ዬሱሲ ኪቴዳዋንቱ ኦሱዋ 6:2-11 in Dawro

² ዬሱሲ ኪቴዳ ታማኔ ላዓቱ ዎሳ ጎሌ ኣሳ ኡባ ፄሲዴ፥ ሃዋዳን ያጌዲኖ፤ «ኑኒ ፆሳ ቃላ ኦዲያዋ ኣጊዴ፥ ቁማ ጊሻናው ኑሲ ቤሴና።

³ ኢሻቶ፥ ሎዓ ጌቴቲያዋንታ ጌሻ ኣያናይኔ ኣꬎ ኤራቴꬃይ ኩሜዳ ላፑ ኣሳቱዋ ሂንቴ ጊዶፔ ዶሪቴ፤ ኑኒ ቃሲ ኡንቱንታ ሃ ኦሱዋሲ ሱንꬃና።

⁴ ሺን ኑኒ ፆሳ ዎሳኒኔ ቃላ ኦዱዋን ሚናና» ያጌዲኖ።

⁵ ዬሱሲ ኪቴዳዋንቱ ሃሳዬዳ ሃሳያይ ኣሳ ኡባ ናሼቼዳ፤ ሄዋፔ ጉዬ፥ ኣማኑኔ ጌሻ ኣያናይ ኩሜዳ ኢስፂፋኖሳ፥ ፒሊጶሳ፥ ጲሮኮሮሳ፥ ኒቃሮና፥ ፂሞና፥ ጳሪሜናኔ ኣዪሁዳቱዋ ኣማኑዋን ጌሌዳ ኣንፆኪያ ኒቆላዎሳ ዶሬዲኖ።

⁶ ያቲዴ ዬሱሲ ኪቴዳዋንቱ ሲንꬃን ኡንቱንታ ኤሲና፥ ዬሱሲ ኪቴዳዋንቱ ፆሳ ዎሴዳዋፔ ጉዪያን፥ ባሬንቱ ኩሺያ ኡንቱንቱ ቦላ ዎꬄዲኖ።

⁷ ፆሳ ቃላይ ኣኪ ኣኪ ቤዳ፤ ካሊያዋንቱ ፓይዱዋን ዬሩሳላሜን ዳሪሲ ዳሪ ዳሪ ቤዳ፤ ቃሲ ጮራ ቄሳቱካ ኣማኔዲኖ።

⁸ ኣꬎ ኬካቴꬃይኔ ዎልቃይ ኩሜዳ ኢስፂፋኖሲ፥ ኣሳ ጊዶን ኦራꬃባኔ ዎልቃማ ማላታ ኦꬄ።

⁹ ኣይሌቴꬃፔ ኬሴዳ ኣሳ ጊያ ኣዪሁዳ ኣማኒያዋንቱፔ፥ ቄሬናፔ፥ ኢስኪንዲሪያ ኣሳቱዋፔ፥ ኪልቂያፔኔ ኢሲያፔ ዬዳ ኢቲ ኢቲ ኣሳቱ ዴንዲዴ፥ ኢስፂፋኖሳና ፓሉሜቴዲኖ።

¹⁰ ሺን ኢስፂፋኖሲ ኣꬎ ኤራቴꬃኒኔ ኣያናን ሃሳዪያዋ ዲጋናው ዳንዳይቤይኪኖ።

¹¹ ሄ ዎዴ ኡንቱንቱ፥ «ሙሴ ቦላኔ ፆሳ ቦላ ኢ ቦሪያ ቃላ ሃሳዪሺን ሲሴዶ» ጊያ ዎርዶ ኣሳቱዋ ሻሜዲኖ።

² Yesuusi kiitteedda tammanne laa77atuu woosa golle asaa ubbaa xeesiide, hawaadan yaageeddino; “Nuuni Xoossaa qaalaa odiyaawaa aggiide, qumaa gishanaw nuussi bessenna.

³ Ishatoo, lo77a geetettiyaawantta Geeshsha Ayyaanaynne aadho eratethay kumeedda laappu asatuwaa hintte giddoppe doorite; nuuni qassi unttuntta ha oosuwaassi sunthana.

⁴ Shin nuuni Xoossaa woosaaninne qaalaa oduwan minnana” yaageeddino.

⁵ Yesuusi kiitteeddawanttu haasayeedda haasayay asaa ubbaa nashechcheedda; hewaappe guyye, ammanuunne Geeshsha Ayyaanay kumeedda Isxxifaanoosa, Piliphphoosa, Phirookoroosa, Niqaaroona, Ximoona, Pharimeenanne Ayihudatuwaa ammanuwan geleedda Anxxookiyaa Niiqolaawoosa dooreeddino.

⁶ Yaatiide Yesuusi kiitteeddawanttu sinthaan unttuntta essina, Yesuusi kiitteeddawanttu Xoossaa woosseeddawaappe guyyiyan, barenttu kushiyaa unttunttu bolla wotheeddino.

⁷ Xoossaa qaalay aakki aakki beedda; kaalliyaawanttu payduwaan Yeerusalaamen darissi dari dari beedda; qassi cora qeesatuukka ammaneeddino.

⁸ Aadho keekatethaynne wolqqay kumeedda Isxxifaanoosi, asaa giddon oorathabaanne wolqqaama malaataa oothee.

⁹ Aylletethaappe keseedda asaa giyaa Ayihuda ammaniyaawanttuppe, Qereenappe, Iskkinddiriyaa asatuwaappe, Kilqqiyaappenne Iisiyappe yeedda itti itti asatuu denddiide, Isxxifaanoosanna palumetteeddino.

¹⁰ Shin Isxxifaanoosi aadho eratethaaninne Ayyaanaan haasayiyaawaa digganaw danddaybeykkino.

¹¹ He wode unttunttu, “Muse bollanne Xoossaa bolla I boriyaa qaalaa haasayishshin siseeddo” giyaa worddo asatuwaa shammeeddino.