ዬሱሲ ኪቴዳዋንቱ ኦሱዋ 5:1-21 in Dawro

¹ ኢቲ ሃናኒያ ጌቴቲያ ቢታኒ ባሬ ማቻቲ ሳጲሪና ጋዲያ ዛሊዔዳ።

² ሄ ዛሊዔዳ ሚሻፔ ባሬ ማቻታ ኤሪሺን ኣሺዴ፥ ኣቶዋ ዬሱሲ ኪቴዳዋንቱሲ ኢሜዳ።

³ ሺን ጴፂሮሲ ሃናኒያ፥ «ኔኒ ጌሻ ኣያና ጪማዴ ኔ ጋዲያ ዛሊዔዳ ሚሻፔ ሻካ ኣሻና ማላ፥ ፃላሂ ኔ ዎዛናን ኣዪሲ ጌሌዴ?

⁴ ኔኒ ዛሊዓናፔ ካሴ ጋዲ ኔዋ ጊዴኔ? ቃሲ ኔኒ ዛሊዓ ሲሚናካ ሚሻይ ኔሳ ጊዴኔ? ያቲና፥ ሃዋ ማላባ ኦꬃናው ኣዪሲ ኔ ዎዛናን ቆፓዲ? ኔኒ ፆሳው ዎርዶቶዋፔ ኣቲን፥ ኣሳው ዎርዶታቤይካ» ያጌዳ።

⁵ ሃናኒ ሄ ቃላ ሲሴዳ ማንዒያንካ ኩንዲዴ ሃይቂ ኣጌዳ፤ ሄዋ ሲሴዳ ኡባይ ዳሮ ያዬዳ።

⁶ ዎዳላ ኣሳቱ ሶይ ጌሊዴ፥ ኣ ኣኃ ፃፂዴ፥ ካሬው ኬሲ ኣ ሞጌዲኖ።

⁷ ሄዙ ሳቴ ጊዶዋፔ ጉዪያን፥ ሃናኒያ ማቻታ ሄዋ ኤሬናን ዴዓዴ ጌላዱ።

⁸ ጴፂሮሲ ኢዞ፥ «ሂንቴንቱ ጋዲያ ሃኒ ኬና ሚሻን ዛሊዔዲቴ? ኣኔ ታው ኦዳ» ያጌዳ። ኢዛ፥ «ኤ ሃኒ ኬና ሚሻን ዛሊዔዶ» ያጋዱ።

⁹ ጴፂሮሲ ሚሺራቶ፥ «ኔኒኔ ኔ ኣሲናይ ጎዳ ኣያና ፓጫናው ኣዪሲ ዞሬቴዲቴ? ቤዓ፤ ኔ ኣሲና ሞጌዳ ኣሳቱ ካሬን ዴዒኖ፤ ኔ ኣኃካ ኡንቱንቱ ካሬ ኬሳና» ያጌዳ።

¹⁰ ሚሺራታ ሄ ማንዒያንካ ጴፂሮሳ ጌዲያ ማታን ኩንዳዴ ሃይቃ ኣጋዱ፤ ዎዳላ ኣሳቱ ጌሊያ ዎዴ ሃይቄዳዉኖ ዴሚዴ፥ ካሬ ኬሴዳዋፔ ጉዬ፥ ኢዚ ኣሲና ዱፉዋ ማታን ሞጌዲኖ።

¹¹ ኣማኒያ ኣሳ ኡባይኔ ሄዋ ሲሴዳ ሃራ ኣሳይ ኡባይ ዳሪ ያዬዳ።

¹² ዬሱሲ ኪቴዳዋንቱ ዳሮ ማላታኔ ኦራꬃባ ኣሳ ጊዶን ኦꬂኖ፤ ኣማኒያ ኡባቱ ሶሎሞኔ ባራንዳን ኢቲፔ ሺቂኖ።

¹³ ሃራ ኣሳፔ ኡንቱንቱና ጋኬታናው ሃራይ ኣቶ ኢቱኔ ፃሊቤና፤ ሺን ኣሳይ ኡንቱንታ ቦንቼ።

¹⁴ ኣማኒያ ኣቱማ ኣሳይኔ ማጫ ኣሳይ ካሴዋፔ ጮራይ ጎዳሲ ጉጄቴ።

¹⁵ ሄዋ ዲራው፥ ኣሳይ ሃርጋንቻቱዋ ሻንቻማኒኔ ሳሌናን ቄሪ ቶኪዴ፥ ጴፂሮሲ ሄዋና ኣꬊያ ዎዴ ሃራይ ኣቶ፥ ኣው ኩዌንቶኔ ኡንቱንቱፔ ኢቱዋ ኢቱዋ ቦላና ኣꬋና ማላ፥ ካታማ ኦጊያ ዶና ኬሲዴ ዎꬄ።

