ዬሱሲ ኪቴዳዋንቱ ኦሱዋ 21:2-33 in Dawro

² ፒንቄ ፒኒያ ማርካቢያ ዴሚዴ፥ ኣኒ ጌሊዴ ባናው ዴንዴዶ።

³ ኑኒ ቆጲሮሳፔ ቤዓናው ዳንዳዪያሳ ዪዴ፥ ኣዋይ ኬሲያሳ ፄሊያ ዎዴ ቆጲሮሳ ሃዲርሳ ባጋ ዬጊዴ፥ ሶሪያ ቤዶ፤ ሄዋፔ ጉዪያን ፂሮሳ ጋኬዶ፤ ኣዪሲ ጎፔ፥ ማርካቢ ባሬ ጫና ፂሮሳን ዎꬄ።

⁴ ያኒ ካሊያዋንታ ዴሚዴ፥ ኡንቱንቱና ላፑ ጋላሳ ኡቴዶ፤ ጳዉሎሲ ዬሩሳላሜ ቤና ማላ፥ ኡንቱንቱ ኣው ኣያናን ኦዴዲኖ።

⁵ ኑኒ ኡንቱንቱና ኡቲያ ዎዲ ዉሪና፥ ኬሲዴ ቤዶ፤ ኡንቱንቱ ኡባቱ ባሬንቱ ማጫዋንቱናኔ ባሬንቱ ናናና ኢቲፔ ካታማፔ ካሬው ኬሳና ጋካናሲ፥ ኑና ሞዪዜዲኖ፤ ኑኒ ኣባ ዶናን ጉልባቲዴ፥ ፆሳ ዎሴዶ።

⁶ ሄዋፔ ጉዪያን፥ ኢቱ ኢቱዋ ሳሮቲዴ፥ ማርካቢያን ጌሌዶ፤ ኡንቱንቱ ባሬንቱ ሶይ ሲሜዲኖ።

⁷ ኑኒ ኣባ ኦጊያ ዉርሲዴ፥ ፂሮሳፔ ጴፄሌማይሴ ጋኬዶ፤ ኢሻቱዋ ሳሮቲዴ፥ ኡንቱንቱ ማታን ኢቲ ጋላሳ ፔሼዶ።

⁸ ዎንቲሳ ጋላሲ ኬሲዴ፥ ቂሳሪያ ቤዶ፤ ዎንጋላ ሚሺራቹዋ ኦዲያ ፒሊጶሳ ሶይ ጋኪዴ፥ ኣ ማታን ኡቴዶ፤ ዬሩሳላሜን ዶሬቴዳ ላፑናቱዋፔ ኢ ኢቱዋ።

⁹ ፒሊጶሳሲ ናባቱዋ ጊዴዳ ኦይዱ ዎዶሮ ማጫ ናናቱ ዴዒኖ።

¹⁰ ኑኒ ኡንዴኔዳ ጋላሳ ኡቴዳ ዎዴ፥ ናቢያ ኣጋቦሳ ጊያ ቢታኒ ዪሁዳፔ ቂሳሪያ ዬዳ።

¹¹ ኑኮ ዪዴ፥ ጳዉሎሳ ሳቂያ ኣኪዴ ባሬ ኩሺያኔ ባሬ ጌዲያ ቃቺዴ፥ «ጌሻ ኣያናይ ጊያዌ ሃዋ፤ ሃ ሳቂያ ጎዳ ዬሩሳላሜን ኣዪሁዳቱ ሃዋዳን ቃቺዴ፥ ኣዪሁዳ ጊዴና ኣሳቱዋሲ ኣꬂዴ ኢማና» ያጌዳ።

¹² ኑኒ ሄዋ ሲሴዳ ዎዴ፥ ኑኒኔ ያኒ ዴዒያ ኣሳቱ ጳዉሎሲ ዬሩሳላሜ ቤና ማላ ዎሴዶ።

¹³ ሺን ጳዉሎሲ ዛሪዴ፥ «ሂንቴንቱ ዬኪዴኔ ታ ዎዛና ቃሬቲሲዴ ዋኒቴ? ታኒ ጎዳ ዬሱሳ ሱንꬃ ዲራው ቃሼታናዋ ፃላላ ጊዴናን፥ ሃራይ ኣቶ ዬሩሳላሜን ሃይቃናዉካ ጊጋ ኡታዲ» ያጌዳ።

