ዬሱሲ ኪቴዳዋንቱ ኦሱዋ 4:7-27 in Dawro

⁷ ዬሱሲ ኪቴዳዋንታ ባሬንቱ ጊዱዋን ኤሲዴ፥ «ኣያ ዎልቃን ዎይ ኦ ሱንꬃን ሃዋ ሂንቴንቱ ኦꬄዲቴ?» ያጊዴ ኦቼዲኖ።

⁸ ሄ ዎዴ ጴፂሮሲ ባሬናን ጌሻ ኣያናይ ኩሚና፥ ኡንቱንታ ሃዋዳን ያጌዳ፤ «ኣሳ ካሌꬂያዋንቶ፥ ኣዪሁዳ ኣሳ ጪማቶ፥

⁹ ሃቼ ሃ ሃርጋንቻ ቢታኒያሲ ኦሴቴዳ ሎዖ ኦሱዋባኔ ኢ ዋኒ ፓፄዴንቶ፥ ሂንቴንቱ ኑና ኦቾፔ፥

¹⁰ ማስቃሊያ ቦላ ሚሲማሪያን ሂንቴንቱ ꬊሺዴ ካቂና፥ ፆሳይ ሃይቁዋፔ ዴንꬄዳ ናዚሬቲያ ዬሱሲ ኪሪስቶሳ ሱንꬃን ሃ ቢታኒ ፓፂዴ፥ ሂንቴንቱ ሲንꬃን ኤቄዳዌ ሂንቴንቱ ኡባሲኔ ኢስራዔሊያ ኣሳ ኡባው ኤሬቶ።

¹¹ ጎሊያ ኬፂያዋንቱ ሂንቴንቱ ካꬊዴ ኢፄዳ ቱሳይ ጎሊያ ኡባ ቶኪያ ኮሺያ ቱሳ ጊዴዳ።

¹² ኣሳይ ኣቶቴꬃ ዬሱሳ ባጋና ዴማናፔ ኣቲን፥ ሃራ ኦ ባጋናኔ ዴሜና፤ ኑኒ ኣ ሱንꬃን ኦꬃናው ቤሴ፤ ኣዪሲ ጎፔ፥ ፆሳይ ሳሉዋፔ ጋርሳን ኣሳሲ ኢሜዳ ሃራ ሱንꬃይ ባዋ» ያጌዳ።

¹³ ሺቁዋ ኣሳይ ጴፂሮሲኔ ዮሃኒሲ ፃሌዳ ፃላ ቤዔዳ ዎዴ፥ ኡንቱንቱ ታማሪቤና ጮ ኣሳ ጊዴዳዋ ኣኬኪዴ ማላሌቴዲኖ፤ ኡንቱንቱ ዬሱሳና ዴዒያዋካ ኤሬዲኖ።

¹⁴ ቃሲ ፓፄዳ ቢታኒ ጴፂሮሳናኔ ዮሃኒሳና ኤቄዳዋ ኣሳይ ቤዒዴ፥ ጊያዋ ꬋዬዲኖ።

¹⁵ ሺን ጴፂሮሲኔ ዮሃኒሲ ሺቁዋፔ ካሬ ኬሳና ማላ ኣሳይ ኣዛዚዴ፥ ባሬ ጊዶን ዞሬቲዴ፥

¹⁶ «ሃ ኣሳቱዋ ኣያ ኡዳኔ? ኣዪሲ ጎፔ፥ ኡንቱንቱ ኩሺያን ኦሴቴዳ ዎልቃማ ማላታቱ ዬሩሳላሜን ዴዒያ ኡባው ቤቴዳ። ኑኒ ሄዋ ኤሮኮ ጋናው ዳንዳዮኮ።

¹⁷ ሺን ዬዉ ኣሳው ላሌቴና ማላ፥ ሃዋፔ ሲንꬃው ሃ ኣሳቱ ዬሱሳ ሱንꬃ ኦሲኔ ኦዴናዳን፥ ሚኒሲዴ ኡንቱንታ፥ ‹ሂንቴና ኤሪቴ› ጎይቴ» ያጌዲኖ።

