ዬሱሲ ኪቴዳዋንቱ ኦሱዋ 8:18-38 in Dawro

¹⁸ ዬሱሲ ኪቴዳዋንቱ ባሬንቱ ኩሺያ ኡንቱንቱ ቦላ ዎꬂና፥ ኡንቱንቶ ጌሻ ኣያናይ ኢሜቴዳዋ ሲሞኒ ቤዔዳ ዎዴ፥ ጴፂሮሳሲኔ ዮሃኒሳሲ ሚሻ ኣሂዴ፥

¹⁹ «ታኒካ ታ ኩሺያ ዎꬂያ ኡባይ ጌሻ ኣያና ኣካና ማላ፥ ሃ ማታ ታዉካ ኢሜሪኪቴ» ያጌዳ።

²⁰ ሺን ጴፂሮሲ ኣው ሃዋዳን ያጌዳ፤ «ኔኒ ፆሳ ኢሞታ ሚሻን ሻማናው ቆፔዳ ዲራው፥ ኔ ሚሻይ ኔናና ጮ ꬋዮ።

²¹ ኔ ዎዛናይ ፆሳ ሲንꬃን ሱሬ ጊዴና ዲራው፥ ኔው ሃዋን ጊሹ ባዋ።

²² ያቶዋፔ ጉዪያን ሃ ኔ ዎዛና ኢታ ቆፋ ዲራው፥ ናጋራፔ ሲማ፤ ኦኒ ኤሪ ኔ ዎዛናን ዴዒያ ኢታ ቆፋ ፆሳይ ኣቶ ጋኔንቶኔ ፆሳ ዎሳ።

²³ ኣዪሲ ጎፔ፥ ኔኒ ዳሮ ቃናቲያ ኦይቃዴ ናጋራ ቃሹዋን ዴዒያዋ ታኒ ቤዓይ» ያጌዳ።

²⁴ ሄዋፔ ጉዬ ሲሞኒ ጴፂሮሳሲኔ ዮሃኒሳሲ ዛሪዴ፥ «ሂንቴንቱ ጌዳዋፔ ኢቲባይኔ ታና ጋኬና ማላ፥ ሂንቴ ታው ፆሳ ዎሲቴ» ያጌዳ።

²⁵ ጴፂሮሲኔ ዮሃኒሲ ማርካቴዳዋፔኔ ጎዳ ቃላ ኦዴዳዋፔ ጉዪያን፥ ጉዬ ዬሩሳላሜ ሲሜዲኖ፤ ያቲዴ ሳማሪያን ዴዒያ ዳሮ ቄሪ ካታማቱዋን ሚሺራቹዋ ቃላ ኦዴዲኖ።

²⁶ ጎዳ ኪታንቻይ ፒሊጶሳ፥ «ዴንዳዴ ዬሩሳላሜፔ ጋዛ ኣፊያ ኣሲ ባይና ሜላ ሳዓ ኦጊያኮ ባ፤ ሄ ኦጊ ኣዋይ ኬሲያሳ ፄሊያ ዎዴ ኡሼቻ ዱጌሃ ባጋና ዴዔ» ያጌዳ።

²⁷ ፒሊጶሲ ዴንዲዴ ቤዳ። ሂንዴኮ ጌቴቲያ ቶጲያ ካታቲሲ ቢታ ሞዲያ ኢ ሚሻ ኡባካ ናጊያ ቶጲያ ኣሳ ጊዴዳ ኢቲ ሹፋይ ዴዒያዌ ጎዪናናው ዬሩሳላሜ ቤዳ።

²⁸ ፓራይ ጎቺያ ጋሪያን ኡቲዴ፥ ዬሩሳላሜፔ ጉዬ ሲሚዴ፥ ናቢያ ኢሲያሳ ማፃፋ ናባቤ።

²⁹ ጌሻ ኣያናይ ፒሊጶሳ፥ «ሄ ጋሪያኮ ሺቃዴ ኢቲፔ ጊዳ» ያጌዳ።

³⁰ ፒሊጶሲ ዎፂ ዪዴ፥ ናቢያ ኢሲያሳ ማፃፋ ሹፋይ ናባቢሺን ሲሲዴ ኣ፥ «ኔኒ ናባቢያዋ ኣኬካይ?» ያጌዳ።

³¹ ሹፋይ፥ «ታው ኦዲዴ ኣኬኪሲያ ኣሳይ ባይናን ዋኒዴ ኣኬኬቲ?» ያጌዳ፤ ቃሲ ባሬናና ጋሪያን ኬሲዴ ኡታና ማላ፥ ፒሊጶሳ ዎሴዳ።

³² ሹፋይ ናባቢያ ማፃፋይ «ዶርሳዳን ኢ ሹኬታናው ላጌቴ። ዶርሳ ማራይ ባሬ ኢሲኪያ ቃንፂያዋ ሲንꬃን ጮዑ ጊያዋዳን፥ ኢካ ባሬ ዶና ፖኪቤና።