¹⁴ ዞሪያ ኢ ኣኬናን ኢፂና፥ «ጎዳይ ጌዳዌ ሃኖ» ያጊዴ ጮዑ ጌዶ።

¹⁵ ያኒ ኣማሬዳ ዎዲያ ጋሚዔዳዋፔ ጉዪያን፥ ጊጌቲዴ ዬሩሳላሜ ባናው ኬሴዳ።

¹⁶ ቂሳሪያን ዴዒያ ካሊያዋንቱፔ ኣማሬዳዋንቱ ቃሲ ኑናና ቤዲኖ፤ ኡንቱንቱ ኑኒ ኣቃናሳ ሚናሶና ጊያ ቆጲሮሳ ቢታኒያ ሶይ ኑና ኣፌዲኖ፤ ሚናሶኒ ዳሮ ዎዲያፔ ዶሚዴ ካሊያዋ።

¹⁷ ኑኒ ዬሩሳላሜ ጋኬዳ ዎዴ፥ ኢሻቱ ኑና ናሼቻን ሞኬዲኖ።

¹⁸ ዎንቲሳ ጋላሲ፥ ጳዉሎሲኔ ኑኒ ያዪቆባና ጋኬታናው ቤዶ። ዎሳ ጎሌ ጪማቱ ኡባቱካ ዴዒኖ።

¹⁹ ጳዉሎሲ ኡንቱንታ ሳሮቴዳዋፔ ጉዪያን፥ ኣዪሁዳ ጊዴና ኣሳ ጊዶን ባሬ ባጋና ፆሳይ ኦꬄዳዋ ኡንቱንቶ ዉርሲዴ ኦዴዳ።

²⁰ ኡንቱንቱ ሄዋ ሲሴዳ ዎዴ ፆሳ ጋላቲዴ፥ ጳዉሎሳ ሃዋዳን ያጌዲኖ፤ «ኑ ኢሻው፥ ኣዪሁዳቱዋ ጊዶን ፆሳ ኣማኔዳዋንቱፔ ኣፑን ሻዓይ ዴዒኖንቶ ቤዓሳ፤ ኡንቱንቱ ኡባይ ሂጊያ ሚኒሲ ናጊኖ።

²¹ ዬሩሳላሜ ኣዪሁዳቱ፥ ኣዪሁዳ ጊዴናዋንቱ ጋዲያን ዴዒያ ኣዪሁዳ ኡባቱ ባሬንቱ ናና ቃፃሬና ማላ፥ ዎይ ኣዪሁዳቱ ኦꬂያዋ ካሌና ማላ፥ ሙሴ ሂጊያካ ባዪዛና ማላ ኔኒ ታማርሲያዋ ሲሴዲኖ።

²² ያቲና፥ ኣዬ ሎዑ? ኔኒ ዬዳዋ ጮራቱ ሲሲያ ዲራው፥ ሺቄናን ኣጊኪኖ።

²³ «ሄዋ ዲራው፥ ሃዋ ኑኒ ኔው ኦዲያዋ ኦꬃ፤ ኢቲፔ ሺቁ ዴዒያ ኦይዱ ኣሳቱ ኑ ማታን ዴዒኖ።

²⁴ ኡንቱንታ ኣካዴ ኡንቱንቱና ጌያ፤ ቃሲ ኡንቱንቱ ባሬንቱ ሁጲያ ሜዴታና ማላ፥ ኡንቱንቶ ሚሻ ኢማ፤ ኡንቱንቱ ኡባይ ኔዋ ሲሴዳዌ ቱማ ጊዴናዋኔ ኔኒ ኔ ሁጴዉካ ቃሲ ሙሴ ሂጊያ ናጋዴ ማራን ዴዒያዋ ኤራና።

