ዮሃኒሳ 20:3-31 in Dawro

³ ሄዋ ዲራው፥ ጴፂሮሲኔ ዮኮ ካሊያዌ ኣጊዴ፥ ዱፉዋኮ ቤዲኖ።

⁴ ላዑካ ኢቲፔ ዎፄዲኖ፤ ሺን ዮኮ ካሊያዌ ጴፂሮሳፔ ኣꬊ ካሴቲዴ፥ ሄ ዱፉዋኮ ጋኬዳ።

⁵ ሄ ካሊያዌ ሆኪዴ፥ ሞጉዋ ኣፊላ ቤዔዳ፤ ሺን ጊዶ ጌሊቤና።

⁶ ሲሞኒ ጴፂሮሴ ኣ ካሊ ዪዴ፥ ዱፉዋ ጊዶ ጌሌዳ። ያቲዴ ሞጉዋ ኣፊላይ ሄዋን ዴዒያዋ ቤዔዳ፤

⁷ ቃሲ ዬሱሳ ሁጲያን ፃፄቲ ኡቴዳ ኣፊላይ ሄ ፃፄቴዳዋዳንካ ዱማ ኢቲ ሳዓን ዴዒያዋ ቤዔዳ፤ ሄ ኣፊላይ ዱማ ዴዔፔ ኣቲን፥ ሞጉዋ ኣፊላና ኢቲፔ ዴዔና።

⁸ ሄ ዎዴ፥ ካሴቲዴ ጎንጎሉዋኮ ጋኬዳ ዮኮ ካሊያዌ ጌሊ ቤዒዴ ኣማኔዳ።

⁹ ዬሱሲ ሃይቁዋፔ ዴንዳናው ቤሲያዋ ኦዲያ ፆሳ ማፃፋ ኡንቱንቱ ቢሮ ኣኬኪቤይኪኖ።

¹⁰ ሄዋፔ ጉዪያን፥ ካሊያዋንቱ ባሬንቱ ጎሌ ሲሚዴ ቤዲኖ።

¹¹ ሺን ማይራማ ሄ ዱፉዋ ዶናን ኤቃዴ ዬካዴ ሆካዴ ዱፉዋ ጊዶ ፄላዱ።

¹² ቦꬃ ማዩዋ ማዬዳ ላዑ ኪታንቻቱ ዬሱሳ ኣኃይ ጊሴዳ ሳዓን ኢቱ ሁጲሳና ኢቱ ጌዲሳና ኡቴዳዋንታ ቤዓዱ።

¹³ ኡንቱንቱ ኢዞ፥ «ሚሺራቴ፥ ኣዪሲ ዬካይ?» ያጊዴ ኦቼዲኖ። ኢዛ፥ «ኣሳቱ ታ ጎዳ ኣፊዲጌዲኖ፤ ኡንቱንቱ ሃቃን ዎꬄዲኖንቶኔ ታኒ ኤሪኬ» ያጋዱ።

¹⁴ ሄዋ ጌዳዋፔ ጉዪያን፥ ጉዬ ሲማ ፄላዴ፥ ዬሱሲ ኤቄዳዋ ቤዓዱ። ሺን ኢ ዬሱሳ ጊዴዳዋ ኣኬካቤይኩ።

¹⁵ ዬሱሲ ኢዞ፥ «ሚሺራቴ፥ ኣዪሲ ዬካይ? ኦና ኮያይ?» ያጊዴ ኦቼዳ። ማይራማ ኣቲኪልቲያ ናጊያዋ ጋዴ፥ «ጎዳው፥ ኔኒ ኣኬዳዋ ጊዶፔ፥ ኣ ሃቃን ዎꬃዲንቶ፥ ታው ኦዳሪኪ፤ ታኒ ኣ ኣካና» ያጋዱ።