¹⁸ ኡንቱንቱ ፄሲዴ፥ ዬሱሳ ሱንꬃ ሙሌካ ዴንꬄናዳኒኔ ኣባ ታማሪሴናዳን ኣዛዜዲኖ።

¹⁹ ሺን ጴፂሮሲኔ ዮሃኒሲ ዛሪዴ፥ «ፆሳው ኤኖ ጊያዋ ኣጊዴ፥ ሂንቴንቶ ኤኖ ጊያዌ ፆሳ ሲንꬃን ሎዔንቶኔ ኣኔ ሂንቴ ፒርዲቴ።

²⁰ ኣዪሲ ጎፔ፥ ኑኒ ቤዔዳባኔ ሲሴዳባ ኦዴናን ኣጋናው ዳንዳዮኮ» ያጊዴ ሺቄዳ ኣሳው ኦዴዲኖ።

²¹ ሺቄዳ ኣሳይ ኡንቱንታ ሙራናው ጋሶቲያባይ ꬋዪና፥ ላዔꬁዋ ዳሪሲ ፓሉሜቲዴ፥ ሃኔዳባው ኣሳይ ኡባይ ፆሳ ጋላቲያ ዲራው፥ ኡንቱንታ ቢሊዴ ዬዴዲኖ።

²² ሄ ሃርጊያፔ ፓꬂያ ማላታቱ ኣው ኦሴቴዳ ቢታኒ ዬሌቶዴፔ ላይꬃይ ኣው ኦይታሙዋፔ ኣꬌዳ።

²³ ጴፂሮሲኔ ዮሃኒሲ ቢሌቲዴ፥ ባሬንቱ ዳባቱዋኮ ቢዴ፥ ቄሳቱዋ ካፓቱኔ ኣዪሁዳ ጪማቱ ባሬንታ ጌዳባ ኡባ ኡንቱንቶ ኦዴዲኖ።

²⁴ ኡንቱንቱ ሄዋ ሲሴዳ ዎዴ፥ ኢቲ ዎዛና ጊዲዴ፥ ፆሳ ሃዋዳን ያጊዴ ዎሴዲኖ፤ «ኡባ ሞዲያ ጎዳው፥ ሳሉዋ፥ ሳዓ፥ ኣባኔ ኡንቱንቱ ጊዶን ዴዒያ ኡባባ ሜꬌዳዎ፥

²⁵ ኔኒ ኔው ኦꬂያ ኑ ኣዉዋ ዳዊቴ ዶናን ጌሻ ኣያናን ሃሳያዴ፥ ‹ኣዪሁዳ ጊዴና ኣሳይ ኣዪሲ ዪሎቴዴ? ቃሲ ኣሳይ ኣዪሲ ዳንቤናባው ማቄቴዴ?

²⁶ ሳዓ ካታቱ ጊጌቴዲኖ፤ ጋዲያ ሞዲያዋንቱ ጎዳ ቦላኒኔ ኢ ኦኬዳ ኪሪስቶሳ ቦላ ኢቲፔ ዴንዴዲኖ› ያጋዴ ሃሳያዳ።

²⁷ «ኣዪሲ ጎፔ፥ ሄሮዲሲኔ ጴንፄናዊያ ጲላፆሲ ኣዪሁዳ ጊዴና ኣሳናኔ ኢስራዔሊያ ኣሳና፥ ኔኒ ኦኬዳ ኪሪስቶሳ ኔ ጌሻ ናዓ ዬሱሳ ቦላ ዴንዳናው፥ ሃ ካታማን ሺቄዳዌ ቱማ።

⁷ Yesuusi kiitteeddawantta barenttu gidduwan essiide, “Ayaa wolqqaan woy O sunthan hawaa hinttenttu ootheedditee?” yaagiide oochcheeddino.

⁸ He wode Phexiroosi barenan Geeshsha Ayyaanay kumina, unttuntta hawaadan yaageedda; “Asaa kaalethiyaawanttoo, Ayihuda asaa cimatoo,

⁹ hachche ha hargganchcha bitaniyaassi oosetteedda lo77o oosuwaabaanne I waani paxeeddentto, hinttenttu nuuna oochchooppe,

¹⁰ masqqaliyaa bolla misimaariyan hinttenttu dhishiide kaqqina, Xoossay hayquwaappe dentheedda Naazireetiyaa Yesuusi Kiristtoosa sunthan ha bitani paxiide, hinttenttu sinthaan eqqeeddawe hinttenttu ubbaassinne Israa7eeliyaa asaa ubbaw eretto.

