ዬሱሲ ኪቴዳዋንቱ ኦሱዋ 22:3-14 in Dawro

³ «ታኒ ኪልቂያን ዴዒያ ፄርሴሴን ዬሌታዴ፥ ሃ ካታማን ጋማሊያሊ ታና ታማሪሲና ዲጫዴ፥ ኑ ኣዋቱዋ ሂጊያካ ሚኒሳ ታማራዴ፥ ሃቼ ሂንቴ ኡባይ ሃኒያዋዳንካ፥ ታኒ ፆሳ ዬዉዋሲ ሴሌቲያ ኣዪሁዳ ኣሳ።

⁴ ታኒ ማጫ ኣሳኔ ኣቱማ ኣሳ ኦይቃ ኦይቃዴ ቃሾ ጎሌን ዬጌዳ ኣሳኔ፥ ሃ ኦጊያ ካሊያ ኣሳ ዎꬊሳና ጋካናሲ ሜቶꬄዳ ኣሳ።

⁵ ሃዋዳንካ፥ ቃሲ፥ ቄሳቱዋ ኡባቱዋ ካፑኔ ጪማ ኡባ ሺቁ ታዋ ማርካታናው ዳንዳዬ፤ ታኒ ዳማስቆን ዴዒያ ኡንቱንቱ ኢሻቱዋ ኣዪሁዳቱዋሲ፥ ኡንቱንቱፔ ዳቢዳቢያ ኣካዴ፥ ሄዋን ዴዒያ ኣሳቱ ቃሼቲዴ ሙሬታናዳን፥ ዬሩሳላሜ ኡንቱንታ ኣሃናው ያ ባዲ።

⁶ «ታኒ ባዴ ዳማስቆ ማቴዳ ዎዴ፥ ሴታ ጋላሳ ጊዲሺን፥ ቆፔናን ሳሉዋፔ ዎልቃማ ፖዑ ታ ማታን ዩዪ ኣꬊዴ ፖዔዳ።

⁷ ታኒ ሳዓን ኩንዳ ኡታዴ፥ ‹ሳዖላ፥ ሳዖላ፥ ታና ኣያው ዬዴርሳይ?› ጊያ ቃላ ሲሳዲ።

⁸ «ታኒ ዛራዴ፥ ‹ታ ጎዳው፥ ኔኒ ኦኔ?› ያጋዲ። «ሄዋፔ ጉዬ፥ ‹ታኒ ኔኒ ዬዴርሲያ ናዚሬቲያ ዬሱሳ› ያጌዳ።

⁹ ታናና ኢቲፔ ዴዒያዋንቱ ፖዑዋ ቤዒዴ ያዬዲኖ፤ ሺን ታው ሃሳዪያዋ ቃላ ሲሲቤይኪኖ።

¹⁰ « ‹ታ ጎዳው፥ ታኒ ኣያ ኡዶ?› ያጋዲ። «ጎዳይ ታና፥ ‹ዴንዳዴ ዳማስቆ ባ። ኔኒ ኦꬃናው ፆሳይ ቆፔዳ ኡባባይ ኔው ያኒ ኦዴታናዋ› ያጌዳ።

¹¹ ሄ ዎልቃማ ፖዑዋ ዲራው፥ ታ ኣይፊ ቆቂና፥ ታናና ዴዒያ ኣሳቱ ታ ኩሺያ ኦይቂዴ፥ ታና ጎቺና፥ ዳማስቆ ጋካዲ።

¹² «ዳማስቆን ዴዒያ ኣዪሁዳ ኡባይ ሎይꬂ ቦንቺያ ኢቲ ሃናኒያ ጊያ ቢታኒ፥ ኑ ሂጊያሲ ኣዛዜቲዴ፥ ፆሳው ኢሜቴዳ ኣሳ።

¹³ ሃናኒ ታኮ ዪዴ፥ ታ ማታን ኤቂዴ ታና፥ ‹ታ ኢሻው ሳዖላ፥ ፄላ› ያጌዳ። ታኒ ሄ ዎዴ ሄ ማንዒያንካ ኣኮ ፄላ ኣጋዲ።

¹⁴ «ኢ ታና ሃዋዳን ያጌዳ፤ ‹ኑ ኣዋቱዋ ፆሳይ ኔኒ ኣ ቆፋ ኤራናው፥ ኣ ፂሎ ናዓ ቤዓናዉኔ ኣ ዶናፔካ ሃሳያ ሲሳናው ኔና ካሴና ዶሬዳ።

³ “Taani Kilqqiyaan de7iyaa Xersseesen yelettaade, ha katamaan Gamaaliyaali taana tamaarissina diccaade, nu aawatuwa higgiyaakka minissa tamaaraade, hachche hintte ubbay haniyaawaadankka, taani Xoossaa yewuwaassi seelettiyaa Ayihuda asa.

⁴ Taani macca asaanne attuma asaa oyqqa oyqqaade qasho gollen yeggeedda asaanne, ha ogiyaa kaalliyaa asaa wodhissana gakkanaassi metootheedda asa.

⁵ Hawaadankka, qassi, qeesatuwaa ubbatuwaa kaappuunne cimaa ubbaa shiiquu tawaa markkattanaw danddayee; taani Damasqqon de7iyaa unttunttu ishatuwaa Ayihudatuwaassi, unttunttuppe dabidaabbiyaa akkaade, hewaan de7iyaa asatuu qashettiide murettanaadan, Yeerusalaame unttuntta ahanaw yaa baaddi.

⁶ “Taani baade Damasqqo mateedda wode, seeta gallassaa gidishshin, qoppennaan saluwaappe wolqqaama poo7uu ta matan yuuyyi aadhdhiide poo7eedda.

⁷ Taani sa7aan kundda uttaade, ‘Saa7oolaa, Saa7oolaa, taana ayaw yederssay?’ giyaa qaalaa sisaaddi.

⁸ “Taani zaaraade, ‘Ta Godaw, neeni oonee?’ yaagaaddi. “Hewaappe guyye, ‘Taani neeni yederssiyaa Naazireetiyaa Yesuusa’ yaageedda.

⁹ Taananna ittippe de7iyaawanttu poo7uwaa be7iide yayyeeddino; shin taw haasayiyaawaa qaalaa sisibeykkino.

¹⁰ “ ‘Ta Godaw, taani ayaa udoo?’ yaagaaddi. “Goday taana, ‘Denddaade Damasqqo ba. Neeni oothanaw Xoossay qoppeedda ubbabay new yaani odettanawaa’ yaageedda.

¹¹ He wolqqaama poo7uwaa diraw, ta ayfii qooqina, taananna de7iyaa asatuu ta kushiyaa oyqqiide, taana goochchina, Damasqqo gakkaaddi.

¹² “Damasqqon de7iyaa Ayihuda ubbay loythi bonchchiya itti Hanaaniyaa giyaa bitani, nu higgiyaassi azazettiide, Xoossaw imetteedda asa.

¹³ Hanaanii taakko yiide, ta matan eqqiide taana, ‘Ta ishaw Saa7oolaa, xeella’ yaageedda. Taani he wode he man77iyankka aakko xeellaa aggaaddi.

¹⁴ “I taana hawaadan yaageedda; ‘Nu aawatuwa Xoossay neeni A qofaa eranaw, A xillo Na7aa be7anawunne A doonaappekka haasayaa sisanaw neena kasenna dooreedda.