¹⁶ ዬሱሲ ኢዞ፥ «ማይራሜ» ያጌዳ። ኣ ኣኮ ሲማዴ፥ ኢብራዪስፄ ቃላን «ራቡኒ» ያጋዱ፤ ሄዋ ቢሌꬃይ «ታማሪሲያዎ» ጊያዋ።

¹⁷ ዬሱሲ ኢዞ፥ «ታኒ ቢሮ ታ ኣዉዋኮ ባቤና ዲራው፥ ታና ቦቾፓ፤ ሺን ታ ኢሻቱዋኮ ባዴ፥ ‹ታኒ ታ ኣዉዋኮኔ ሂንቴንቱ ኣዉዋኮ፥ ታ ፆሳኮኔ ሂንቴንቱ ፆሳኮ፥ ፑዴ ባይ ጌዳ› ጋዴ ኡንቱንቱሲ ኦዳ» ያጌዳ።

¹⁸ ማግዳላ ጌቴቲያ ካታማፔ ዬዳ ማይራማ ጎዳ ቤዔዳዋኔ ኢዚው ኢ ሄዋ ኦዴዳዋ ባዴ ካሊያዋንቱሲ ኦዳዱ።

¹⁹ ሄ ዎጋ ጋላሲ ኦማርሲ፥ ካሊያዋንቱ ኣዪሁዳቱው ያዬዳ ዲራው፥ ፔንጊያ ጎርዲዴ፥ ሺቂ ኡቲ ዴዒሺን፥ ዬሱሲ ዪዴ፥ ኡንቱንቱ ጊዱዋን ኤቂዴ፥ «ሳሮቴꬃይ ሂንቴንቱሲ ጊዶ» ያጌዳ።

²⁰ ሄዋ ጌዳዋፔ ጉዪያን፥ ባሬ ኩሺያኔ ባሬ ሚዪያ ኡንቱንታ ቤሴዳ፤ ካሊያዋንቱ ጎዳ ቤዔዳ ዎዴ ሎይꬂ ናሼቴዲኖ።

²¹ ዬሱሲ ላዔንꬁዋ ኡንቱንቱሲ፥ «ሳሮቴꬃይ ሂንቴንቱሲ ጊዶ፤ ታ ኣቡ ታና ኪቴዳዋዳን፥ ታኒካ ሂንቴንታ ኪታይ» ያጌዳ።

²² ሄዋ ጌዳዋፔ ጉዪያን፥ ኡንቱንቱ ቦላ ኡፉ ጊዴ ሼምፔዳ፤ ቃሲ፥ «ጌሻ ኣያና ኣኪቴ።

²³ ሂንቴንቱ ኣቶ ጌዳ ኣሳ ናጋራይ ኣቶ ጌቴታናዋ፤ ሂንቴንቱ ኣቶ ጌናዋንቱ ናጋራይ ኣቶ ጌቴቴና» ያጌዳ።

²⁴ ሺን ታማኔ ላዑ ካሊያዋንቱፔ ኢቱ፥ ማንቲያ ጊያ ቶማሲ፥ ዬሱሲ ዬዳ ዎዴ ኡንቱንቱና ባዋ።

²⁵ ሄዋ ዲራው፥ ዮኮ ካሊያዋንቱ ቶማሳው፥ «ኑኒ ጎዳ ቤዔዶ!» ያጌዲኖ። ሺን ቶማሲ ኡንቱንቱሲ፥ «ሚሲማሪያን ኢ ጫዴቴዳ ኣ ኩሺያን ዴዒያ ማላ ቤዔናኒኔ ሄ ማላ ታ ቢራꬊያን ቦቼናን፥ ቃሲ ታ ኩሺያ ኣ ሚዪያን ዬዳ ቤዔናን ታኒ ኣማኒኬ» ያጌዳ።

²⁶ ሳሚንታፔ ጉዪያን፥ ዬሱሳ ካሊያዋንቱ ቃሲካ ጎሌን ሺቂ ኡቴዲኖ፤ ቶማሲካ ኡንቱንቱና ዴዔ። ፔንጊ ቃሼቲ ኡቲ ዴዒሺን፥ ዬሱሲ ዪዴ፥ ኡንቱንቱ ጊዱዋን ኤቂዴ፥ «ሳሮቴꬃይ ሂንቴንቱሲ ጊዶ» ያጌዳ።

