ዬሱሲ ኪቴዳዋንቱ ኦሱዋ 2:14-44 in Dawro

¹⁴ ሺን ጴፂሮሲ፥ ዬሱሲ ኪቴዳ ሃራ ታማኔ ኢቲ ኪቴቶዋንቱና ዴንዲ ኤቂዴ፥ ባሬ ኮሻ ꬎቁ ኦꬂዴ፥ ኡንቱንቶ ሃዋዳን ያጊ ኦዴዳ፤ «ኣዪሁዳቶ፥ ቃሲ ዬሩሳላሜን ዴዒያ ኡባቶ፥ ታኒ ኦዲያዋ ሲሲቴ። ሃዌ ሂንቴንቶ ኤሬቶ፤ ሂንቴንቱ ቆፒያዋዳን፥ ሃዋንቱ ማꬆቲቤይኪኖ።

¹⁵ ኣዪሲ ጎፔ፥ ዎንታፔ ቢሮ ሄዙ ሳቴ ጊዴ።

¹⁶ ሺን ሃዌ ናቢያ ኢዩዔል ሃሳዬዳዋ።

¹⁷ «ኢ ሃሳዪዴ፥ ‹ፆሳይ ሃዋዳን ያጌዳ፤ ዎዲያ ዉርሴꬃን ሃዋዳን ሃናናዋ። ታኒ ኣሳ ኡባ ቦላን ታ ኣያና ጉሳና። ሂንቴንቱ ኣቱማ ናናይኔ ሂንቴንቱ ማጫ ናናይ ቲምቢቲያ ኦዳናዋንታ። ሂንቴንቱ ዎዳላ ናናይካ ሳፃ ቤዓናዋንታ፤ ሂንቴንቱ ጪማቱካ ኣኩሙዋ ኣኩሜታናዋንታ።

¹⁸ ሄ ጋላሳቱን ታ ኣቱማ ቆማቱዋ ቦላኒኔ ታ ማጫ ኣሺካራቱዋ ቦላን ታኒ ታ ኣያና ጉሳና። ሄዋፔ ጉዬ ኡንቱንቱ ቲምቢቲያ ኦዳናዋንታ።

¹⁹ ቃሲ ታኒ ቦላ ሳሉዋን ኦራꬃባ፥ ጋርሳ ሳዓንካ ማላታ ቤሳና። ሱꬃይ፥ ታማይኔ ሻሪያዳን ካሜዳ ጩዋይ ዴዓና።

²⁰ ዎልቃማኔ ቦንቾ ጊዴዳ ጎዳ ጋላሳይ ጋካናፔ ካሴ ኣዋይ ꬉማና፤ ኣጌናይካ ሱꬃ ማላታና።

²¹ ሄ ዎዴ ሃዋዳን ሃናናዋ፤ ጎዳ ሱንꬃ ፄሲያ ኦኒኔ ኣታና› ያጌዳ።

²² «ኢስራዔሊያ ኣሳቶ፥ ሃ ቃላ ሲሲቴ፤ ናዚሬቲያ ዬሱሲ ሂንቴንቱ ጊዶን ፆሳይ ባሬናን ኦꬄዳ ዎልቃማ ኦሱዋን፥ ኦራꬃባኒኔ ማላታን ሂንቴንቶ ꬊሺሴዳ ኣሳ፤ ሄዋ ሂንቴንቱካ ኤሪታ።

²³ ዬሱሲ ሂንቴንቶ ኢሜታና ማላ፥ ፆሳይ ካሴ ባሬ ሼኒያኒኔ ባሬ ኤራን ባሬ ቆፋ ቃቺ ዎꬄዳ፤ ያቲና፥ ኣ ሂንቴንቱ ናጋራንቻቱዋ ኩሺያን ማስቃሊያ ቦላ ሚሲማሪያን ꬊሺሲዴ፥ ካቂሲ ዎꬊሴዲታ።

²⁴ ሺን ሃይቁ ዬሱሳ ኦይቃናው ዳንዳዪቤና ዲራው፥ ፆሳይ ሃይቁዋ ሴላ ኣፔ ꬋዪሲዴ፥ ኣ ዴንꬄዳ።

²⁵ ኣዪሲ ጎፔ፥ ዳዊቴ ዬሱሳባ ሃዋዳን ያጌዳ፤ ‹ታኒ ሜቶቴናዳን፥ ጎዳይ ታ ኡሼቻን ዴዒያ ዲራው፥ ታኒ ኡባ ዎዴ ጎዳ ታ ማታን ቤዓይ።

