ዬሱሲ ኪቴዳዋንቱ ኦሱዋ 19:11-37 in Dawro

¹¹ ፆሳይ ጳዉሎሳ ባጋና ዱማ ማላታ ኦꬄዳ።

¹² ሄዋ ዲራው፥ ኣሳይ ኣ ቦላይ ቦቼዳ ማራቢያ ዎይ ማዩዋ ሃርጋንቻቱዋሲ ኣፌ፤ ሃርጋንቻቱካ ፓፂኖ፤ ኢታ ኣያናቱካ ኡንቱንቱፔ ኬሲኖ።

¹³ ኢታ ኣያናቱዋ ኬሲዴ ዩዪያ ኣዪሁዳቱዋፔ ኢቱ ኢቱ፥ «ጳዉሎሲ ቃላ ኦዲያ ዬሱሳ ሱንꬃን ኑኒ ሂንቴንታ ኬሲቴ ጊዴ ኣዛዜቶ» ያጊዴ፥ ኢታ ኣያናቱ ዴዒያ ኣሳቱዋ ቦላን ጎዳ ዬሱሳ ሱንꬃ ፄሲ ቤዔዲኖ።

¹⁴ ቄሳቱዋ ካፑዋ ኣስቄዋ ጊያ ኢቲ ኣዪሁዳ ቢታኒያሲ ሄዋ ኦꬄዳ ላፑ ናናይ ዴዒኖ።

¹⁵ ኢታ ኣያናይ ኡንቱንቶ ዛሪዴ፥ «ታኒ ዬሱሳ ኤራይ፤ ጳዉሎሳካ ኤራይ። ሺን ሂንቴንቱ ኦኔ?» ያጌዳ።

¹⁶ ኢታ ኣያናይ ዴዒያ ቢታኒ ኡንቱንቱ ቦላ ጉፒ ዎꬊና፥ ኡንቱንቱ ማሱንፂዴ፥ ሄ ጎሊያፔ ካሎ ዎፃና ጋካናሲ፥ ዎልቃሚዴ ፆኔዳ።

¹⁷ ኤፌሶኔን ዴዒያ ኣዪሁዳቱኔ ኣዪሁዳ ጊዴናዋንቱ ኡባይ ሄዋ ሲሲዴ ኡባይ ዳሮ ያዬዲኖ፤ ጎዳ ዬሱሳ ሱንꬃይካ ዳሮ ቦንቼቴዳ።

¹⁸ ኣማኒያዋንቱፔ ጮራ ኣሳቱ ባሬንቱ ኦꬄዳዋ ፓፂዲኔ ቆንጪያን ኦዲዴ ዪኖ።

¹⁹ ቢቲያዋንቱፔ ጮራቱ ባሬንቱ ማፃፋቱዋ ሺሺዴ፥ ኣሳ ኡባ ሲንꬃን ጉዴዲኖ፤ ሄ ማፃፋቱዋ ጋቲያ ሄቲያ ዎዴ፥ ኢሻታሙ ሻዓ ቢራ ሳንቲሚያ ጊዴዳ።

²⁰ ሄዋ ማላ ዎልቃማ ኦጊያን ፆሳ ቃላይ ዲጬኔ ኣኬ።

²¹ ሄዌ ፖሌቴዳዋፔ ጉዪያን ጳዉሎሲ፥ «ታኒ ዬሩሳላሜ ባዴ ሮሜካ ቃሲ ቤዓናው ቤሴ» ያጊዴ፥ ማቂዶኒያናኔ ኣካዪያና ኣꬊዴ፥ ዬሩሳላሜ ባናው ቆፋ ቃቼዳ።