²⁷ ሄዋፔ ጉዪያን፥ ዬሱሲ ቶማሳ፥ «ኔ ኩሺያ ሃ ኣሃዴ፥ ታ ኩሺያ ቤዓ፥ ቃሲ ኔ ኩሺያ ሃ ኣሃዴ፥ ታ ሚዪያን ዬዳ ቤዓ፥ ኔኒ ኣማኒያዋ ጊዳፔ ኣቲን፥ ኣማኔናዋ ጊዶፓ!» ያጌዳ።

²⁸ ቶማሲ ዛሪዴ፥ «ታ ጎዳው፥ ታ ፆሳው!» ያጌዳ።

²⁹ ዬሱሲ፥ «ኔኒ ታና ቤዔዳ ዲራው ኣማናዳ፤ ቤዔናን ኣማኔዳዋንቱ ኣንጄቴዳዋንታ» ያጌዳ።

³⁰ ዬሱሲ ሃ ማፃፋን ፃፌቲቤና ሃራ ዳሮ ማላታቱዋ ባሬና ካሊያዋንቱ ሲንꬃን ኦꬄዳ።

³¹ ሺን ዬሱሲ፥ ኢ ኪሪስቶሳ፥ ፆሳ ናዓ ጊዲያዋ ሂንቴንቱ ኣማናና ማላኔ፥ ቃሲ ኣ ኣማኒዴ ኣ ሱንꬃን ዴዑዋ ሂንቴንቱ ዴማና ማላ፥ ሃዌ ፃፌቴዳ።

³ Hewaa diraw, Phexiroosinne yokko kaalliyaawe aggiide, duufuwaakko beeddino.

⁴ Laa77uukka ittippe woxxeeddino; shin yokko kaalliyaawe Phexiroosappe aadhdhi kasetiide, he duufuwaakko gakkeedda.

⁵ He kaalliyaawe hokkiide, mooguwaa afilaa be7eedda; shin giddo gelibeenna.

⁶ Simooni Phexiroose A kaalli yiide, duufuwaa giddo geleedda. Yaatiide mooguwaa afilay hewan de7iyaawaa be7eedda;

⁷ qassi Yesuusa huuphiyaan xaaxetti utteedda afilay he xaaxetteeddawaadankka dumma itti sa7an de7iyaawaa be7eedda; he afilay dumma de7eeppe attin, mooguwaa afilaanna ittippe de7enna.

⁸ He wode, kasetiide gonggoluwaakko gakkeedda yokko kaalliyaawe geli be7iide ammaneedda.

⁹ Yesuusi hayquwaappe denddanaw bessiyaawaa odiyaa Xoossaa maxaafaa unttunttu biro akeekibeykkino.

¹⁰ Hewaappe guyyiyan, kaalliyaawanttu barenttu golle simmiide beeddino.

¹¹ Shin Mayraama he duufuwaa doonan eqqaade yeekkaadde hokkaade duufuwaa giddo xeellaaddu.

¹² Bootha mayuwaa mayyeedda laa77u kiitanchchatuu Yesuusa anhay giseedda sa7an ittu huuphissanna ittuu gedissanna utteeddawaantta be7aaddu.

¹³ Unttunttu izo, “Mishirattee, ayissi yeekkay?” yaagiide oochcheeddino. Iza, “Asatu ta Godaa afidiggeeddino; unttunttu haqqan wotheeddinonttonne taani erikke” yaagaaddu.

¹⁴ Hewaa geeddawaappe guyyiyan, guyye simma xeellaade, Yesuusi eqqeedawaa be77aaddu. Shin I Yesuusa gideeddawaa akeekabeykku.

¹⁵ Yesuusi izo, “Mishirattee, ayissi yeekkay? Oona koyyay?” yaagiide oochcheedda. Mayraama atikkilttiyaa naagiyaawaa gaade, “Godaw, neeni akkeeddawaa gidooppe, A haqan wothaaddintto, taw odaarikki; taani A akkana” yaagaaddu.

