ዬሱሲ ኪቴዳዋንቱ ኦሱዋ 7:37-44 in Dawro

³⁷ «ኢስራዔሊያ ኣሳሲ፥ ‹ፆሳይ ታና ዴንꬄዳዋዳን፥ ሂንቴ ዛሪያ ጊዶፔ ታ ማላ ናቢያ ሂንቴንቶ ዴንꬃናዋ› ያጌዳዌ ሄ ሙሳ።

³⁸ ኢ ኢስራዔሊያ ኣሳ ማባራና ኢቲፔ ሜላ ቢታን ዴዔዳዋ፤ ኢ ኑ ኣዋቱዋናኔ ሲና ዴሪያ ቦላን ባሬው ሃሳዬዳ ኪታንቻና ኢቲፔ ዴዔዳ። ያቲዴ ፆሳፔ ዴዑዋ ቃላ ኑሲ ኢማናው ኣኬዳ።

³⁹ «ሙሴው ኑ ኣዋቱ ኣዛዜታናው ዶሲቤይኪኖ፤ ሺን ጌዴ ኣ ሱጊ ኦሊዴ፥ ጉዬ ጊብፄ ሲማናው ኣሞቴዲኖ።

⁴⁰ ቃሲ ኣሮና፥ ‹ኑና ካሌꬂያ ፆሳቱዋ ኑሲ ሜꬋ፤ ኣዪሲ ጎፔ፥ ሃ ኑና ጊብፄፔ ኣሄዳ ሙሴ ዋኔዴንቶ ኑኒ ኤሮኮ› ያጌዲኖ።

⁴¹ ሚዛ ማራ ማላቲሲዴ፥ ሄ ዎዴ ኤቃ ኦꬄዲኖ፤ ሄ ኤቃሲ ያርሹዋ ያርሺዴ፥ ባሬንቱ ኩሺ ኦꬄዳ ኦሱዋን ናሼቴዲኖ።

⁴² ሺን ፆሳይ ኡንቱንቶ ዞኪያ ዛሬዳ፤ ኡንቱንቱ ሳሉዋ ፆሊንቲያሲ ጎዪናናዳን፥ ኡንቱንታ ኣጌዳ፤ ናባቱዋ ማፃፋን፥ ‹ኢስራዔሊያ ኣሳቶ፥ ኦይታሙ ላይꬃ ኣሳይ ባይና ሳን ሹኬዳ ሜሂያኔ ያርሹዋ ታው ያርሼዲቴ?

⁴³ ሂንቴንቱ ሂንቴንቶ ጎዪናናው ኦꬄዳ ኤቃቱዋ፥ ሞሎካ ዱንካኒያኔ ሬፋና ጊያ ሂንቴ ፆሳ ፆሊንቲያ ቶኬዲታ። ታኒ ሂንቴንታ ባቢሎኔፔ ሂኒ ባጋ ዬዳና› ጌቴቲዴ ፃፌቴዳ።

⁴⁴ «ሙሴ ባሬ ቤዔዳዋ ማላቲሲዴ፥ ጎዳይ ኣው ኦዴዳዋዳን ሜꬌዳ ማርካ ዱንካኒ ኑ ኣዋቱዋሲ ሜላ ቢታን ዴዔ።

³⁷ “Israa7eeliyaa asaassi, ‘Xoossay taana dentheeddawaadan, hintte zariyaa giddoppe ta mala nabiyaa hinttenttoo denthanawaa’ yaageeddawe he Musa.

³⁸ I Israa7eeliyaa asaa maabaraanna ittippe mela biittaan de7eeddawaa; I nu aawatuwannanne Siinaa Deriyaa bollan barew haasayeedda kiitanchchaanna ittippe de7eedda. Yaatiide Xoossaappe de7uwaa qaalaa nuussi immanaw akkeedda.

³⁹ “Musew nu aawatuu azazettanaw dosibeykkino; shin gede A sugi oliide, guyye Gibxe simmanaw amotteeddino.

⁴⁰ Qassi Aaroona, ‘Nuuna kaalethiyaa xoossatuwaa nuussi medhdha; ayissi gooppe, ha nuuna Gibxeppe aheedda Muse waaneeddentto nuuni erokko’ yaageeddino.

⁴¹ Miizzaa Maraa malatissiide, he wode eeqaa ootheeddino; he eeqaassi yarshshuwaa yarshshiide, barenttu kushii ootheedda oosuwan nashetteeddino.

⁴² Shin Xoossay unttunttoo zokkiyaa zaareedda; unttunttu saluwaa xoolinttiyaassi goyinnanaadan, unttuntta aggeedda; nabatuwaa maxaafan, ‘Israa7eeliyaa asatoo, oytamu laythaa asay baynna saan shukkeedda mehiyaanne yarshshuwaa taw yarshsheedditee?

⁴³ Hinttenttu hinttenttoo goyinnanaw ootheedda eeqatuwaa, Molooka dunkkaaniyaanne Refaana giyaa hintte xoossaa xoolinttiyaa tookkeeddita. Taani hinttentta Baabilooneppe hini bagga yeddana’ geetettiide xaafetteedda.

⁴⁴ “Muse bare be7eeddawaa malatissiide, Goday aw odeeddawaadan medhdheedda markkaa dunkkaanii nu aawatuwassi mela biittaan de7ee.