²⁶ ሄዋ ዲራው፥ ታ ዎዛናይ ናሼቴዳ፤ ታ ኢንፃርሳንካ ናሼቻይ ኩሜዳ። ቃሲ ታ ቦላይካ ሎዖ ዴዓና ጊዴ፥ ናሼቻን ናጌ።

²⁷ ኣዪሲ ጎፔ፥ ታ ሼምፑዋ ሲዖሊያን ኣጋካ። ቃሲ ኔ ጌሻ ናዓ ኣኃካ ዎቄꬃካ።

²⁸ ኔኒ ታና ዴዑዋ ኦጊያ ኤርሳዳ። ኔኒ ታናና ዴዒያዋን ታኒ ዳሪ ናሼታይ› ያጌዳ።

²⁹ «ኢሻቶ፥ ኑ ኣዋቱዋ ካፑዋ ዳዊቴባ ታኒ ሂንቴንቶ ጌሻዴ ኦዳናው ቤሴ፤ ዳዊቴ ሃይቂዴ ሞጌቴዳ፤ ኣ ዱፉ ሃቼ ጋካናዉካ ኑ ማታን ዴዔ።

³⁰ ዳዊቴ ናቢያ ጊዴዳ ዲራዉኔ ፆሳይ ኣ ናና ዜሬꬃፔ ኢቱዋ ኣ ካዉቴꬃ ኦይዲያን ኡቲሳናው ኣው ጫቄዳዋ ኤሬዳ ዲራው፥

³¹ ኪሪስቶሳ ዴንዱዋ ሲንꬃው ፄሊዴ፥ ‹ኣ ሼምፑ ሲዖሊያን ኣቲቤና፤ ኣ ቦላይካ ዎቂቤና› ጊዴ ኦዴዳ።

³² «ፆሳይ ዬሱሳ ሃይቁዋፔ ዴንꬄዳዋሲ ኑኒ ኡባይ ማርካ።

³³ ሄዋ ዲራው፥ ፆሳይ ባሬፔ ኡሼቻ ባጋን ኣ ꬎቁ ꬎቁ ኡዲዴ፥ ኣው ጌሻ ኣያና ኢማና ጌዳዋዳን፥ ጌሻ ኣያና ኣኪዴ፥ ሃዋ ሂንቴንቱ ሃዒ ቤዒያዋኔ ሲሲያዋ ኑ ቦላ ጉሴዳ።

³⁴ ኣዪሲ ጎፔ፥ ዳዊቴ ባሬ ሁጴው ሳሉዋ ኬሲቤና፤ ሺን ያጌዳ፤ ‹ጎዳይ ታ ጎዳ፤ «ታኒ ኔ ሞርኬቱዋ ኔኒ ጌዲያን ዬꬋ ኤቂያዋ ኦꬃና ጋካናው ሃዋን ታፔ ኡሼቻ ባጋና ኡታ» ጌዳ› ያጌዳ።

³⁶ «ሄዋ ዲራው፥ ፆሳይ ማስቃሊያ ቦላ ሚሲማሪያን ሃ ሂንቴንቱ ꬊሺዴ ካቄዳ ዬሱሳ ጎዳኔ ኪሪስቶሳ ኦꬄዳዋ ኢስራዔሊያ ኣሳ ዜሬꬃይ ኡባይ ቱሙፔ ኤሮ» ያጌዳ።

³⁷ ኣሳይ ጴፂሮሲ ጌዳዋ ሲሴዳ ዎዴ፥ ኣሳው ዎዛናይ ዳሮፔ ቦሼቲና፥ ጴፂሮሳኔ ዬሱሲ ኪቴዳ ሃራቱዋ፥ «ኑ ኢሻቶ፥ ያቲና ኑኒ ኣያ ኡዳኔ?» ያጌዲኖ።

³⁸ ጴፂሮሲ ኡንቱንታ፥ «ሂንቴንቱ ናጋራይ ኣቶ ጌቴታና ማላ፥ ናጋራፔ ሲሚዴ፥ ሂንቴንቱ ሁጲያን ሁጲያን ዬሱሲ ኪሪስቶሳ ሱንꬃን ፃማቄቲቴ። ፆሳይ ኢሚያ ጌሻ ኣያና ሂንቴንቱ ኣካና።