²² ቃሲ ባሬና ማዲያዋንቱፔ ላዓቱዋ ፂሞቶሳኔ ኤራስፆሳ ማቂዶኒያ ኪቲዴ፥ ባሬው ኢሲያን ኣማሬዳ ዎዲያ ጋሚዔዳ።

²³ ጎዳ ኦጊያ ዲራው፥ ሄ ዎዴ ዳሮ ዋላሳይ ኬሴዳ።

²⁴ ኣዪሲ ጎፔ፥ ፃጋራ ቢራ ሙሺሲዴ ቲጊ ሜꬊያ ዲሜፂሮሳ ጊያ ኢቲ ቢታኒ ኣርፄሚሲ ጌሻ ጎሊያ ሚሲሊያ ቢራፔ ቲጊ ቲጊዴ፥ ኦሳንቻቱዋሲ ዳሮ ዎꬊያ ዴሜ።

²⁵ ሄዋንታኔ ኡንቱንቱዋ ማላ ኦሱዋ ኦꬂያዋንታ ኢቲፔ ሺሺዴ፥ ሃዋዳን ያጌዳ፤ «ኣሳው፥ ኑ ዱሬቴꬃይ ሃ ኦሱዋና ጊዲያዋ ሂንቴ ኤሪታ።

²⁶ ሄዌ ጳዉሎሲ፥ ‹ኣሳ ኩሺ ሜꬌዳዋንቱ ፆሳቱዋ ጊዲኪኖ› ያጊዴ፥ ኤፌሶኔ ፃላላን ጊዴናን ኣማሬዳ ጋዳቱዋፔ ኣቲን፥ ኢሲያን ኡባን ጮራ ኣሳሲ ኦዲ ኣማንꬄዳዋ ሂንቴንቱ ቤዔዲታኔ ሲሴዲታ።

²⁷ ሎዔናባይ፥ ኑ ኦሱ ካꬌታናዋ ፃላላ ጊዴና፤ ሺን ኢሲያን ዴዒያ ኡባቱኔ ሳዓ ኡባን ዴዒያዋንቱ ጎዪኒያ ዎልቃማ ፆሳቶ ጌቴቲያ ኣርፄሚሲ ጌሻ ጎሊ ቦንቼቴናን ኣታናዋኔ፥ ኢዚ ዳሮቴꬃይ ኩንዳናዋ» ያጌዳ።

²⁸ ኣሳይ ሄዋ ሲሴዳ ዎዴ ሎይꬂ ሃንቄቲዴ «ኤፌሶኔ ኣርፄሚሳ ዎልቃማ» ያጊዴ ጫቦቴዲኖ።

²⁹ ካታማ ኡባን ዋላሳይ ዴንዴዳ፤ ጳዉሎሳና ሃሜቲያ ማቂዶኒያ ኣሳቱዋ ጋዮሳኔ ኣሪስፂሮኮሳ ባሬንቱና ኦይቂ ኣኪዴ፥ ኢቲፔ ካሳ ሳዓ ዎፄዲኖ።

³⁰ ጳዉሎሲካ ኣሳይ ሺቄዳሳ ጌላናው ኮዬዳ። ሺን ካሊያዋንቱ ኣ ዲጌዲኖ።

³¹ ኢሲያ ጋዲያ ካፓቱዋፔ ጳዉሎሳ ላጌꬃቱዋፔ ኢቱ ኢቱ ጳዉሎሳው ኪቲዴ፥ ካሳ ሳዓን ቆንጪያ ኬሲዴ ኢ ቤቴና ማላ፥ ኣ ዎሴዲኖ።

³² ሺቁዋን ዋላሳይ ዴንዲና፥ ዳሪያ ባጋ ኣሳይ ሃራይ ኣቶ ኣዪሲ ሺቄዴንቶ ኤሬና ዲራው፥ ኢቱ ኢቲባው ዋላቄቲያ ዎዴ፥ ዮኩ ቃይ ሃራባው ዋላቄቴ።

³³ ኣዪሁዳቱ ኢስኪንዲራ ኣꬂ ቤሲና፥ ኢቲ ኢቲ ኣሳይ ኢ ሃሳያና ማላ፥ ኣሳ ጊዶፔ ሲንꬃው ኣ ኣꬄዳ፤ ኣሳይ ጮዑ ጋና ማላ፥ ኢ ባሬ ኩሺያን ፆርሲ ቤሲዴ፥ ኣሳሲ ሞቴታናው ኮዬዳ።

