ዬሱሲ ኪቴዳዋንቱ ኦሱዋ 2:4-22 in Dawro

⁴ ኡንቱንቱ ኡባን ጌሻ ኣያናይ ኩሚዴ፥ ዱማ ዱማ ቃላን ሃሳያና ማላ፥ ኡንቱንታ ዳንዳዪሲና፥ ሃሳያ ዶሜዲኖ።

⁵ ሳዓን ዴዒያ ኣሳ ዜሬꬃ ኡባፔ ዪዴ፥ ፆሳው ያዪያ ኢቲፔ ዴዒያ ኣዪሁዳቱ ዬሩሳላሜን ዴዒኖ።

⁶ ሃ ጉንꬃ ሲሴዳ ዎዴ፥ ኣሳይ ኡባይ ሺቄዳ፤ ኡንቱንቱ ባሬንቱ ቃላን ቃላን ሃሳዪሺን ሲሴዳ ዲራው፥ ጊያዋ ꬋዬዲኖ።

⁷ ኣሳይ ኡባይ ማላሌቲዴኔ ሃዌ ኦራꬃባ ጊዴ፥ «ቤዒቴ፤ ሃ ሃሳዪያዋንቱ ኡባቱ ጋሊላ ኣሳቱዋ ጊዲኪኖ?

⁸ ያቲና፥ ኑኒ ኑ ዬሌቴዳ ጋዴ ቃላን ኡንቱንቱ ሃሳዪሺን ዋኒዴ ሲሴቶ?

⁹ ኑኒ ጳርቴ ኣሳቱ፥ ሜዶኔ ኣሳቱ፥ ኤላሜፄ ኣሳቱ፥ ላዑ ሻፋቱዋፔ ጊዱዋን ዴዒያዋንቱ፥ ዪሁዳን፥ ቃጳዶቂያን፥ ጳንፆሳን፥ ኢሲያን፥

¹⁰ ፒርጊያን፥ ጲኒፊሊያን፥ ጊብፄን፥ ቄሬና ባጋን ዴዒያ ሊቢያ ዎራዳቱዋን ዴዒያዋንቱ፥ ሮሜፔ ዬዳ ኢማꬃቱ፥ ኣዪሁዳቱ፥ ኣዪሁዳቴꬃው ላሜቴዳ ኑፔ ኣማሬዳዋንቱ፥ ቃሪፄሴ ኣሳቱኔ፥ ኣራቢያ ኣሳቱ፥ ፆሳይ ኦꬄዳ ዎልቃማ ኦሱዋ ኑ ቃላን ኡንቱንቱ ሃሳዪሺን ሲሴዶ» ያጌዲኖ።

¹² ኡባይካ ማላሌቲዴ፥ ዬዉ ባሬንቶ ጌሌናን ኢፂና ባሬንቱ ጊዶን፥ «ላ ሃዌ ዋጊያዌ?» ያጌዲኖ።

¹³ ሺን ሃራ ኣሳቱ ኣማኒያዋንቱ ቦላን ቂሊጪዴ፥ «ሃዋንቱ ኡሺዴ ማꬆቴዲኖ» ያጌዲኖ።

¹⁴ ሺን ጴፂሮሲ፥ ዬሱሲ ኪቴዳ ሃራ ታማኔ ኢቲ ኪቴቶዋንቱና ዴንዲ ኤቂዴ፥ ባሬ ኮሻ ꬎቁ ኦꬂዴ፥ ኡንቱንቶ ሃዋዳን ያጊ ኦዴዳ፤ «ኣዪሁዳቶ፥ ቃሲ ዬሩሳላሜን ዴዒያ ኡባቶ፥ ታኒ ኦዲያዋ ሲሲቴ። ሃዌ ሂንቴንቶ ኤሬቶ፤ ሂንቴንቱ ቆፒያዋዳን፥ ሃዋንቱ ማꬆቲቤይኪኖ።

¹⁵ ኣዪሲ ጎፔ፥ ዎንታፔ ቢሮ ሄዙ ሳቴ ጊዴ።

¹⁶ ሺን ሃዌ ናቢያ ኢዩዔል ሃሳዬዳዋ።

¹⁷ «ኢ ሃሳዪዴ፥ ‹ፆሳይ ሃዋዳን ያጌዳ፤ ዎዲያ ዉርሴꬃን ሃዋዳን ሃናናዋ። ታኒ ኣሳ ኡባ ቦላን ታ ኣያና ጉሳና። ሂንቴንቱ ኣቱማ ናናይኔ ሂንቴንቱ ማጫ ናናይ ቲምቢቲያ ኦዳናዋንታ። ሂንቴንቱ ዎዳላ ናናይካ ሳፃ ቤዓናዋንታ፤ ሂንቴንቱ ጪማቱካ ኣኩሙዋ ኣኩሜታናዋንታ።

¹⁸ ሄ ጋላሳቱን ታ ኣቱማ ቆማቱዋ ቦላኒኔ ታ ማጫ ኣሺካራቱዋ ቦላን ታኒ ታ ኣያና ጉሳና። ሄዋፔ ጉዬ ኡንቱንቱ ቲምቢቲያ ኦዳናዋንታ።