²⁵ «ሺን ኣማኔዳ ኣዪሁዳ ጊዴና ኣሳቱዋ ጊዶፔ፥ ኡንቱንቱ ኤቃው ያርሼዳዋ ሜና ማላኔ ሱꬃ ኡሼና ማላ፥ ባኩቴዳ ሜሂያ ኣሹዋ ሜና ማላኔ ዎሹሜና ማላ፥ ኑኒ ዬዉዋ ቃቺዴ፥ ኡንቱንቶ ዳቢዳቢያ ፃፌዶ» ያጌዲኖ።

²⁶ ሄዋፔ ጉዪያን፥ ጳዉሎሲ ዎንቲሳ ጋላሲ ኣሳቱዋ ኣኪዴ፥ ኡንቱንቱና ጌዬዳ፤ ኢ ባሬንታ ጌሹሳ ኣዉዴ ፖሊንቶ ኤሪሳናዉኔ ቃሲ ያርሹዋ ሁጲያን ሁጲያን ኣዉዴ ኢማኔንቶ ኤሪሳናው ጌሻ ጎሊያ ጌሌዳ።

²⁷ ላፑ ጋላሳይ ዉራና ሃኖዴ፥ ኢሲያፔ ዬዳ ኣዪሁዳቱ ጌሻ ጎሊያን ጳዉሎሳ ቤዒዴ፥ ኣሳ ኡባ ሃንቄꬂዴ፥ «ኢስራዔሊያ ኣሳው፥ ኑና ማዲቴ፤ ኢስራዔሊያ ኣሳ፥ ሙሴ ሂጊያኔ ሃ ጌሻ ጎሊያ ኢፂዴ፥ ኡባሳን ኣሳ ኡባ ታማሪሲያዌ ሃ ቢታኒያ፤ ጉጂዴ ቃሲ ጊሪኬ ኣሳካ ጌሻ ጎሊያ ጌሊሲዴ፥ ሃ ጌሻ ሳዓ ቱኒሴዳ» ያጊ ዋሲዴ፥ ጳዉሎሳ ኦይቄዲኖ።

²⁹ ኡንቱንቱ ካሴ ኤፌሶኔን ዴዒያ ፂሮፊሞሳ ጳዉሎሳና ካታማን ቤዔዳ ዲራው፥ ጌሻ ጎሊያ ጳዉሎሲ ኣ ጌሊሴዳዋ ኡንቱንቶ ማላቴዳ።

³⁰ ካታማ ኡባይ ሻቢሬቴዳ፤ ኣሳይ ኡባይ ሺቂዴ ጳዉሎሳ ኦይቂዴ፥ ጌሻ ጎሊያፔ ካሬው ጎቺ ኬሴዳ፤ ሄ ማንዒያንካ ጌሻ ጎሊያ ፔንጌቱ ቃሼቲ ኣጌዲኖ።

³¹ ኣሳይ ጳዉሎሳ ዎꬋና ሃኒሺን፥ «ዬሩሳላሜ ካታማይ ሙሌካ ሻቢሬቲዲጌዳ» ጊያ ሃሳያይ ሮሜ ጋዲያ ኦላ ካፑዋሲ ጋኬዳ።

³² ሄ ኦላ ካፑ ዎታዳራቱዋኔ ፄታቱዋ ካፓቱዋ ኢቲፔ ኣኪዴ፥ ዎፂዴ ኣሳ ቦላ ኬሲ ዎꬌዳ፤ ኣሳይ ኦላ ካፑዋኔ ዎታዳራቱዋ ቤዔዳ ዎዴ፥ ጳዉሎሳ ሾጪያዋ ባሺ ኣጌዳ።

³³ ሄ ዎዴ፥ ሄ ኦላ ካፑ ሺቂ፥ ጳዉሎሳ ኦይቂዴ፥ ላዑ ሳንꬃላታን ቃሼታና ማላ ኣዛዚዴ፥ ኢ ኦኔንቶኔ ቃሲ ኣያ ኦꬄዴንቶኔ ኣሳ ኦቼዳ።

² Pinqqe pinniyaa markkabiyaa demmiide, aani geliide baanaw denddeeddo.