³⁴ ሺን ኢስኪንዲሬ ኣዪሁዳ ኣሳ ጊዴዳዋ ኣሳይ ኤሬዳ ዎዴ፥ ላዑ ሳቴ ጊዲያዋ ኬና ኡባይ ኢቲ ቃላን፥ «ኤፌሶኔ ኣርፄሚሳ ዎልቃማ» ያጊዴ ጫቦቴዲኖ።

³⁵ ካታማው ፃፌ ጊዴዳዌ ኣሳ ጮዑ ኦꬂዴ፥ ሃዋዳን ያጌዳ፤ «ኤፌሶኔ ኣሳው፥ ኤፌሶኔ ካታማይ ዎልቃማ ኣርፄሚሲሲኔ ሳሉዋፔ ዎꬌዳ ኤቃ ሹቻሲ ኤቃ ጎሊያ ናጊያዋ ጊዴዳዋ ኤሬና ኣሳይ ኦኔ?

³⁶ ሃዋ ካዲያ ኣሳይ ባይና ዲራው፥ ሂንቴንቱ ዎፑ ጋናዉኔ ዲርቤናን ኣጋናው ቤሴ።

³⁷ ኣዪሲ ጎፔ፥ ሃዋንቱ ጌሻ ጎሊያ ሚሻ ዉዒቤናዋንታ ኑ ፆሳቱዋካ ቦሪቤናዋንታ ኣሄዲታ።

¹¹ Xoossay Phawuloosa bagganna dumma malaataa ootheedda.

¹² Hewaa diraw, asay A bollay bochcheedda maarabiyaa woy mayuwaa hargganchchatuwassi afee; hargganchchatuukka paxiino; iita ayyaanatuukka unttunttuppe kesiino.

¹³ Iita ayyaanatuwaa kessiidde yuuyyiyaa Ayihudatuwaappe ittu ittuu, “Phawuloosi qaalaa odiyaa Yesuusa sunthan nuuni hinttentta kesite giide azazeetto” yaagiide, iita ayyanatuu de7iyaa asatuwaa bollan Godaa Yesuusa sunthaa xeesi be7eeddino.

¹⁴ Qeesatuwaa kaappuwaa Asqqeewa giyaa itti Ayihuda bitaniyaassi hewaa ootheedda laappu naanay de7iino.

¹⁵ Iita ayyaanay unttunttoo zaariide, “Taani Yesuusa eray; Phawuloosakka eray. Shin hinttenttu oonee?” yaageedda.

¹⁶ Iita ayyaanay de7iyaa bitani unttunttu bolla guppi wodhdhina, unttunttu masunxxiide, he golliyaappe kallo woxxana gakkanaassi, wolqqaamiide xooneedda.

¹⁷ Efesoonen de7iyaa Ayihudatuunne Ayihuda gidennawanttu ubbay hewaa sisiide ubbay daro yayyeeddino; Godaa Yesuusa sunthaykka daro bonchchetteedda.

¹⁸ Ammaniyaawanttuppe cora asatuu barenttu ootheeddawaa paaxiiddinne qoncciyaan odiidde yiino.

¹⁹ Bitiyaawanttuppe coratuu barenttu maxaafatuwaa shiishshiide, asaa ubbaa sinthan guuddeeddino; he maxaafatuwaa gatiyaa heettiyaa wode, ishatamu sha77a Biraa santtimiyaa gideedda.

²⁰ Hewaa mala wolqqaama ogiyaan Xoossaa qaalay dicceenne aakkee.

²¹ Hewe poletteeddawaappe guyyiyan Phawuloosi, “Taani Yeerusalaame baade Roomekka qassi be7anaw bessee” yaagiide, Maqidooniyaannanne Akaayiyaanna aadhdhiide, Yeerusalaame baanaw qofaa qachcheedda.

