ዬሱሲ ኪቴዳዋንቱ ኦሱዋ 28:13-31 in Dawro

¹³ ሄዋፔ ዩዪዴ፥ ሬጊዩሜ ጊያ ካታማ ጋኬዶ። ኢቲ ጋላሳፔ ጉዪያን፥ ኣዋይ ኬሲያሳ ፄሊያ ዎዴ ኡሼቻ ዱጌሃ ባጋ ጫርኩ ጫርኪና፥ ዎንቲሳ ጋላሲ ፑቲያሉሳ ጊያ ካታማ ዬዶ።

¹⁴ ሄዋን ኑኒ ኢቲ ኢቲ ኣማኒያዋንታ ዴሚና፥ ባሬንቱና ላፑ ጋላሳ ኡታና ማላ፥ ኑና ዎሴዲኖ፤ ሄዋፔ ቃሲ ሮሜ ዬዶ።

¹⁵ ሮሜን ዴዒያ ኣማኒያዋንቱ ኑባ ሲሲዴ፥ ኣፊያሳ ጌያኔ «ሄዙ ኣቂያሳ ጌቴቲያሳ» ጋካናሲ ኑና ሞካናው ዬዲኖ፤ ጳዉሎሲ ኡንቱንታ ቤዔዳ ዎዴ ፆሳ ጋላቲዴ፥ ዎዛናን ሚኒሴዳ።

¹⁶ ኑኒ ሮሜ ጌሌዳ ዎዴ፥ ጳዉሎሲ ባሬና ናጊያ ዎታዳራና ባሬካ ዴዓናዳን ኡዴቴዳ።

¹⁷ ሄዙ ጋላሳፔ ጉዪያን፥ ጳዉሎሲ ኣዪሁዳቱዋ ካፓቱዋ ባሬኮ ፄሴዳ፤ ኡንቱንቱ ሺቄዳ ዎዴ፥ ኡንቱንታ ሃዋዳን ያጌዳ፤ «ታናዳን ኣማኒያዋንቶ፥ ታኒ ኑ ኣሳ ዎይ ኑ ኣዋቱዋ ዎጋ ኢታባ ኣይኔ ኦꬄናን፥ ታና ዬሩሳላሜን ቃቺዴ፥ ሮሜ ኣሳሲ ኣꬂዴ ኢሜዲኖ።

¹⁸ ኡንቱንቱ ታና ቢዴዳዋፔ ጉዬ፥ ሃይቃናው ቤሲያባይ ታ ቦላ ኣይኔ ባዪና ዲራው፥ ታና ቢላናው ኮዬዲኖ።

¹⁹ ሺን ሄዋ ኣዪሁዳቱ ኤኖ ጌናን ኢፄዳ ዎዴ፥ ‹ታባ ቄሳሬ ፒርዶ› ጋናዌ ታና ኮሼዳፔ ኣቲን፥ ታኒ ታ ዛሪያ ሞቲያባይ ታው ዴዒና ጊዴና።

²⁰ ታኒ ሂንቴንቱና ጋኬታናዉኔ ሃሳያናው ሂንቴንታ ፄሴዳዌ ሄዋሳ፤ ኣዪሲ ጎፔ፥ ኢስራዔሊያ ኣሳይ ናሼቻን ናጊያዋ ዲራው ታኒ ሃ ሳንꬃላታን ቃሼታዲ» ያጌዳ።

²¹ ኣዪሁዳ ጪማቱ ጳዉሎሳ፥ «ኑኒ ዪሁዳፔ ኔባው ዳቢዳቢያ ኣኪቤይኮ። ኑ ኢሻቱዋፔካ ሃራይ ኣቶ፥ ኢቱካ ዪዴ፥ ኔባ ኦዲቤና፤ ዎይ ኔ ሱንꬃ ባዪዚዴ፥ ኑሲ ኦዲቤና።