¹⁹ ቃሲ ታኒ ቦላ ሳሉዋን ኦራꬃባ፥ ጋርሳ ሳዓንካ ማላታ ቤሳና። ሱꬃይ፥ ታማይኔ ሻሪያዳን ካሜዳ ጩዋይ ዴዓና።

²⁰ ዎልቃማኔ ቦንቾ ጊዴዳ ጎዳ ጋላሳይ ጋካናፔ ካሴ ኣዋይ ꬉማና፤ ኣጌናይካ ሱꬃ ማላታና።

²¹ ሄ ዎዴ ሃዋዳን ሃናናዋ፤ ጎዳ ሱንꬃ ፄሲያ ኦኒኔ ኣታና› ያጌዳ።

²² «ኢስራዔሊያ ኣሳቶ፥ ሃ ቃላ ሲሲቴ፤ ናዚሬቲያ ዬሱሲ ሂንቴንቱ ጊዶን ፆሳይ ባሬናን ኦꬄዳ ዎልቃማ ኦሱዋን፥ ኦራꬃባኒኔ ማላታን ሂንቴንቶ ꬊሺሴዳ ኣሳ፤ ሄዋ ሂንቴንቱካ ኤሪታ።

⁴ Unttunttu ubbaan Geeshsha Ayyaanay kumiide, dumma dumma qaalaan haasayana mala, unttuntta danddayissina, haasayaa doommeeddino.

⁵ Sa7aan de7iyaa asaa zerethaa ubbaappe yiide, Xoossaw yayyiyaa ittippe de7iyaa Ayihudatuu Yeerusalaamen de7iino.

⁶ Ha gunthaa siseedda wode, asay ubbay shiiqeedda; unttunttu barenttu qaalaan qaalaan haasayishshin siseedda diraw, giyaawaa dhayeeddino.

⁷ Asay ubbay maalalettiiddenne hawe oorathabaa giidde, “Be7ite; ha haasayiyaawanttu ubbatuu Galiilaa asatuwaa gidikkinoo?

⁸ Yaatina, nuuni nu yeletteedda gade qaalaan unttunttu haasayishshin waaniide siseettoo?

⁹ Nuuni Phartte asatuu, Meedoone asatuu, Elaameexe asatuu, laa77u shaafatuwaappe gidduwan de7iyaawanttu, Yihudaan, Qaphphadooqiyan, Phanxxoossan, Iisiyan,

¹⁰ Pirggiyan, Phinifiliyan, Gibxen, Qereena baggan de7iyaa Liibiyaa woradatuwan de7iyaawanttu, Roomeppe yeedda immathatuu, Ayihudatuu, Ayihudatethaw laametteedda nuuppe amareeddawanttu, Qarixxeese asatuunne, Arabiyaa asatuu, Xoossay ootheedda wolqqaama oosuwaa nu qaalaan unttunttu haasayishshin siseeddo” yaageeddino.

¹² Ubbaykka maalalettiide, yewuu barenttoo gelennaan ixxina barenttu giddon, “Laa hawe waagiyaawee?” yaageeddino.

¹³ Shin hara asatuu ammaniyaawanttu bollan Qilliicciidde, “Hawanttu ushiide mathotteeddino” yaageeddino.

¹⁴ Shin Phexiroosi, Yesuusi kiitteedda hara tammanne itti kiitettowanttunna denddi eqqiide, bare kooshshaa dhoqqu oothiide, unttunttoo hawaadan yaagi odeedda; “Ayihudatoo, qassi Yeerusalaamen de7iyaa ubbatoo, taani odiyaawaa sisite. Hawe hinttenttoo eretto; hinttenttu qoppiyaawaadan, hawanttu mathottibeykkino.

¹⁵ Ayissi gooppe, wonttaappe biro heezzu saate gidee.

¹⁶ Shin hawe Nabiyaa Iyu7eel haasayeeddawaa.

¹⁷ “I haasayiidde, ‘Xoossay hawaadan yaageedda; wodiyaa wurssethaan hawaadan hananawaa. Taani asaa ubbaa bollan ta Ayyaanaa gussana. Hinttenttu attuma naanaynne hinttenttu macca naanay timbbitiyaa odanawantta. Hinttenttu wodalla naanaykka saxaa be7anawantta; hinttenttu cimatuukka akumuwaa akumettanawantta.

¹⁸ He gallassatun ta attuma qoomatuwaa bollaninne ta macca ashikkaratuwaa bollan Taani Ta Ayyaanaa gussana. Hewaappe guyye unttunttu timbbitiyaa odanawantta.

¹⁹ Qassi Taani bolla saluwan oorathabaa, garssa sa7ankka malaataa bessana. Suuthay, tamaynne shaariyaadan kammeedda cuway de7ana.

²⁰ Wolqqaamanne bonchcho gideedda Godaa gallassay gakkanaappe kase away dhumaana; agenaykka suuthaa malatana.

²¹ He wode hawaadan hananawaa; Godaa sunthaa xeesiyaa ooninne attana’ yaageedda.

²² “Israa7eeliyaa asatoo, ha qaalaa sisite; Naazireetiyaa Yesuusi hinttenttu giddon Xoossay barenan ootheedda wolqqaama oosuwan, oorathabaaninne malaatan hinttenttoo dhiishisseedda asa; hewaa hinttenttukka eriita.