³³ ኢ ካዉሼዳዋዳን ኣው ፂሎ ፒርዳይ ꬋዬዳ። ዬሱሳ ዴዑ ሃ ሳዓፔ ፑዴ ኣኬቲዲጌዳ ዲራው፥ ኣ ዛሪያባ ኦኔ ኦዳናዌ?» ያጌዳ።

³⁴ ሹፋይ ዛሪዴ ፒሊጶሳው፥ «ናቢ ሃዋ ኦዋ ኦዲ? ባሬባ ኦዲዬ ዎይ ሃራ ኣሳባ ኦዲ? ታው ኦዳሪኪ» ያጌዳ።

³⁵ ፒሊጶሲ ዛሪዴ፥ ፆሳ ማፃፋ ኢ ናባቢያሳፔ ዶሚዴ፥ ዬሱሳባ ሚሺራቹዋ ቃላ ኣው ኦዴዳ።

³⁶ ኡንቱንቱ ኦጊያ ኦይቂ ቢዴ፥ ሃꬃይ ዴዒያሳ ጋኬዲኖ፤ ሹፋይ፥ «ሃꬃ ሃዋ ቤዓ፤ ፃማቄቲያዋ ታና ዲጊያዌ ኣዬ?» ያጌዳ።

³⁷ ፒሊጶሲ ኣ፥ «ኔኒ ኔ ኩሜንꬃ ዎዛናፔ ኣማኖፔ፥ ዳንዳያ» ያጌዳ። ኢ ዛሪዴ፥ «ዬሱሲ ኪሪስቶሲ ፆሳ ናዓ ጊዲያዋ ታኒ ኣማናይ» ያጌዳ።

³⁸ ጋሪ ኤቃና ማላ ሹፋይ ኣዛዚና፥ ኢኔ ፒሊጶሲ ላዓቱ ዱጌ ዎꬊዴ፥ ሃꬃን ጌሊና ፒሊጶሲ ኣ ፃማቄዳ።

¹⁸ Yesuusi kiitteeddawanttu barenttu kushiyaa unttunttu bolla wothina, unttunttoo Geeshsha Ayyaanay imetteeddawaa Simooni be7eedda wode, Phexiroosassinne Yohaannisassi miishshaa ahiide,

¹⁹ “Taanikka ta kushiyaa wothiyaa ubbay Geeshsha Ayyaanaa akkana mala, ha maataa tawukka immeerikkitee” yaageedda.

²⁰ Shin Phexiroosi aw hawaadan yaageedda; “Neeni Xoossaa imotaa miishshaan shammanaw qoppeedda diraw, ne miishshay neenanna coo dhayo.

²¹ Ne wozanay Xoossaa sinthan suure gidenna diraw, new hawaan gishuu baawa.

²² Yaatowaappe guyyiyaan ha ne wozanaa iita qofaa diraw, nagaraappe simma; ooni eri ne wozanaan de7iyaa iita qofaa Xoossay atto gaanenttonne Xoossaa woossa.

²³ Ayissi gooppe, neeni daro qanaatiyaa oyqqaade nagaraa qashuwan de7iyaawaa taani be7ay” yaageedda.

²⁴ Hewaappe guyye Simooni Phexiroosassinne Yohaannisassi zaariide, “Hinttenttu geeddawaappe ittibaynne taana gakkenna mala, hintte taw Xoossaa woossite” yaageedda.

²⁵ Phexiroossinne Yohaannisi markkatteeddawaappenne Godaa qaalaa odeeddawaappe guyyiyan, guyye Yeerusalaame simmeeddino; yaatiide Sammaariyan de7iyaa daro qeeri katamatuwaan mishiraachchuwaa qaalaa odeeddino.

²⁶ Godaa kiitanchchay Piliphphoosa, “Denddaade Yeerusalaameppe Gaaza afiyaa asi baynna mela sa7aa ogiyaakko ba; he ogii away kesiyaasaa xeelliyaa wode ushechcha dugehaa bagganna de7ee” yaageedda.

²⁷ Piliphphoosi denddiide beedda. Hinddeko geetettiyaa Tophphiyaa kaatattissi biittaa mooddiyaa I miishshaa ubbaakka naagiyaa Tophphiyaa asa gideedda itti shuufay de7iyaawe goyinnanaw Yeerusalaame beedda.

²⁸ Paray goochchiyaa gaariyaan uttiide, Yeerusalaameppe guyye simmiide, nabiyaa Isiyaasa maxaafaa nabbabee.

²⁹ Geeshsha Ayyaanay Piliphphoosa, “He gaariyaakko shiiqaade ittippe gida” yaageedda.

³⁰ Piliphphoosi woxxi yiide, nabiyaa Isiyaasa maxaafaa shuufay nabbabishshin sisiide A, “Neeni nabbabiyaawaa akeekay?” yaageedda.

³¹ Shuufay, “Taw odiide akeekissiya asay baynnaan waaniide akeekettii?” yaageedda; qassi barenanna gaariyaan kesiide uttana mala, Piliphphoosa woosseedda.

³² Shuufay nabbabiyaa maxaafay “Dorssaadan I shukettanaw laagettee. Dorssa maray bare isikiyaa qanxxiyaawaa sinthan co77u giyaawaadan, ikka bare doonaa pokibeenna.

³³ I kawusheeddawaadan aw xillo pirdday dhayeedda. Yesuusa de7uu ha sa7aappe pude akettidiggeedda diraw, A zariyaabaa oonee odanawe?” yaageedda.

³⁴ Shuufay zaariide Piliphphoosaw, “Nabii hawaa oowaa odii? Barebaa odiyee woy hara asaabaa odii? Taw odaarikkii” yaageedda.

³⁵ Piliphphoosi zaariide, Xoossaa maxaafaa I nabbabiyaasaappe doommiide, Yesuusabaa mishiraachchuwaa qaalaa aw odeedda.

³⁶ Unttunttu ogiyaa oyqqi biidde, haathay de7iyaasaa gakkeeddino; shuufay, “Haathaa hawaa be7a; xammaqettiyaawaa taana diggiyaawe ayee?” yaageedda.

³⁷ Piliphphoosi A, “Neeni ne kumentha wozanaappe ammanooppe, danddayaa” yaageedda. I zaariide, “Yesuusi Kiristtoosi Xoossaa Na7aa gidiyaawaa taani ammanay” yaageedda.

³⁸ Gaari eqqana mala shuufay azazina, inne Piliphphoosi laa77atuu duge wodhdhiide, haathaan gelina Piliphphoosi A xammaqeedda.