¹⁶ Yesuusi izo, “Mayraamee” yaageedda. A aakko simmaade, Ibraayisxxe qaalaan “Rabunii” yaagaaddu; hewaa bilethay “Tamaarissiyaawoo” giyaawaa.

¹⁷ Yesuusi izo, “Taani biro Ta Aawuwaakko babeenna diraw, Taana bochchoppa; shin Ta ishatuwaakko baade, ‘Taani Ta Aawuwaakkonne hinttenttu Aawuwaakko, Ta Xoossaakkonne hinttenttu Xoossaakko, pude bay geedda’ gaade unttunttussi oda” yaageedda.

¹⁸ Magdala geetettiyaa katamaappe yeedda Mayraama Godaa be7eeddawaanne iziw I hewaa odeeddawaa baade kaalliyaawanttussi odaaddu.

¹⁹ He Woggaa gallassi omarssi, kaalliyaawanttu Ayihudatuw yayyeedda diraw, penggiyaa gorddiidde, shiiqi utti de7ishshin, Yesuusi yiide, unttunttu gidduwan eqqiide, “Sarotethay hinttenttussi gido” yaageedda.

²⁰ Hewaa geeddawaappe guyyiyan, bare kushiyaanne bare miyyiyaa unttuntta besseedda; kaalliyaawanttu Godaa be7eedda wode loythi nashetteeddino.

²¹ Yesuusi laa7enthuwa unttunttussi, “Sarotethay hinttenttussi gido; Ta Aabbu Taana kiitteeddawaadan, Taanikka hinttentta kiittay” yaageedda.

²² Hewaa geeddawaappe guyyiyan, unttunttu bolla uffu giide shemppeedda; qassi, “Geeshsha Ayyaanaa akkite.

²³ Hinttenttu atto geedda asaa nagaray atto geetettanawaa; hinttenttu atto geennaawanttu nagaray atto geetettenna” yaageedda.

²⁴ Shin tammanne laa77u kaalliyaawanttuppe ittuu, Manttiyaa giyaa Toomaasi, Yesuusi yeedda wode unttunttunna baawa.

²⁵ Hewaa diraw, yokko kaalliyaawanttu Toomaasaw, “Nuuni Godaa be7eeddo!” yaageeddino. Shin Toomaasi unttunttussi, “Misimaariyan I cadetteedda A kushiyan de7iya mallaa be7ennaaninne he mallaa ta biradhdhiyan bochchennan, qassi ta kushiyaa A miyyiyaan yeedda be7ennaan taani ammanikke” yaageedda.

²⁶ Saaminttaappe guyyiyan, Yesuusa kaalliyaawanttu qassikka gollen shiiqi utteeddino; Toomaasikka unttunttunna de7ee. Penggi qashetti utti de7ishshin, Yesuusi yiide, unttunttu gidduwaan eqqiide, “Sarotethay hinttenttussi gido” yaageedda.

²⁷ Hewaappe guyyiyan, Yesuusi Toomaasa, “Ne kushiyaa haa ahaade, Ta kushiyaa be7a, qassi ne kushiyaa haa ahaadde, Ta miyyiyaan yeedda be7a, neeni ammaniyaawaa gidappe attin, ammanennawaa gidoppa!” yaageedda.

²⁸ Toomaasi zaariide, “Ta Godaw, ta Xoossaw!” yaageedda.

²⁹ Yesuusi, “Neeni Taana be7eedda diraw ammanaadda; be7ennaan ammaneeddawanttu anjjetteeddawantta” yaageedda.

³⁰ Yesuusi ha maxaafan xaafettibeenna hara daro malaatatuwaa barena kaalliyaawanttu sinthan ootheedda.

³¹ Shin Yesuusi, I Kiristtoosa, Xoossaa Na7aa gidiyaawaa hinttenttu ammanana malanne, qassi A ammaniide A sunthan de7uwaa hinttenttu demmana mala, hawe xaafetteedda.