²² ሺን ሄ ኣሳ ሱንꬃ ኡባሳን ኣሳይ ባዪዚዴ ሃሳዪያዋ ኑኒ ኤሪያ ዲራው፥ ኔ ቆፋ ሲሳናው ኮዬቶ» ያጌዲኖ።

²³ ኡንቱንቱ ባሬንቱ ያና ጋላሳ ጳዉሎሳው ኬሪዴ፥ ሄ ጋላሲ ጮሪዴ ኢ ዴዒያሳ ዬዲኖ፤ ኢካ ኡንቱንቶ ፆሳ ካዉቴꬃባ ማርካቴዳ። ቃሲ ኡንቱንቱ ዬሱሳባ ኣማናና ማላ፥ ሙሴ ሂጊያፔኔ ናባቱ ፃፌዳዋፔ ኣኪዴ ኡንቱንታ ታማሪሲዴ፥ ዎንታፔ ኦማርሲ ጋካናው ሎይꬂ ኦዴዳ።

²⁴ ባጋቱ ጳዉሎሲ ጌዳዋ ኣማኔዲኖ፤ ሺን ባጋቱ ኣማኒቤይኪኖ።

²⁵ ኡንቱንቱ ባሬንቱ ጊዶን ዬዉዋ ኤኖ ጌናን ኢፄዳ ዎዴ፥ ጳዉሎሲ ኢቲባ ጌዳዋፔ ጉዪያን ቤዲኖ፤ ኢ ሃዋዳን ያጌዳ፤ «ጌሻ ኣያናይ ኑ ኣዋቱዋሲ ናቢያ ኢሲያሳ ማፃፋን፥

²⁶ ‹ኔኒ ሄ ኣሳኮ ባዴ ሃዋዳን ጋ፤ «ሂንቴንቱ ሲሳ ሲሳና፥ ሺን ሂንቴንቶ ጌሌና፤ ሂንቴንቱ ፄላ ፄላና፥ ሺን ቤዒኪታ።

²⁷ ኣዪሲ ጎፔ፥ ሃ ኣሳ ዎዛናይ ጉዙሜዳ፤ ባሬንቱ ሃይꬃ ቱሊሴዲኖ፤ ባሬንቱ ኣዪፊያካ ጪሉሜዲኖ። ሄዌ ባዌንቶ፥ ባሬንቱ ኣይፊያን ቤዓና፤ ኡንቱንቱ ሃይꬃይካ ሲሳና፤ ኡንቱንቱ ዎዛናይካ ኣኬካና፤ ኡንቱንቱ ታኮ ፆሳኮ ሲማና። ቃሲ ታኒካ ኡንቱንታ ፓꬃና» ያጋ› ያጌዳ።

²⁸ «ሲሚ ሃዌ ፆሳ ኣቶቴꬃይ፥ ኣዪሁዳ ጊዴናዋንቶ ኪቴቴዳዌ ሂንቴንቶ ኤሬቶ። ቃሲ ኡንቱንቱካ ሲሳና» ያጌዳ።

²⁹ ጳዉሎሲ ሄዋ ጌዳዋፔ ጉዪያን፥ ኣዪሁዳቱ ባሬንቱ ጊዶን ዳሮ ፓሉሜቲዴ ቤዲኖ።

³⁰ ጳዉሎሲ ኪራ ጎሊያን ላዑ ላይꬃ ኩሜንꬃ ዴዒዴ፥ ባሬኮ ዪያ ኡባ ሞኬ።

³¹ ባሬና ኦኒኔ ዲጌናን ፆሳ ካዉቴꬃባኔ ጎዳ ዬሱሲ ኪሪስቶሳባ ኦዲዴ፥ ያዬናን ዳሪ ቆንጪሲዴ ታማርሴዳ።

¹³ Hewaappe yuuyyiidde, Regiiyume giyaa katamaa gakkeeddo. Itti gallassaappe guyyiyan, away kesiyaasaa xeelliyaa wode ushechcha dugehaa bagga carkkuu carkkina, wonttissa gallassi Putiyaaluusa giyaa katamaa yeeddo.

¹⁴ Hewaan nuuni itti itti ammaniyaawantta demmina, barenttunna laappu gallassaa uttana mala, nuuna woosseeddino; hewaappe qassi Roome yeeddo.

¹⁵ Roomen de7iyaa ammaniyaawanttu nubaa sisiide, Afiyaasaa Geyaanne “Heezzu Aqiyaasaa geetettiyaasaa” gakkanaassi nuuna mokkanaw yeeddino; Phawuloosi unttuntta be7eedda wode Xoossaa galatiide, wozanaan minisseedda.