³ Nuuni Qophiroosappe be7anaw danddayiyaasaa yiide, away kesiyaasaa xeelliyaa wode Qophiroosa haddirssa bagga yeggiide, Sooriyaa beeddo; hewaappe guyyiyaan Xiiroosa gakkeeddo; ayissi gooppe, markkabii bare caanaa Xiiroosan wothee.

⁴ Yaani kaalliyaawantta demmiide, unttunttunna laappu gallassaa utteeddo; Phawuloosi Yeerusalaame beenna mala, unttunttu aw Ayyaanaan odeeddino.

⁵ Nuuni unttunttunna uttiyaa wodii wurina, kesiide beeddo; unttunttu ubbatuu barenttu maccawanttunnanne barenttu naanaanna ittippe katamaappe karew kessana gakkanaassi, nuuna moyizzeeddino; nuuni abbaa doonaan gulbbatiide, Xoossaa woosseeddo.

⁶ Hewaappe guyyiyan, ittu ittuwaa sarotiide, markkabiyaan geleeddo; unttunttu barenttu soy simmeeddino.

⁷ Nuuni abbaa ogiyaa wurssiide, Xiiroosappe Phexelemayse gakkeeddo; ishatuwaa sarotiidde, unttunttu matan itti gallassaa peesheeddo.

⁸ Wonttissa gallassi kesiide, Qiisaariyaa beeddo; wonggalaa mishiraachchuwaa odiyaa Piliphphoosa soy gakkiide, A matan utteeddo; Yeerusalaamen dooretteedda laappunatuwappe I ittuwaa.

⁹ Piliphphoosassi nabatuwaa gideedda oyddu wodoro macca naanatuu de7iino.

¹⁰ Nuuni unddenneedda gallassaa utteedda wode, nabiyaa Agaaboosa giyaa bitani Yihudaappe Qiisaariyaa yeedda.

¹¹ Nuukko yiide, Phawuloosa saqqiyaa akkiide bare kushiyaanne bare gediyaa qachchiide, “Geeshsha Ayyaanay giyaawe hawaa; ha saqqiyaa godaa Yeerusalaamen Ayihudatuu hawaadan qachchiide, Ayihuda gidenna asatuwaassi aathiide immana” yaageedda.

¹² Nuuni hewaa siseedda wode, nuuninne yaani de7iyaa asatuu Phawuloosi Yeerusalaame beenna mala woosseeddo.

¹³ Shin Phawuloosi zaariide, “Hinttenttu yeekkiiddenne ta wozanaa qaretissiidde waaniitee? Taani Godaa Yesuusa sunthaa diraw qashettanawaa xalalaa gidennaan, haray atto Yeerusalaamen hayqqanawukka giiga uttaaddi” yaageedda.

¹⁴ Zoriyaa I akkennaan ixxina, “Goday geeddawe hano” yaagiide co77u geeddo.

¹⁵ Yaani amareedda wodiyaa gami77eeddawaappe guyyiyan, giigettiide Yeerusalaame baanaw keseedda.

¹⁶ Qiisaariyaan de7iyaa kaalliyaawanttuppe amareeddawanttu qassi nuunanna beeddino; unttunttu nuuni aqanasaa Minaasoona giyaa Qophiroosa bitaniyaa soy nuuna afeeddino; Minaasooni daro wodiyaappe doommiide kaalliyaawaa.

¹⁷ Nuuni Yeerusalaame gakkeedda wode, ishatuu nuuna nashechchaan mokkeeddino.

¹⁸ Wonttissa gallassi, Phawuloosinne nuuni Yayiqoobanna gakettanaw beeddo. Woosa golle cimatuu ubbatuukka de7iino.

¹⁹ Phawuloosi unttuntta saroteeddawaappe guyyiyan, Ayihuda gidenna asaa giddon bare bagganna Xoossay ootheeddawaa unttunttoo wurssiide odeedda.

