላ ዬሱሳ ዎሲን ኢ ያን ናምዑ ጋላስ ኡቲስ።

⁴¹ ኢ ኦዲያ ቃላ ጊሾ ካሴይሳፌ ዳሮ ኣሳይ ኣማኒዶሶና።

⁴² ቃሲ ኤንቲ ማጫሴኮ፥ «ሃዒ ኑ ኣማኔይ ኑ ሁዔን ኢ ጌይሳ ሲዒዳ ጊሾሳፌ ኣቲን ኔኒ ማርካቲዳ ጊሾሳ ጊዴና። ቃሲ ኢ ቱማ ሃ ኣላሚያ ኣሼይሳ ጊዴይሳ ኑኒ ኤሪዳ» ያጊዶሶና።

⁴³ ናምዑ ጋላሳፔ ጉዬ፥ ዬሱሲ ያፔ ኬዪዲ ጋሊላ ቢታ ቢስ።

⁴⁴ ዬሱሲ ባ ሁዔን፥ «ናቤይ ባ ቢታን ቦንቼቴና» ያጊዲ ካሴቲዲ ኦዲስ።

⁴⁵ ዬሱሲ ጋሊላ ጋኪዳ ዎዴ ጋሊላ ኣሳይ ኢያ ሞኪዶሶና። ኣይስ ጊኮ፥ ፓሲካ ባሌ ቦንቺያ ጋላስ ኤንቲ ዬሩሳላሜን ዴዒያ ጊሾ ኢ ኦꬂዳባ ኡባ ቤዒዶሶና።

⁴⁶ ዬሱሲ ሃꬃ ዎይኔ ኡሺ ላሚዳ ቤሳ፥ ጋሊላን ዴዒያ ቃና ካታማ ቢስ። ቂፊርናሆሜን ካዎ ኬꬃን ኦꬂያ ኢሲ ሹማስ ናዓይ ሃርጌቲስ።

⁴⁷ ዬሱሲ ዪሁዳፔ ጋሊላ ዪዳይሳ ሄ ሹማይ ሲዒዲ ኢያኮ ዪስ። ሃይቃናው ማቲዳ ባ ናዓ ቢዲ ፓꬃና ሜላ ዬሱሳ ዎሲስ።

⁴⁸ ዬሱሲ ሹማኮ፥ «ፆሳይ ኦꬂያ ማላታታኔ ኦራꬃባታ ቤዖና ዴዒሼ ሂንቴ ኡባራካ ኣማኔኬታ» ያጊስ።

⁴⁹ ሹማይ ዛሪዲ፥ «ጎዳው፥ ታ ናዓይ ሃይቆና ዴዒሺን ታራ ዬꬋርኪ» ያጊስ።

⁵⁰ ዬሱሲ፥ «ኔ ሶ ባ፤ ኔ ናዓይ ፓፃና» ያጊስ። ሄ ሹማይ ዬሱሲ ጊዳይሳ ኣማኒዲ ባ ሶ ቢስ።

⁵¹ ኢ ባ ሶ ቢሺን ኢያ ኣይሌቲ ኢያኮ ዪሼ ኢያራ ኦጌን ጋሄቲዲ፥ «ኔ ናዓይ ፓፂስ» ጊዶሶና።

⁵² ኢ ባ ኣይሌታ ባ ናዓስ ኣይ ሳቴን ሎዒዳኮ ኦይቺስ። ኤንቲ ዛሪዲ፥ «ዚኔ ላፑን ሳቴን ሚሻይ ኣጊስ» ያጊዶሶና።

²⁸ Hessafe guye, maccasiya ba haatha otuwa aggada guye katamaa bada asaakko,

²⁹ “Taani oothidabaa ubbaa taw odida addiya be7anaw yedhdhite. I Kiristtoosa gidanddeshshaa?” yaagasu.

³⁰ Asay katamaappe keyidi Yesuusakko bidosona.

³¹ Hessi hanishin, iya tamaareti Yesuusakko, “Guuthabaa markkii” yaagidi woossidosona.

³² Shin I, “Taw hintte eronna kathi ta meyssi de7ees” yaagis.

³³ Hessa gisho, iya tamaareti bantta giddon, “Iyaw miyabaa asi ehonna aggenna?” yaagidosona.

³⁴ Yesuusi enttako, “Ta kathay tana kiittidayssa sheniya oothanayssanne iya oosuwa polanayssa.

³⁵ Hintte, ‘Oyddu ageenappe guye kathay cakettana’ geekketiyye? Shin taani hinttew odays; kathay kaxidi shiishoos gakkidayssa loythi xeellite.

³⁶ Zereyssinne cakkeyssi issife ufayttana mela cakkeyssi damooze ekkees qassi kathaa merinaa de7os shiishees.

³⁷ Hiza, ‘Issoy zerees; hankkoy qassi cakkees’ giya oday tuma.

³⁸ Hintte daaburiboonayssa shiishana mela taani hinttena kiittas. Harati oothi daaburidasuwan gelidi hintte entta daaburaa ayfiyaa ekkideta” yaagis.

³⁹ Maccasiya, “I, taani oothida ubbabaa odis” gada markkattida gisho he kataman de7iya Samaare asaappe daroti Yesuusa ammanidosona.

⁴⁰ Samaare asay Yesuusakko yidi, bantta matan gam77ana mela Yesuusa woossin I yan nam77u gallas uttis.

⁴¹ I odiya qaala gisho kaseyssafe daro asay ammanidosona.

⁴² Qassi entti maccaseekko, “Ha77i nu ammaney nu huu7en I geyssa si7ida gishossafe attin neeni markkattida gishossa gidenna. Qassi I tuma ha alamiya ashsheyssa gideyssa nuuni erida” yaagidosona.

⁴³ Nam77u gallasappe guye, Yesuusi yaappe keyidi Galiila biitta bis.

⁴⁴ Yesuusi ba huu7en, “Nabey ba biittan bonchchettena” yaagidi kasetidi odis.

⁴⁵ Yesuusi Galiila gakkida wode Galiila asay iya mokkidosona. Ays giikko, Paasika Baale bonchchiya gallas entti Yerusalaamen de7iya gisho I oothidabaa ubbaa be7idosona.

⁴⁶ Yesuusi haathaa woyne ushshi laammida bessaa, Galiilan de7iya Qaana katama bis. Qifirnahoomen kawo keethan oothiya issi shuumaas na7ay harggettis.

⁴⁷ Yesuusi Yihudappe Galiila yidayssa he shuumay si7idi iyaakko yis. Hayqqanaw matida ba na7aa bidi pathana mela Yesuusa woossis.

⁴⁸ Yesuusi shuumakko, “Xoossay oothiya malaatatanne oorathabata be7onna de7ishe hintte ubbarakka ammanekketa” yaagis.

⁴⁹ Shuumay zaaridi, “Godaw, ta na7ay hayqqonna de7ishin taara yedhdharkki” yaagis.

⁵⁰ Yesuusi, “Ne soo ba; ne na7ay paxana” yaagis. He shuumay Yesuusi gidayssa ammanidi ba soo bis.

⁵¹ I ba soo bishin iya aylleti iyaakko yishe iyara ogen gahettidi, “Ne na7ay paxis” gidosona.

⁵² I ba aylleta ba na7aas ay saaten lo77idaakko oychchis. Entti zaaridi, “Zine laappun saaten mishay aggis” yaagidosona.