¹¹ Golliyaa keexxiyaawanttu hinttenttu kadhiide ixxeedda tuussay golliyaa ubbaa tookkiyaa koshshiyaa tuussaa gideedda.

¹² Asay atotethaa Yesuusa bagganna demmanaappe attin, hara O baggannanne demmenna; nuuni A sunthan oothanaw bessee; ayissi gooppe, Xoossay saluwaappe garssan asaassi immeedda hara sunthay baawa” yaageedda.

¹³ Shiiquwaa asay Phexiroossinne Yohaannisi xaleedda xalaa be7eedda wode, unttunttu tamaaribeenna coo asaa gideeddawaa akeekiide maalaletteeddino; unttunttu Yesuusanna de7iyaawaakka ereeddino.

¹⁴ Qassi paxeedda bitani Phexiroossannanne Yohaannisanna eqqeeddawaa asay be7iide, giyaawaa dhayeeddino.

¹⁵ Shin Phexiroossinne Yohaannisi shiiquwaappe kare kesana mala asay azaziide, bare giddon zorettiide,

¹⁶ “Ha asatuwaa ayaa udanee? Ayissi gooppe, unttunttu kushiyan oosetteedda wolqqaama malaatatuu Yeerusalaamen de7iyaa ubbaw beetteedda. Nuuni hewaa erokko gaanaw danddayokko.

¹⁷ Shin yewuu asaw laalettenna mala, hawaappe sinthaw ha asatuu Yesuusa sunthaa oossinne odennaadan, minissiide unttuntta, ‘Hinttena erite’ goytte” yaageeddino.

¹⁸ Unttunttu xeesiide, Yesuusa sunthaa mulekka denthenaadaninne aabaa tamaarissennaadan azazeeddino.

¹⁹ Shin Phexiroossinne Yohaannisi zaariide, “Xoossaw eeno giyaawaa aggiide, hinttenttoo eeno giyaawe Xoossaa sinthan lo77enttonne ane hintte pirddite.

²⁰ Ayissi gooppe, nuuni be7eeddabaanne siseeddabaa odennaan agganaw danddayokko” yaagiide shiiqeedda asaw odeeddino.

²¹ Shiiqeedda asay unttuntta muranaw gaasottiyaabay dhayina, laa7ethuwaa darissi palumettiide, haneeddabaw asay ubbay Xoossaa galatiyaa diraw, unttuntta billiide yeddeeddino.

²² He harggiyaappe pathiyaa malaatatuu aw oosetteedda bitani yelettoodeppe laythay aw oytamuwaappe aadhdheedda.

²³ Phexiroossinne Yohaannisi bilettiide, barenttu dabbatuwakko biide, qeesatuwaa kaappatuunne Ayihuda cimatuu barentta geeddabaa ubbaa unttunttoo odeeddino.

²⁴ Unttunttu hewaa siseedda wode, itti wozana gidiide, Xoossaa hawaadan yaagiide woosseeddino; “Ubbaa Mooddiyaa Godaw, saluwaa, sa7aa, abbaanne unttunttu giddon de7iyaa ubbabaa medhdheeddawoo,

²⁵ Neeni New oothiyaa nu aawuwaa Daawite doonaan Geeshsha Ayyaanan haasayaadde, ‘Ayihuda gidenna asay ayissi yiloteeddee? Qassi asay ayissi danbbennabaw maqqetteeddee?

²⁶ Sa7aa kaatatuu giigetteeddino; gadiyaa mooddiyaawanttu Godaa bollaninne I okkeedda Kiristtoosa bolla ittippe denddeeddino’ yaagaade haasayaadda.

²⁷ “Ayissi gooppe, Heeroodisinne Phenxxenaawiyaa Philaaxoosi Ayihuda gidenna asaannanne Israa7eeliyaa asaanna, neeni okkeedda Kiristtoosa ne Geeshsha Na7aa Yesuusa bolla denddanaw, ha katamaan shiiqeeddawe tuma.