²⁰ Unttunttu hewaa siseedda wode Xoossaa galatiide, Phawuloosa hawaadan yaageeddino; “Nu ishaw, Ayihudatuwaa giddon Xoossaa ammaneeddawanttuppe aappun sha77ay de7iinontto be7aasa; unttunttu ubbay higgiyaa minissi naagiino.

²¹ Yeerusalaame Ayihudatuu, Ayihuda gidennawanttu gadiyan de7iyaa Ayihuda ubbatuu barenttu naanaa qaxxarenna mala, woy Ayihudatuu oothiyaawaa kaallenna mala, Muse higgiyaakka bayizzana mala neeni tamaarssiyaawaa siseeddino.

²² Yaatina, ayee lo77uu? Neeni yeeddawaa coratuu sisiyaa diraw, shiiqennaan aggikkino.

²³ “Hewaa diraw, hawaa nuuni new odiyaawaa ootha; ittippe shiiquu de7iyaa oyddu asatuu nu matan de7iino.

²⁴ Unttuntta akkaade unttunttunna geeyya; qassi unttunttu barenttu huuphiyaa meedettana mala, unttunttoo miishshaa imma; unttunttu ubbay newaa siiseeddawe tuma gidennawaanne neeni ne huuphewukka qassi Muse higgiyaa naagaadde maaran de7iyaawaa erana.

²⁵ “Shin ammaneedda Ayihuda gidenna asatuwaa gidooppe, unttunttu eeqaw yarsheeddawaa meenna malanne suuthaa ushenna mala, bakuteedda mehiyaa ashuwaa meenna malanne woshummenna mala, nuuni yewuwaa qachchiide, unttunttoo dabidaabbiyaa xaafeeddo” yaageeddino.

²⁶ Hewaappe guyyiyan, Phawuloosi wonttissa gallassi asatuwaa akkiide, unttunttunna geeyyeedda; I barentta geeshshussaa awude polintto erissanawunne qassi yarshshuwaa huuphiyan huuphiyan awude immanentto erissanaw Geeshsha Golliyaa geleedda.

²⁷ Laappu gallassay wurana hanoode, Iisiyappe yeedda Ayihudatuu Geeshsha Golliyaan Phawuloosa be7iide, asaa ubbaa hanqqethiide, “Israa7eeliyaa asaw, nuuna maaddite; Israa7eeliyaa asaa, Muse higgiyaanne ha Geeshsha Golliyaa ixxiide, ubbasan asaa ubbaa tamaarissiyaawe ha bitaniyaa; gujjiide qassi Giriike asaakka Geeshsha Golliyaa gelissiide, ha geeshsha sa7aa tunisseedda” yaagi waassiidde, Phawuloosa oyqqeeddino.

²⁹ Unttunttu kase Efesoonen de7iyaa Xirofimoosa Phawuloosanna katamaan be7eedda diraw, Geeshsha Golliyaa Phawuloosi A gelisseeddawaa unttunttoo malateedda.

³⁰ Katamaa ubbay shabbiretteedda; asay ubbay shiiqiide Phawuloosa oyqqiide, Geeshsha Golliyaappe karew goochchi kesseedda; he man77iyankka Geeshsha Golliyaa penggetuu qashettii aggeeddino.

³¹ Asay Phawuloosa wodhana hanishshin, “Yeerusalaame katamay mulekka shabbirettidiggeedda” giyaa haasayay Roome gadiyaa olaa kaappuwaassi gakkeedda.

³² He olaa kaappuu wottaaddaratuwaanne xeetatuwaa kaappatuwaa ittippe akkiide, woxxiidde asaa bolla kesi wodhdheedda; asay olaa kaappuwaanne wottaaddaratuwaa be7eedda wode, Phawuloosa shociyaawaa bashi aggeedda.

³³ He wode, he olaa kaappuu shiiqi, Phawuloosa oyqqiide, laa77u santhalataan qashettana mala azaziide, I oonenttonne qassi ayaa ootheeddenttonne asaa oochcheedda.