¹⁶ Nuuni Roome geleedda wode, Phawuloosi barena naagiyaa wottaaddaraanna barekka de7anaadan udetteedda.

¹⁷ Heezzu gallassaappe guyyiyan, Phawuloosi Ayihudatuwaa kaappatuwaa barekko xeeseedda; unttunttu shiiqeedda wode, unttuntta hawaadan yaageedda; “Taanaadan ammaniyaawanttoo, taani nu asaa woy nu aawatuwa wogaa iitabaa aynne oothennaan, taana Yeerusalaamen qachchiide, Roome asaassi aathiide immeeddino.

¹⁸ Unttunttu taana biddeeddawaappe guyye, hayqqanaw bessiyaabay ta bolla aynne bayinna diraw, taana billanaw koyyeeddino.

¹⁹ Shin hewaa Ayihudatuu eeno geennaan ixxeedda wode, ‘Tabaa Qeesaare pirddo’ gaanawe taana koshsheeddappe attin, taani ta zariyaa mootiyaabay taw de7ina gidenna.

²⁰ Taani hinttenttunna gakettanawunne haasayanaw hinttentta xeeseeddawe hewaassa; ayissi gooppe, Israa7eeliyaa asay nashechchaan naagiyaawaa diraw taani ha santhalataan qashettaaddi” yaageedda.

²¹ Ayihuda cimatuu Phawuloosa, “Nuuni Yihudaappe nebaw dabidaabbiyaa akkibeykko. Nu ishatuwaappekka haray atto, ittuukka yiide, nebaa odibeenna; woy ne sunthaa bayizziide, nuussi odibeenna.

²² Shin he asaa sunthaa ubbasan asay bayizziide haasayiyaawaa nuuni eriyaa diraw, ne qofaa sisanaw koyyeetto” yaageeddino.

²³ Unttunttu barenttu yaana gallassaa Phawuloosaw keeriide, he gallassi coriide I de7iyaasaa yeeddino; ikka unttunttoo Xoossaa kawutethaabaa markkatteedda. Qassi unttunttu Yesuusabaa ammanana mala, Muse higgiyaappenne nabatuu xaafeeddawaappe akkiide unttuntta tamaarissiidde, wonttappe omarssi gakkanaw loythi odeedda.

²⁴ Baggatuu Phawuloosi geeddawaa ammaneeddino; shin baggatuu ammanibeykkino.

²⁵ Unttunttu barenttu giddon yewuwaa eeno geennaan ixxeedda wode, Phawuloosi ittibaa geeddawaappe guyyiyan beeddino; I hawaadan yaageedda; “Geeshsha Ayyaanay nu aawatuwassi nabiyaa Iisiyaasa maxaafaan,

²⁶ ‘Neeni he asaakko baade hawaadan ga; “Hinttenttu sissaa sisana, shin hinttenttoo gelenna; hinttenttu xeelaa xeellana, shin be7ikkita.

²⁷ Ayissi gooppe, ha asaa wozanay guzumeedda; barenttu haythaa tullisseeddino; barenttu ayifiyaakka ciilummeeddino. Hewe baawentto, barenttu ayfiyaan be7ana; unttunttu haythaykka sisana; unttunttu wozanaykka akeekana; unttunttu taakko Xoossaakko simmana. Qassi taanikka unttuntta pathana” yaaga’ yaageedda.

²⁸ “Simmi hawe Xoossaa atotethay, Ayihuda gidennawanttoo kiitetteeddawe hinttenttoo eretto. Qassi unttunttukka sisana” yaageedda.

²⁹ Phawuloosi hewaa geeddawaappe guyyiyan, Ayihudatuu barenttu giddon daro palumettiidde beeddino.

³⁰ Phawuloosi kiraa golliyaan laa77u laythaa kumenthaa de7iidde, barekko yiyaa ubbaa mokkee.

³¹ Barena ooninne diggennan Xoossaa kawutethaabaanne Godaa Yesuusi Kiristtoosabaa odiidde, yayyennaan darii qonccissiide tamaarsseedda.