³⁹ ኣዪሲ ጎፔ፥ ፆሳይ ኢማና ጌዳ ቃላይ ሂንቴንቱሳ፥ ሂንቴንቱ ናናቱዋሳኔ ጎዳይ ኑ ፆሳይ ባሬኮ ፄሲያ ሃኩዋን ዴዒያዋንቱ ኡባሳ» ያጌዳ።

⁴⁰ ጴፂሮሲ ኡንቱንቶ ቃላ ሃራካ ጉጂ ማርካቲዴ፥ «ሃ ዎዲያ ጌላ ኣሳፔ ሂንቴንቱ ሁጲያ ኣሺቴ» ያጊዴ ዞሬዳ።

⁴¹ ጴፂሮሲ ኦዴዳዋ ኣኬዳዋንቱ ፃማቄቴዲኖ፤ ሄ ጋላሲ ሄዙ ሻዓ ጊዲያ ኣሳይ ኣማኔዲኖ።

⁴² ኡንቱንቱ ዬሱሲ ኪቴዳዋንቱ ቲሚርቲያን፥ ኢቲፔቴꬃን ኡኪꬃ ሜንꬂ ሚያዋኒኔ ፆሳ ዎሳን ጌንጪኖ።

⁴³ ዬሱሲ ኪቴዳዋንቱ ኩሺያን ዳሮ ኦራꬃባይኔ ማላታቱ ኦሴቲና፥ ኣሳ ኡባ ያሻይ ኦይቄዳ።

⁴⁴ ኣማኔዳ ኡባቱ ኢቲፔ ዴዒኖ፤ ቃሲ ባሬንቶ ዴዒያባ ኡባካ ኢቲፔ ሻኪ ኣኬዲኖ።

¹⁴ Shin Phexiroosi, Yesuusi kiitteedda hara tammanne itti kiitettowanttunna denddi eqqiide, bare kooshshaa dhoqqu oothiide, unttunttoo hawaadan yaagi odeedda; “Ayihudatoo, qassi Yeerusalaamen de7iyaa ubbatoo, taani odiyaawaa sisite. Hawe hinttenttoo eretto; hinttenttu qoppiyaawaadan, hawanttu mathottibeykkino.

¹⁵ Ayissi gooppe, wonttaappe biro heezzu saate gidee.

¹⁶ Shin hawe Nabiyaa Iyu7eel haasayeeddawaa.

¹⁷ “I haasayiidde, ‘Xoossay hawaadan yaageedda; wodiyaa wurssethaan hawaadan hananawaa. Taani asaa ubbaa bollan ta Ayyaanaa gussana. Hinttenttu attuma naanaynne hinttenttu macca naanay timbbitiyaa odanawantta. Hinttenttu wodalla naanaykka saxaa be7anawantta; hinttenttu cimatuukka akumuwaa akumettanawantta.

¹⁸ He gallassatun ta attuma qoomatuwaa bollaninne ta macca ashikkaratuwaa bollan Taani Ta Ayyaanaa gussana. Hewaappe guyye unttunttu timbbitiyaa odanawantta.

¹⁹ Qassi Taani bolla saluwan oorathabaa, garssa sa7ankka malaataa bessana. Suuthay, tamaynne shaariyaadan kammeedda cuway de7ana.

²⁰ Wolqqaamanne bonchcho gideedda Godaa gallassay gakkanaappe kase away dhumaana; agenaykka suuthaa malatana.

²¹ He wode hawaadan hananawaa; Godaa sunthaa xeesiyaa ooninne attana’ yaageedda.

²² “Israa7eeliyaa asatoo, ha qaalaa sisite; Naazireetiyaa Yesuusi hinttenttu giddon Xoossay barenan ootheedda wolqqaama oosuwan, oorathabaaninne malaatan hinttenttoo dhiishisseedda asa; hewaa hinttenttukka eriita.

²³ Yesuusi hinttenttoo imettana mala, Xoossay kase bare sheniyaaninne bare eraan bare qofaa qachchi wotheedda; yaatina, A hinttenttu nagaranchchatuwaa kushiyan masqqaliyaa bolla misimaariyan dhishissiide, kaqissi wodhisseeddita.

