ዬሱሲ ኪቴዳዋንቱ ኦሱዋ 16:19-38 in Dawro

¹⁹ ሺን ኢዚ ጎዳቱ ባሬንቱ ሚሻ ዴማና ኦጊ ꬋዬዳዋ ቤዒዴ፥ ጳዉሎሳኔ ሲላሳ ኦይቂዴ፥ ጌያ ሳዓን ዴዒያ ዳናቱዋ ሲንꬃ ጎቺ ኬሴዲኖ።

²⁰ ዳናቱዋ ሲንꬃ ኡንቱንታ ኣፊዴ፥ «ሃዋንቱ ኣዪሁዳ ኣሳ ጊዲዴ፥ ኑ ካታማ ኣሳ ሎይꬂ ሜቶꬂኖ።

²¹ ኑኒ ሮሜ ጋዲያ ኣሳ ጊዲዴ፥ ኣካናዉኔ ኦꬃናው ዎጋ ጊዴናባ ታማሪሲኖ» ያጌዲኖ።

²² ኣሳይ ኢቲ ባጋ ጊዲዴ፥ ጳዉሎሳ ቦላኒኔ ሲላሳ ቦላ ዴንዴዳ፤ ዳናቱካ ኡንቱንቱ ማዩዋ ቃሪ ኣኪዴ፥ ፃምዓን ኡንቱንታ ሾጫና ማላ ኣዛዜዲኖ።

²³ ኡንቱንቱ ዳሪሲ ዋꬌዳዋፔ ጉዪያን፥ ቃሾ ጎሊያን ዬጌዲኖ። ቃሾ ጎሊያ ናጊያዌካ ኡንቱንታ ሚኒሲ ናጋናዳን ኣዛዜዲኖ።

²⁴ ቃሾ ጎሊያ ናጊያዌ ሄ ኣዛዙዋ ኣኪዴ፥ ጳዉሎሳኔ ሲላሳ ቃሾ ጎሊያ ቆልዖ ጌሊሴዳ፤ ኡንቱንቱ ጌዲያካ ሚꬃና ጋꬂ ዳራፂዴ ቃቼዳ።

²⁵ ሺን ቃማ ቢላሄ ጊዲያ ሄራን ጳዉሎሲኔ ሲላሴ ፆሳ ዎሲዴ፥ ማዚሙሪያ ዬፂዴ ፆሳ ጋላቲኖ፤ ቃሼቶ ኣሳይ ኡንቱንቱ ጊያዋ ሲሴ።

²⁶ ቃሾ ጎሊያ ፃጱ ቃፃና ጋካናው ዎዛና ኣꬄናን ቢታይ ዳሪሲ ቃፄዳ፤ ሄ ማንዒያንካ ፔንጊካ ኡባይ ዶዬቲ ኣጊና፥ ቃሼቴዳ ኣሳ ኡባ ሳንꬃላታይ ቢሌቲ ዎꬌዳ።

²⁷ ቃሾ ጎሊያ ናጊያዌ ጌሚዒሹዋፔ ቤጎቲያ ዎዴ፥ ቃሾ ጎሊያ ፔንጊካ ኡባይ ዶዬቴዳዋ ቤዒዴ፥ ቃሼቶ ኣሳይ ኬሲ ኣኪዴ ቢዲጌዳዋ ኣው ማላቲና፥ ባሬና ዎꬋናው ቆፒዴ፥ ጩቢያ ኣኬዳ።

²⁸ ሺን ጳዉሎሲ ኮሻ ꬎቁ ኦꬂዴ፥ «ኔኒ ኔና ኣያኔ ኡዶፓ፤ ኣዪሲ ጎፔ፥ ኑኒ ኡባይ ሃዋን ዴዔቶ» ያጌዳ።

²⁹ ቃሾ ጎሊያ ናጊያዌ ፆምፒያ ዎሲ ኣኪዴ፥ ኤሌካ ቆልዖ ዎፄዳ፤ ኮኮሪዴ ጳዉሎሳ ሲንꬃኒኔ ሲላሴ ሲንꬃን ጉፋኔዳ፤

³⁰ ኡንቱንታ ካሬ ኬሲዴ፥ «ታ ጎዳቶ፥ ታኒ ኣታናው ኣያ ኦꬃና ቤሲ?» ያጌዳ።

³¹ ጳዉሎሲኔ ሲላሴ ኣ፥ «ጎዳ ዬሱሲ ኪሪስቶሳ ኣማና፤ ኔኒ ኣታና፤ ኔ ሶይ ኣሳይካ» ያጌዲኖ።

³² ኡንቱንቱ ኣዉኔ ኣ ሶዪን ዴዒያ ኡባው ጎዳ ቃላ ኦዴዲኖ።

³³ ቃማ ሄ ሳቲያንካ ቃሾ ጎሊያ ናጊያዌ ኡንቱንታ ኣፊዴ ኡንቱንቱ ማይꬃ ሜጬዳ፤ ሄ ማንዒያንካ ባሬ ሶይ ኣሳ ኡባና ፃማቄቲ ኣጌዳ።

³⁴ ጳዉሎሳኔ ሲላሳ ፑዴ ባሬ ሶይ ኣፊዴ፥ ኡንቱንቶ ቁማ ኣꬄዳ፤ ኢ ባሬ ሶይ ኣሳ ኡባና ፆሳ ኣማኔዳ ዲራው፥ ናሼቴዳ።

³⁵ ዎንቲና ዳናቱ፥ «ሄ ኣሳቱዋ ቢላ» ያጊዴ፥ ፖሊሲያ ካፓቱዋ ኣኮ ኪቴዲኖ።

³⁶ ሄዋፔ ጉዬ ቃሾ ጎሊያ ናጊያዌ፥ «ሂንቴንቱ ቢሌታና ማላ፥ ዳናቱ ታው ኪቴዲኖ፤ ሲሚ ሃዒ ኬሲዴ ሳሮቴꬃን ቢቴ» ያጊዴ ሄ ኪታ ጳዉሎሳው ኦዴዳ።

