ዮሃኒሳ 4:18-54 in Dawro

¹⁸ ኔኒ ኢቼሹ ኣሲና ጌላዳ፤ ሃዒ ኔናና ዴዒያ ቢታኒ ኔ ኣሲና ጊዴና። ኔኒ ሃዒ ታው ኦዴዳዌ ቱማ» ያጌዳ።

¹⁹ ሚሺራታ ቃይ፥ «ጎዳው፥ ኔኒ ናቢያ ጊዲያዋ ታ ሃዒ ኤራዲ፤

²⁰ ኑ ሳማሪያ ኣሳ ኣዋቱ ሃ ዴሪያን ጎዪኔዲኖ፤ ሺን ኣዪሁዳቱ ሂንቴንቱ ኣሳይ ፆሳው ጎዪናናው ቤሲያ ሳዓይ ዬሩሳላሜና ያጊታ» ያጋዱ።

²¹ ዬሱሲ፥ «ሃ ሚሺራቴ፥ ታና ኣማና፤ ሃ ዴሪያን ዎይ ዬሩሳላሜን ኣዉዋ ፆሳው ሂንቴንቱ ጎዪኔና ዎዲ ያናዋ።

²² ሂንቴንቱ ሳማሪያ ኣሳይ ሂንቴ ኤሬናባው ጎዪኒታ፤ ፆሳይ ኑና ኣዪሁዳቱዋ ጎዔቲዴ ኣቶቴꬃ ኣሂያ ዲራው፥ ኑኒ ኑ ኤሪያዎ ጎዪኔቶ።

²³ ሺን ኣዉዋ ፆሳው ቱሙዋፔ ጎዪኒያዋንቱ ኣ፥ ጌሻ ኣያና ዎልቃኒኔ ፆሳ ፆሳቴꬃዳን ጎዪኒያ ዎዲ ማታቴዳ፤ ኡባ ሃዒካ ጋኬዳ። ኣዪሲ ጎፔ፥ ኣሳ ባሬው ጎዪናና ማላ፥ ኣዉ ፆሳይካ ሃ ኦጊያን ጎዪኒያዋንታ ኮዬ።

²⁴ ፆሳይ ኣያና፤ ኣው ጎዪኒያዋንቱካ ጌሻ ኣያና ዎልቃኒ ፆሳ ፆሳቴꬃዳን ጎዪናናው ቤሴ» ያጌዳ።

²⁵ ሚሺራታ፥ «ማሲሂያ ጌቴቲያ ኦኬቶዌ ያናዋ ታኒ ኤራይ። ኢ ዪያ ዎዴ ኑሲ ኡባባ ኦዳናዋ» ያጋዱ።

²⁶ ዬሱሲ፥ «ሃ ኔናና ሃሳዪያዌ ታኒ ኣ» ያጌዳ።

²⁷ ሃዋ ኡንቱንቱ ሃሳዪሺን፥ ዬሱሳ ካሊያዋንቱ ቤዳሳፔ ሲሜዲኖ። ዬሱሲ ሚሺራቲና ሃሳዪሺን ኡንቱንቱ ቤዒዴ ዳሪሲ ማላሌቴዲኖ፤ ሺን ሚሺራቶ፥ «ኣያ ኮያይ?» ዎይ ዬሱሳ፥ «ኢናና ኣዪሲ ሃሳያይ?» ጊዴ ኦቾዌ ኦኒኔ ባዋ።

