ዬሱሲ ኪቴዳዋንቱ ኦሱዋ 25:13-23 in Dawro

¹³ ኣማሬዳ ጋላሳፔ ጉዪያን፥ ካቲያ ኣግሪጳይኔ ባሪኒቄ ፒስፆሳ ሳሮታናው ቂሳሪያ ቤዲኖ።

¹⁴ ያኒ ኡንቱንቱ ጮራ ጋላሳ ኡቲ ዴዒሺን፥ ፒስፆሲ ካቲያሲ ጳዉሎሳባ ሃዋዳን ያጊዴ ኦዴዳ፤ «ሃዋን ፊሊኪሴ ቃቺዴ ባሺ ቤዳ ኢቲ ቢታኒ ዴዔ።

¹⁵ ታኒ ዬሩሳላሜን ዴዒሺን፥ ቄሳቱዋ ካፓቱኔ ኣዪሁዳ ጪማቱ ኣ ቦላ ፒርዳና ማላ፥ ታና ዎሲዴ፥ ኣባ ታው ኦዴዲኖ።

¹⁶ ታኒ፥ ‹ሞቴቴዳ ኡራይ ባሬና ሞቲያዋንቱና ኢቲፔ ኤቄናኒኔ ባሬና ሞቴዳ ዬዉዋሲ ዛሩዋ ኢሜናን፥ ኦና ጊዶፔኔ ኣꬂዴ ኢሚያዌ ሮሜ ኣሳሲ ዎጋ ጊዴና› ያጋዴ ኡንቱንቶ ዛራዲ።

¹⁷ «ሄዋ ዲራው፥ ኡንቱንቱ ሃዋን ሺቄዳ ዎዴ፥ ታኒ ጋሚዔናን ዎንቲሳ ጋላሲ፥ ፒርዳ ጎሌ ጌላዴ ጳዉሎሳ ኣሃና ማላ ኣዛዛዲ።

¹⁸ ኣ ሞቲያዋንቱ ኤቂዴ፥ ኢታባን ኣ ሞቴናን ኣጊኪኖ ጋዴ ታኒ ቆፔዳዋዳን፥ ኣይኔ ኣ ሞቲቤይኪኖ።

¹⁹ ሺን ኡንቱንቱ ባሬንቱ ኣማኔዳባንቱባኔ ጳዉሎሲ፥ ‹ፓፃ ዴዔ› ጊያ ሃይቄዳ ኢቲ ዬሱሳ ጌቴቲያ ቢታኒያባ ኣናና ፓሉሜቴዲኖ።

²⁰ ታኒ ሃ ዬዉዋ ዎታዴ ቢዳ ዴማኒታንቶ፥ ቆፋ ቃቼናን ዴዓዴ፥ ጳዉሎሲ ዬሩሳላሜ ቢዴ፥ ሃ ዬዉዋ ያኒ ኦሼታናው ኮዪንቶኔ ጋዴ ኣ ኦቻዲ፤

²¹ ሺን ጳዉሎሲ ባሬ ዬዉዋ ኣዉጊስፆሴ ቄሳሬ ኦጊያ ኦይꬃና ጋካናው ናጌታናዳን ኦቺና፥ ታኒ ኣ ቄሳራኮ ዬዳና ጋካናሲ፥ ኢ ቃሼታና ማላ ኣዛዛዲ» ያጌዳ።

²² ሄዋፔ ጉዬ ኣግሪጳይ ፒስፆሳ፥ «ታኒ ታ ሁጴዉካ ቃሲ ሄ ቢታኒ ጊያዋ ሲሳና ኮያይ» ያጌዳ። ፒስፆሲ ኣ፥ «ኔኒ ዎንቲ ኢ ጊያዋ ሲሳናሳ» ያጌዳ።

²³ ዎንቲሳ ጋላሲ፥ ኣግሪጳይኔ ባሪኒቄ ዳሮ ቦንቹዋን ኦላ ካፓቱዋናኔ ካታማን ዴዒያ ዎልቃማ ኣሳና ዪዴ፥ ፒርዳ ጎሌ ጌሌዲኖ፤ ፒስፆሲ ጳዉሎሳ ኣሃና ማላ ኣዛዚና ኣሄዲኖ።

¹³ Amareedda gallassaappe guyyiyan, Kaatiyaa Agriiphphaynne Bariniiqe Pisxxoosa sarotanaw Qiisaariyaa beeddino.

¹⁴ Yaani unttunttu cora gallassaa utti de7ishshin, Pisxxoosi kaatiyaassi Phawuloosabaa hawaadan yaagiide odeedda; “Hawaan Filikise qachchiide bashi beedda itti bitani de7ee.

¹⁵ Taani Yeerusalaamen de7ishshin, qeesatuwaa kaappatuunne Ayihuda cimatuu A bolla pirddana mala, taana woossiidde, aabaa taw odeeddino.

¹⁶ Taani, ‘Mootetteedda uray barena mootiyaawanttunna ittippe eqqennaaninne barena mooteedda yewuwaassi zaaruwaa immennaan, oona gidooppenne aathiide immiyaawe Roome asaassi woga gidenna’ yaagaade unttunttoo zaaraaddi.

¹⁷ “Hewaa diraw, unttunttu hawaan shiiqeedda wode, taani gami77ennaan wonttissa gallassi, pirdda golle gelaade Phawuloosa ahana mala azazaaddi.

¹⁸ A mootiyaawanttu eqqiide, iitabaan A mootennaan aggikkino gaade taani qoppeeddawaadan, aynne A mootibeykkino.

¹⁹ Shin unttunttu barenttu ammaneeddabanttubaanne Phawuloosi, ‘Paxa de7ee’ giyaa hayqqeedda itti Yesuusa geetettiyaa bitaniyaabaa aananna palumetteeddino.

²⁰ Taani ha yewuwaa wootaade bidda demmanitantto, qofaa qachchennaan de7aadde, Phawuloosi Yeerusalaame biide, ha yewuwaa yaani ooshettanaw koyyinttonne gaade A oochchaaddi;

²¹ shin Phawuloosi bare yewuwaa Awugisxxoose Qeesaare ogiyaa oythana gakkanaw naagettanaadan oochchina, taani A Qeesaarakko yeddana gakkanaassi, I qashettana mala azazaaddi” yaageedda.

²² Hewaappe guyye Agriiphphay Pisxxoosa, “Taani ta huuphewukka qassi he bitani giyaawaa sisana koyyay” yaageedda. Pisxxoosi A, “Neeni wontti I giyaawaa sisanaassa” yaageedda.

²³ Wonttissa gallassi, Agriiphphaynne Bariniiqe daro bonchchuwan olaa kaappatuwaannanne katamaan de7iyaa wolqqaama asaanna yiide, pirdda golle geleeddino; Pisxxoosi Phawuloosa ahana mala azazina aheeddino.