²² Qassi barena maaddiyaawanttuppe laa77atuwaa Ximootoosanne Erasxxoosa Maqidooniyaa kiittiide, barew Iisiyan amareedda wodiyaa gami77eedda.

²³ Godaa ogiyaa diraw, he wode daro walassay keseedda.

²⁴ Ayissi gooppe, xagaraa biraa muushissiide tigi medhdhiyaa Dimexiroosa giyaa itti bitani Arxxemiisi Geeshsha Golliyaa misiliyaa biraappe tigi tigiide, oosanchchatuwaassi daro wodhiyaa demmee.

²⁵ Hewanttanne unttunttuwaa mala oosuwaa oothiyaawantta ittippe shiishshiide, hawaadan yaageedda; “Asaw, nu duretethay ha oosuwaanna gidiyaawaa hintte eriita.

²⁶ Hewe Phawuloosi, ‘Asaa kushii medhdheeddawanttu xoossatuwaa gidikkino’ yaagiide, Efesoone xalalaan gidennaan amareedda gadatuwaappe attin, Iisiyan ubbaan cora asaassi odi ammantheeddawaa hinttenttu be7eedditanne siseeddita.

²⁷ Lo77ennabay, nu oosuu kadhettanawaa xalalaa gidenna; shin Iisiyan de7iyaa ubbatuunne sa7aa ubbaan de7iyaawanttu goyinniyaa wolqqaama xoossatto geetettiyaa Arxxemiisi geeshsha golli bonchchettennan attanawaanne, izi darotethay kunddanawaa” yaageedda.

²⁸ Asay hewaa siseedda wode loythi hanqqettiide “Efesoone Arxxemiisa wolqqaama” yaagiide cabbotteeddino.

²⁹ Katamaa ubbaan walassay denddeedda; Phawuloosanna hamettiyaa Maqidooniyaa asatuwaa Gaayoosanne Arisxxirokoosa barenttunna oyqqi akkiide, ittippe kaassaa sa7aa woxxeeddino.

³⁰ Phawuloosikka asay shiiqeeddasaa gelanaw koyyeedda. Shin kaalliyaawanttu A diggeeddino.

³¹ Iisiyaa gadiyaa kaappatuwaappe Phawuloosa laggethatuwaappe ittu ittuu Phawuloosaw kiittiide, kaassaa sa7aan qoncciyaa kesiide I beettenna mala, A woosseeddino.

³² Shiiquwaan walassay denddina, dariya bagga asay haray atto ayissi shiiqeeddentto erenna diraw, ittu ittibaw walaqettiyaa wode, yokkuu qay harabaw walaqettee.

³³ Ayihudatuu Iskkinddira aathi bessina, itti itti asay I haasayana mala, asaa giddoppe sinthaw A aatheedda; asay co77u gaana mala, I bare kushiyan xorssi bessiide, asaassi mootettanaw koyyeedda.

³⁴ Shin Iskkinddire Ayihuda asaa gideeddawaa asay ereedda wode, laa77u saate gidiyaawaa keenaa ubbay itti qaalaan, “Efesoone Arxxemiisa wolqqaama” yaagiide cabbotteeddino.

³⁵ Katamaw xaafe gideeddawe asaa co77u oothiide, hawaadan yaageedda; “Efesoone asaw, Efesoone katamay wolqqaama Arxxemiisissinne saluwaappe wodhdheedda eeqaa shuchchaassi eeqaa golliyaa naagiyaawaa gideeddawaa erenna asay oonee?

³⁶ Hawaa kaddiyaa asay baynna diraw, hinttenttu woppu gaanawunne dirbbennan agganaw bessee.

³⁷ Ayissi gooppe, hawanttu Geeshsha Golliyaa miishshaa wuu77ibeennawantta nu xoossatuwaakka boribeennawantta aheeddita.