²⁸ ሄዋፔ ጉዪያን፥ ሚሺራታ ባሬ ሃꬃ ኦቱዋ ኣጋ ባሻ ጉዬ ካታማ ባዴ ኣሳው፥

²⁹ «ታኒ ኦꬄዳዋ ኡባ ታው ኦዴዳ ቢታኒያ ቤዓናው ዴንዲቴ፤ ሄዌ ኪሪስቶሳ ጊዳንዴሻ?» ያጋዱ።

³⁰ ኣሳይ ካታማፔ ኬሲዴ፥ ዬሱሳኮ ቤዳ።

³¹ ሄዌ ሃኒሺን፥ ኣ ካሊያዋንቱ ዬሱሳ፥ «ጉꬃባ ማሪኪ!» ያጊዴ ዎሴዲኖ።

³² ሺን ኢ፥ «ታው ሂንቴንቱ ኤሬና ቁማይ ታኒ ሚያዌ ዴዔ» ያጌዳ።

³³ ሄዋ ዲራው፥ ኣ ካሊያዋንቱ ባሬንቱ ጊዶን፥ «ኣው ሚያባ ኣሄዳ ኣሳይ ዴዓንዴሻ?» ያጌዲኖ።

³⁴ ዬሱሲ ኡንቱንቱሲ፥ «ታ ቁማይ ታና ኪቴዳዋ ሼኒያ ኡዱሳኔ ኣ ኦሱዋ ፖሉሳ።

³⁵ ሂንቴንቱ፥ ‹ኦይዱ ኣጌናፔ ጉዪያን፥ ካꬃይ ጫኬታናዋ› ጊኪቴዬ? ታኒ ሂንቴንቱሲ ኦዳይ፤ ጎሻ ሎይꬂ ፄሊቴ፤ ካꬃይ ጫካ ቤሴዳ።

³⁶ ዜሪያዌኔ ጫኪያዌ ኢቲፔ ናሼታና ማላ፥ ጫኪያዌ ዲርጉዋ ኣኬኔ ካꬃ ሜꬊና ዴዖ ሺሼ።

³⁷ ሃ ጋሱዋን፥ ‹ኢቱ ዜሬ፤ ቃሲ ኢቱ ጫኬ› ጊያ ሃሳያይ ቱማ።

³⁸ ሂንቴንቱ ዳቡሪቤናዋ ጫካና ማላ፥ ታኒ ሂንቴንታ ኪታዲ፤ ሃራቱ ኦꬂ ዳቡሬዲኖ፤ ሂንቴንቱ ሃራቱዋ ዳቡራን ጌሌዲታ» ያጌዳ።

³⁹ ሚሺራታ፥ «ኢ ታኒ ኦꬄዳ ኡባባ ኦዴዳ» ጋዴ ማርካቴዳ ዲራው፥ ሄ ካታማን ዴዒያ ሳማሪያ ኣሳፔ ጮራይ ዬሱሳ ኣማኔዳ።

⁴⁰ ሳማሪያ ኣሳይ ዬሱሳኮ ዬዳ ዎዴ፥ ባሬንቱ ማታን ጋሚዓና ማላ፥ ዬሱሳ ዎሲና ኢ ያኒ ላዑ ጋላሳ ኡቴዳ።

⁴¹ ኢ ኦዲያ ቃላ ዲራው፥ ካሴዋፔ ጮራ ኣሳይ ኣማኔዳ፤

⁴² ቃሲ ኡንቱንቱ ሚሺራቶ፥ «ኑኒ ኑ ሁጴው ኢ ጊያዋ ሲሲዴ ኣማኔዳዋፔ ኣቲን፥ ኔኒ ማርካቴዳ ዲራሳ ጊዴና፤ ኢ ቱሙ ኣላሚያ ኣሳ ኣሺያዋ ጊዲያዋካ ኑኒ ኤሬዶ» ያጌዲኖ።

⁴³ ላዑ ጋላሳፔ ጉዪያን፥ ዬሱሲ ሳማሪያፔ ኬሲዴ፥ ጋሊላ ጋዲያ ቤዳ።

⁴⁴ ኣዪሲ ጎፔ፥ ኢ ባሬ ሁጴው፥ «ናቢ ባሬ ጋዲያን ቦንቼቴና» ያጊ ኦዴዳ።

⁴⁵ ዬሱሲ ጋሊላ ጋኬዳ ዎዴ፥ ጋሊላ ኣሳይ ኣ ሞኬዳ፤ ፓሲጋ ቦንቺያ ጋላሲ ኡንቱንቱ ዬሩሳላሜን ዴዒያ ዲራው፥ ኢ ኦꬄዳ ኡባባ ቤዔዲኖ።

⁴⁶ ዬሱሲ ሃꬃ ዎዪኒያ ኡሻ ኬሴዳ፥ ጋሊላን ዴዒያ ቃና ካታማ ቤዳ። ቂፊሪናሆማን ኣ ናዓይ ሳኬቲያ፥ ካቲያ ጎሌን ኦꬂያ ኢቲ ካፑ ዴዔ።