¹⁶ ቃሲ ጮራ ኣሳይ ዬሩሳላሜ ማታን ዴዒያ ካታማቱዋፔ ሃርጋንቻቱዋኔ ኢታ ኣያናን ኦይቄቴዳ ኣሳቱዋ ኣኪ ዬዲኖ፤ ኡባቱካ ፓፄዲኖ።

¹⁷ ሄዋፔ ሲሚና ቄሳቱዋ ካፑኔ ኣናና ዴዒያ ሳዱቃዋናቱ ኡባቱ ዬሱሲ ኪቴዳዋንታ ዳሮ ቃናቲዴ፥ ኡንቱንቱ ቦላ ዴንዴዲኖ።

¹⁸ ቃሲ ዬሱሲ ኪቴዳዋንታ ኦይቂዴ፥ ኡባ ኣሳ ቃቺያ ጎሊያን ዬጌዲኖ።

¹⁹ ሺን ጎዳ ኪታንቻይ ቃማ ቃሾ ጎሌ ፔንጊያ ዶዪዴ፥ ዬሱሲ ኪቴዳዋንታ ካሬ ኬሲዴ፥

²⁰ «ሂንቴንቱ ቢዴ፥ ጌሻ ጎሊያን ኤቂዴ፥ ሃ ኦራꬃ ዴዑዋ ቃላ ኡባ ኣሳው ኦዲቴ» ያጌዳ።

²¹ ዬሱሲ ኪቴዳዋንቱ ሄዋ ሲሴዳ ዎዴ፥ ዎንቱማꬃን ጌሻ ጎሊያ ጌሊዴ፥ ታማርሳናው ዶሜዲኖ። ቃሲ ቄሳቱዋ ካፑኔ ኣናና ዴዒያዋንቱ ዪዴ፥ ሺቄዳ ኣሳና ኢስራዔሊያ ጪማቱዋ ኡባቱዋ ኢቲፔ ፄሲዴ፥ ዬሱሲ ኪቴዳዋንታ ባሬንቱ ሲንꬃ ኣሃና ማላ፥ ዎታዳራቱዋ ቃሾ ጎሌ ኪቴዲኖ።

¹ Itti Hanaaniyaa geetettiyaa bitani bare machchatti Saphphiirinna gadiyaa zali77eedda.

² He zali77eedda miishshaappe bare machchatta erishshin ashshiide, attowaa Yesuusi kiitteeddawanttussi immeedda.

³ Shin Phexiroosi Hanaaniyaa, “Neeni Geeshsha Ayyaanaa cimmaade ne gadiyaa zali77eedda miishshaappe shaakka ashshana mala, xalahii ne wozanaan ayissi geleeddee?

⁴ Neeni zali77anaappe kase gadii newaa gidennee? Qassi neeni zali77a simminakka miishshay neessa gidennee? Yaatina, hawaa malabaa oothanaw ayissi ne wozanaan qoppaaddii? Neeni Xoossaw worddotowaappe attin, asaw worddotabeykka” yaageedda.

⁵ Hanaanii he qaalaa siseedda man77iyankka kunddiide hayqqi aggeedda; hewaa siseedda ubbay daro yayyeedda.

⁶ Wodalla asatuu soy geliide, A anhaa xaaxiide, karew kesi A moogeeddino.

⁷ Heezzu saate gidowaappe guyyiyan, Hanaaniyaa machchatta hewaa erennaan de7aadde gelaaddu.

⁸ Phexiroosi izo, “Hinttenttu gadiyaa hanni keena miishshaan zali77eedditee? Ane taw oda” yaageedda. Iza, “E hanni keena miishshaan zali77eeddo” yaagaaddu.

⁹ Phexiroosi mishiratto, “Neeninne ne asinay Godaa Ayyaanaa paaccanaw ayissi zoretteedditee? Be7a; ne asinaa moogeedda asatuu karen de7iino; ne anhaakka unttunttu kare kessana” yaageedda.

¹⁰ Mishiratta he man77iyankka Phexiroosa gediyaa matan kunddaade hayqqaa aggaaddu; wodalla asatuu geliyaa wode hayqqeeddawunno demmiide, kare kesseeddawaappe guyye, izi asinaa duufuwaa matan moogeeddino.

¹¹ Ammaniyaa asaa ubbaynne hewaa siseedda hara asay ubbay darii yayyeedda.

¹² Yesuusi kiitteeddawanttu daro malaataanne oorathabaa asaa giddon oothiino; ammaniyaa ubbatuu Solomone baranddaan ittippe shiiqiino.

¹³ Hara asaappe unttunttunna gakettanaw haray atto ittuunne xalibeenna; shin asay unttuntta bonchchee.

¹⁴ Ammaniyaa attuma asaynne macca asay kasewaappe coray Godaassi gujettee.

¹⁵ Hewaa diraw, asay hargganchchatuwaa shanchchamaaninne saleenan qeri tookkiide, Phexiroosi hewaanna aadhdhiyaa wode haray atto, aw kuwenttonne unttunttuppe ittuwaa ittuwaa bollanna aadhdhana mala, katamaa ogiyaa doonaa kessiide wothee.

¹⁶ Qassi cora asay Yeerusalaame matan de7iyaa katamatuwaappe harganchchatuwanne iita ayyaanan oyqetteedda asatuwaa akki yeeddino; ubbatuukka paxeeddino.

¹⁷ Hewaappe simmina qeesatuwaa kaappuunne aananna de7iyaa Saduqaawanatuu ubbatuu Yesuusi kiitteeddawantta daro qanaatiide, unttunttu bolla denddeeddino.

¹⁸ Qassi Yesuusi kiitteeddawantta oyqqiide, ubba asaa qachchiyaa golliyaan yeggeeddino.

¹⁹ Shin Godaa kiitanchchay qamma qasho golle penggiyaa dooyyiide, Yesuusi kiitteeddawantta kare kessiide,

²⁰ “Hinttenttu biide, Geeshsha Golliyan eqqiide, ha ooratha de7uwaa qaalaa ubba asaw odite” yaageedda.

²¹ Yesuusi kiitteeddawanttu hewaa siseedda wode, wonttumaathaan Geeshsha Golliyaa geliide, tamaarssanaw doommeeddino. Qassi qeesatuwaa kaappuunne aananna de7iyaawanttu yiide, shiiqeedda asaanna Israa7eeliyaa cimatuwaa ubbatuwaa ittippe xeesiide, Yesuusi kiitteeddawantta barenttu sintha ahana mala, wottaaddaratuwaa qasho golle kiitteeddino.