²⁴ Shin hayquu Yesuusa oyqqanaw danddayibeenna diraw, Xoossay hayquwaa seelaa aappe dhayissiide, A dentheedda.

²⁵ Ayissi gooppe, Daawite Yesuusabaa hawaadan yaageedda; ‘Taani metootennaadan, Goday ta ushechchaan de7iyaa diraw, taani ubba wode Godaa ta matan be7ay.

²⁶ Hewaa diraw, ta wozanay nashetteedda; ta inxxarssankka nashechchay kumeedda. Qassi ta bollaykka lo77o de7ana giide, nashechchaan naagee.

²⁷ Ayissi gooppe, ta shemppuwaa Si7ooliyan aggakka. Qassi ne Geeshsha Na7aa anhaakka wooqethakka.

²⁸ Neeni taana de7uwaa ogiyaa erssaadda. Neeni taananna de7iyaawaan taani darii nashettay’ yaageedda.

²⁹ “Ishatoo, nu aawatuwa kaappuwaa Daawitebaa taani hinttenttoo geeshshaade odanaw bessee; Daawite hayqqiide moogetteedda; A duufuu hachche gakkanawukka nu matan de7ee.

³⁰ Daawite Nabiyaa gideedda dirawunne Xoossay A naanaa zerethaappe ittuwaa A kawutethaa oydiyaan utissanaw aw caaqqeeddawaa ereedda diraw,

³¹ Kiristtoosa dendduwaa sinthaw xeelliide, ‘A shemppuu Si7ooliyan attibeenna; A bollaykka wooqqibeenna’ giide odeedda.

³² “Xoossay Yesuusa hayquwaappe dentheeddawaassi nuuni ubbay markka.

³³ Hewaa diraw, Xoossay bareppe ushechcha baggan A dhoqqu dhoqqu udiide, aw Geeshsha Ayyaanaa immana geeddawaadan, Geeshsha Ayyaanaa akkiide, hawaa hinttenttu ha77i be7iyaawaanne sisiyaawaa nu bolla gusseedda.

³⁴ Ayissi gooppe, Daawite bare huuphew saluwaa kesibeenna; shin yaageedda; ‘Goday ta Godaa; “Taani ne morkketuwaa neeni gediyaan yedhdha eqqiyaawaa oothana gakkanaw hawaan taappe ushechcha bagganna utta” geedda’ yaageedda.

³⁶ “Hewaa diraw, Xoossay masqqaliyaa bolla misimaariyan ha hinttenttu dhishiide kaqqeedda Yesuusa Godanne Kiristtoosa ootheeddawaa Israa7eeliyaa asaa zerethay ubbay tumuppe ero” yaageedda.

³⁷ Asay Phexiroosi geeddawaa siseedda wode, asaw wozanay daroppe boshettina, Phexiroosanne Yesuusi kiitteedda haratuwaa, “Nu ishatoo, yaatina nuuni ayaa udanee?” yaageeddino.

³⁸ Phexiroosi unttuntta, “Hinttenttu nagaray atto geetettana mala, nagaraappe simmiide, hinttenttu huuphiyan huuphiyan Yesuusi Kiristtoosa sunthan xammaqettite. Xoossay immiyaa Geeshsha Ayyaanaa hinttenttu akkana.

³⁹ Ayissi gooppe, Xoossay immana geedda qaalay hinttenttussa, hinttenttu naanatuwassanne Goday nu Xoossay barekko xeesiyaa haakuwaan de7iyaawanttu ubbaassa” yaageedda.

⁴⁰ Phexiroosi unttunttoo qaalaa haraakka gujji markkattiide, “Ha wodiyaa geella asaappe hinttenttu huuphiyaa ashshite” yaagiide zoreedda.

⁴¹ Phexiroosi odeeddawaa akkeeddawanttu xammaqetteeddino; he gallassi heezzu sha77a gidiyaa asay ammaneeddino.

⁴² Unttunttu Yesuusi kiitteeddawanttu timirttiyaan, ittippetethaan ukithaa menthi miyaawaaninne Xoossaa woosan gencciino.

⁴³ Yesuusi kiitteeddawanttu kushiyan daro oorathabaynne malaatatuu oosettina, asaa ubbaa yashshay oyqqeedda.

⁴⁴ Ammaneedda ubbatuu ittippe de7iino; qassi barenttoo de7iyaabaa ubbaakka ittippe shaakki akkeeddino.