⁴⁷ ዬሱሲ ዪሁዳፔ ጋሊላ ዬዳዋ ሄ ካፑ ሲሲዴ፥ ኣኮ ዪዴ ሃይቃናው ማቴዳ ባሬ ናዓ ቢዴ ፓꬃና ማላ፥ ዬሱሳ ዎሴዳ።

⁴⁸ ዬሱሲ ሄ ካፑዋ፥ «ፆሳይ ኦꬂያ ማላታኔ ሄቾ ጊሲያባ ቤዔናኒ ዴዒዴ፥ ሂንቴንቱ ኣዪኔ ኣማኒኪታ» ያጌዳ።

⁴⁹ ሄ ካፑ ዛሪዴ፥ «ጎዳው፥ ታ ናዓይ ሃይቄናን ዴዒሺን፥ ታናና ባሪኪ» ያጌዳ።

⁵⁰ ዬሱሲ፥ «ባ፤ ኔ ናዓይ ፓፃ ዴዓናዋ!» ያጌዳ። ሄ ካፑ ዬሱሲ ጌዳዋ ኣማኒዴ ቤዳ።

⁵¹ ኢ ባሬ ጎሌ ቢሺን፥ ኣ ቆማቱ ኣናና ኦጊያን ጋኬቲዴ ኣ፥ «ኔ ናዓይ ፓፃ ዴዔ» ጌዲኖ።

⁵² ኢ ባሬ ቆማቱዋ ባሬ ናዓው ኣይ ሳቲያን ኬኬዴንቶ ኦቺና ኡንቱንቱ፥ «ዚኖ ላፑ ሳቲያን ቆፁ ኣ ኣጌዳ» ያጌዲኖ።

⁵³ ናዓ ኣዉ ዬሱሲ ባሬው፥ «ኔ ናዓይ ፓፃ ዴዓናዋ» ጌዳዌ ሄ ሳቲያና ጊዴዳዋ ሃሳዬዳ። ሄዋ ዲራው፥ ኢኔ ኣ ሶይ ኣሳይ ኡባይ ኣማኔዲኖ።

⁵⁴ ሃዌ ዬሱሲ ዪሁዳፔ ጋሊላ ዪዴ ኦꬄዳ ላዔንꬆ ማላታ።

¹⁸ Neeni ichcheshu asinaa gelaadda; ha77i neenanna de7iyaa bitani ne asinaa gidenna. Neeni ha77i taw odeeddawe tuma” yaageedda.

¹⁹ Mishiratta qay, “Godaw, neeni nabiyaa gidiyaawaa ta ha77i eraaddi;

²⁰ nu Sammaariyaa asaa aawatuu ha deriyaan goyinneeddino; shin Ayihudatuu hinttenttu asay Xoossaw goyinnanaw bessiyaa sa7ay Yeerusalaamena yaagiita” yaagaaddu.

²¹ Yesuusi, “Ha mishirattee, taana ammana; ha deriyaan woy Yeerusalaamen Aawuwaa Xoossaw hinttenttu goyinnenna wodii yaanawaa.

²² Hinttenttu Sammaariyaa asay hintte erennabaw goyinniita; Xoossay nuuna Ayihudatuwaa go77ettiide atotethaa ahiyaa diraw, nuuni nu eriyaawoo goyinneetto.

²³ Shin Aawuwaa Xoossaw tumuwaappe goyinniyaawanttu A, Geeshsha Ayyaanaa wolqqaaninne Xoossaa Xoossaatethaadan goyinniya wodii matatteedda; ubba ha77ikka gakkeedda. Ayissi gooppe, asaa barew goyinnana mala, Aawuu Xoossaykka ha ogiyaan goyinniyaawantta koyyee.

²⁴ Xoossay Ayyaanaa; aw goyinniyaawanttukka Geeshsha Ayyaanaa wolqqaani Xoossaa Xoossatethaadan goyinnanaw bessee” yaageedda.

²⁵ Mishiratta, “Masihiyaa geetettiyaa Okettowe yaanawaa taani eray. I yiyaa wode nuussi ubbabaa odanawaa” yaagaaddu.

²⁶ Yesuusi, “Ha neenanna haasayiyaawe taani A” yaageedda.

²⁷ Hawaa unttunttu haasayishshin, Yesuusa kaalliyaawanttu beeddasaappe simmeeddino. Yesuusi mishirattinna haasayishshin unttunttu be7iide darissi maalaletteeddino; shin mishiratto, “Ayaa koyyay?” woy Yesuusa, “Iinanna ayissi haasayay?” giide oochchowe ooninne baawa.

²⁸ Hewaappe guyyiyan, Mishiratta bare haathaa otuwaa agga basha guyye katamaa baade asaw,

²⁹ “Taani ootheeddawaa ubbaa taw odeedda bitaniyaa be7anaw denddite; hewe Kiristtoosa gidaanddeeshsha?” yaagaaddu.

