ዮሃኒሳ 17:13-24 in Dawro

¹³ «ሃዒ ታኒ ኔኮ ባይ፤ ኡንቱንቱ ዎዛናን ታ ናሼቻይ ፖሌታና ማላ፥ ሃዋ ታኒ ኣላሚያን ሃሳያይ።

¹⁴ ታኒ ኡንቱንቱሲ ኔ ቃላ ኢማዲ፤ ታኒ ኣላሚያሳ ጊዴናዋዳን፥ ኡንቱንቱካ ኣላሚያሳ ጊዴና ዲራው፥ ኣላሚ ኡንቱንታ ኢፄዳ።

¹⁵ ኔኒ ፃላሂያፔ ኡንቱንታ ናጋና ማላ ዎሲያዋፔ ኣቲን፥ ኣላሚያፔ ኬሳና ማላ ዎሲኬ።

¹⁶ ታኒ ኣላሚያሳ ጊዴናዋዳን፥ ኡንቱንቱካ ኣላሚያሳ ጊዲኪኖ።

¹⁷ ኔኒ ቱማቴꬃን ኡንቱንታ ኔዋንታ ኦꬃ፤ ኔ ቃላይካ ቱማቴꬃ።

¹⁸ ኔኒ ታና ኣላሚያ ኪቴዳዋዳን፥ ታኒካ ኡንቱንታ ኣላሚያ ኪታዲ፤

¹⁹ ቃሲ ኡንቱንቱ ቱማቴꬃን ኔው ዱማታና ማላ፥ ኡንቱንቱ ዲራው፥ ታኒ ታ ሁጲያ ኔው ዱማያዲ።

²⁰ «ታኒ ኡንቱንቱ ፃላላው ዎሲኬ፤ ሺን ኡንቱንቱ ቃላ ኦዲና፥ ታና ኣማኔዳዋንቶካ ዎሳይ።

²¹ ኡንቱንቱ ኡባይ ኢቱዋ ጊዳና ማላ፥ ታኒ ዎሳይ። ኣዎ፥ ኔኒ ታ ጊዶን ዴዒያዋዳን፥ ቃሲ ታኒካ ኔ ጊዶን ዴዒያዋዳን፥ ኡንቱንቱ ኑ ጊዶን ዴዒኖ። ቃሲ ኔኒ ታና ኪቴዳዋ ኣላሚ ኣማናና ማላ፥ ኡንቱንቱ ኢቱዋ ጊዲኖ።

²² ኔኒኔ ታኒ ኢቱዋ ጊዲያዋዳን፥ ኡንቱንቱ ኢቱዋ ጊዳና ማላ፥ ኔኒ ታና ቦንቼዳዋዳን፥ ታኒካ ኡንቱንታ ቦንቻዲ።

²³ ታኒ ኡንቱንቱ ጊዶን ዴዒና፥ ኔኒ ታ ጊዶን ዴዒና፥ ቃሲ ኔኒ ታና ሲቂያዋዳን፥ ኡንቱንታካ ሲቆዋኔ ኔኒ ታና ሃ ኣላሚያ ኪቴዳዋ ኣላሚ ኤራናዳን፥ ኡንቱንቱ ኡባ ኢቱዋ ጊዲኖ።

²⁴ «ኣዎ፥ ሳዓይ ሜꬌታናፔ ካሴ ኔኒ ታና ሲቄዳ ዲራው፥ ታው ኢሜዳ ታ ቦንቹዋ ኡንቱንቱ ቤዓና ማላ፥ ኔኒ ታው ኢሜዳዋንቱ ታኒ ዴዒያ ሳዓን ታናና ዴዓና ማላ ኮያዲ።

¹³ “Ha77i Taani Neekko bay; unttunttu wozanaan Ta nashechchay polettana mala, hawaa Taani alamiyan haasayay.

¹⁴ Taani unttunttussi ne qaalaa immaaddi; Taani alamiyaassa gidennawaadan, unttunttukka alamiyaassa gidenna diraw, alamii unttuntta ixxeedda.

¹⁵ Neeni xalahiyaappe unttuntta naagana mala woossiyaawaappe attin, alamiyaappe kessana mala woossikke.

¹⁶ Taani alamiyaassa gidennawaadan, unttunttukka alamiyaassa gidikkino.

¹⁷ Neeni tumatethaan unttuntta newantta ootha; ne qaalaykka tumatethaa.

¹⁸ Neeni Taana alamiyaa kiitteeddawaadan, Taanikka unttuntta alamiyaa kiittaaddi;

¹⁹ qassi unttunttu tumatethaan new dummatana mala, unttunttu diraw, Taani Ta huuphiya new dummayaaddi.

²⁰ “Taani unttunttu xalalaw woossikke; shin unttunttu qaalaa odina, Taana ammaneeddawanttookka woossay.

²¹ Unttunttu ubbay ittuwa gidana mala, Taani woossay. Aawoo, Neeni Ta giddon de7iyaawaadan, qassi Taanikka Ne giddon de7iyaawaadan, unttunttu nu giddon de7iino. Qassi neeni Taana kiitteeddawaa alamii ammanana mala, unttunttu ittuwa gidino.

²² Neeninne Taani ittuwa gidiyaawadan, unttunttu ittuwa gidana mala, neeni Taana bonchcheeddawaadan, Taanikka unttuntta bonchchaaddi.

²³ Taani unttunttu giddon de7ina, Neeni Ta giddon de7ina, qassi Neeni Taana siiqiyaawaadan, unttunttakka siiqowaanne Neeni Taana ha alamiyaa kiitteeddawaa alamii eranaadan, unttunttu ubba ittuwaa gidino.

²⁴ “Aawoo, sa7ay medhettanaappe kase Neeni Taana siiqeedda diraw, Taw immeedda Ta bonchchuwaa unttunttu be7ana mala, Neeni Taw immeeddawanttu Taani de7iya sa7an Taananna de7ana mala koyyaaddi.