³⁷ ሺን ጳዉሎሲ ሄ ፖሊሲያ ካፓቱዋ፥ «ኑኒ ሮሜ ጋዴ ኣሳ ጊዲሺን፥ ኡንቱንቱ ኑና ፒርዳይ ባይናን ኣሳ ሲንꬃን ዋꬊዴ፥ ቃሾ ጎሊያን ዬጌዲኖ። ሃዒ ኑና ጌማን ኬሲ ዬዲኖ? ሃኔና፤ ኡንቱንቱ ባሬንቱ ሁጴው ዪዴ፥ ኑና ኬሲኖ» ያጌዳ።

³⁸ ፖሊሲያ ካፓቱ ዳናቱዋሲ ሄዋ ኦዲና፥ ጳዉሎሲኔ ሲላሴ ሮሜ ጋዴ ኣሳ ጊዴዳዋ ሲሴዳ ዎዴ፥ ያዬዲኖ።

¹⁹ Shin izi godatuu barenttu miishshaa demmana ogii dhayeeddawaa be7iide, Phawuloosanne Sillaasa oyqqiide, geyaa sa7aan de7iyaa daannatuwaa sintha goochchi kesseeddino.

²⁰ Daannatuwaa sintha unttuntta afiide, “Hawanttu Ayihuda asaa gidiide, nu katamaa asaa loythi metoothiino.

²¹ Nuuni Roome gadiyaa asaa gidiide, akkanawunne oothanaw woga gidennabaa tamaarissiino” yaageeddino.

²² Asay itti bagga gidiide, Phawuloosa bollaninne Sillaasa bolla denddeedda; daannatuukka unttunttu mayuwaa qaari akkiide, xam77aan unttuntta shocana mala azazeeddino.

²³ Unttunttu darissi wadhdheeddawaappe guyyiyan, qasho golliyaan yeggeeddino. Qasho golliyaa naagiyaawekka unttuntta minissi naaganaadan azazeeddino.

²⁴ Qasho golliyaa naagiyaawe he azazuwaa akkiide, Phawuloosanne Sillaasa qasho golliyaa qol77o gelisseedda; unttunttu gediyaakka mithaanna gathi daraxiide qachcheedda.

²⁵ Shin qamma bilahe gidiyaa heeran Phawuloosinne Sillaase Xoossaa woossiidde, mazimuriyaa yexxiide Xoossaa galatiino; qashetto asay unttunttu giyaawaa sisee.

²⁶ Qasho golliyaa xaphuu qaaxxana gakkanaw wozanaa aathennaan biittay darissi qaaxxeedda; he man77iyankka penggiikka ubbay dooyetti aggina, qashetteedda asaa ubbaa santhalatay biletti wodhdheedda.

²⁷ Qasho golliyaa naagiyaawe gemi77ishuwaappe beegottiyaa wode, qasho golliyaa penggiikka ubbay dooyetteeddawaa be7iide, qashetto asay kessi akkiide bidiggeeddawaa aw malatina, barena wodhanaw qoppiide, cubiyaa akkeedda.

²⁸ Shin Phawuloosi kooshshaa dhoqqu oothiide, “Neeni neena ayanne udoppa; ayissi gooppe, nuuni ubbay hawaan de7eetto” yaageedda.

²⁹ Qasho golliyaa naagiyaawe xomppiyaa woossi akkiide, ellekka qol77o woxxeedda; kokkoriidde Phawuloosa sinthaaninne Sillaase sinthan guufanneedda;

³⁰ unttuntta kare kessiide, “Ta godatoo, taani attanaw ayaa oothana bessii?” yaageedda.

³¹ Phawuloosinne Sillaase A, “Godaa Yesuusi Kiristtoosa ammana; neeni attana; ne soy asaykka” yaageeddino.

³² Unttunttu awunne A soyin de7iyaa ubbaw Godaa qaalaa odeeddino.

³³ Qamma he saatiyankka qasho golliyaa naagiyaawe unttuntta afiide unttunttu maythaa meecceedda; he man77iyankka bare soy asaa ubbaanna xammaqetti aggeedda.

³⁴ Phawuloosanne Sillaasa pude bare soy afiide, unttunttoo qumaa aatheedda; I bare soy asaa ubbaanna Xoossaa ammaneedda diraw, nashetteedda.

³⁵ Wonttina daannatuu, “He asatuwaa billa” yaagiide, polisiyaa kaappatuwaa aakko kiitteeddino.

³⁶ Hewaappe guyye qasho golliyaa naagiyaawe, “Hinttenttu bilettana mala, daannatuu taw kiitteeddino; simmi ha77i kesiide sarotethaan biite” yaagiide he kiitaa Phawuloosaw odeedda.

³⁷ Shin Phawuloosi he polisiyaa kaappatuwaa, “Nuuni Roome gade asaa gidishshin, unttunttu nuuna pirdday baynnaan asaa sinthan wadhdhiide, qasho golliyaan yeggeeddino. Ha77i nuuna geeman kessi yeddiinoo? Hanenna; unttunttu barenttu huuphew yiide, nuuna kessino” yaageedda.

³⁸ Polisiyaa kaappatuu daannatuwaassi hewaa odina, Phawuloosinne Sillaase Roome gade asa gideeddawaa siseedda wode, yayyeeddino.