³⁰ Asay katamaappe kesiide, Yesuusakko beedda.

³¹ Hewe hanishshin, A kaalliyaawanttu Yesuusa, “Guuthabaa maarikkii!” yaagiide woosseeddino.

³² Shin I, “Taw hinttenttu erenna qumay taani miiyaawe de7ee” yaageedda.

³³ Hewaa diraw, A kaalliyaawanttu barenttu giddon, “Aw miyaabaa aheedda asay de7anddeeshsha?” yaageeddino.

³⁴ Yesuusi unttunttussi, “Ta qumay taana kiitteeddawaa sheniyaa udussaanne A oosuwaa polussaa.

³⁵ Hinttenttu, ‘Oyddu agenaappe guyyiyan, kathay cakettanawaa’ giikkiteeyee? Taani hinttenttussi oday; goshshaa loythi xeellite; kathay caka besseedda.

³⁶ Zeriyaawenne cakkiyaawe ittippe nashettana mala, cakkiyaawe dirgguwaa akkeenne kathaa medhinaa de7oo shiishshee.

³⁷ Ha gaasuwaan, ‘Ittu zeree; qassi ittu cakkee’ giyaa haasayay tuma.

³⁸ Hinttenttu daaburibeennawaa cakkana mala, taani hinttentta kiittaaddi; haratuu oothi daabureeddino; hinttenttu haratuwaa daaburan geleeddita” yaageedda.

³⁹ Mishiratta, “I taani ootheedda ubbabaa odeedda” gaade markkatteedda diraw, he katamaan de7iyaa Sammaariyaa asaappe coray Yesuusa ammaneedda.

⁴⁰ Sammaariyaa asay Yesuusakko yeedda wode, barenttu mataan gami77ana mala, Yesuusa woossina I yaani laa77u gallassaa utteedda.

⁴¹ I odiyaa qaalaa diraw, kasewaappe cora asay ammaneedda;

⁴² qassi unttunttu mishiratto, “Nuuni nu huuphew I giyaawaa sisiide ammaneeddawaappe attin, neeni markkatteedda diraassa gidenna; I tumu alamiyaa asaa ashshiyaawaa gidiyaawaakka nuuni ereeddo” yaageeddino.

⁴³ Laa77u gallassaappe guyyiyan, Yesuusi Sammaariyaappe kesiide, Galiilaa gadiya beedda.

⁴⁴ Ayissi gooppe, I bare huuphew, “Nabii bare gadiyan bonchchettenna” yaagi odeedda.

⁴⁵ Yesuusi Galiilaa gakkeedda wode, Galiilaa asay A mokkeedda; Paasigaa bonchchiya gallassi unttunttu Yeerusalaamen de7iya diraw, I ootheedda ubbabaa be7eeddino.

⁴⁶ Yesuusi haathaa woyiniyaa ushshaa kesseedda, Galiilaan de7iya Qaanaa katamaa beedda. Qifirinaahooman A na7ay sakettiyaa, kaatiyaa gollen oothiyaa itti kaappuu de7ee.

⁴⁷ Yesuusi Yihudaappe Galiilaa yeeddawaa he kaappuu sisiide, aakko yiide hayqqanaw mateedda bare na7aa biide pathana mala, Yesuusa woosseedda.

⁴⁸ Yesuusi he kaappuwaa, “Xoossay oothiyaa malaataanne hechcho giissiyaabaa be7ennaani de7iidde, hinttenttu ayinne ammanikkita” yaageedda.

⁴⁹ He kaappuu zaariide, “Godaw, ta na7ay hayqqennan de7ishshin, taananna baarikkii” yaageedda.

⁵⁰ Yesuusi, “Ba; ne na7ay paxa de7anawaa!” yaageedda. He kaappuu Yesuusi geeddawaa ammaniide beedda.

⁵¹ I bare golle biishshin, A qoomatuu aananna ogiyaan gakettiide A, “Ne na7ay paxa de7ee” geeddino.

⁵² I bare qoomatuwaa bare na7aw ay saatiyaan keekeeddentto oochchina unttunttu, “Zino laappu saatiyaan qooxuu A aggeedda” yaageeddino.

⁵³ Na7aa aawuu Yesuusi barew, “Ne na7ay paxa de7anawaa” geeddawe he saatiyaana gideeddawaa hassayeedda. Hewaa diraw, inne A soy asay ubbay ammaneeddino.

⁵⁴ Hawe Yesuusi Yihudaappe Galiilaa yiide ootheedda laa7entho malaataa.